6
Iesu Iu urubia komidiro saiki Abera Naramu e
1 Iesu Iu urubia komidiro saiki ato woiti pari turituri ato gou-ro, taie gabo turi ato iedi woiti iopu ro na-gorowotoi nou kowasoro urubia ro nato gidoho-rimo. Neio ro na-giakukuti-rimo iato giho-rimo.
2 Neio Parasi urubia ro na-giwia-rimo edi tanaro ro na-gisioidiro-rimo neio ro nato gutura-rimo ibo, ‘Mabu boira nio ro idaibo tanaro na-isioidiro-dumo? Mose sabi ro ibo aro pua idaibo tanaro isioidiro ri. Nimo komidiro saiki ato, idaibo tanaro kisioidiro imese sabi ia ie.’
3 Ina neio Iesu ro ibo gimowameai, ‘Nio ro keremoputi pua ra Deibidi ro edi tanaro gosioidiro nou sogoi ro na-gorobai? Deibidi edio urubia mutu goroho neio ibose sogoi ro ta-girobai,
4 taie nou nato godoro Godi edi Tarena parai moto ro neito, nou ro dokou ioudo nato gimidai-ro, edi dokou ro tarena ia ie, modobo pua dorogora se urubia ro kiho. Taie edi dokou ro nou ro ioudo na-gimidai-ro imese gouho, arua nou ro borubi aboto giaiwai neio atu se imese giho-rimo. Ina iedi tanaro ro neio na-gosioidiro-rimo Mose sabi ro ta-gowapotai-ro ibo nedi dokou ro imese tarena ia ie, modobo ie Godi ra urubia ra turituri urubia neio ro se kiho, arua urubia ro kiho sabi ie.’
5 Taie Iesu ro nato gutura Parasi urubia aboto, ‘Mo Imese Urubia Kiauri Dubu e, mo komidiro saiki Abera Naramu e.’
6 Ina ata Iu urubia komidiro saiki ato Iesu imese gidiai Iu urubia karadabu moto to, taie nou ro urubia iato imese gitamudiro. Iedi moto ro nato ata dubu iato ta-gomidiro nou tu ubauba dubu e.
7 Ina Mose sabi kitamudiro urubia Parasi urubia mutu neio ibose iato ta-gorowomidiro edi moto ro nato. Neio ro Iesu idomari to gemaipirio-rimo ibo etu moro ra nou ro ata mere ata komidiro saiki ato meana ama-owai-ri. Neio ubi ie Iesu ro ata ubauba tanaro ata osioidiro ri taie neio ro nato emowapotai rie ibo oro ro ubauba tanaro osioidiro
8 kaupoti neio edi kimaragoidiro ro nou ro ta-gimowea.
Taie nou ro nato gutura iedi tu ubauba dubu ro nou aboto, ‘Oro abora dotobowa neio sosoro gabo ato!’ Taie edi dubu ro Iesu beda owera gutura nou ro aise gosioidiro, nou na-gotobowa taie imese gou, neio sosoro gabo ato imese gotobowa.
9 Taie Iesu ro nato gutura ibo, ‘Nio Parasi urubia daro Mose sabi kitamudiro urubia nio mo ro a-niratodai, nimo komidiro saiki ato sabi ra meamea tanaro kisioidiro o ubauba tanaro ra? Urubia mere keremiro meana emowai ri ra o ubauba emowai ri ra?’
10 Taie Iesu ro nedi urubia ro neio se giauri na-gorowotoi taie iedi tu ubauba dubu ro nou aboto nato gutura ibo, ‘Oro tu neito dotuturai-ro!’ Taie iedi dubu ro aise geribua, tu Iesu aboto iato gotuturai-ro, iedi kotuturai ro na-gotuturai-ro iedi tu ubauba ro modobo aise goi ata pokiri iopu tato ie.
11 Taie iedi Parasi urubia ro Mose sabi kitamudiro mutu neio auna ia serawo ro girobai. Neio nakara se iato geremowauti-rimo, ‘Nedi dubu ro nimo ro beda mino to anamadimo-oworohuti-ri?’
Iesu nou 12 kitiodorai urubia giaubai
12 Iedi tau ro nato Iesu imese gidiai podo ohu to Godi mutu eremowauti ri. Nou iato duwo tuturu ta-gomidirowado Godi mutu geremowauti-rido.
13 Taie saiki na-gowaroho nou kowasoro urubia sirio atu moro ato nato gidabuai. Taie iedi tau ro nato nou ro 12 dubu nato aise giaubai, edio 12 dubu ro neio giapoi kitiodorai urubia to, nou neio masiro ie,
14 Saimoni ata masiro Pita Iesu ro gomia, nou neama Enduru, Iemisi, Ioane, Piripi, Batoromiu,
15 Mataio, Tomasi, ata Iemisi nou Arapisi mere ie, ata Saimoni, Roma urubia masawe nou ro iaurititi,
16 Iudasi (ata Iemisi nou mere ie), ina Iudasi nou Kerioti sabowa dubu e, Iesu ido nasa rubi aboto nou ro gapoi.
Iesu ro urubia na-gitamudiro temeteme urubia meana iato giwaititi
17 Iesu nou kowasoro urubia mutu podo rido ioudo na-giodori-ro, durio goto to na-gereredea-rimo iato aise gororodiobo-rimo Iesu sosoro gabo ato. Ibose urubia imese ta-garadabuti-rimo kaupoti moro to. Nedi urubia ro arua Iudia duriomoro rido gou-rimo, arua Ierusarema sabowa rido gou-rimo. Ibose netewa teibo auna sabowa teibo auna oromo bara ato na-giamo-ma Taia ra Sidoni ra duriomoro ato ibose ioudo ta-gou-rimo.
18 Neio imese sirio ia se a-gou-rimo Iesu owera gare emedea ri. Neio ibose ata mabu ato gou-rimo neio edi temeteme ro durupi ato na-iworohutiti-mo, Iesu ro meana iwaititi rie. Etio ra ubauba urio ro na-giworohuti-rimo neio Iesu meana aise giwaititi.
19 Urubia sirio auna ubi ro giamo Iesu neio ro owaseidiro ri, mabu imese pupuwo korosa nou aboudo gosuruo-ro, neio meana neito giwaititi.
20 Iesu idomari na-giwesegerai kowasoro urubia bato giwotobowa iato gutura neio aboto, ‘Nio etio ra namabu tato na-orowomidiro nio ro Godi aboudo meana amadimi-iwia-ri mabu Godi edi kiwaboi tanaro ro nio do ie.
21 Nio etio ra sogoi ro na-iwati nio ro Godi aboudo meana amadimi-iwia-ri mabu ido nio abato ohona modobomodobo ato ama-iamo-ri.
Nio etio ra abora idobi na-iroto-dumo nio ro Godi aboudo meana amadimi-iwia-ri mabu saiki ata nio gaga kamade mutu amadimi-irorouti-ri.
22 Urubia ro nio ubauba na-iwaititi-dumo daro nio aboto ubauba tanaro na-isioidiro-dumo, nio ro Godi aboudo meana amadimi-iwia-ri. Urubia ro nio sapuwo to ubauba owera na-waro-dumo mabu nio ro mo nowasoro-dumo, nio ro Godi aboudo meana amadimi-iwia-ri.
23 Iedi tau ro nato nio modobo ie auna kamade mutu kererepedu mabu nio Godi aboudo meamea wisa amadimi-iwia-ri Adiri sabowa to namadimo-orowateai-ri. Idaibo ubauba tanaro neio nasaio ro ta-gisioidiro-rimo Godi ipusu owera urubia aboto. Ina idaibo atu sosoro ubauba tanaro neio ro tisioidiro-dumo nio aboto.
24 Nio etio ra namabu sirio mutu na-orowomidiro auna ia ubauba tanaro nio aboto ama-ereredea-ri, mabu nio meana kebase ta-gomidai-rimo, ina nio ro ido ata meana ata omidai-ri pua.
25 Nio etio ra ohona modobomodobo ato na-iamo, auna ia ubauba ro ama-ereredea-ri nio aboto mabu nio edi tau ro nato sogoi ro ama-iwati-ri.
Nio etio ra gaga na-irorouti-dumo, nio abato ubauba ama-ereredea-ri, saiki ata nio idobi amadimi-iroto-ri.
26 Nio sapuwo to sirio urubia ro meamea owera karo ato, nio aboto auna ubauba ama-ereredea-ri. Mabu neio edi nasaio ro idaibo sosoro meamea owera ta-garo-rimo Godi ipusu owera karatigi urubia aboto.’
Oro masawe etio ro iauri-dumo neio aboto meamea tanaro disioidiro
27 Iesu ro urubia ina ibo gimowauti, ‘Nio etio ro irowidiro-dumo nedi owera ro mo ro nama-imowauti-ri, nasa dubu aise gi-adabuti-ri. Nio etio ro ihoio-dumo, modobo ie nio ro meamea tanaro kisioidiro neio aboto.
28 Nio owera to ubauba etio ro iwaititi-dumo, Godi ba-dararatoro-mo neio nou ro meana ba-miwai. Nio ubauba se etio ro iworohuti-dumo, neio sapuwo to Godi ba-dararatoro-mo.
29 Ibose oro ata dubu ro tawe dao ato na-iatoia, ina derewesegerai ata sapuwo rido iatoia ri. Oro sedo ata dubu ro na-owomidai emowairiai mamo, modobo ato momidai. Ina siginisi ohu rido demotomai.
30 Etu ro orowaro-die ata nakomu ri oro aboto, ematimai mamo aise gi-iomia-ri. Ibose oro edi namabu ro ata dubu ata ro ubi na-emedea emagege mamo emowameai ri.
31 Oro ubi beda sosoro owamo arua urubia ro oro koworohuti aboto, oro ro idaibo sosoro ba-diworohuti.
32-33 Oro etio ro owarebai-dumo ina neio se nirimagare na-imati, ina neio se na-iwarebai, oro ibo a-imaragoidiro ra Godi ro mea wisa oro aboto amadi-aiwai-ri? Idaibo sosoro tanaro ubauba tanaro urubia ro kisioidiro ie, neio etio ro iwarebai-dumo, wisa neio ro kiwarebai ie.
34 Oro mani urubia aboto na-iaiwo, ina oro ro na-imaragoidiro ibo, “O mo neio ro atu sosoro ibose to namadidime-emowame-ri,” oro ibo a-imaragoidiro ra Godi ro mea wisa oro aboto amadi-aiwai-ri? E e, idaibo sosoro tanaro ubauba urubia ro tisioidiro-dumo, neio mani tiaiwo-dumo amia ubauba urubia aboto, mabu neio ubi ie iedi mani ro ina kimowame aboto.
35 Kaupoti etio ra masawe na-iamo-die oro aboto, wisana oro ro neio nirimagare kimati modobo ie, meamea tanaro se ba-disioidiro neio aboto. Oro edi namabu ro neio ro kiworohuti modobo ie, ina kiwame aboto imaragoidiro mamo. Edi kiwarebai tanaro ro oro ro nama-isioidiro-ri, oro Godi aboudo mea wisa nato ama-iauri-ri. Ibose nedi tanaro ro oro neio ro amadimo-owapotai-ri ibo oro Godi ohu ia ato na-omidiro-die, oro nou ro morobise ia mere to ta-gapoi. Mabu Godi nou auna ia nirimagare ie auna ia ubauba urubia aboto, neio meamea kiwarebai tanaro Godi aboudo kimade kawa kimade ie.
36 Ina modobo ie oro ro arua urubia natonato kimati, mabu ohu ato na-womidiro-die oro Abera idaibo sosoro natonato tiwawutiti-die urubia aboto.’
Oro nakara se derereauri
37 Iesu ro urubia ina ibo gimowauti, ‘Modobo pua arua urubia oro ro kidoromuti. Oro ro neio nama-idoromuti-ri ina Godi ro atu sosoro tanaro ibose to ama-osioidiro-ri oro aboto. Ibose arua urubia ubauba urubia to iasoro mamo. Ina oro ibose Godi ro ubauba to apoi-ri pua. Ibose arua urubia ro beda ubauba tanaro isioidiro-dumo oro aboto, neio edi ubauba ro oro ro woki kimati modobo ie, ina oro edi ubauba ro Godi ro nato ama-ematopeamuti-ri.
38 Oro edi namabu ro arua urubia neito ba-diwarebai, oro ro wisa Godi aboudo ama-iauri-ri. Oro ro namabu masawe tato nama-iaiwo-ri arua urubia kiwarebai sapuwo to, oro Godi ro wisa aise ama-emodiawado-ri sapuwo ama-iretuti-ri. Oro ro beda sosoro iaiwo arua urubia kiwarebai aboto ina iedi gabo ro noudo Godi ro oro aboto ibo amadi-iaiwo-ri.’
39 Iesu ro neio ina iato gimowauti, ‘Modobo ra pogo dubu ro boinana pogo dubu kowaguwo? Modobo pua! Neitiro gabo kiauri tato goto bobo to atu se kiretei-ma ie.
40 Ibose sikuru mere nou simara kitamudiro dubu mutu atu modobo pua. Kaupoti nedi sikuru mere ro sirio tanaro kitamudiro dubu aboudo umoro nama-oititi-ri, taie nou simara kitamudiro dubu nou edi mako ro nato ama-orobai-ri.’
41 Iesu ro ina iato gutura, ‘Mabu boira oro kimibiria namutuna momoso nou idomari ato na-emeauri, kaupoti oro simara idomari ato ota agagi na-wotoi a-remowea ra?
42 Oro ibo utura nou aboto, “Momoso anamadi-eweihai-ri.” Ina oro nakara se ota agagi a-remowea ra?
Nio kimibiria urubia to aratigi-dumo! Oro modobo ie kebase simara idomari rido ota agagi kereweihai. Ido nakara se mea se nato ama-ororowea-ri, ina namutuna idomari rido momoso nato amadi-eweihai-ri.’
Totomu ota iopu sapuwo to
43 Iesu ro ina ibo, ‘Mea ota rido ubauba ota iopu isuwoduti-ri pua, ibose ubauba ota rido meamea ota iopu isuwoduti-ri pua.
44 Ota iopu ro, oro umoro kowai ie ibo beda ota rido araubo-die. Urubia ro woimu ota iopu imade-ri pua ununu ota rido. Ibose buni iopu urubia ro imade-ri pua badari ota rido.
45 Ina idaibo atu sosoro ie, mea dubu meamea tanaro nou niro turi ato na-iamo ioudo neio ro kosuwoduti ie. Kaupoti ubauba dubu ubauba tanaro nou niro turi ato na-iamo ioudo neio ro kosuwoduti ie. Urubia ro niro turi to beda tanaro kibiti ra, io matagoro rudo neio ro kosuwoduti ie.’
Totomu moto keremari dubu teibo sapuwo to
46 Iesu ro ina iato gutura, ‘Mo ro edi owera ro niarotiti nio ro kisioidiro pua. Ina mabu boira nio ro mo Abera Naramu to na-nasoro-dumo?
47 Etu ro oroho-die mo aboto mo owera na-irowidiro, ina durupi to na-isioidiro
48 nou idaibo ie, urubia dubu beda sosoro ra moto na-gididi damera goto ato. Nou posi mea se gimobuti, iato gimowodu koko kiwaititi sapuwo to. Ina iato abata na-gioro-ro surama ro iato egea se gado owaburuti pua, iedi moto ro koko se gotoi. Mabu edi moto ro nakomu abera ro kididi to ta-gosioidorai.
49 Ina etu ro irowidiro mo owera, kaupoti nou ro durupi to isioidiro tato io nou idaibo ie. Ata dubu moto pusuru goto ato gididi, nou ro posi bobo mea se imobuti pua. Abata obo pupuwo to gohau-ro ina edi moto ro koko se otoi pua, aise gowaburuti, posi tima moro ato giamo, oga tima moro ato giamo, edi moto ro imese ubauba ta-gowai.’