7
Iesu ro Roma boso eputa dubu nou edi sowake dubu ro meana gowai
1 Iesu ro urubia sirio owera kimowauti na-goporeai nou iato imese gohau Kapeniama sabowa to.
2 Iedi sabowa ro nato, ata Roma boso eputa dubu nu edi suwake dubu ro, auna temeteme ro gorobai-rimo aupise gowamo karaburai. Iedi Roma boso eputa dubu ro nou ro nu mea woko dubu to asorotiti.
3 Roma boso eputa dubu ro na-girorowai Iesu kou owera, Iu sabowa kiauri urubia iato gitiodorai Iesu ou ri nu sowake dubu meana kowai aboto.
4-5 Iedi sabowa kiauri urubia ro neido na-gou-rimo neio ro Iesu aise gemagege-rimo ou ri edi dubu ro meana kowai sapuwo to. Neio ro ibo, ‘Iesu, Roma boso eputa dubu oro ubi emedea-die nu oro ro owarebai rie. Iu urubia nimo nou ro nimatiti-die nirimagare, nou mea dubu e, nimo karadabu moto nou ro nimidi. Modobo ie oro aboudo nou ro mea wisa kowea.’
6 Iesu ro na-girorowai edi owera ro iedi sabowa kiauri urubia ro nou neio aboto aise garadabuai atu se imese gou-rimo. Edi Roma boso eputa dubu ro moto Iesu ro aupiaupi na-gemowaititi, taie edi auna dubu ro nou ro urubia ina iato gitiodorai Iesu aboto neio ro ipi gabo ato emowapotai ri, ibo, ‘Nimo auna dubu ibo utura-die Abera Naramu, modobo pua oro kou mo moto to. Mo meana dubu pua, oro neito ou ate mo aboto.
7 Mo ia nou ri nomidiro-die ou tato oro aboto. Owera kawakawa se ba-dutura-ro mo suwake dubu sapuwo to nou meana nato ama-oi-ri.
8 Mo umoro ie oro ro modobo ie idaibo tanaro kosioidiro, mabu boso eputa urubia mo aboto ata owera kutura ato mo ro neio ubi tanaro aise kisioidiro ie, ina ibose mo boso urubia mutu e, ina mo ro kutura ato neio aboto, neio ro edi tanaro ro aise kosioidiro ie. Mo ro ibo kutura ato ata dubu aboto, “Dou!” nou mo aboto aise kou e. Mo ata aboto ibo kutura ato, “Dou-ro!” nou aise kou e. Ina mo ro kutura ato mo suwake dubu aboto, “Nedi tanaro ro dosioidiro!” nou ro aise kosioidiro ie.’
9 Iesu ro nedi owera ro na-girorowai nu auna kimaragoidiro ro gopia iato nu edi urubia sirio ro gobodoro-rimo neio aboto aise gerewesegerai. Nou ro ibo ‘Nio mo ro nedi owera ro nou ri nimowapotai nedi Roma dubu ro auna ia kimibiria dubu e. Isiraere urubia abato, mo ro ata dubu ata nou sosoro owea pua morobise kimibiria mutu.’
10 Iedi urubia gimeriai boso eputa dubu ro, neio neido na-gorowameai-rimo iedi temeteme dubu ro a-gomidiro meana ta-goi.
Iesu ro pamo osio mere geitorai
11 Tuturu to owamo pua Iesu imese gedei ata sabowa to masiro Naini. Nu ibo pua nakara se kedei, kowasoro urubia ta-garadabuai-rimo ibose auna dubu patu nou saro rido ta-gou-rimo.
12 Neio ito na-gorowateai-rimo Iesu kodouti magere damo rido neido girarowea pamo osio mere namuturubi ro idobi gemerete-rimo. Ata garamu orobo nou mere kaupoti edi na ro oworohutiti nou ro garaburai. Urubia sirio nedi sabowa ro neido ta-garadabuti edi garamu orobo ro nou aboto. Neio ro edi osio mere ro patapata to aise gowotodai-rimo atu se imese gowosuruwo-rimo idobi mutu,
13 Iesu isana kodouti moro rido edi garamu orobo ro nou ro ioudo gowea-ro. Iesu auna ia nirimagare goi nou aboto. Taie nou ro ibo, ‘Oro idobi na ie, deremasiai buro.’
14 Taie Iesu ioudo na-giaubai-ro pamo osio beda patapata ato gowotodai-rimo nou ro iato gowasomai ina edi urubia ro gowou-rimo neio iato aise gotobowa-rimo. Taie Iesu ro ibo edi pamo osio mere ro nou aboto, ‘Osio mere oro mo ro abora a-nemowapotai, “Deribua-ro!” ’
15 Taie edi osio mere ro aise geribua-ro owera imese garo iato Iesu ro nou aise gotiodorai simara mamu aboto.
16 Urubia iato na-gorowotoi neio ro edi tanaro ro na-giauri-rimo neio imese auna ia tere ro girobai. Neio ro Godi iato gemowabu-rimo, ina arua ro ibo garo-rimo, ‘Godi edi ipusu owera dubu ro auna ia pupuwo mutu nimo aboto ta-gorowateai-die! Godi nou simara urubia giraturiomai-die.’
17 Taie Iesu ro odio tanaro ro na-gisioidiro nou sapuwo to owera imese nato gorobodorouti Iudia duriomoro gebari ato ibose arua sabowa gomo ato na-giamo nedi owera neio ro ta-girorowai-rimo.
Ioane ro gemodowa Iesu
18 Ioane edi kowasoro urubia ro Ioane iato gemowauti-rimo ibo Iesu ro beda tanaro sirio gisioidiro.
19 Nou ro netewa teibo kowasoro dubu teibo iato gimeiriai-ma Iesu aboto ou ri kararatoro owera mutu. Nou ro ibo, ‘Nedi karatoro owera ro ba-dowou-do Iesu aboto, “Oro nou se ra Godi ro kohodowa dubu, o nimo ro ata dubu ata emotoi-ri ra?” ’
20 Taie iedi dubu teibo ro iato gou-rido Iesu aboto karatoro owera mutu. Iesu aboto na-gorowateai-rido neitiro ro ibo, ‘Neitiro Ioane obo to edi dubu ro iwarumiautiti neitiro nou ro nimeiriai-madie oro aboto oro emodowa ri. “Oro Godi ro kohodowa dubu nou se ra o ata dubu ata emotoi-ri ra nimo ro?” ’
21 Iedi tau ro nato Iesu ro urubia sirio temeteme aboudo meana ta-giwaititi, idaibo idomari pogo urubia nou ro idomari meana ta-gimowaititi. Ibose ubauba urio edio urubia abato na-gorowomidiro nou ro aise giwagarewado.
22 Taie Iesu ro ibo iedi dubu teibo neitiro aboto, ‘Mo ro beda tanaro nisioidiro ina ibose beda owera nimowauti nitiro ro simara idomari to ta-iauri-do ina simara gare to ta-irowidoro-do. Nitiro abora ba-dorowameai-do Ioane ba-demowauti-do. Idomari pogo urubia abora modobo ato tirarowo-dumo, sairo ubauba urubia, neio abora modobo ato toroho-dumo, katio gebarigebari urubia na-irohotiti-dumo abora katio pua ie. Ibose gare koropai urubia neio abora owera mea se tirowidiro-dumo, pamo urubia abora torowomidiro. Ibose mo ro mea owera dorogora se urubia ta-nimowautiti.
23 Etio ra karagare tato mo edi kowasoro gabo ro neido neio Godi ro korosa ama-imio-ri.’
24 Taie Ioane edi kowasoro dubu teibo ro Iesu neitiro ro aise gemeserai-rido, ina Iesu ro urubia iato gimowauti Ioane sapuwo to. ‘Nio goto se duriomoro to na-iredutiti-mo etu iaurititi-mo? Nio ro gurigo daimo nou a-wiaurititi-mo ra gawia ro na-iwadudumawadotiti? E e.
25 Ina nio ro iato etu iauri-mo, ata dubu meamea namabu to keremeduti nou a-iaurititi-mo ra? E e, nou pua mabu urubia etio ra meamea namabu mutu neio irowomidirotiti eputa urubia awawo moto ato.
26 Kaupoti nio ito na-iredutiti-mo goto se duriomoro to etu iaurititi-mo? Godi ipusu owera dubu ra? Io morobise ie, nio ro nou iaurititi-mo. Kaupoti nio mo ro mimowapotai-ro Ioane nou arua Godi ipusu owera urubia sosoro pua.
27 Ioane sapuwo to tagara tau ato Godi ipusu owera dubu Marakai ro owera ta-gisioidiro ibo Keba moro to mo ro anama-emeiriai-ri ata dubu, oro gabo nou ro ama-emaipo-ri.
28 Ina mo ro a-nimowapotai nedi tau ro nato, Ioane nou ata auna dubu e, ibo pua arua urubia na-irowomidirotiti nou neio sosoro pua, nou ata sosoro ie. Kaupoti Godi edi kiwaboi tanaro maumo ro nato, dorogora urubia to na-wararasoro-dumo edi urubia ro neio imese awawo masiro urubia ie, neio ro Ioane sopu to amadimi-iauri-ri.’
29 Taie takesi kimade urubia arua urubia mutu, neio ro nedi owera ro na-girorowai-rimo Iesu aboudo neio ro ubi to aise gomidai-rimo. Neio ro ibo, ‘Godi edi gabo ro morobise gabo ie.’ Neio ro ibo garo-rimo mabu keba se nedi urubia ro Ioane ro obo to ta-giwarumiauti.
30 Kaupoti Parasi urubia daro Mose sabi kitamudiro urubia keba se neio ubi tato goi-rimo Ioane ro neio obo to kiwarumiauti aboto. Neio ubi tato na-goi-rimo, Godi edi ubi gabo ro neio simara sapuwo to idaibo mino to a-gebeiouti-rimo.
31 Ina Iesu ro ibo, ‘Mo ro beda owera to nama-imowapotai-ri nio abora na-orowomidiro nio sapuwo to?
32 Nio abora beda sosoro orowomidiro nio nama-iwauti-ri. Abora nio merebusere kainakaina sosoro ie karakarau moro ato irowomidirotiti nio abora ibo orowomidiro. Merebusere ibo irororu-dumo, “Nimo ro pate ra gama ra na-niadotiti-mo nio orowamaro-ri pua, ibose nio nimo ro gido na-nimabodutititi-mo nio idobi nato iroto-ri pua.” Ina atu sosoro ie nio sapuwo to.
33 Mabu Ioane koko obo idiotiti pua, ibose ohona aise iraiautiti, ina nio nou ri iarotiti-mo ibo, “Ioane ubauba urio ro oworohutiti.”
34 Imese Urubia Kiauri Dubu mo nou se ie. Mo ohona ti-nihotiti arua urubia beda sosoro ihotiti-dumo, daro mo koko obo egea mere se ti-nidiotiti. Ina mo sapuwo to nio ibo taro-dumo, “Nedi dubu ro ma-diauri-mo, auna sogoi dubu e, auna kidio dubu e! Nou auna kidabuti ie takesi kimade urubia mutu, ibose arua ubauba urubia mutu.”
35 Kaupoti Godi edi muro ro etio ro ibodoro-dumo neio ro kiwawuti ie ibo morobise muro nou se ie.’
Ata orobo ro gemowiouti Iesu sairo teibo
36 Ata Parasi dubu ro gutura Iesu nou mutu iho ri. Taie, Iesu imese gou edi Parasi dubu ro nou moto to, iato aise gomi ohona iho ri.
37 Edi sabowa ro nato ata ubauba tanaro kisioidiro orobo iato imidirotiti, nou ro ta-girorowai ibo Iesu Parasi dubu moto ato ohona tiho-die. Iesu isana a-giho iedi moto ro nato, taie iedi orobo ro nato gou-ro nou aboto mea nibo dehoro botoni mutu.
38 Iedi orobo ro Iesu abato aise gotobowa idobi se gememai. Taie Iesu iedi sairo teibo ro nou ro idobi suwo to iato gemowiouti ina sobo to iato gewipiti, ibose Iesu sairo teibo kamade mutu giohidiro-ma. Nou ro edi nibo dehoro ro gowou-ro sairo teibo nouto aise gemadiriti.
39 Iedi moto abera ro nou ro nato giauri edi tanaro ro gororosioidiro-rimo Iesu aboto, nou iato auna kimaragoidiro ro gopia. Nou ro ibo kimaragoidiro to, ‘Iesu Godi ipusu owera dubu rasiri ie, nu umoro a-sowamo ibo nedi orobo ro owasomai ata ubauba orobo ie, nou ro emaidodorai-ri pua.’
40 Iesu ro ibo nou aboto, ‘Saimoni, mo ata owera towamo oro kemowapotai aboto.’
Taie Saimoni ro ibo, ‘Io kitamudiro dubu ma-demowapotai-ro.’
41 Iesu ro ibo, ‘Netewa teibo dubu teibo ro mani doro to auna mani dubu aboudo gimade-rido. Ata dubu ro a-gimidai K500, ina ata dubu ro a-gimidai K50.
42 Nedi dubu teibo ro modobo pua mani abera kemowameai. Kaupoti mani abera ro neitiro teibo ibo gimowapotai-ma, “Marasio mo mani nitiro ro emowameai ate.” ’
Ina Iesu ro Saimoni ibo gemodowa, ‘Auna nirimagare etu ro gowapotai mani abera aboto?’
43 Ina Saimoni ro ibo, ‘Mo ro ibo a-nimaragoidiro etu ro gomidai auna to nou ro gowapotai auna nirimagare mani abera aboto.’
Iesu ro ibo, ‘Oro ro morobise owera aro-die.’
44 Iesu ina aise gerewesegerai iedi orobo ro nou aboto, taie Saimoni aboto iato gutura, ‘Nedi orobo ro oro ro ma-dowea. Mo neito na-nou-die oro moto to, mo sairo kiwiouti obo oro ro emedea pua. Kaupoti nedi orobo ro mo sairo teibo idobi suwo to nou ro nemowiouti ina sobo to iato newepiti.
45 Mo oro ro kamade mutu ohiai pua. Kaupoti mo sairo teibo ato nedi orobo ro nou ro kamade mutu aise nohidiro.
46 Mo neito na-nou-die mo eputa dehoro to oro ro emadiriti pua, mo sairo teibo nou ro auna wisa nakomu to nemadiriti.
47 Oro mo ro a-nemowapotai nedi orobo ro beda mutu ubauba ra mo ro ta-nematopeamuti. Nedi tanaro ro nou ro na-wosioidiro paea se osioidiro-die nu auna ia nirimagare owapotai-die mo aboto. Kaupoti ubauba tanaro kainakaina etio ro isioidiro-dumo ina Godi ro nato na-imatopeamuti, nedi urubia ro neio ro mo nirimagare auna se ematiti-ri pua.’
48 Taie Iesu ro nedi orobo ro nou aboto nato gutura ‘Abora oro mo ro ubauba ta-nematopeamuti.’
49 Iedi urubia ro na-gorowomidiro kiho moro ato neio nakara se iato geremowapotaidiro-rimo ibo ‘Nou beda dubu ra, nou ro beda sosoro kimatopeamuti ra ubauba?’
50 Taie Iesu ro iato gutura edi orobo ro nou aboto ibo, ‘Oro ubauba aboudo ta-napopo-ro mabu oro kimibiria mutu e. Abora dorowameai miro maumo ato ba-dimidirotiti.’