8
Iesu beda mamio ro gowarebai-rimo
1 Arua saiki na-gororoporeai-rimo Iesu ro nato giraturio awawo sabowa, kainakaina sabowa, nu na-goroho nou ro urubia iato gimowauti Godi ro kiwaboi tanaro beda sosoro owamo. Nu 12 kowasoro urubia mutu atu se goroho-rimo,
2 ina amia mamio ibose ta-garadabuai-rimo Iesu aboto. Neio keba se temeteme ro na-iwatiti neio meana Iesu ro giwaititi, ibose beda mamio aboudo gimabodoidiro ubauba urio neio ibose ta-garadabuai-rimo. Nedi mamio ro neio ie: Maria Magadarena, nedi orobo ro Iesu ro nou aboudo gimabodorai 7 ubauba urio,
3 ina ata orobo Ioana nou Kusa orobo ie (Kusa eputa dubu Herodi, mani nou ro emeaurititi). Ina ata orobo Susana, daro amia mamio neio ibose ta-garadabuai-rimo, nedi mamio ro Iesu nou kowasoro urubia mutu mani to neio ro iwarebidiro-mo.
Erere goto sapuwo to nou totomu e
4 Ata tau Iesu aboto urubia sirio nato garadabuti-rimo. Nedi urubia sirio ro sabowa gabogabo rido goroho-rimo. Taie Iesu ro neio nedi totomu ro nato gimowauti,
5 ‘Ata pari kisioidiro dubu ro ota iopu nato giheruti goto ato. Ota iopu nou ro edi kiheruti ro na-giheruti arua ota iopu dorogora se gabo bara ato gararemuti-rimo. Gabo bara ato edi na ro gararemuti-rimo, urubia goto ato na-goroho-rimo edi ota iopu ro neio ro aise gituti-rimo, iato pawa ro giroruwo-ro, iedi ota iopu ro neio ro aise giwadaudiro-rimo.
6 Amia ota iopu nou ro na-giheruti nadi goto ato gararemuti-rimo. Iedi ota iopu ro neio na-gisuruo-rimo, iato aise gorowaburai-rimo mabu nadi goto ato obo tato ie.
7 Ina arua ota iopu neio ununu ota sere maumo to giretuti, nedi ota iopu ro ibose neio mea se ta-gisuruwo-rimo, kaupoti edi ununu ota sere ro neio mea se kosuruwo moro rido aise giwasiouti-rimo.
8 Kaupoti sipu tato edi na gararemuti-rimo mea goto ato nedi ota iopu ro neio ro gisuwoduti-rimo mea se, arua ota rido ota iopu imese sirio ia se gisuwoduti-rimo.’
Iesu ro owera neito gopai, ‘Etio ra mo owera modobo ato kirowidiro aboto, neio ro mo owera gare se ba-memedea-rimo.’
9 Taie nou kowasoro urubia ro nato gemodowa-rimo, ‘Nedi totomu ro oro ro na-worowauti nu maumo beda sosoro ra?’
10 Iesu ro neio neito gimowameai, ‘Godi ro kiwaboi tanaro keba se piro se ta-gowamo mo ro abora paeapaea ta-niwai nio aboto. Kaupoti arua urubia mo ro neio totomu se nimowautiti mo ro nedi tanaro ro nou ri nisioidiro, ina noudo ie neio ro kowea ie, kaupoti neio ro eibimai-ri pua. Ina ibose owera neio ro kirowidiro ie kaupoti maumo neio ro meana se imade-ri pua.
11 Nedi totomu ro maumo ibo ie. Ota iopu ro Godi owera iwapotaidiro-die.
12 Beda ota iopu ro gararemuti-rimo gabo bara to, idaibo urubia imabuti etio ro irowidiro-dumo Godi edi mea owera ro, ina iato Satani ro kou e neio niro turi rido nou ro aise kiwagareawado ie. Ina nedi owera ro neio ro modobo pua mea mino to kimibiria, neio ro mea mino to kimibiria rasiri ie, neio Godi ro ubauba aboudo kiwagarewado ie.
13 Ina beda ota iopu ro gararemuti-rimo nadi goto ato urubia ro neio imabuti-die. Neio ro Godi owera kirowidiro ie kamade mutu kimade ie, kaupoti neio sipi maumo to mea mino to iwodouti-ri pua. Neio tuturu tau to imibiria-ri pua. Ina neio aboto beda koko tau ro kou ra neio Godi edi mea gabo ro ioudo aise karaseperai ie.
14 Ina beda ota iopu ro gararemuti-rimo ununu ota sere abato, idaibo urubia neio imabuti-die. Neio ro Godi owera kirowidiro ie mea mino to kimade ie, kaupoti nedi urubia ro neio kimaragoidiro sirio duriomoro tanaro ato kiamo ie. Nedi tanaro sirio ro neio ro kimohuti ie kiroromai moro rido. Ina neio aboudo meamea ota iopu isuwoduti-ri pua.
15 Kaupoti beda ota iopu ro gararemuti-rimo mea goto ato, iedi goto ro idaibo urubia neio imabuti-die. Nedi urubia ro Godi owera morobise giropu to neio ro gimibiria-rimo. Neio ro Godi edi ubi tanaro ro aise kisioidiro ie ina ipi ato ororodiobo-ri pua, womu tato meamea tanaro nou ro paea se kiwawuti.’
Oro abato beda umoro ro owamo dowawuti
16 Ata totomu Iesu ro nou gorowauti ‘Oro erempa kowateai ato edi erempa ro oro ro ata nakomu to owasiai-ri pua. Nedi erempa ro oro ro kenene ato paea se kakoka ie. Etu ro kodoro ra edi woroworo ro nato nou ro namabu mea se kiauri ie.
17 Piro se na-iamo paeapaea amadimo-oi-ri. Ibose piro se na-giatumuti-rimo saiki woroworo ro ama-iwaroho-ri.
18 Mea se! Owera beda mino to kirowidiro ra modobo ie oro nakara se mea se keremowotoi, owera mea mino to kirowidiro aboto, ina umoro mea se kimade aboto. Mabu etio abato iamo umoro Godi edi mea owera ro nou sapuwo to, neio aboto ina amia umoro ohu rido Godi ro ama-imotomo-ri. Kaupoti etio ro gimidiai-rimo egea mere se umoro Godi edi mea owera ro nou sapuwo to neio ibo na-imaragoidiro-dumo “neio modobo ie, neio abato umoro tiamo”, edi urubia ro neio aboudo edi umoro kainakaina ro na-iamo Godi ro ama-iwatateai-ri.’
Iesu morobise mamu daro niramio etio ra
19 Iesu mamu daro niramio na-gou-birimo nou aboto, kaupoti nou auna ia topira maumo ato gomidiro, neibi ro kowea aboto modobo pua.
20 Amia urubia ro gemowapotai-rimo Iesu ibo, ‘Oro mamu daro niramio moto araradi ato totoi-diebimo, neibi ubi ie oro kowea.’
21 Taie neibi Iesu ro ibo gimowapotai-bi, ‘Godi edi mea owera ro etio ro irowidiro-dumo ibose durupi to na-isioidiro-dumo io neio mo ia mamio ie ibose mo ia niramio ie.’
Iesu ro surama ra bukopu ra a-giadibiai-ma
22 Ata saiki Iesu kowasoro urubia mutu pe to na-giora-rimo taie nou ro ibo, ‘Nimo ito ma-miabu-rimo obo paruo ata sapuwo to.’ Taie neio sawa na-gemobodorai-rimo imese giabu-rimo.
23 Neio edi kiabu ro na-giabu-rimo Iesu iato norou aise gutuwa. Nou norou na-gorobu tuturu to pua surama na-gihudurai-ro obo ato gororosowa-ro bukopu samo to giriribua-rimo. Edi pe ro bukopu sapuwosapuwo rido gorowiti-rimo aupise ie kimarumo.
24 Taie neio iato gorowadodoro-rimo Iesu norou maumo rido amutia ri, ‘Auna dubu oro deribua-ro nimo etou ri nimauriai-die obo to iroruwo-ri ra?’
Taie Iesu norou maumo rido ioudo na-geribidiro-ro, nou ro surama ra bukopu ra nato gimadowerai-ma, ‘Nitiro abora dorodiobo-do!’ Taie nou ro edi kutura ro na-gutura ororodiobo ri surama ra bukopu ra aise geremasiai-rido, edi obo paruo ro imese gasio ia se gemowadau ata bukopu tato ie.
25 Taie Iesu aise gerewesegerai kowasoro urubia aboto nou ro ibo, ‘Nio kirorowai boira?’
Iesu owera neio ro na-gemororowai-rimo neio tere ro aise girobai. Neio ro auna se gimaragoidiro-rimo nou ro edi tanaro gosioidiro. Taie neio ro ibo, ‘Nu beda dubu ra? Nou ro idaibo owera kutura ato egea nakomu aboto tanaro aise kororosioidiro ie. Nou ro surama ra bukopu ra aboto na-utura neitiro ro aise irorowai-do!’
Urubia dubu ubauba urio ro goworohuti-rimo
26 Iesu kowasoro urubia mutu sawa pe to imese giabu-rimo Gariri obo paruo ata sapuwo to Gerasa duriomoro bato gowamo.
27-29 Neio ito na-gorowateai-rimo Iesu pe rido keba se gerepeduai. Ata kawakawa dubu nedi sabowa ro neido ie nu dorogora moro ato imidirotiti Iesu nou ro na-gowea nou ro ioudo gemaea-ro. Iedi dubu ro ubauba urio sirio nou niro goro ato irowomidirotiti. Tuturu tau to nedi dubu ro porose se imidirotiti pamo urubia bobo abato. Nou moto ato imidirotiti pua. Sirio tau nedi dubu ro ubauba urio ro aise ememidirotiti-mo, neio ro emeserai pua. Nou urubia ro tu ra sairo ra seni to egea se kemotohiti ie, kaupoti seni nou ro aise iasioutiti ina goto se duriomoro to neio ro iato kewedei ie.
Nedi dubu ro Iesu nou ro na-gowea-ro nu ioudo giaea-ro auna ia se, goto ato aise gereteamoidiro Iesu sairo mabu ato. Nou auna se ioudo giaea-ro Iesu aboto, ‘Mo umoro ie oro! Iesu oro ro etou tanaro amadi-osioidiro-ri mo aboto? Abera Naramu ohu ato na-omidiro-die oro nou mere ie! Mo oro ro ubauba owai ate!’ Ubauba urio ro nou ri gutura mabu Iesu ro a-gimadowerai iedi dubu ro nou aboudo osuruwo rie.
30 Taie nedi dubu ro Iesu ro nato gemodowa, ‘Oro masiro etu ra?’
Ina nou ro ibo, ‘Sirio mo masiro ie.’ Mabu ubauba urio sirio ia se irowomidirotiti nou abato.
31 Taie nedi ubauba urio sirio ro Iesu aboto binio to iato gutura-rimo, ‘Nimo oro ro imeiriai ate era paruo to, ata moro to dimeiriai-ro!’
32 Podo gawagogo ato giro sirio ohona geremosora-rimo. Ubauba urio ro ibo, ‘Nimo giro niro turi to dimeiriai-ro.’
Taie Iesu ro nedi tanaro ro ororosioidiro ri gabo aise
33 gimapoi. Giro sirio beda ipi ato goroho-rimo neio niro turi to na-gorowateai-rimo iato edi dubu ro neio ro aise gemeserai-rimo. Taie edi giro sirio ro imese gorowodori-rimo damera gawagogo rido obo paruo to neio sirio se imese obo ro aise giopia.
34 Taie edi giro kimowotoi urubia ro neio ro nedi tanaro ro na-gowea-rimo neio tere ri aise gorowadau. Neio ro nedi owera ro iato gobodorouti-rimo erere duriomoro ato,
35 ibose aupi sabowa urubia ta-gou-rimo nedi tanaro ro na-gororosioidiro nou iauri ri. Neio Iesu aboto na-gou-rimo iedi dubu ro modobo ato gomidiro Iesu gomo ato. Nou obotama ta-gowori-rimo nou mutu gomidiro. Nou kimaragoidiro patu mea mino to ta-gorowameai-rimo mabu ubauba urio sirio nou aboudo ta-gosuruwo-rimo. Beda urubia ro gou-rimo iedi dubu ro iauri ri neio tere ro giwati.
36 Ina beda urubia ro giauri-rimo nedi tanaro ro na-gororosioidiro-rimo neio ro Iesu sapuwo to urubia aise gimowauti-rimo, Iesu ro beda sosoro to gowai nedi dubu ro meana.
37 Gerasa duriomoro urubia ro Iesu nou mabu ato gebeiouti-rimo ioudo aragare ri. Neio ro ibo, ‘Oro nato omidiro ate dorowameai neido simara sabowa to!’ Mabu neio tere ro giwati.
Taie Iesu pe to na-gorora kowasoro urubia mutu imese giabu-rimo Gariri obo paruo ata sapuwo to.
38 Ina edi dubu ro Iesu ro meana na-gowai nu Iesu aboto aise gararaipirio-ro. Kaupoti nou Iesu ro simara sabowa to gemeiriai. Nou ro ibo,
39 ‘Oro ba-dorowameai simara sabowa to urubia ba-dimowauti Godi ro beda tanaro osioidiro-die oro aboto.’ Taie edi dubu ro Iesu ro beda owera to gemowapotai nou ro aise gosioidiro, simara sabowa urubia nou ro iato gimowauti Iesu ro beda tanaro gosioidiro nou aboto.
Iesu ro giwai-ma meana pamo besere, ata temeteme orobo mutu
40 Iesu ta-gorowameai-ro Gariri obo paruo ata sapuwo rido urubia sirio ta-gemahaudiro-ro nou gemotoi-rimo kamade emowai rie.
41 Ata dubu masiro Iairo nato gou-ro Iesu aboto, nu ata eputa dubu e nou ro iaurititi Iu urubia karadabu moto. Iairo ro na-gowea Iesu, nu iato kauhio to aise girimusubua Iesu sairo mabu ato. Taie Iesu nou ro iato garamairiai-ro neitiro atu se ou ri nou moto to, ‘Oro aise kou modobo ra mo moto to?
42 Mo besere kaupoti ia ie, nu abora 12 kisimisi ie. Nou auna ia temeteme ro owati aupise ie karaburai.’
Taie Iesu Iairo mutu aise gou-rido nou moto to, ipi ato urubia sirio ro nou sapuwosapuwo rido gemohutauti-rimo.
43 Edi topira ro nou maumo ato, ata orobo ta-garadabuai-ro. Nedi orobo ro 12 kisimisi ta-giporeai durupi tama rido auna karima ro ororuwotiti-ro, ina nu ata ro meana nato owai pua.
44 Nedi orobo ro topira maumo rido gosuwoidiro urubia ro owea pua huru rido gateai-ro nou ro Iesu obotama gare nato gemowasomai. Iedi kemowasomai ro na-gemowasomai, nou karima egenabo aise gororodiobo.
45 Iesu ro ibo, ‘Mo etu ro nowasomai-die?’
Ina urubia sirio ro nu ibo gemowameai-rimo, ‘Nimo umoro pua, oro nimo ata ro owasomai pua.’
Ina Pita ro ibo, ‘Auna dubu, oro ro ma-diauri dubu patu imese auna ia ie, urubia aise ororohoiouti-dioumo. Oro neio ata ro ta-emowasomai obotama.’
46 Taie Iesu ro ibo, ‘Morobise ie mo ata ro nowasomai-die, mo nakara se umoro ta-noi mabu mo aboudo pupuwo korosa ta-wosuruwo.’
47 Iedi orobo ro ta-geremasibai nu modobo pua korowopirowa. Nou ro ibo, ‘Iesu mo ro nowasomai.’ Nou iato soro korowamaro gou-ro Iesu sosoro gabo ato kauhio teibo to aise gorodiriti. Iedi orobo ro urubia sirio nou ro iato gimowauti etou mabu ato gemowasomai Iesu obotama, ibose nou ro iato gimowauti nou karima beda sosoro gororodiobo nou aboudo.
48 Taie Iesu ro ibo edi orobo ro nou aboto, ‘Urubia orobo, ba-dorowameai oro meana ta-woi mabu oro kimibiria mutu e. Miro oro abato aise ba-mowamotiti.’
49 Ina Iesu ibose to geremowagomea, iato ata dubu ro girario-ro Iairo moto rido. Nou ro ibo, ‘Auna dubu oro besere ta-wotobowa, kitamudiro dubu neito owou ate, nou amadi-orowagumaidiro-ri.’
50 Kaupoti Iesu ro na-girorowai nedi owera ro nou ro ibo Iairo aboto, ‘Oro ata kimaragoidiro na ie, aise dimibiria, nou meana ama-oi-ri.’
51 Iesu odio tau ato na-gorowateai Iairo moto to nou ro Pita, Ioane, Iemisi neibi se gidabuai-ibi besere ia mamu ra abera ra mutu neibi atu se imese godoro-birimo.
52 Urubia sirio iato na-gorowomidiro neio idobi diamo ro garo. Edi urubia ro giroto-rimo idobi, Iesu ro iato gimadohodai ibo, ‘Nio idobi na ie! Besere kainai norou orobu. Nou pamo pua.’
53 Urubia ro na-girorowai-rimo neio ata sosoro kimaragoidiro giwia-rimo iato neio ro nu gaga gemororouti-rimo. Neio umoro ta-goi-rimo iedi besere ro morobise pamo ia ie.
54 Kaupoti edi besere ro Iesu ro tu rido na-gorobai-ro nou ro iato gamutia, ‘Mona ia mo besere, deribua.’
55 Taie iedi besere ro urio aise gorowameai-ro durupi mamu aboto, iato aise geribidiro-ro.
Iesu ro mamu ra abera ra owera iato gimowapotai-ma, ‘Ata kouho nakomu ata domia-do.’
56 Mamu ra abera ra ro na-gowea-rido nedi tanaro ro neitiro auna ia se gimaragoidiro-rido. Ina neitiro Iesu ro koko owera iato gimowapotai-ma ibo, ‘Abora nedi tanaro ro na-wororosioidiro nitiro ro urubia imowauti ate!’