10
Iesu ro upi kiraribo nou sapuwo to gitomu
1 Iesu nou kowasoro urubia mutu Kapeniama sabowa na-gemeserai-birimo Gariri duriomoro ato na-owamo neio atu se imese giodori Iudia duriomoro to. Ina ioudo Iodeni oromo sapuwo to imese giabu-rimo, iedi duriomoro ro nato Iesu aboto auna ia dubu patu ro garadabuti-rimo. Nou beda sosoro irowatititi urubia nou ro kiwia ato totomu iato gi-imowauti-ri.
2 Taie iedi tau ro nato arua Parasi urubia nato gou-rimo nou aboto. Nou neio ro nato gemodowa-rimo neio ubi ie nou owaibia ri bagea to garatodai-rimo ibo, ‘Sabi ra ata dubu orobo kararubia?’
3 Iesu ro neio ina iato gimodowa, ‘Nio keba se Mose ro ata sabi ata nou sapuwo to kimia pua ra?’
4 Parasi urubia ro ibo, ‘Mose sabi ro ibo nimowapotai-ro beda dubu ra orobo giropu tato kowea nou ro na-wararubia iedi dubu ro modobo ie orobo kararubia peba titi kemesioidiro keba se ibo “mo ubi tato ie nedi orobo ro nou aboto imese nararubia,” taie iedi dubu ro nou orobo imese moro to kararubia ie.’
5 Taie Iesu ro Parasi urubia iato gimowauti ibo, ‘Nio Mose ro nedi sabi ro nou ri gimia mabu nio kimaragoidiro mutu imese koko ia ie, nio imese auna akau urubia ie. Nio ro Godi edi kitamudiro owera ro modobo pua meana se kimidai aboto,
6 kaupoti keba ia tau ato Godi ro edi tau ato na-gisioidiro imese sirio nakomu nou ro orobo ra dubu ra ibose ta-gisioidiro-ma.
7 Ina nou do ie urubia mere ro mamu ra abera ra nou ri kimeserai-ma ie nou orobo mutu atu moro ato komidiro.
8 Neitiro imese tanaro kisioidiro ato kaupoti owera to kisioidiro ie mabu neitiro kaupoti ie.
9 Godi ro neitiro na-gidabuai-ma modobo pua ata ro kihodowa-ma aboto, neitiro abora orobo ra uramu ra ie neitiro abora kaupoti ie.’
10 Taie Iesu kowasoro urubia mutu adimo na-gorowameai-rimo moto to, Iesu neio ro nato gemodowa-rimo upi kiraribo sapuwo to.
11 Iesu ro neio ibo gimowameai, ‘Beda dubu ro ararubia orobo ina orio orobo nato na-wedea iedi dubu ro nou ro auna ia ubauba tanaro kosioidiro ie nou keba orobo aboto, sabi kesebea ie nou ata orobo aboto na-oroho.
12 Ina atu sosoro ibo ie orobo ro na-wararubia nou simara uramu ina ata dubu ro nato na-wedea, iedi orobo ro nou ro auna ia ubauba tanaro kosioidiro ie nou keba uramu aboto, sabi kesebea ie nou ata dubu aboto na-oroho.’
Iesu ubi ie merebusere kainakaina ou ri nou aboto
13 Iesu kowasoro urubia mutu iedi duriomoro nato na-gorowomidiro arua urubia neio merebusere Iesu ro iwaseidiro ri nato giworoho-rimo. Nou kowasoro urubia ro na-giauri-rimo mamio abeamio merebusere na-giworoho-rimo Iesu aboto neio masawe ro giwati.
14 Taie neio Iesu ro iato na-giwia neio beda mino gisioidiro-rimo nou masawe goi nou kowasoro urubia aboto, taie nou nato gutura ibo, ‘Nedi merebusere kainakaina ro modobo ie mo aboto kiworoho, modobo pua nio ro na-idiobuti-dumo mabu Godi ro kiwaboi tanaro idaibo merebusere kainakaina ro neio ro modobo ato kisioidiro ie tanaro.
15 Nio imese morobise owera nimowapotai etio ra Godi kiwaboi tanaro maumo neito kodoro tato nedi merebusere kainakaina beda sosoro godoro-rimo iedi urubia ro Godi edi kiwaboi tanaro maumo neito kodouti modobo pua.’
16 Iesu merebusere kainakaina na-girobai-ro iato giohi nou tu teibo neio eputa to iato gitomo neio korosa iato gimio.
Namabu sirio dubu ro gemodowa Iesu
17 Iesu iedi duriomoro kemeserai noponopo ie ata dubu nou aboto nato girario-ro kauhio to goto ato aise girumusubua Iesu sosoro gabo ato taie nou ro nato gutura ibo, ‘Mea kitamudiro dubu, mo womu tato womu tato keremiro beda sosoro nama-owea-ri?’
18 Ina iedi dubu ro Iesu ro nato gemowameai ibo, ‘Mo oro ro mea dubu to etou mabu ato napoi-die? Ata mea dubu ata omidiro pua Godi kaupoti nakara se imese meana ia ie.
19 Oro umoro ie Godi ro edi sabi giaiwai-ro oro ro keremoputi ie idaibo, Urubia iopiauti mamo, Arua urubia mamio iwadaudiro mamo, Namabu piro to iwopiro mamo, Koto tau ato urubia owera kakate moro to imoworohuti mamo, Tanaro kisioidiro mutu urubia imatigi mamo, Mamu ra abera ra mea mino to gi-iauri-mari.’
20 Iedi dubu ro nou ro ibo, ‘Mo kaina rido naratamuai-ro womu tato abora iedi sabi sirio ro mo ro ti-nibodorotiti.’
21 Iesu idomari na-giwawota iedi dubu ro nou ato se giwotobowa natonato gemati, nou ro iato gemowapotai, ‘Oro ro kaupoti tanaro osioidiro pua. Oro beda mutu namabu sirio iworohuti, mani to ba-mowamade-mo, ina edio mani ro namabu tato urubia ba-dimio, ina mo aboto nato ba-daradabuai-ro ido oro Godi sabowa ato womu tato womu tato keremiro nato ama-owea-ri.’
22 Iedi dubu ro nou ro na-girorowai iedio owera ro nou aborabora ro gorobai Iesu ro beda sosoro owera to gemowapotai, koko ia ie idaibo tanaro nou ro kosioidiro aboto mabu nou auna se gimaragoidiro namabu aboto koko ia ie nou ro kiaiwo aboto. Taie nou aise gororoupiriai ata owera ata utura pua.
23 Ina Iesu iato gerewesegerai kowasoro urubia aboto nou ro nato gimowauti, ‘Merebusere Niramio tanaro auna ia koko ie idaibo sosoro urubia neio aboto, Godi edi kiwaboi tanaro maumo ro neio neito kodouti aboto.’
24 Nou kowasoro urubia kimaragoidiro ro giopia neio ro na-girowai-rimo idaibo owera. Iesu ro ibo, ‘Auna koko ie Godi edi kiwaboi tanaro maumo ro neito kodoro aboto ibose auna ia koko ro ama-owamo-ri namabu sirio urubia neio ro Godi edi kiwaboi maumo ro neito kodoro aboto.
25 Io idaibo sosoro ie kemoro kodoro ra nira kainai goro rido keresia ra ata sapuwo to? Modobo pua io! Ina idaibo sosoro ie suana sirio dubu ro kodoro koko ia ie Godi edi kiwaboi tanaro maumo neito.’
26 Iesu kowasoro urubia ro na-girowai-rimo neio auna ia se gimaragoidiro-rimo taie nakara se iato geremowagomea-rimo. Neio ro ibo, ‘Ata dubu ata ro womu tato keremiro beda sosoro kowea ra?’
27 Iesu neio aboto na-girarowea iato gimowapotai, ‘Nedi tanaro ro sopu dubu ro kisioidiro modobo pua. Godi nakara se modobo ie kisioidiro aboto nedi tanaro ro. Godi nou nakara se modobo ie imese sirio tanaro kisioidiro aboto.’
28 Pita ro iato gutura Iesu aboto, ‘Imese beda mutu nakomu sirio ra nimo ro ta-nimeserai-rimo, oro nimo ro saro rido ti-nowasoro-dumo.’
29 Taie Iesu ro nato gutura ibo, ‘Nio mo ro morobise ia owera nimowapotai, etu ro kemeserai ra simara sabowa, niramio naramio mamio abeamio medamio mabiamio dokou suwa duriomoro mo sapuwo to daro mea owera kimowauti sapuwo to,
30 nedi duriomoro ro nato oro sirio moto mutu e, sirio mamio mutu e, sirio naramio niramio mutu e sirio medamio mabiamio mutu e dokou suwa duriomoro mutu e, oro ina ido womu tato keremiro ama-owea-ri. Oro ibose mo sapuwo to arua urubia ro ubauba se amadimi-oworohuti-ri mabu oro mo do ie.
31 Etio ra keba to na-wou-dumo neio saro to ama-iweisia-ri, ibose etio ra saro rido na-oromudidiro-dumo keba to neio ama-iweisia-ri.’
Iesu ina geremabowa simara pamo sapuwo to
32 Iesu urubia mutu atu se Ierusarema to kidiawado gabo nou gidiai-rimo. Iesu ro gimomudo gabo keba se Ierusarema sabowa to urubia sirio ro nou saro rido gobodoro-rimo. Nou edio tanaro na-gisioidiro kowasoro urubia auna se gimaragoidiro-rimo ina dorogora urubia etio ro gidiai-rimo saro rido neio tere ro girobai. Taie ipi ato nou kowasoro urubia aise gihodowa gabo sapuwo to, nakara moro ato nou ro iato gimowapotai owera ibo nou aboto etou tanaro ro amadimo-ororosioidiro-ri Ierusarema sabowa ato.
33 Taie nou ro nato gapusia owera nakomu ibo, ‘Nimo Ierusarema to nidiai-dumo. Imese Urubia Kiauri Dubu to Na-gapoi nedi dubu ro amadimo-ohiai-ri Godi ra urubia ra turituri urubia ro daro Mose sabi kitamudiro urubia ro. Neio ro namadimo-orobai-ri ina nato amadimu-utura-ri nou aboto ibo, “Nedi dubu ro modobo ie kesuai aboto”, neio ro nou iato daimodaimo rubi aboto amadima-aiwai-ri,
34 taie ina nedi dubu ro neio ro nou amadime-emasosowado-ri, gase to amadima-amoruti-ri, nou kerei to amadime-epesuti-ri ubauba mino to, ina iato amadimo-opia-ri. Kaupoti netewa teibo saiki teibo namado-oroporeai-ri ina ata saiki ato nou bobo rido amadi-eribua-ri keremiro ama-owea-ri.’
Iemisi ra Ioane ra Iesu a-gararatoro-rido auna masiro imidai ri
35 Iemisi ra Ioane ra neitiro Sebedi mere teibo ie, ata tau Iesu aboto nato gou-rido. Neitiro ro ibo, ‘Kitamudiro dubu, neitiro ubi tanaro oro ro kosioidiro modobo ra?’
36 Taie neitiro Iesu ro ibo gimowameai-ma, ‘Nitiro etona ubi emedea-diodo mo ro kimisioidiro-ma aboto?’
37 Ina neitiro ro Iesu ibo gemowameai-rido, ‘Oro auna gabamani to nama-omidiro-ri, oro ro nama-iwaboi-ri urubia sirio, neitiro ubi ie ata oro tumodi sapuwo ato komidiro ina ata oro pere sapuwo ato komidiro ina nedi gabamani ro neibi ro namabimi-iauri-ri atu se oro mutu.’
38 Neitiro Iesu ro ibo gimowameai-ma, ‘Etou nakomu ri araratoro-diodo nitiro umoro pua! Mo ro edio temeteme ro nama-iwia-ri nitiro ro idaibo temeteme kiwia ato nitiro aboudo modobo ra? Mo anama-odoro-ri auna ia mibo to idaibo sosoro ie mo obo to namadimo-owarumia-ri. Ina nitiro aboudo modobo ra idaibo sosoro nitiro obo maumo to kiwarumia-ma?’
39 Ina neitiro ro ibo, ‘Io neitiro ro kisioidiro modobo ie.’
Taie Iesu ro ina nato gimowameai-ma ibo, ‘Nitiro idaibo sosoro temeteme amadi-iwia-ri mo ro beda sosoro temeteme nama-iwia-ri, ina nitiro ibose ie obo maumo to amadimi-iwarumia-mari mo beda sosoro to namadimo-owarumia-ri.
40 Mo ro irapoi-mari pua etu tiro ro amadi-imidiro-ri edio bobo teibo ro nato, Godi nakara se nou ro ama-iwomi-mari.’
41 Ina arua kowasoro urubia na-girowidiro-rimo idaibo owera Iemisi ra Ioane ra aboudo neio auna serawo ro girobai neitiro aboto.
42 Taie Iesu ro imese kowasoro urubia atu moro to iato gidabuai neitiro ia mutu iato nou ro nato gimowauti ibo, ‘Daimodaimo duriomoro ato neio eputa urubia mutu e, neio ro woko urubia auna kimagege ie ina nio umoro ie ibo idaibo sosoro urubia kiwaboi neio auna ubi ie auna dubu to kararasoro, amura to kararasoro woko urubia se kimasouti, nou ubi tanaro se kisioidiro. Ibose neio iedi gabamani eputa urubia ro auna ubi ie urubia neio ro idaibo mino to kiworohuti.
43 Kaupoti nio ro idaibo sosoro tanaro isioidiro ate!’
Nou ro ibo, ‘Nio ata ubi na-owamo auna masiro kimidai aboto nou modobo ie urubia woko kemesioidiro aboto.
44 Nio ata ubi na-owamo auna dubu to kararasoro aboto nou modobo ie urubia sowake koroho.
45 Mo Imese Urubia Kiauri Dubu to na-napoi-ro mo nou ri ou pua mo urubia ro woko emesioidiro ri, urubia ro tu tobotobo oworohuti ri mo auna dubu to ararasoro ri. Mo a-nou-ro urubia woko imesioidiro rie. Mo noudo nou-ro keremiro aiwai ri sirio urubia iapopo ri ubauba aboudo.’
Iesu ro gowai idomari pogo dubu meana
46 Iesu nou kowasoro urubia mutu Ieriko sabowa to ou rie neibi auna ia dubu patu ro gibodoro-ibirimo saro rido. Neio iedi sabowa ro na-gemeserai-rimo ata pogo dubu urubia nou ro iwarotiti gabo bara ato gomidiro nou Timeasi mere ie masiro Batimeasi.
47 Nou ro na-girowai ibo ata Nasareti sabowa dubu masiro Iesu nou tou-die neito Ieriko sabowa to, iato nou ro Iesu nato gorumai ibo, ‘Ei! Iesu, mo umoro ie oro Godi ro kohodowa dubu e, mo natonato demati-ro!’
48 Ina iedi pogo dubu ro idaibo owera na-garo sirio urubia ro a-gemadohuti-rimo ibo, ‘Oro deremasiai! Nou aboto auna se giaiauti!’
Kaupoti iedi pogo dubu ro nou eremasio pua kiaiauti. Nou neio ro pupuwo to gemowaititi-rimo nou ro ina ibo, ‘Iesu, oro Godi ro kohodowa dubu e, mo dowarebai-ro! Iesu oro Godi ro kohodowa dubu e, mo dowarebai-ro, mo natonato demati-ro!’
49 Taie Iesu ro iedi owera ro na-girowai nou aise gotobowa nou ro ibo, ‘Demowapotai-mo iedi dubu ro neito mou-ro mo aboto.’
Taie neio ro nou iato gorumai-rimo samo to ou ri Iesu aboto, neio ro ibo, ‘Oro deribua-ro Iesu ro taramairi-die nou aboto ou ri.’
50 Taie iedi idomari pogo dubu ro na-geribidiro nou iedi obotama to na-garatimaidiro aise gebedidiro taie Iesu aboto imese gaberai-ro.
51 Nou Iesu ro nato gemodowa ibo, ‘Mo ro etou tanaro nama-osioidiro-ri oro aboto?’
Taie iedi pogo dubu ro ibo, ‘Kitamudiro dubu mo idomari teibo meana demowai-ro. Mo ubi ie mea se kirarowo aboto.’
52 Iesu ro ibo, ‘Oro idomari teibo meana ta-woi-do mabu oro kimibiria towamo mo aboto.’
Taie iedi tau ro nato nou gabo ato na-gou namabu patu nou ro mea se giauri. Iedi pogo dubu ro orowameai pua simara sabowa to Iesu beda moro to gou nou aise garadabuai nou aboto.