11
Iesu Ierusarema sabowa to na-godoro
1 Iesu nou kowasoro urubia mutu Ierusarema sabowa aupi aupi na-gemowaititi-birimo neibi ro Betepage ra Betani ra nedi sabowa teibo ro neito gorowateai-birimo keba se, iedi sabowa teibo ro iato iamo-ma Oribi Podo gomo ato. Taie ioudo Iesu ro netewa teibo kowasoro dubu teibo nou ro nato gimeriai-ma ata sabowa to.
2 Nou ro ibo gitomudiro-ma, ‘Nitiro ito ba-dou-do iedi sabowa ro na-owamo-die ito namado-orowateai-ri nitiro ro amado-owea-ri doniki kainai nama-otoi-ri. Iedi doniki ro ata ro nou gimini ohu ato omidiro pua orio na ie. Nitiro ro kemasaubiai amado-owea-ri ba-demopuritai-rido neito ba-demowou-rido mo.
3 Ina ata ro nama-imodowa-mari ibo, “etou ri emopuritai-do?” Ina ibo ba-demowameai-do, “O Abera Naramu ubi ie nou ro koworohuti aboto ina nou ro amadi-owameai-ri neito nio aboto.” ’
4 Taie iedi owera ro kowasoro dubu teibo ro na-girowidiro-rido iato neitiro imese gaimai-rido iedi sabowa ro neito. Neitiro ro iedi doniki ro iato gowea-rido kemasaubiai na-gotoi moto magere damo gomo ato. Iedi moto ro gabo bara ato gotoi. Taie neitiro ro iedi doniki ro hodo aise gemopuritai-rido,
5 iato arua urubia na-gorowotoi neio ro ibo, ‘Ei nitiro ro etou tanaro osioidiro-do? Etou mabu ato emopuritai-do iedi doniki ro?’
6 Neitiro Iesu ro beda sosoro gimowapotai-ma kutura owera neitiro idaibo sosoro owera to garo-rido iedi urubia neio aboto, ‘Abera Naramu ubi ie nedi doniki kainai ro.’
Taie iedi urubia ro neio ro ibo, ‘Modobo ie ba-demowou-do!’
7 Neitiro ro iedi doniki kainai ro iato imese gowou-rido Iesu aboto. Neitiro simara obotama doniki gimini ohu ato aise gisouti-rido ina Iesu imese gomi doniki gimini ohu ato.
8 Iesu doniki gimini ohu to beda tau ato giriratai urubia sirio ro obotama se gemosouti-rimo, ina arua urubia ota atemo kainakaina na-giasio-rimo iato gemosouti-rimo gabo ato Iesu kou moro ie doniki to.
9 Arua urubia keba to na-gou-rimo, arua saro rudo, Iesu isana turi ato neio a-gemowabu-rimo kamade ri noudo giaiauti-rimo ‘Godi imese meana ia ie! Godi ro oro korosa ta-gomia, Abera Naramu pupuwo mutu oro nou se tou-die, korosa towamo oro abato. Abera Naramu ro Morobise Kohodowa Dubu to na-gapoi oro nou se ie. Korosa ama-owamotiti-ri oro abato.
10 Abera Naramu ro nou edi korosa ro na-gomia oro ro nama-iauri-ri, keba se Deibidi ro beda sosoro to giauri. Godi imese meana ia ie! Auna se ba-demowabutiti-mo!’
11 Iesu Ierusarema sabowa to na-gorowateai nou aise gemobodiai Tarena Moto to iato idomari se goworohuti. Kaupoti saiki ta-geretei nou modobo pua iato korobu. Ina ioudo nou aise gorowameai-ro 12 kowasoro urubia mutu Betani sabowa to.
Pigi ota Iesu ro gatodai
12 Ata kowaroho Iesu kowasoro urubia mutu Betani sabowa na-gemeserai-rimo neio imese gou-rimo Ierusarema sabowa to. Ipi ato Iesu sogoi ro nato gorobai,
13 muso rido neido girarowea pigi ota na-gotoi-ro puara patupatu iopu tato. Nou neido na-gosiomai ota iopu imawotidiro ri kaupoti iopu iroridiro pua egea se giosora, pigi ota nou simara kororuti tau ro orobai pua.
14 Taie nou ro pigi ota owera to nato gemowapotai, ‘Ido oro aboudo iopu iorari pua!’ Nedi owera nou ro na-gutura kowasoro urubia ro ta-gemorowai-rimo.
Iesu tarena moto ato namabu gimagagawado
15 Iesu kowasoro urubia mutu Ierusarema sabowa to na-gorowameai-rimo nou aise gemobodiai Tarena Moto to. Nou ro iato urubia sirio se giwia namabu mani to na-gorowamade-rimo, arua namabu a-geremahudirio-rimo. Nou ro iedi urubia ro ioudo aise gibodoidiro-ro. Urubia ibose ti-gorowotoi mani geremahudirio-rimo. Muso urubia neio mani na-giwou-rimo Iu urubia mani mutu geremahudirio-rimo. Urubia sirio dumu pawa ioudo ta-gimade-rimo mani to, imatowo na ie Godi aboto. Iedi urubia ro na-gorowotoi Iesu ro iato giapirio, teiboro sirio nou ro aise giatutubo dumu pawa edi teiboro ohu ato na-gorowomidiro ibose to giatutubo.
16 Urubia sitoa namabu na-giworoho-rimo Tarena Moto gomo ato Iesu ro neio gabo aise giwasiouti.
17 Taie iedi urubia sirio ro iato na-gorowotoi nou ro nato gimowapotai ibo, ‘Tarena Buka ato tiamo idaibo sosoro owera, “Mo moto imese duriomoro urubia kararatoro moto ie”, kaupoti nio ro abora “piro dubu moto to” apoi-dumo.’
18 Mose sabi kitamudiro urubia daro urubia ra Godi ra turituri rubi neio ro Iesu na-gemorowai-rimo neio ubauba kimaragoidiro ta-giwia-rimo. Taie neio ro Iesu kopia gabo nato gemosora-rimo mabu neio tere ro giwati urubia nou ro beda mino to gitamudiro, ina iedi urubia sirio ro na-gorowotoi Iesu beda sosoro owera to gitamudiro neio ro kamade to gomidai-rimo. Neio ro ibo, ‘Idaibo sosoro kitamudiro keba se nimo ro owea pua!’
19 Taie iato Iesu kowasoro urubia mutu adimo ato gosuruwo-rimo Ierusarema sabowa rido ata moro to ioudo gou-rimo.
Pigi ota rido Iesu ro maumo tanaro gitamudiro
20 Ata kowaroho Iesu nou kowasoro urubia mutu na-gorowameai-rimo Ierusarema sabowa to ipi ato neio ro nato gowea-rimo pigi ota na-gotoi puara tato, Iesu owera huhuame ro edi na gorobai sipi rido durupi agagi imese ta-garawo.
21 Pita ro na-gowea iedi ota ro nou nato gimagareai ina Iesu aboto nato gutura ibo, ‘Kitamudiro dubu a-imaragoidiro-ra, oro ro ma-dowea iedi pigi ota ro dutu oro owera huhuame ro gorobai, iedi ota ro ta-garawo!’
22 Ina Iesu ro Pita ibo gemowameai, ‘Nio ro ba-dimibiria-mo Godi aboudo imese tanaro patu kisioidiro modobo ie.
23 Gare neito ma-diedea-rimo, nio morobise owera nama-imowapotai-ri. Nedi podo ro na-otoi-die oro nou ato kutura ato ibo, “Podo oro dodori obo to!” Oro abato ataata kimaragoidiro iamo tato kimibiria kawakawa na-owamo ina etou nakomu ri araratoro Godi aboto io kororosioidiro ie.
24 Ina nou rie oro mo ro a-nemowapotai modobo ie oro karatoro tau ato kimibiria mutu ibo, “Mo ro edi wisa ro morobise to anama-owea-ri,” taie, oro ro aise kowea ie.
25-26 Ibose oro karatoro ato oro na-imagareai ibo oro ata mutu serawo teremowomidiro-do oro ro modobo ie morobise woki kememati nou edi ubauba ro oro aboto na-gosioidiro. Oro ro iedi tanaro kosioidiro ato, ina ibose ie oro Abera Adiri ato na-omidiro-die nou ro idaibo tanaro kosioidiro ie oro edi ubauba ro nou ro kematopeamuti ie.’
Awawo urubia ro Iesu a-gemodowa-rimo nou korosa boido gowai
27 Iesu nou kowasoro urubia mutu ina Ierusarema sabowa to na-gorowameai-rimo nou Tarena Moto gomo ato iato goroho. Taie turituri urubia, Mose sabi kitamudiro urubia daro duriomoro kiauri urubia Iesu aboto nato gou-rimo.
28 Neio ro nato gemodowa-rimo nou, ‘Iesu oro boido gowai iedi pupuwo korosa ro? Oro etu ro gomia-ro iedi korosa ro?’
29 Iesu ro iedi urubia ro ibo gimowameai, ‘Nio ro keba se mo edi karatoro owera ro ba-demowameai-rimo, ina nio ido nato nama-imowapotai-ri ibo mo korosa etu aboudo nomidai-ro.
30 Mo abora ma-demowapotai-rimo Ioane obo to urubia na-iwarumiautiti iedi korosa ro boido gowai-ro? Godi aboudo a-gomidai ra o urubia aboudo ra? Mo abora ma-demowapotai-rimo!’
31 Iedi karatoro owera neio ro na-girowai-rimo neio nakara se owera to iato gororobai-rimo. Neio ro ibo, ‘Nimo ro ibo namadime-emowameai-ri Ioane obo to kiwarumiauti korosa Godi aboudo ie ina Iesu ro ibo amadi-utura-ri, “ina mabu boira Ioane iedi owera nio ro imibiria tato?”
32 Ina nimo ro ibo namadimu-utura-ri Ioane edi korosa ro urubia aboudo gomidai-ro ina iedi urubia ro na-orowotoi-die neio serawo amadimo-oi-ri nimo aboto.’ Nedi awawo urubia ro urubia topira gebari tere gemati-rimo mabu imese sirio urubia neio umoro ie ibo Ioane nou Godi ipusu owera dubu e.
33 Taie iedi awawo urubia ro Iesu neito gemowameai-rimo, ‘Nimo umoro pua.’
Iesu ro ina nato gutura neio aboto, ‘Ina mo edi korosa ro boido nowai nio mo ro imowapotai-ri pua mabu mo edi karatoro owera ro mo wisa mea se nio ro emowameai pua, marasio.’