16
Iesu a-geribua pamo rudo
1 Komidiro saiki adimo na-goroporeai, Maria Magadarena, Sarome daro orio Iemisi edi mamu ro Maria neibi ro meamea nibo dehoro nato gimade-birimo Iesu durupi emadiriti na.
2 Ina iato Sande saiki na-gowaroho iedio mamio ro Iesu beda nadi goro to gibiria-rimo neito gou-birimo nou durupi meamea nibo dehoro neito emadiriti ri.
3 Taie neibi nakara se nato geremowagomea-birimo ibo, ‘Nou magere auna ia nadi to gemopai-dumo etu ro nama-iwarebai-biri neibi, modobo ra neibi aboudo?’ Neibi na-gou-birimo neito geremowagomea-birimo.
4 Neibi idomari neido na-gimeriai-birimo keba moro to neibi ro nato gowea-birimo bobo magere a-gaidiro-ro. Iedi auna nadi gebari ro potoro ie gomo ato imese gowamo.
5 Iedi mamio ro nadi bobo to na-godoro-birimo neibi ro nato ata orio dubu se gowea-birimo na-gomidiro, nadi goro ato, nou keakea obotama to ta-geremeduti, tumodi sapuwo ato gomidiro. Neibi ro nou na-gowea-birimo omidiro moro ato neibi iato a-gimugugurai-bi tere ri. Neibi orowadau rie
6 kaupoti iedi dubu ro nou ro ibo, ‘Ee, tere na ie nibi. Mo umoro ie nibi edi mabu ato ou-diebimo neito. Nibi Nasareta dubu Iesu nou osora-diebimo dutu ata na-gemopoguti-rimo ota kemowotowa ato. Iedi dubu ro nibi ro na-osora-diebimo nou nato orobu pua pua ie. Nou pamo pua, keremiro ie! Ta-weribua ma-dowea-birimo nou edi moro ato gowotodai-dumo, potoro ie nou nato.
7 Nibi abora neido dorowameai-bimo Pita ba-demowapotai-bimo arua kowasoro urubia mutu ibo “Nio ba-dou-mo Gariri duriomoro to Iesu mutu iato amadimo-ororowea-ri, nou ta-waimai keba moro to. Nio nou ro keba se ta-gimowapotai idaibo owera to.” ’
8 Iedi mamio ro neibi iato imese gerereauri-birimo neibi auna ia tere ro giwati-bi soro aise gorowamaro. Iedi mamio ro ioudo na-gororoupiriai-birimo urubia neibi ro imowauti pua beda tanaro gowea-birimo mabu neibi auna tere ro giwati-bi.
Iesu keba ia se sosoro Maria Magadarena ro gowea
9 Sande kowaroho duwoduwo ato Iesu na-geribua pamo rudo, nou keba se sosoro a-gorowawea Maria Magadarena aboto. Keba se iedi orobo ro nou aboudo 7 ubauba urio nou abato ta-irowomidirotiti ina Iesu ro gimabodorai-ro owera to nou aboudo.
10 Taie Maria Magadarena ro Iesu ta-gowea nou iato otoi pua aise gorowameai-ro hio to, Iesu edi urubia mutu na-irohotiti neio imowapotai rie, neio wisa na a-gorowomidiro idobi giroto-rimo pape gorowomidiro. Taie Maria Magadarena ro nato gimowapotai ibo, ‘Iesu abora pamo pua, nou ta-weribua-ro, mo ro sosoro se nowea na-wotoi!’
11 Kaupoti edi kowasoro urubia ro neio ro nou beda sosoro gutura neio ro imibiria pua.
Kowasoro dubu teibo ro Iesu gabo ato sosoro se gowea-rido
12 Kowasoro dubu teibo Ierusarema sabowa na-gemeserai-rido ipi gabo ato Iesu neitiro ro nato sosoro se gowea-rido. Taie Iesu neitiro ro na-gowea-rido keba se edi sosoro woidomari ro na-giworohuti ibo pua, nou ta-garatidiai ata sosoro gorowawea neitiro aboto.
13 Taie neitiro ro na-gowea-rido hio to aise gorowadau-rido borubi imowapotai ri. Taie neitiro ro ibo, ‘Iesu neitiro ro ta-nowea-do gabo ipi ato.’ Kowasoro urubia na-gorowomidiro neitiro edi owera ro na-garo-rido neio ro imibiria pua.
Iesu kowasoro urubia aboto gorowapotai
14 Neio moto goro ato gorowomidiro ohona giho-rimo iato tuturu tau to owamo pua Iesu nou sosoro nato gorowapotai nakara se 11 kowasoro urubia aboto. Iesu neio aboto koko owera nato garo mabu neio imibiria pua mea se, ibose neio ubi tato ie edi urubia ro giauri-birimo Iesu pamo rido na-geribua neibi owera kimibiria aboto, neibi ro edi owera ro neito na-giatodai-birimo neio neito aise gimohumai-birimo.
15 Taie nou ro nato gutura kowasoro urubia aboto, ‘Nio ba-dororoburutai-mo duriomoro gabogabo to ba-doroho-mo. Nedi mea owera ro nio ro ba-dobodorouti-mo imese sirio urubia aboto.
16 Etio ro imibiria-dumo iedi mea owera ro mo sapuwo to, ina ibose obo to na-iwarumiauti-dumo, neio keremiro amadimo-owea-ri. Etio ra kimibiria tato iedi urubia ro saiki ata Godi edi auna koto ro nato ama-orowotoi-ri ubauba wisa amadimi-imidai-ri.
17 Iedi urubia ro na-imibiria-dumo mo edi mea owera ro neio mo aboudo pupuwo amadimi-iwia-ri korosa tanaro isioidiro-ri. Mo pupuwo ato neio ro ubauba urio amadimi-imabodoidiro-ri. Neio ro arua urubia owera umoro koi tato, io neito amadima-aro-ri.
18 Etio ra umoro tato tanaro kisioidiro idaibo bagawe tu to kirobo, soma isi obo kidio, neio temeteme iauri-ri pua. Neio ro ibose amadimi-iwaseidiro-ri temeteme rubi ina neio aboudo temeteme aise amadima-aragarewado-ri.’
Godi ro gowameai Iesu Adiri to
19 Iesu nou kowasoro urubia owera kimowauti na-goroporeai iato nou Godi ro aise gowioro toboro ohu to, nou ito na-gorowateai Adiri to Godi edi tumodi sapuwo ro nou nato gowomi.
20 Taie iato kowasoro urubia orowomidiro pua, neio aise gororoburutai-rimo duriomoro gabogabo to. Nou edio mea owera ro nato gobodorouti-rimo urubia neito gimowauti-rimo. Iedi kowasoro urubia ro Abera naramu ro ta-giwarebai-ro, pupuwo korosa ta-gimia, korosa tanaro neio ro neito gisioidiro-rimo. Urubia ro neio na-giauri-rimo iedi korosa tanaro ro na-gisioidiro-rimo neio ro ibo ‘Nedi owera ro morobise owera ie!’ Ina neido ie urubia ro morobise to gimibiria-rimo.
(Mea owera Iesu sapuwo to Mareko ro gisioidiro nou se ie.)