2
Iesu ro togiri dubu meana gowai
1 Iesu nakara moro ato ta-imidirotiti, arua saiki na-goroporeai-rimo ina ioudo gorowameai-ro Kapeniama sabowa to. Urubia ro na-girowai-rimo Iesu korowameai owera
2 neio imese sirio se aise garadabuti-rimo nou owera gare emedea ri. Nou beda moto ato gomidiro imese ta-gemosopa-rimo taie nou ro urubia iato imese gitamudiro.
3 Iedi tau ato nou ro na-gitamudiro arua rubi ro togiri dubu nato gowou-rimo,
4 neibi gabo egea se giosora-birimo nou kowodoro aboto. Nou taratara ato gorobu neibi ro nato gowodoro-birimo Iesu aboto, neibi ro modobo pua Iesu aboto hio to kowateai. Taie neibi kimaragoidiro nato giwia-birimo ibo modobo ie neibi ro ohu to kowioro ohu rido pito nato namabime-emepito-ri, neido namadibimo-owororuwo-ri. Taie neibi ro nedi tanaro na-gosioidiro-birimo, pito kemepito moto ohu rido taie imese gowororuwo-birimo Iesu aboto.
5 Iesu ro ta-gimasibai-bi neibi kimibiria mutu gosioidiro-birimo taie nou ro nato gutura, ‘Mo mere abora oro ubauba tanaro patu ta-nematopeamuti.’
6 Kaupoti Iesu beda moro ato gitamudiro iato, Mose sabi kitamudiro urubia ta-gorowomidiro neio iato gimaragoidiro-rimo nakara se Iesu beda sosoro owera to gutura. Neio ro ibo,
7 ‘Nedi dubu ro idaibo sosoro owera etou mabu ato utura? Nou ro Godi masiro ubauba ta-owai. Godi kaupoti nou se ie ubauba nou ro kimatopeamuti ie, nedi dubu ro nou ro modobo pua.’
8 Iesu ro neio kimaragoidiro patu ta-gimaritiawado, neio beda sosoro gimaragoidiro-rimo. Taie nou ro iato gutura neio aboto ibo, ‘Nio mabu boira idaibo sosoro kimaragoidiro na-imaragoidiro-dumo?
9 Beda sosoro ra mea se nedi dubu ro nou aboto kutura ibo, “Oro ubauba tanaro patu ta-nematopeamuti” o ibo kutura “Oro deribua, taratara daratai, dou!”?
10 Nio umoro ba-doi-mo ibo Imese Urubia Kiauri Dubu mo nou e, ibose mo abato korosa towamo urubia sirio ubauba kiatopeamuti aboto. Ina ba-diauri-mo!’
Taie Iesu aise gerewesegerai iedi togiri dubu nou aboto, nou ro ibo,
11 ‘Oro deribua! Taratara daratai! Dou!’
12 Iedi togiri dubu ro aise geribidiro-ro nou taratara na-garatai taie imese gosuruo-ro.
Nou ro edi tanaro na-gosioidiro urubia sirio ibose ti-girarowo-rimo neio imese auna ia se gimaragoidiro-rimo. Ina neio ro Godi iato gemowabu-rimo ibo, ‘Nimo ro idaibo tanaro kiauri pua, nou abora tanaro ororosioidiro!’
Iesu ro Riwai garapoi
13 Iesu ina imese godori Gariri obo paruo bara to iato goroho. Nou iato na-goroho urubia sirio nou aboto nato garadabuti-rimo. Taie neio nou ro na-giwia iato gitamudiro.
14 Urubia kitomu na-goporeai, nou ina nakara se obo paruo bara ato imese gagegeidiro. Nou ro iato Arapisi mere gowea Riwai, takesi kimade moto ato na-gomidiro. Taie Iesu ro nato utura Riwai aboto, ‘Iedi woko ro demeserai takesi mani kimade, abora dou-ro mo dowasoro-ro.’ Taie Riwai ro edi owera ro na-girowai nou woko aise gemeserai Iesu aboto iato garadabuai-ro.
15 Taie iedi adimo ro nato Riwai moto to Iesu imese gou ohona iho ri. Urubia sirio ito garadabuti dorogora se urubia takesi kimade urubia, neio Iesu kowasoro urubia mutu atu moro to na-garadabuti-rimo taie iato ohona imese giho-rimo. Sirio takesi kimade urubia neio Iesu kowasoro urubia to ta-gararapoi-rimo. Ibose dorogora se urubia sirio Iesu neio ro gowasoro-rimo.
16 Mose sabi kitamudiro urubia neio arua Parasi urubia to ta-gararapoi-rimo. Neio ro nato gowea-rimo Iesu dorogora se urubia, takesi kimade urubia neio mutu atu moro ato ohona na-giho-rimo, taie neio aise gou-rimo Iesu kowasoro urubia neio ro iato gimodowa-rimo, ‘Mabu boira Iesu idaibo urubia mutu atu moro ato kiho?’
17 Neio ro iedi owera ro na-gutura-rimo Iesu ro ta-gimorowai. Taie nou ro nato gimowameai ibo, ‘Dokota temeteme tato urubia aboto ou-ri pua, nou temeteme urubia aboto kou e. Mo woko idaibo sosoro ie, etio ra imaragoidiro-dumo ibo, “Nimo meamea urubia ie”, mo neio sapuwo to ou pua. Mo a-nou-ro etio ra imaragoidiro-dumo ibo, “Nimo ubauba urubia ie”, io mo neio sapuwo to nou-ro.’
Tagara tanaro orio tanaro mutu imasaupiai-ri pua
18 Ata saiki ato obo to kiwarumiauti dubu Ioane nou kowasoro urubia Parasi urubia mutu neio ohona kiho tato gorowomidiro. (Parasi urubia ro Iu urubia sabi patu auna ia se girobidiro-rimo.)
Taie arua urubia nato gou-rimo Iesu aboto neio ro nato gutura-rimo nou aboto, ‘Ioane kowasoro urubia Parasi urubia mutu neio abora ohona kiho tato orowomidiro-die, kaupoti oro edi kowasoro urubia ro ohona neio ro tiho-dumo, io mabu boira?’
19 Iesu ro nato gimowameai, ‘Orio domere nou orobo kedea ato, nou namuturubi ohona kiho tato korowomidiro ra, a? Orio domere nou idaibo tau ato na-omidiro nou edio namuturubi ro ohona kiho ie
20 kaupoti ata tau amadi-ou-ri nedi orio domere ro simara urubia aboudo nato amadimo-owatateai-ri. Iedi tau ro nato nou namuturubi kiho tato nato ama-orowomidiro-ri.
21 Ina ibose ata mere tagara sodo pito kowaruwouti ato, nou ro modobo pua orio obotama kere to pito kowateai mabu kowiouti ato, iedi obotama kere ro aise keretebuti ie, ibose edi tagara sodo ro nou pito auna aise kowai ie.
22 Ina ibose ata mere ro idaibo tanaro osioidiro-ri pua orio tuba tagara kepuru to karate, mabu edi kepuru ro modobo pua, tuba nou boroboro koi ato, edi kepuru ro aise kerepepea ie, ina tuba tima moro to karaseduti ie. Orio tuba orio kepuru to kiratuti ie.’
Iesu Iu urubia komidiro saiki Abera naramu e
23 Iesu komidiro saiki ato goroho woiti iopu pari abato, nou kowasoro urubia mutu. Nou iato na-goroho ina nou kowasoro urubia ro se gidoho-rimo woiti iopu, na-giakukuti-rimo taie iato aise giho-rimo. (Woiti iopu araiso sosoro ie.)
24 Neio edi tanaro nou gisioidiro-rimo Parasi urubia ro na-giwia-rimo taie Iesu aboto aise gou-rimo neio ro iato garatodai-rimo nou ibo, ‘Abora saiki imese ota iopu kidoho sabi ie! Mabu boira oro kowasoro urubia ro komidiro saiki sabi na-esebea-dumo?’
25-26 Nou ro neio iato gemowameai, ‘Nio ro a-wioputiti-mo ra Deibidi etu na tanaro gisioidiro? Tagara tau ato Abiata na-gomidiro Godi ra urubia ra turituri rubi nou ro na-iaurititi, Deibidi auna sogoi ro gowati Godi edi tarena parai moto ro nou neito nato godoro. Taie nou ro dokou ioudo na-gimidai-ro nou etio mutu gou neio mutu atu se giho-rimo. Iedi dokou ro na-giaremuti-rimo Godi sapuwo to giaremuti-rimo imese tarena ia ie.’
Kaupoti Iesu ro a-gutura ibo, ‘Mose edi sabi patu ro na-giaiwai-ro ibo aro urubia ra Godi ra turituri dubu dokou kiaremuti ato tarena parai moto ato io Godi ra urubia ra turituri dubu neio kawakawa ro kiho ie iedi dokou ro.’
27 Nou ro ina iato gutura Parasi urubia aboto, ‘Komidiro saiki Godi ro gedea urubia kiwarebai aboto, ibo pua Godi ro urubia kisioidiro komidiro saiki sapuwo to.
28 Mabu mo Imese Urubia Kiauri Dubu e, mo komidiro saiki abera naramu e.’