4
Erere goto sapuwo to nou totomu e
1 Iesu ata tau ato Gariri obo paruo bara ato gitamudiro ina auna ia dubu patu ro nou nato gemosopa-rimo. Taie nou pe to aise gorora imese gabu egea mere se, urubia sirio koriri ato na-gorowomititi taie nou pe ato na-gomi ioudo gitamudiro-ro.
2 Nou ro sirio totomu maumo mutu neio neito gitamudiro mea umoro kimidai sapuwo to. Nou ro iato gutura neio aboto ibo,
3 ‘Nio neito ma-dirowidiro-rimo mo aboto. Ata tau ata pari kisioidiro dubu pakea ta-gieba keba se, nou ina iato gaimai ota iopu mutu pari ato iheruti ri mea mino to kisuruwo aboto.
4 Ota iopu iedi dubu ro na-giheruti, arua erehe moro ato gororobouti-rimo, idaibo arua iopu gabo ato gararemuti-rimo. Gabo ato na-gararemuti-rimo iedi ota iopu ro iato pawa ro giroruwo-ro neio ro giho-rimo,
5 ina arua ota iopu nou ro na-giheruti nadi goto ato gararemuti-rimo. Iedi ota iopu ro mea mino to gosuruwo-rimo keba se,
6 ina iato saiki korosa ro na-giwia neio puara aise gitemeiriai-rimo. Taie iato saiki korosa ri aise gorowaburai-rimo, mabu neio sipi mea mino to iwodoro pua mabu mea goto ohu ato kainai ie ina nadi maumo ato gowamo.
7 Ina arua ota iopu edi na giheruti ununu ota sere beda moro ato gorowotoi atu se gorowioro-rimo, iedi meamea ota ro ununu ota ro gimohiawado-rimo ina iedi ota ro neido meamea iopu iasesuti pua.
8 Kaupoti sipu tato edi na gararemuti-rimo mea goto ato neio ro gisuruwo-rimo mea se, arua ota rido iopu sipu tato se gisuwoduti-rimo, arua ota rido sirio se gisuwoduti-rimo, ina arua ota rido imese sirio ia se gisuwoduti-rimo.’
9 Iesu ro owera neito gopai, ‘Etu ra mo owera modobo ato kirowidiro aboto nou mo gare se ba-memedea-ro!’
Mabu boira Iesu ro urubia totomu na-itomutiti
10 Iesu nou urubia mutu nakara se geremeserai taie nou edi 12 urubia ro arua rubi mutu neio ro nato gemodowa-rimo nou ibo, ‘Mabu boira oro ro totomu na-itomuti?’
11 Iesu ro neio neito gimowameai, ‘Godi ro kiwaboi tanaro keba se piro se ta-gowamo mo ro a-niwawea nio ia aboto. Arua rubi aboto mo ro totomu se korowauti ie, kaupoti maumo neio aboto iwapotai-ri pua.
12 Mo ro nou mabu ato nisioidirotiti idaibo Aisaia Godi ipusu owera dubu keba se nou ro ta-gisioidiro owera ibo Neio ro kowea ie kaupoti neio ro beda kowea ra. Neio ro kirowidiro ie kirowidiro ie umoro beda koi ra. Etu umoro ra neio ro kimidai ato taie neio kerewesegerai ie Godi aboto, neio edi ubauba ro nou ro nato kimatopeamuti ie.’
Totomu erere goto sapuwo to Iesu ro maumo nou gowawea
13 Iesu ro iato gutura nou kowasoro urubia aboto, ‘Iedi totomu ro mo ro na-nimowauti nio ro mea se imidai pua ra? Ina arua totomu nama-imowauti-ri nio ro maumo beda sosoro amadimi-imade-ri?
14 Ota iopu kiheruti dubu nou idaibo ie Godi edi mea owera ro edi na urubia ro na-iaiwo-dumo neio ie.
15 Arua ota iopu a-gararemuti-rimo gabo ato neio idaibo urubia ie dorogora se kirowai ie Godi edi mea owera ro ina Satani kou ato neio aboudo nou ro aise kipouti ie.
16 Arua ota iopu neio nadi goto ato gararemuti-rimo neio idaibo urubia ie, kirowai ie Godi edi mea owera ro keba se kamade mutu kimidai ie,
17 ina Godi edi mea owera ro sipi kiwodoro modobo pua edi urubia ro neio abato, tuturu to beda korowotoi ra. Arua ubauba kou ato neio aboto mabu neio edi mea owera ro ta-gimidai-rimo, edi tau ro nato neio ubi tato aise koi ie.
18 Ina arua ota iopu neio a-gararemuti-rimo ununu ota sere beda moro ato gorowotoi neio idaibo urubia ie kirowai ie Godi edi owera ro mea mino to
19 kaupoti neio abato kiamo ie kimaragoidiro siriosirio, kimaragoidiro mani aboto auna se kiamo ie, ibose neio ubi ie imese sirio namabu patu kiworohuti aboto. Taie edi kimaragoidiro patu ro iedi mea owera ro kiroromai aboudo neio ro kiwasiouti ie, ata ota iopu ata osuruwo-ri pua ioudo.
20 Ina arua ota iopu mea goto ato gararemuti-rimo neio idaibo urubia ie kirorowai ie edi mea owera ro taie neio ro mea mino to aise kimibiria ie. Iedi urubia ro Godi ubi tanaro mea se neio ro emesioidiro-dumo, ina neio aboudo Godi ro mea wisa imade, arua aboudo egea mere se ie, arua aboudo auna se ie, ina arua aboudo auna ia se ie.’
Tanaro paeapaea amadimo-oi-ri
21 Iesu ro iato gutura ibo, ‘Oro erempa kowateai ato oro ro ibi gugu maumo to kowopirowa ra? E e ibo pua. Oro ro ohu ato kakokai ie kenene rudo,
22 ina idaibo sosoro ie imese beda mutu tanaro patu ra urubia ro kiauri tato neio paeapaea amadimo-oi-ri. Ina beda nakomu ra urubia ro na-giatimuti-rimo ibose to amadimi-iwatatetuti-ri.
23 Etu ra mo owera modobo ato kirowidiro aboto nou mo gare se ba-memedea-ro.
24 Nio modobo ie nedi tau ro nato mea se kirowai mo ro beda owera naro. Nio ro urubia beda sosoro to iworohuti-dumo nio neio ro ibose amadimi-iworohuti-ri.
25 Etio ro gimidai-rimo auna umoro Godi mea owera sapuwo to neio aboto amia umoro ohu rudo ama-imotomotiti-ri. Etio ro gimidai-rimo egea mere se umoro Godi mea owera sapuwo to neio aboudo edio umoro kainakaina ro ama-iwatate-ri.’
Totomu ota iopu nakara se kiroromai sapuwo to
26 Iesu ina iato gutura nou kowasoro urubia aboto ibo, ‘Godi ro kiwaboi tanaro idaibo sosoro ie, ata dubu ro ota iopu kibouti ato iedi ota iopu ro neio nakara se awawo aise koi ie.
27 Neio awawo koi ato saiki ato kiroromai ie duwo ato kiroromai ie ibo kiroromai ie. Urubia dubu norou korobu ato ina kowaroho na-werebua iedi ota iopu ro neio nakara se kiroromai ie. Nou umoro oi-ri pua ibo nedi ota iopu ro beda sosoro iroromai-dumo nou ata umoro tato ie.
28 Kau keba se keremapusuti ie, ina iato upa ro isuwoduti-dumo iato iopu iaremuti-dumo.
29 Iopu awawo na-woi-dumo taie gumuni ato pari kibouti dubu ro iato kidabuti ie.’
Totomu masitadi ota iopu sapuwo to ie
30 Iesu ro ina nou kowasoro urubia iato gimowauti, ‘Mo ro nio totomu ina anama-imowauti-ri Godi ro kiwaboi tanaro beda sosoro ra.
31 Nou masitadi iopu sosoro ie oro ro karo ato goto ato iedi iopu kainai ro auna pua, nou imese kaina ia ie. (Masitadi iopu mirie iopu sosoro ie.) Arua ota iopu awawo ie, kaupoti nedi ota iopu ro kaina ia ie.
32 Ibose nou oro ro goto ato karo ato iedi ota ro na-wororomai nou auna ia aise koi ie ina arua ota na-worowotoi pari ato neio nou ro sopu to kiauri ie, iedi ota ro gebari ia ie. Nou atemo na-iheruti ito tumu pawa iato kou e neio toto iato keremari ie iedi ota ro nou atemo ato.’
33 Iesu ro Godi edi mea owera ro sirio tau idaibo sosoro totomu to itomutititi womu tato neio ro umoro simara modobo ato gimade-rimo.
34 Nou ro urubia sirio na-imowautiti nou ro totomu to se imowautititi, kaupoti nou kowasoro rubi mutu na-imidirotiti nakara moro ato nou ro totomu maumo mea mino to iato imabutititi neio aboto.
Iesu ro surama ra bukopu ra a-giadibiai-ma
35 Iedi adimo duwoduwo ro nato Iesu ro iato gutura nou kowasoro urubia aboto, ‘Nimo miabu-rimo Gariri obo paruo sapuwo to.’
36 Taie auna topira neio ro aise gemeserai-rimo Iesu keba se gorora pe to, nou kowasoro rubi kororuti taie neio imese giabu-rimo obo paruo sapuwo to. Arua pe neibi pe mutu atu se gorowabu-rimo.
37 Neio na-gorowabu-rimo turi damo ato auna ia surama ro iato giwia taie bukopu nato giriribua-rimo pe sapusapuwo rido gorowiti-rimo obo ta-giritomuai-ro neio aupise kimarumo.
38 Iesu pira ato geremeidiro norou ia gorobu wapo ato imese moro to gaimawado. Nou kowasoro urubia aborabora se giraroweauti-rimo, neio ro ibo, ‘Nimo aupise ie kimarumo!’
Taie neio aise gorowadoro-rimo Iesu aboto amutia ri, ‘Auna dubu oro deribua nimo aupise korowaburai oro kimaragoidiro tato ra nimo aboto?’
39 Iesu ro na-girowai neio edi owera ro nou owera kaupoti ato aise gerebua-ro surama ra bukopu ra aboto nou ro iato gutura, ‘Surama deremasiai! Bukopu deremasiai!’
Taie surama ra bukopu ra aise garadibiai-rido obo paruo ato gasio imese gereredea.
40 Iesu ina iato gerewesegerai nou kowasoro urubia aboto, nou ro ibo, ‘Nio otou tere ro iwati? Nio kimibiria iamo pua ra?’
41 Taie neio auna ia tere ro giwati nakara se iato geremowagomea-rimo ibo, ‘E, nedi dubu ro beda dubu ra? Nou edi owera ro surama ra bukopu ra aise irorowai-do!’