11
Iesu ro urubia Ioane sapuwo to gimowauti
1 Iesu ro nedi 12 kowasoro urubia ro totomu kimowauti na-goporeai, taie iedi moro ro nou ro aise gemeserai-ro. Nou ioudo gou-ro Gariri duriomoro to urubia simara sabowa to na-gorowomidiro neio Godi owera itamudiro rie ibose imowauti rie.
2 Iedi tau ro Ioane dibura abato gomidiro, nou ro owera nato girorowai ibo, Godi ro kohodowa dubu nou ro pupuwo korosa tanaro tisioidiro. Taie Ioane ro simara kowasoro urubia nato gimeriai-ro Iesu aboto,
3 nedi kemodowa owera ro nou mutu ibo, ‘Godi ipusu owera urubia ro edi kohodowa dubu ro owautiti-mo nimo aboto ou ri, oro nou se ra? O ata dubu emotoi-ri ra?’
4 Neio Iesu ro ibo gimowameai, ‘Ba-dorowameai-mo, Ioane nio ro ba-demowapotai-mo, mo ro edi pupuwo korosa tanaro ro na-nisioidiro, nio ro simara idomari to tiauri-dumo.
5 Abora idomari pogo urubia mo ro meana na-niwaititi neio idomari mea se tirarowo-dumo. Sairo ubauba urubia abora mea se toroho-dumo. Katio ikoni urubia abora neio katio tato ie. Gare tato urubia abora neio owera tirowidiro-dumo. Pamo urubia abora neio pamo rido torowame-dumo. Ibose mea owera Godi sapuwo to imese torobodorouti namabu tato urubia aboto.
6 Etio ra mo edi kimibiria gabo ro neido karagarewado tato, neio Godi ro korosa ama-imio-ri.’
7 Ioane kowasoro urubia ro Iesu na-gemeserai-rimo, taie nou auna topira aboto aise gerewesegerai. Neio nou ro owera Ioane sapuwo to nato gimowauti. Nou ro ibo, ‘Nio goto se duriomoro to na-iredutiti-mo etu iaurititi-mo? Nio ro gurigo daimo nou a-wiaurititi-mo ra gawia ro na-iwadudumawadotiti? E e.
8 Ina urubia dubu meamea namabu to keremeduti nou iauri ri a-iredutiti-mo ra? Ma-dimaragoidiro-mo. Etio ra meamea namabu to keremeduti, nedi urubia ro eputa urubia edi meamea moto ro nato irowomidirotiti.
9 Ina nio beda dubu iauri ri iredutiti-mo? Godi ipusu owera dubu iauri ri ra? Nio mo ro owera ibo mimowapotai-ro, Io morobise ie, Ioane nou Godi ipusu owera dubu sekere ie. Kaupoti nou edi masiro ro ohu ia to owamo-die. Godi ipusu owera urubia sirio, neio masiro nou sopu ato iamo-die.
10 Nedi dubu ro Ioane nou sapuwo to owera kebase Tarena Buka ato ta-gowapotai-rimo ibo, Mo ro keba moro to owera sowake dubu anama-emeiriai-ri. Nedi dubu ro oro gabo nou ro ama-emaipo-ri.’
11 Iesu ro ina ata owera neio aboto iato gowapotai, ‘Nio mo ro morobise owera mimowapotai-ro. Ioane obo to kiwarumiauti dubu nou auna ia dubu e Godi sosoro gabo ato, imese urubia nou ro sopu to iaurititi. Kaupoti etio ra Godi edi kiwaboi maumo ro nato na-orowomidiro, nedi urubia ro masiro kainakaina na-irobidiro-dumo, Ioane neio ro sopu to iauri-dumo.
12 Ioane obo to kiwarumiauti dubu owera kimowauti beda tau ato na-gatamuai womu tato abora, Godi ro kiwaboi tanaro ro imese pupuwo ia to aimowado-die. Pupuwo urubia edi tau ro nato pupuwo iasibowado-dumo Godi edi kiwaboi maumo ro neito kodoro aboto.
13 Keba ia se, Mose edi sabi sirio ro, Godi ipusu owera urubia sirio mutu, neio Godi ipusu owera ta-imowautiti-rimo, womu tato Ioane ti-gorowapotai-ro.
14 Owera Tarena Buka ato iamo ibo Eraia kebase tanaro pupuwo mutu beda sosoro isioidirotiti, ido ata dubu nou sosoro amadi-ou-ri. Nio mo ro a-nimowapotai ibo nedi dubu ro Ioane nouse ie, tanaro Eraia sosoro pupuwo mutu tisioidiro. Nedi owera ro nio ro ubi to amadimo-omidai-ri ra?
15 Etio ra mo owera modobo ato kirowidiro aboto, neio ro mo owera gare se ba-memedea-rimo.
16 Abora nedi urubia ro na-orowomidiro, neio mo ro etio mutu nama-idobowa-ri, neio abora edi muro to na-orowomidiro? Neio merebusere kainakaina sosoro ie goto didiri ato orowiro-dumo garara owera iaro-dumo, borubi merebusere kainakaina aboto iaiauti-dumo.
17 “Nio nimo ro gama ra pate ra egea se kimado ato, kaupoti nio nato aise orowamaro-ri pua. Nimo idobi gido to egea se kiroto ie, kaupoti nio idobi nato aise iemai-ri pua.”
18 Ina abora ma-diauri-mo, nedi atu sosoro tanaro ro neio ro ororosioidiro-dumo. Ioane obo to edi dubu ro iwarumiauti, nou ro Godi woko kemesioidiro edi tau ato gatamuai, nou ro koko obo idiotiti pua, ibose ohona ta-iraiautiti. Kaupoti Ioane sapuwo to urubia ro karasaubuti owera iarotiti-dumo ibo, “Ioane ubauba urio ro oworohutiti.”
19 Ibose Imese Urubia Kiauri Dubu neito na-gou-ro nou urubia mutu ihotiti, ibose waini obo egea mere se imusubutiti. Kaupoti nedi dubu ro neio ro nou sapuwo to bagea karasaubuti owera iarotiti-dumo ibo, “Nedi dubu ro ma-diauri-mo, auna sogoi dubu e, auna kidio dubu e. Nou auna se idabutiti takesi kimade urubia mutu, ibose arua ubauba urubia mutu.”
Kaupoti Godi edi muro ro etio ro ibodoro-dumo, neio ro kiwawuti ie ibo morobise muro nou se ie.’
Kimibiria tato sabowa urubia, ubauba neio abato amadimo-ororosioidiro-ri
20 Iesu ro pupuwo korosa tanaro sirio edi sabowa ato na-gisioidiro, iedi urubia ro simara ubauba aboudo erewesegerai pua. Ina noudo ie Iesu ro neio nato gimaiauti ibo,
21 ‘Korasini sabowa urubia, nio ro saiki ata auna ubauba amadimo-owea-ri. Ibose Betesaida sabowa urubia, nio iasoperai-ri pua, nio ro ibose auna ubauba amadimo-owea-ri. Nitiro atu se ubauba emosio-do. Mabu kebase mo ro pupuwo korosa tanaro nio sabowa teibo ato egea se nisioidirotiti, mo ro Taia ra Sidoni ra sabowa teibo ato kisioidiro rasiri ie, nedi Godi umoro tato urubia ro ubauba aboudo keba ia se ba-gerewesegerai-rimo. Neio ro kerekere koropukoropu obotama ba-giroiti-rimo, ina durupi panese to ba-gorowoititi-rimo. Neio ro nedi tanaro ro paease nou ba-gowawea-rimo ibo, “Nimo ubauba aboudo ta-nerewesegerai-dumo.”
22 Ina noudo ie nio mo ro sirio se a-nimowapotai, Korasini urubia Betesaida urubia mutu, saiki ata nio ro auna ubauba wisa amadimi-imidai-ri. Auna koto tau nama-orobai-ri, Taia ra Sidoni ra ro neitiro ro beda sosoro auna ubauba isioidirotiti-do, iedi ubauba wisa ro neio ro kainai mere se amadimi-imidai-ri. Kaupoti Korasini urubia Betesaida mutu, neio ro saiki ata auna ia ubauba wisa amadimi-imidai-ri.
23 Ina nio Kapeniama sabowa urubia, nio ibo a-imaragoidiro-dumo ra nio Godi ro Adiri sabowa to ama-iwou-ri, auna masiro imade ri? Marasio! Nio era paruo maumo to ama-ioubiri-ri. Iedi pupuwo korosa tanaro ro nio abato na-nisioidirotiti, Sodom sabowa ato kisioidiro rasiri ie, iedi sabowa ro Godi ro ubauba owai-ri pua, abora a-sowamo.
24 Kaupoti nio mo ro ibo mimowapotai-ro, koto tau ato Sodom sabowa urubia ubauba wisa egea mere se amadimi-imidai-ri. Kaupoti Kapeniama sabowa urubia, auna ubauba wisa nio ro amadi-imidai-ri.’
Mo aboto dou-rimo nio toutou kiwai sapuwo to
25 Iedi tau ro nato Iesu ro urubia owera kimowauti na-goporeai, taie nou Godi aboto iato gararatoro. Nou kararatoro owera ibo garo, ‘Abera, goto, toboro imese namabu sirio mutu, oro do ie. Oro mo ro a-nemowabu mabu oro edi mea umoro ro urubia aboudo ta-giwopirowa. Kaupoti nedi mea umoro ro oro ro keremowabu tato urubia aboto giwapotai-ro, neio merebusere kainakaina sosoro irowomidirotiti.
26 Io Abera, awawo umoro urubia, ibose muro urubia aboudo, oro ro na-giwopirowa nedi tanaro ro, oro ubi ato gororosioidiro-rimo.
27 Imese pupuwo ia korosa mo abera ro nemapoi-ro. Urubia ro umoro oi pua mere, Abera nakara umoro ie mo, nou mere ie. Ibose urubia ro Abera umoro pua, mo nou mere ie mo nakara umoro ie nou. Ibose beda urubia ra nou mere, mo ro na-nirapoi-ro Abera owawuti ri neio aboto, neio atu se umoro ie mo edi abera ro.
28 Nio etio ra durupi aise na-ipuse, ibose nio sirio mibo na-iratidiro-dumo, nio dou-rimo, mo abato se dimibiria-mo, ina nio toutou anama-iwai-ri.
29 Mo aboudo ba-dirarebai-rimo, ibose mo aboudo ba-daratamudiro-rimo. Nio mo ro imudo-ri pua. Mo urubia ubauba mino to kiworohuti pua, mea mino to niworohutiti, ata keremowabu tato ie. Nedi muro kiwaboi ro nou maumo ato, nio niro turi ato toutou keremiro amadimi-iauri-ri.
30 Mabu mo edi kitamudiro ro koko pua. Ibose mo edi woko ro na-iamo nio ro kisioidiro aboto, nio aboudo koko se iamo-ri pua.’