20
Gereipi pari woko urubia sapuwo to ie
1 ‘Godi ro kiwaboi tanaro duriomoro abera sosoro ie. Ata saiki, kowaroho duwoduwo ato nou moto rido nato gosuruo-ro maketo moro to, woko urubia iosora ri pari kemowati aboto.
2 Nou ro ibo arua urubia aboto, “Nio mo ro wisa kaupoti saiki sapuwo to anama-imio-ri.”
Iedi owera ro neio ro na-girorowai-rimo, ubi to aise gomidai-rimo. Taie neio nou ro imese gimeiriai gereipi pari to, woko aise gatamuai-rimo.
Taie moto abera aise gorowameai simara moto to,
3 ina saiki egea mere se ta-gidiai-ro, imese gorowameai maketo moro to. Nou ro urubia sirio iato giwia woko kirobai aboto na-geremasebidiro-rimo.
4 “Nio ubi ra mo pari woko emowati ri? Nio mo ro woko sapuwo to mea wisa anama-imio-ri.”
5 Neio ro ibo, “Ehe, modobo ie, anamadime-emowati-ri.”
Taie neio woko aboto aise gou-rimo.
Ina saiki turi ato, ibose saiki egea mere se ta-goriodidiro, nou ro atu sosoro tanaro ibose to gosioidiro. Urubia nou ro na-girobo imese gitioduti pari woko emowati ri.
6 Ina adimo ato saiki egea mere se ta-goriodoi, nou ro arua urubia ina maketo ato nato giwia, neio woko kirobai aboto geremasebidiro-rimo. Nou ro ibo neio ato, “Mabu boira nio saiki tuturu korowotoi kawa na-orowotoi?”
7 Neio ro ibo, “Nimo woko tato urubia ie, woko kimio urubia nimotoi-dumo.”
Pari abera ro ibo, “Nio ubi ra mo pari kemowati?”
Neio ro ibo, “Io modobo ie, anamadime-emowati-ri.”
Taie neio imese giamedei-rimo pari woko owati ri.
8 Nedi urubia ro woko tuturu tau to owati pua, saiki muta to goriodidiro.
Tuturu to owamo pua, pari abera ro keba se woko kiauri dubu iato gorumai nou aboto ou ri. Nou ro ibo, “Woko kiwati urubia ba-dirumai oro aboto ou ri, ina neio mani ba-dimio. Saro ia rido kitamuai urubia neio wisa kebase ba-dimio, womu tato kebase edi urubia ro itamuai-dumo neio wisa saro rido ba-dimio.”
9 Taie woko kiauri dubu ro wisa kimio nato gatamuai. Saiki egea mere se na-geredumudiro edi urubia gimeiriai woko aboto, wisa kimio neio aboudo gatamuai, neio nou ro kaupoti saiki woko sapuwo to wisa momuo se gimio.
10 Imese kimio to nato gou-ro, womu tato saiki egea mere se ta-gidiai-ro edi urubia ro gatamuai-rimo. Neio ro a-gimaragoidiro-rimo, “Kaupoti saiki woko sapuwo to se wisa imidai-ri pua, ohu rido ama-imotomo-ri. Mabu saiki egea mere se na-oriodoi edi urubia ro woko na-watamuai-dumo, neio ro kaupoti saiki sapuwo to wisa momuo se imidai-dumo. Nimo saiki tuturu nisioidiro-dumo woko, ina noudo ie didi wisa anamadimi-imidai-ri.”
Kaupoti idaibo tanaro ororosioidiro pua, neio ro kaupoti saiki woko sapuwo to wisa ibose to gimade-rimo.
11 Taie neio atu se masawe owera nato garo-rimo. Neio ro ibo,
12 “Adimo duwoduwo ato woko edi urubia ro itamuai-dumo, neio woko auna se iwati pua, neio wisa sopu to kimidai modobo ie. Nimo ro nisioidiro-dumo auna woko saiki korosa ato, ohu mere to nimo ro ba-nimidai-dumo.”
13 Neio ata aboto pari abera ro ibo gutura, “Namutuna, nio mo ro isaubuti pua. Nio ubi kebase ta-woi-mo kaupoti saiki woko sapuwo to wisa kimade aboto.
14 Marasio, kamade mutu aise dimade-mo, ina aise daimai-mo. Mo ubi ie saro rido edi urubia nirobo, wisa atu modobo ato kimio nio mutu.
15 Mo simara mani simara ubi ato koworohuti ato sabi ra? Saro rido mo ro edi urubia nirobo, nio neio aboto maumo masawe na-woi-dumo, mabu mo neio aboto mea tanaro a-nosioidiro ra?” ’
16 Iesu ro owera ibo goporeai, ‘Ina noudo ie abora etio ra sopu ato na-orowomidiro, saiki ata nedi urubia ro awawo masiro neio ro amadimi-irobidiro-ri. Ina ibose, abora urubia sirio awawo masiro mutu na-orowomidiro, saiki ata neio imese sopu ato ama-irowomidiro-ri.’
Iesu ina geremabowa simara pamo sapuwo to
17 Iesu Ierusarema sabowa to na-gidiai nou 12 kowasoro urubia mutu, nou ro kowasoro urubia ipi gabo ato aise giwotobowa. Nou ro ibo,
18 ‘Owera neito ma-dirowidiro-rimo! Neibi Ierusarema sabowa to nidiai-bimo. Imese Urubia Kiauri Dubu Godi ra urubia ra turituri awawo urubia aboto iato amadima-apoi-ri. Ibose Mose sabi kitamudiro urubia aboto amadima-apoi-ri. Neio ro nou sapuwo to amadimu-utura-ri ibo, “Nedi dubu ro modobo ie kesuai aboto.”
19 Ina nou neio ro Iu owera karo tato urubia aboto amadima-aiwai-ri. Nou neio ro amadime-emasosowado-ri, kerei to amadime-epesuti-ri. Nou neio ro ota kemowotowa ato amadime-emopoguti-ri. Nou bobo ato netewa teibo saiki to ama-orobu-ri. Kaupoti netewa didi saiki nama-orobai-ri, nou pamo rido Godi ro amadi-owameai-ri.’
Iemisi ra Ioane ra ubi ie auna to kararasoro
20 Tuturu to owamo pua Iesu aboto Sebedi orobo ro gou-ro mere teibo mutu. Iedi orobo ro kauhio to aise girimusubua, nou ubi ie Iesu ro nou ubi tanaro osioidiro ri.
21 Iesu ro nou nato gemodowa, ‘Oro etou ri ra?’
Nou ro Iesu ibo gemowameai, ‘Oro ro auna gabamani to nama-omidiro-ri Godi ro kiwaboi maumo ato, mo ata mere tumodi sapuwo ato ba-dowomi, ina ata mere pere sapuwo ato ba-dowomi.’
22 Iesu ro edi orobo ro ibo gemowameai, ‘Nibi edi owera to aro-diebimo, nou maumo nibi umoro oi pua.’
Taie Iesu ro edi mere teibo ro nato gimowapotai-ma, ‘Mo edi temeteme maumo ro neito namadi-odoro-ri, nitiro aboudo modobo ra neito kodoro?’
Neitiro ro ibo, ‘Io, neitiro aboudo modobo ie.’
23 Iesu ro ibo, ‘Morobise ie nedi temeteme ro nitiro ro amado-owea-ri. Urubia dubu tumodi sapuwo ato kowomi, ina ata pere sapuwo ato kowomi, urubia mo ro kituputi modobo pua. Mo abera ro edi na teibo ro gituputai-ma iedi bobo ro neitiro do ie, auna masiro teibo neitiro ro amadi-irobidiro-mari.’
24 Nedi owera ro arua 10 kowasoro urubia ro na-girorowai-rimo, neio auna serawo goi-rimo naramu ra neama ra aboto.
25 Taie neio Iesu ro atu moro to aise gidabuai, nou ro nedi owera ro neito gimowauti, ‘Nio umoro ie, kimibiria tato urubia neio simara eputa urubia mutu e. Neio ro urubia auna kimagege ie woko imesioidiro ri. Ina nio auna umoro ie idaibo kiwaboi urubia neio auna ubi ie keremowabu, neio woko imesioidiro ri urubia se kimasouti.
26 Kaupoti nio ro idaibo tanaro kisioidiro modobo pua. Ata dubu nio abato ubi na-owamo auna masiro korobidiro aboto, nou ro modobo ie nio sowake dubu to kararapoi.
27 Ibose nio ata dubu ata ubi na-owamo ohu ia to komidiro aboto, nou ro modobo ie nio wisa tato woko kisioidiro.
28 Ina atu sosoro tanaro ie, mo Imese Urubia Kiauri Dubu nou se ie, mo neito nou ri ou pua urubia ro mo wisa tato woko emesioidiro ri. Mo a-nou-ro urubia wisa tato woko mo ro imesioidiro ri, ibose mo keremiro aiwai ri sirio urubia ubauba aboudo iapopo ri.’
Iesu ro idomari pogo dubu teibo meana giwai-ma
29 Iesu kowasoro urubia mutu Ieriko sabowa rido na-gosuruwo-birimo, urubia sirio ro nou saro rido aise gobodoro-rimo.
30 Isana netewa teibo idomari pogo dubu teibo gabo bara ato gomidiro-rido. Neitiro umoro na-goi-rido ibo neitiro Iesu ro a-nirohodorai-madie, taie neitiro auna se Iesu aboto nato giaiauti-rido, ‘Abera Naramu, oro Godi ro kohodowa dubu e! Neitiro natonato dimati-maro!’
31 Neitiro edi kiaiauti ro urubia ro na-gimororowai-marimo, neio ro aise gimadohuti-marimo. ‘Ei! Deremasiai-do! Owera na ie!’
Kaupoti neitiro neio ro pupuwo bo gimowaititi-marimo. Neitiro ina auna ia se nato giaiauti-rido, ‘Abera Naramu, oro Godi ro kohodowa dubu e! Neitiro natonato dimati-maro!’
32 Neitiro kiaiauti owera Iesu ro na-gimororowai-ma, nou gabo ato aise gotobowa. Taie neitiro nou ro aise girumai-maro. Nou ro ibo, ‘Nitiro mo ro beda sosoro iwarebai-mari ra?’
33 Neitiro ro ibo, ‘Abera Naramu, neitiro ubi ie idomari mea se kirarowo.’
34 Neitiro nirimagare gimati-maro, taie idomari Iesu ro iato gimowasomai-ma. Neitiro idomari edi tau ato gimowasomai-ma, neitiro idomari meana aise goi-rido, namabu mea se imese giauri-rido. Taie neitiro ro Iesu saro rido imese gobodoro-rido.