21
Iesu eputa dubu to godoro Ierusarema sabowa to
1 Iesu kowasoro urubia mutu Ierusarema sabowa to ido to gorowateai-birimo. Tauo kebase neibi Betepage sabowa to gou-birimo. Betepage sabowa Oribi Podo gomo ato gowamo. Neibi iedi sabowa ro neito orowateai pua, Iesu ro netewa teibo kowasoro dubu teibo gabo ipi ato keba se ioudo gimeriai-maro Betepage sabowa to.
2 Neitiro kebase nou ro ibo gitomudiro-ma, ‘Nitiro edi sabowa ro neito namado-orowateai-ri, nitiro ro orio doniki kainai amado-owea-ri mamu mutu, nou hodo to kemobuai ama-otoi-ri. Ba-dimopurutai-marido, mo aboto neito ba-diwaguwo-marido.
3 Nitiro ata dubu ata ro nama-imodowa-mari ibo, “Nitiro ro edi doniki teibo ro etou mabu ato imopurutai-mado?”, ibo ba-demowameai-do, “Abera Naramu ubi ie neitiro egea mere se kiworohuti-ma, ina nou ro amadi-imowameai-mari.” ’
4 Kebase Godi ipusu owera urubia ro na-gisioidiro-rimo Tarena Buka ato, tanaro morobise to noti gororosioidiro-dumo ibo,
5 Ierusarema sabowa urubia dimowapotai ibo, Nio eputa dubu doniki kainai ohu ato tomidiro-die muro se noto ou-die.
6 Taie iedi kowasoro dubu teibo ro ioudo kebase gasiriai-rido Betepage sabowa to. Neitiro ito na-gorowateai-rido, Iesu ro beda owera to gimowauti-ma ibose to gisioidiro-rido.
7 Neitiro ro edi doniki teibo ro Iesu aboto imese giwaguwo-marido. Iesu aboto na-giwateai-marido, neitiro simara ohu obotama orio doniki kainai gimini ato aise gisouti-rido. Taie Iesu edi doniki kainai ro nou ohu ato aise gomi.
8 Nou doniki ohu ato beda tau ato gomi, auna ia dubu patu Iesu kou gabo ato obotama aise gisouti-rimo. Ibose arua urubia ro ota puara aise gisouti-rimo Iesu kou gabo ato, nou kemowabu sapuwo to.
9 Iesu edi urubia ro gowaboi-rimo, arua keba se arua saro rido nou neio ro turi ato goumai-rimo. Neio ro nou a-gemowabu-rimo, kamade ri nato giaiauti-rimo ibo, ‘Oro Godi ro kohodowa dubu nouse ie, nimo ro memowabu-rimo! Oro Godi ro korosa ta-gomia! Abera Naramu pupuwo mutu oro nou ro se tou-die! Oro se memowabu-rimo!’
10 Iesu Ierusarema sabowa to na-godoro, nou urubia sirio ro na-gowea-rimo, neio erere kimaragoidiro giworohuti-rimo. Neio ro ibo, ‘Nedi dubu ro beda dubu ra?’
11 Iesu edi urubia ro gowaboi-rimo neio ro ibo, ‘Nou Iesu e, nou ata Godi ipusu owera dubu e. Nou Nasareta sabowa dubu e, Gariri duriomoro ato na-owamo.’
Tarena Moto ato namabu korowamade urubia Iesu ro gimabodoidiro
12 Iesu Ierusarema sabowa to edi kodoro ro na-godoro, nou aise gemobodiai Tarena Moto to. Nou ro urubia sirio iato giwia, neio namabu mani to gorowamade-rimo. Arua neio a-geremahudirio-rimo erere duriomoro mani to. Nou ro mani kiamo moro, dumu pawa korowomidiro moro mutu, aise giatutubo.
13 Nou ro ibo nedi urubia ro neio aboto, ‘Tarena Buka ato owera keba se ta-gisioidiro-rimo ibo, Mo moto owamo ibo urubia Godi aboto kararatoro moto ie. Kaupoti nio ro piro urubia agabea to gapoi-rimo.’
14 Iedi tau ro nato Tarena Moto ato idomari pogo urubia, sairo ubauba urubia Iesu aboto ta-gou-rimo meana iwaititi ri, taie neio Iesu ro meana aise giwaititi.
15 Godi ra urubia ra turituri awawo urubia ibose Mose sabi kitamudiro urubia, neio iato ibose to gorowomidiro. Neio ro Iesu iato ta-giauri-rimo awawo meamea tanaro na-gisioidiro. Ibose merebusere kainakaina na-giaiauti-rimo Tarena Moto goro ato ibo, ‘Oro Godi ro kohodowa dubu e, nimo ro memowabu-rimo!’
16 Iedi eputa urubia ro idaibo owera na-girowidiro-rimo merebusere kainakaina ro na-giaiauti-rimo, neio auna serawo goi-rimo. Neio ro ibo Iesu aboto, ‘Merebusere kainakaina gare ma-dimedea, beda owera to hata iaiauti-dumo? Dimadowerai! Mororodiobo-mo!’
‘Io neio mo ro gare ti-nimedea. Ina nio ro owera Tarena Buka ato kioputi ra ibo na-iamo? Merebusere kainakaina, ibose nono kidio bamuai kainakaina mutu, neio oro ro gitamudiro idaibo kemowabu owera iaiauti ri.’
17 Taie Iesu ro Tarena Moto aise gemeserai, imese godori-ro Betani sabowa to, nou duwo kaupoti iato gorobu.
Pigi ota Iesu ro gatodai
18 Ata saiki na-gowaroho kowaroho duwoduwo ato, Iesu Betani sabowa goro rido na-gosuruwo-ro, ina imese gidiai Ierusarema sabowa to. Ipi gabo ato nou sogoi ro gorobai.
19 Ina gabo bara ato nou ro pigi ota ta-gowea, nou aboto imese gou pigi gumuni iosora ri. Ohu to na-gawota puara patupatu gotoi, ata iopu tato ie. Taie iedi ota ro nou ro nato gatodai ibo, ‘Oro mo ro a-nemowapotai, iopu oro aboudo kiasesuti gabo a-nopai.’ Tuturu to owamo pua iedi pigi ota ro aise garawo, penepene imese gotoi.
20 Kowasoro urubia ro na-gowea-rimo iedi pigi ota ro karawo na-gotoi, neio kimaragoidiro ro giopia. Neio ro ibo, ‘Nedi pigi ota ro hio to beda sosoro arawo?’
21 Iesu ro neio ibo gimowameai, ‘Nio mo ro morobise owera mimowapotai-ro! Nio abato morobise kimibiria na-iamo, ataata kimaragoidiro tato, nou se pua beda tanaro ro ororosioidiro pigi ota aboto. Nio modobo koi ie podo aboto kutura ibo, Podo, obo to dodori!, ina iedi podo ro oro owera to obo to kodori ie.
22 Ina nio abato morobise kimibiria na-iamo, ataata kimaragoidiro tato, nio ro Godi etou nakomu ri kararatoro ra, nio ro mea wisa nou aboudo kiauri ie.’
Iesu ro urubia etu ubi ato gimabodoidiro Tarena Moto rido?
23 Iesu Tarena Moto to na-godoro urubia nou ro iato gitamudiro. Nedi kitamudiro ro na-gitamudiro, Godi ra urubia ra turituri awawo urubia, sabowa kiauri awawo urubia mutu, neio Iesu aboto nato gou-rimo. Neio ro Iesu nato gemodowa-rimo, ‘Oro ro Tarena Moto ato urubia na-giaipirio, namabu na-giatutubo, etu ubi ato gisioidiro?’
24 Iesu ro neio owera ibo gimowameai, ‘Tauo nio mo ro mimodowa-ro, mo nio ro wisa owera namadidimo-owameai-ri, nio wisa mo ro nato nama-imowapotai-ri ibo mo etu ubi ato nisioidiro edi tanaro ro.’
25 Taie neio Iesu ro nato gimodowa, ‘Ioane obo to kiwarumiauti dubu, etu ubi ato gisioidiro urubia nou ro obo to na-iwarumiautiti? Godi Adiri sabowa ato na-omidiro-die nou aboudo ra, o urubia aboudo ra?’
Neio ro nedi owera ro na-girorowai-rimo, neio nakara se iato geremowauti-rimo. ‘Nimo ro ibo namadimu-utura-ri, “Godi aboudo ie,” nimo nou ro ina anamadi-imodowa-ri ibo, “Ina mabu boira Ioane owera nio ro imibiria tato na-iamotiti?”
26 Ina nimo ro ibo namadimu-utura-ri, “Urubia aboudo ie,” nimo tere ie nedi urubia sirio nato na-orowotoi neio aboto, etu umoro ra neio aboudo ubauba anamadimo-owea-ri. Mabu neio auna se imaragoidiro-dumo ibo Ioane Godi ipusu owera dubu e.’
27 Taie neio ro Iesu ibo gemowameai-rimo, ‘Ioane ro etu ubi ato gisioidiro nimo umoro pua.’
Iesu ro neio ibo gimowameai, ‘Ina nio mo ro imowapotai-ri pua nedi tanaro ro mo ro etu ubi ato nisioidiro.’
Totomu mere teibo sapuwo to ie
28 Iesu ro neio owera aise gimowautiwado Godi ra urubia ra turituri awawo urubia, sabowa kiauri awawo urubia mutu. Taie neio nou ro nato gimodowa, ‘Nedi totomu ro nio ro maumo mea se nou ba-demaragoidiro-mo. Ata dubu netewa teibo mere teibo giworohuti-ma. Taie karasomai abera, naramu dubu aboto nato gou-ro, nou ro ibo, “Mere, gereipi pari abora oro ro ama-emowati-ri.”
29 Nou ro ibo, “Ei, mo ubi tato ie.” Kaupoti iedi mere ro kimaragoidiro ina aise giwesegerai, taie imese gou pari emowati ri.
30 Karasomai abera ina neama dubu aboto nato gou-ro, nou ro atu sosoro owera nato gutura, “Mere, gereipi pari abora oro ro ama-emowati-ri.” Iedi saro mere ro abera ro ibo gemowameai, “Io anama-emowati-ri.” Kaupoti pari nou ro emowati pua, owera kawa gutura.
31 Iedi mere teibo ro kiauri-ma ato, abera ubi tanaro etu ro gosioidiro?’
Neio ro ibo, ‘Keba mere.’
Iesu ro neio ibo gimowapotai, ‘Nio mo ro morobise owera mimowapotai-ro! Ubauba urubia idaibo takesi kimade urubia, era gabo mamio, ubauba aboudo neio ro erewesegere-dumo, nio neio ro imatuti-dumo ina Godi edi kiwaboi maumo ro neito odoutiti-dumo.
32 Ioane nio aboto egea se gou-ro, nio nou ro ta-imasoutiti mea tuputupu gabo boido aidiro-die, nou obodoro ri. Kaupoti nio ro nou owera imibiria pua. Takesi kimade urubia, era gabo mamio mutu, Ioane owera neio ro gimibiria-rimo. Neio edi tau ato gerewesegerai-rimo ubauba aboudo nio ro ta-giauri-rimo. Kaupoti nio ubi tato goi-rimo nou owera kimibiria aboto, ina ubauba aboudo nato erewesegerai pua.’
Pari ubauba urubia ro emeaurititi-mo nou totomu e
33 Iesu ro neio ibo gimowauti, ‘Dirowidiro-mo! Nio mo ro ata totomu anama-imowauti-ri. Duriomoro abera nou simara goto kere ato gereipi pari nato gosioidiro. Iedi pari ro kara to ta-gemowagegeidiro, nou ro bobo na-goboba gereipi iopu kituti moro ie. Ina ohu moto kainai iato gididi pari ioudo kiauri sapuwo to. Nou pari emeauri na urubia nou ro iato girobai. Taie nou koroho aboto ata duriomoro to imese gaimai.
34 Gereipi edi pari ato na-gorowotoi, gumuni na-girobai, taie pari abera ro sowake urubia nato gimeriai pari kemeauri urubia aboto, simara sapuwo rido gereipi gumuni emodoho ri.
35 Pari kemeauri urubia ro sowake urubia na-giwia-rimo, neio ro aise girobai-rimo. Ata dubu ubauba mino to gado-birimo, ata gesuai-birimo, ata dubu nadi to gobo-birimo pamo nato gowea.
36 Taie ina pari abera ro arua sowake urubia nato gimeiriai, kebase sipu tato gimeiriai-bi, nedi tau ro nato sipu mere se gimeiriai-bi. Pari kiauri urubia ro iedi sowake urubia ro na-giwia-rimo, atu sosoro tanaro to ibose to giworohuti-rimo.
37 Taie iato nou simara ia mere saro ia rido nato gemeiriai. Nou ro ibo, “Mo ia simara mere anama-emeiriai-ri, nou neio ro mea mino to amadimi-iauri-ri.”
38 Kaupoti nou neio ro na-gowea-rimo, neio nakara se iato geremowauti-rimo ibo, “Nedi mere ro abera edi namabu sirio ro nou ro ama-irahidimai-ri. Mou-rimo anamadimo-opia-ri. Taie nedi pari ro nimo do to nato ama-ararapoi-ri.”
39 Taie iedi mere ro kara goro rido na-geherai-rimo iato aise gopia-rimo.
40 Ina noudo ie pari abera namadi-orowameai-ri, nou ro etou tanaro amadi-osioidiro-ri pari kemeauri urubia aboto?’
41 Godi ra urubia ra turituri awawo urubia, sabowa kiauri urubia mutu, Iesu owera neio ro ibo gemowameai-rimo. ‘Nedi ubauba urubia ro neio nou ro ama-iopiauti-ri. Ina nedi pari ro nou ro arua urubia aboto ama-iapoi-ri emeauri ri. Pari ato gereipi gumuni namadimo-oi-ri, neio umoro ie pari abera neio ro sapuwo amadime-emodoho-ri, ina sapuwo neio do ie.’
42 Iesu ro ibo neio aboto, ‘Tarena Buka ato owera na-iamo nio ro keremoputi pua ra? Moto keremari urubia ro edi nadi ro na-gowatobetai-rimo kakate moro ato na-owamotiti, iedi moto ro edi nadi ro kowotoi ie. Ina Abera Naramu Godi ro nedi tanaro ro gosioidiro. Nimo ro nedi tanaro ro na-niauri-dumo, imese meana ia tanaro ie.’
43 Iesu ro owera ina neito gopai, ‘Ina noudo ie nio mo ro nedi owera ro nou mimowapotai-ro, Godi ro kiwaboi tanaro nio aboudo ama-iwagare-ri, arua urubia Godi edi kiwaboi tanaro ro nato neio ama-imapoi-ri. Godi edi kiwaboi maumo ro nato neio ro Godi ubi tanaro amadimi-isioidiro-ri.
44 Ibose nedi nadi ro nato beda urubia ro irohumo-dumo, neio imese moro to amadime-eresebuti-ri. Nedi atu nadi ro nou ro beda urubia imahidimo, neio imese moro to ama-ipatarumowado-ri.’
45 Nedi totomu owera ro Godi ra urubia ra turituri awawo urubia, Parasi urubia mutu, neio ro na-girowidiro-rimo Iesu aboudo, neio ta-geremasibai-rimo ibo, nedi totomu ro pari ubauba urubia ro na-emeaurititi-mo, nimo sapuwo to orowauti-die.
46 Taie iato neio gabo giosora-rimo Iesu orobai ri, koto aboto nato owou rie. Kaupoti neio ro urubia tere ta-gimati-rimo, mabu urubia sirio ta-gimibiria-rimo ibo Iesu nou Godi ipusu owera dubu ata nouse ie.