22
Totomu marete soriomu sapuwo to ie
1 Iesu ro totomu na-imowautiti maumo mutu e. Ina nou ro ata totomu nou gimowauti.
2 ‘Godi edi kiwaboi tanaro ro nou idaibo sosoro ie. Ata duriomoro eputa dubu, auna soriomu simara mere marete koi sapuwo to nato gemododiai.
3 Nou keremododiai woko na-goporeai taie nou ro sowake urubia nato gimeirio nou ubi urubia irobo ri nedi soriomu ro nou aboto ou ri.
Kaupoti neio ubi tato goi-rimo,
4 taie nou ro ina arua sowake urubia nato gimeiriai, nou ro ibo, “Mo ro kebase edi urubia nirumai ina ba-dimowapotaidiro-mo ibo ohona neio sapuwo to tau kimododiai ie. Meamea kasawi ia kiwoubua burumukau neio sapuwo to tau kimopiauti ie. Imese namabu patu neio sapuwo to modobo tau kiwai ie, neio aise ba-mou-rimo!”
5 Kaupoti neio gare iado pua nedi tanaro ro nou sapuwo to, simara ubi tanaro gimaragoidiro-rimo. Ata dubu nou simara woko gisioidiro, ata pari aboto gou.
6 Arua ro nedi sowake urubia ro aise girobo-rimo, ubauba mino to giado-rimo, ina aise giopiauti-rimo.
7 Soriomu abera ro nedi owera ro na-girorowai, nou auna ia serawo ro gorobai. Taie nou ro boso urubia nato gimeiriai nedi kiopiauti urubia ro neio ro iopiauti ri. Neio ro imese aise giopiauti-rimo. Ibose neio edi sabowa gebari ro era to aise gosubuwa-rimo.
8 Ina duriomoro eputa dubu ro arua sowake urubia iato gimowapotai ibo, “Soriomu ohona sirio imese tau kimododiai ie. Mo ro edi urubia nirumai neio neito orowateai pua. Neio meamea urubia pua nedi soriomu ohona ro nou kiho aboto.
9 Abora nio mo ro a-nitiodorai beda urubia ro namadimi-iwia-ri gabo ipi ato na-oroho-dumo, nedi soriomu ro nou aboto neio aise ba-mou-rimo!”
10 Taie nedi owera ro neio ro na-girorowai-rimo, imese gaimai-rimo. Beda urubia giauri-rimo gabo ipi ato na-goroho-rimo, idaibo ubauba urubia, meamea urubia, neio ro aise girobo-rimo, imese giwou-rimo nedi soriomu ro nou aboto. Taie iedi soriomu moto ro aise girotomuai.
11 Tuturu to owamo pua iato edi eputa dubu ro nou ro godoro-ro kiroru urubia iraturiomai ri. Nou na-giraroweauti, nou ro ata dubu nato geibimai marete soriomu obotama kiroiti tato gomidiro.
12 Eputa dubu ro ibo, “Namutuna, oro marete soriomu obotama iroiti pua. Ina oro beda mabu ato odoro-die neito?”
Iedi dubu ro nou ro eputa dubu owera na-gemororowai, nou owera tato imese gomidiro.
13 Taie eputa dubu ro sowake urubia iato gimowapotai, “Nedi dubu ro tu ra sairo ra demotohiti-mo. Temeteme iamo beda moro ato imaro-dumo, ibonoro kiririkiriri na-iwaro, iedi duwoduwo moro ro neito deherai-mo!” ’
14 Iesu ro owera neito gopai, ‘Sirio urubia Godi ro tiroru-die sekere, kaupoti neio maumo rido sipu tato urubia nou ro tihoduti-die.’
Iesu Parasi urubia ro gemodowa-rimo takesi mani kiaremo sapuwo to
15 Parasi urubia ro Iesu na-gemeserai-rimo, nakara moro ato owera iato geremowauti-rimo Iesu neio ro korobai sapuwo to. Neio ubi a-giamo Iesu ro ata ubauba owera kutura, ina gabamani dubu aboto nato owou rie.
16 Taie neio simara sowake urubia Herodi kowarebai urubia mutu Iesu aboto nato gimeiriai-rimo. Iedi karatigi urubia ro Iesu aboto nato gutura-rimo ibo, ‘Kitamudiro dubu, nimo umoro ie oro morobise dubu e. Ibose oro ro Godi ubi gabo morobise to itamudirotiti. Arua urubia oro ro iadodorowado pua, oro neio ro kageawado aboto. Mabu imese urubia oro ro atu mino to tiworohutiti.
17 Ina noudo ie nimo oro ro ma-dimowapotai-ro, modobo ra nimo ro takesi mani kiaiwo Roma gabamani eputa dubu Sisa aboto?’
18 Kaupoti neio edi ubauba kimaragoidiro ro Iesu ro keba se ta-gimowea. Nou ro ibo, ‘Nio imese auna karatigi urubia ie! Mabu boira mo nio ro na-nowaibirio-dioumo?
19 Mani iopu ata takesi edi na to imadetiti-dumo, neito ma-dowou-rimo.’
Taie mani iopu iato gemowou-rimo.
20 Iesu ro ibo, ‘Mani iopu ato etu asaso ro ateidiro, ina etu masiro ro owamo?’
21 Neio ro ibo, ‘Sisa asaso ro ateidiro masiro mutu.’
Iesu ro ibo, ‘Ina noudo ie beda nakomu ra Sisa do ie, Sisa aboto gi-aiwai-ri. Ina beda nakomu ra Godi do ie, Godi aboto gi-aiwai-ri.’
22 Neio ro nedi owera ro na-girorowai-rimo, neio imese giwaweauti-rimo. Taie Iesu neio ro aise gemeserai-rimo, ata moro to imese gorowadau.
Pamo rido kireruburio kararatoro owera ie
23 Sadusi urubia ibo imibiria-dumo, urubia dubu na-waraburai nou ina keremiro owea-ri pua. Taie edi atu saiki ro nato, Sadusi urubia kararatoro owera mutu Iesu aboto nato gou-rimo.
24 Neio ro ibo, ‘Kitamudiro dubu, Mose ro Godi owera ta-giatiti sabi maumo ato ibo, urubia dubu na-waraburai, nou orobo garamu na-emeserai-die mere besere tato, iedi garamu orobo ro neama ro ba-medea. Neama ro edi merebusere ro na-irasomai iedi orobo ro nou abato, nou merebusere to ararasoro-ri pua, naramu merebusere to kararapoi ie.’
25 Neio ro ina ibo, ‘Ata tau 7 naminiramio neio ro gorowomidiro. Naramu dubu ro gedea orobo kebase, iato nou aise garaburai. Ina edi garamu orobo ro neama ro aise gedea.
26 Iedi neama ro nou mutu tuturu to omidiro pua, nou aise garaburai. Ina iedi atu garamu orobo ro ata neama ro aise gedea. Ina iedi neama ro nou mutu tuturu tu omidiro pua, nou aise garaburai. Iedi garamu orobo ro 7 naminiramio ro karemo to ta-gororoporeai.
27 Saro to edi garamu orobo ro aise garaburai.
28 Nimo karatoro owera ibo ie, Urubia pamo rudo Godi ro edi tau ato namadi-iwameai-ri, iedi orobo ro 7 tau to naminiramio ro ta-garemo-rimo, ina nou etu orobo to ama-ararasoro-ri?’
29 Neio Iesu ro ibo gimowameai, ‘Nio morobise gabo ato ou pua, karasaubuti gabo ato ou-dumo. Mabu nio umoro pua Godi edi owera ro Tarena Buka ato na-iamo. Ibose nio umoro pua Godi edi pupuwo korosa ro.
30 Urubia Godi ro pamo rudo namadi-iwameai-ri, neio Godi sowake urio Adiri sabowa ato na-irowomidiro, neio sosoro ama-irowomidiro-ri, kararemo tato.
31 Kaupoti urubia Godi ro pamo rido kiwame tanaro sapuwo to, nio ro owera keremoputi pua ra Tarena Buka ato na-iamo? Godi ro kebase owera nio aboto ta-gowapotai-ro ibo,
32 Aberaham, Aisaki, Iakobo, mo neibi ro ti-nemowabutiti-bimo. Neibi ta-gorowaburo-birimo, ina abora neibi keremiro ie. Godi abora neibi ro temowabu-bimo, mabu imese sirio urubia neio abora teremiro-dumo Godi sosoro gabo ato. Urubia abora na-orowomidiro, urubia na-gorowaburo-rimo, neio atu se Godi ro tiauri-die.’
33 Urubia sirio ro na-girorowai-rimo Iesu edi kitamudiro owera ro, neio kimaragoidiro ro giopia.
Nedi tanaro teibo ro auna tanaro teibo ie
34 Sadusi urubia Iesu owera to edi tau ato na-giwaweauti-rimo, Parasi urubia ro edi owera ro ta-girorowai-rimo. Taie neio atu moro to nato na-garadabuti-rimo,
35 ata dubu Iesu aboto neio ro nato gotiodorai-rimo. Nedi dubu ro Iu urubia edi sabi sirio ro auna umoro ie. Nou ubi ie Iesu owaibia ri, noudo ie nou kararatoro owera mutu kou Iesu aboto. Nou ro ibo,
36 ‘Mose sabi imese sirio ia ie, ina nou maumo ato auna sabi beda sabi ra?’
37 Iesu ro nedi dubu ro ibo gemowameai, ‘Godi nirimagare kemati modobo ie morobise giropu to, morobise ubi to, morobise kimaragoidiro to, imese nou aboto kiaiwai modobo ie.
38 Godi edi sabi sirio maumo ato na-owamo nedi sabi ro imese auna ia sabi ie.
39 Ina ata sabi nou maumo ato na-owamo, nou e. Modobo ie arua urubia oro ro nirimagare kimati, oro nirimagare nakara se beda sosoro eremati.
40 Mose edi sabi sirio ro ibose Godi ipusu owera urubia ro edi buka owera sirio ro na-gisioidiro-rimo, iedi auna sabi teibo ro neitiro aboudo irobu-die.’
Godi ro Kohodowa Dubu nou etu nasa ra
41 Parasi urubia ina atu moro to nato garadabuai-rimo. Taie neio Iesu ro nato gimodowa,
42 ‘Godi ro kohodowa dubu nou etu nasa ra? Nio beda sosoro imaragoidiro-dumo?’
Neio ro Iesu ibo gemowameai-rimo, ‘Nou Deibidi nasa ie.’
43 ‘Ina mabu boira Deibidi Tarena Urio ro kutura owera umoro na-gowai ibo Godi ro kohodowa dubu Deibidi Abera Naramu e? Mabu Deibidi ro owera ta-giatiti Tarena Buka ato tiamo ibo,
44 Godi ro ta-gutura mo Abera Naramu aboto, Oro mo tumodi sapuwo ato ba-domidiro womu tato oro nasa urubia mo ro nama-iturai-ri oro sairo mabu ato.
45 Deibidi ro Godi ro Kohodowa Dubu Abera Naramu to gasoro. Ina mabu boira arua urubia ro ibo na-waro-dumo ibo nou Deibidi nasa ie?’
46 Ata dubu ata ro Iesu kemodowa owera modobo pua wisa kemowameai aboto. Iedi saiki ro neido ata dubu ata modobo pua nou aboto kou kemodowa owera mutu.