23
Iesu ro sabi kitamudiro urubia sapuwo to koko owera gimia
1 Taie Iesu ro urubia sirio, nou kowasoro urubia mutu neio aboto koko owera nato garo. Nou ro ibo,
2 ‘Mose sabi kitamudiro urubia, Parasi urubia mutu neio masiro mutu urubia ie, Mose edi sabi sirio ro urubia aboto kimabuti sapuwo to.
3 Ina noudo ie neio edi owera ro nio ro aise kibodoro modobo ie. Kaupoti neio ro edi tanaro ro na-isioidirotiti-dumo nato aise imatiouti mamo. Mabu neio ro beda owera karo ra, durupi to tanaro aise isioidiro-ri pua.
4 Neio ro urubia auna se kimediawado ie Mose sabi sirio koko mino to kibodoro aboto. Ina urubia mibo ohu rido aise imotomotiti-dumo. Kaupoti neio tu iaiwo-ri pua nedi urubia ro kiwarebai aboto.
5 Neio ro beda tanaro sirio isioidirotiti-dumo, neio ubi ie urubia ro imowabu ri. Idaibo neio ro pauso witoro ato Godi edi sabi owera ro peba titi kainakaina to kisioidiro ie, Iu urubia sirio ro beda sosoro isioidirotiti-dumo. Ina neio iedi pauso ro boroboro ta-giwaititi-rimo, urubia ro kimowabu aboto. Ibose Iu urubia sirio isitoro simara ohu obotama rido iremebutiti-dumo, Godi edi sabi sirio ro kimaragoidiro sapuwo to. Kaupoti sabi kitamudiro urubia, Parasi urubia mutu, neio ro simara isitoro tututu nakara se irimowaititi-dumo, urubia ro kimowabu aboto.
6 Soriomu tau ato neio auna ubi ie meamea komidiro moro kimaberewado, ibose Iu urubia karadabu moto ato.
7 Ibose neio auna ubi ie kamade owera to kiatoro maketo moro ato, ina urubia ro kitamudiro urubia to kiasoro.
8 Kaupoti nio sapuwo to owera ibo ie, mo nio ia morobise kitamudiro dubu kaupoti nouse ie, ina nio naminiramio ie. Ina noudo ie nio modobo pua arua urubia ro kitamudiro urubia to kiasoro.
9 Ibose nio ro abera to ata sopu duriomoro dubu ata apoi mamo. Mabu nio Abera kaupoti nou se ie, Adiri sabowa ato na-omidiro-die.
10 Ibose nio ro ata dubu kitamudiro dubu to apoi mamo, mabu nio kaupoti kitamudiro dubu mutu e, Godi ro kohodowa dubu nouse ie.
11 Abora nedi tau ro nato nio abato awawo urubia to edi urubia ro ararasoro-dumo, neio ro nio wisa tato woko ba-mimesioidirotiti-mo.
12 Ibose abora awawo to nakara se edi urubia ro ararasoro-dumo, neio Godi ro sopu to amadi-iwororuwo-ri. Ina ibose etio ra sopu to nakara se na-orowororuwoidiro-dumo, neio Godi ro awawo masiro ama-imio-ri.’
Iesu ro Mose sabi kitamudiro urubia Parasi urubia mutu gimaiauti
13-14 ‘Mose sabi kitamudiro urubia Parasi urubia mutu, auna ubauba nio ro amadimo-owea-ri! Nio imese karatigi urubia ie! Urubia ubi ie Godi edi kiwaboi tanaro ro neito kodouti. Kaupoti neio kodouti aboto gabo nio ro imoputi-dumo. Nio ia ibose, ito odouti pua.
15 Mose sabi kitamudiro urubia Parasi urubia mutu, auna ubauba nio ro amadimo-owea-ri! Nio imese auna karatigi urubia ie! Obo ipi ato na-irarasiouti-dumo duriomoro sirio nio ro tiporeai-dumo pe to koroho ibose sairo to koroho, womu tato dubu kaupoti nio ro na-wageai-dumo nio kiwasoro aboto. Ina nio kiwasoro dubu to na-wararapoi, nedi dubu ro nio ro emododiai-dumo era paruo to ou rie. Nio ro idaibo tanaro na-isioidiro-dumo, nio nou ro kirohodorai ie ubauba tanaro kisioidiro mutu era paruo to kou aboto.
16 Nio ro urubia iwaboi-dumo, kaupoti nio idomari pogo urubia ie! Urubia nio ro duwoduwo maumo to iwaguwo-dumo. Ina noudo ie auna ubauba nio ro amadimo-owea-ri. Urubia nio ro ibo itamudiro-dumo, urubia dubu ro hodo kemasaubiai owera karo ato, nou Tarena Moto masiro na-wapoi nou owera pupuwo kowai sapuwo to, nou dorogora owera karo ie. Ina nio ro ibo, urubia dubu ro nou simara hodo kemasaubiai owera nama-esebea-ri, io modobo ie, ata ubauba tato ie. Ina nio ro urubia ibose to itamudiro-dumo, urubia dubu ro hodo kemasaubiai owera karo ato, gorodi nadi Tarena Moto ato na-iamo, nou masiro na-wapoi nou owera pupuwo kowai sapuwo to, taie nou ro neito koko ta-wowai, nou edi kemasaubiai owera ro ba-mobodoro.
17 Nio imese bokiki tato urubia ie! Pogo urubia ie! Auna nakomu etou ra, gorodi ra o Tarena Moto ra? Gorodi Tarena Moto ato na-iamotiti, neio Tarena Moto ro iwaititi tarena.
18 Ina nio ro ata tanaro ibose titamudiro-dumo, ata dubu ro kemasaubiai owera kutura ato, nou ro tarena patapata kimatowo moro masiro na-wapoi, nou owera pupuwo kowai sapuwo to, nou dorogora owera karo ie. Ina nio ro urubia ibose to itamudiro-dumo, urubia dubu ro hodo kemasaubiai owera karo ato, kimatowo namabu masiro na-wapoi nou owera pupuwo kowai sapuwo to, taie nou ro neito koko ta-wowai, nou edi kemasaubiai owera ro ba-mobodoro.
19 Nio imese pogo urubia ie! Auna nakomu etou ra, kimatowo nakomu ra o kimatowo patapata ra? Io, kimatowo patapata ie! Mabu dao patapata ro kiwai ie tarena, Godi aboto kiaiwo sapuwo to.
20 Ina noudo ie etu ra tarena patapata masiro na-wapoi nou kemasaubiai owera pupuwo kowai sapuwo to, tarena patapata masiro se apoi-ri pua, nou ro beda kiaiwo nakomu na-iamo patapata ato, nou masiro ibose to kiapoi ie.
21 Ina ibose etu ra Tarena Moto masiro na-wapoi nou kemasaubiai owera pupuwo kowai sapuwo to, nou Tarena Moto masiro se apoi-ri pua, nou ro Tarena Moto goro ato etu ro imidirotiti, nou masiro ibose to kapoi ie.
22 Ina ibose etu ra Adiri sabowa masiro na-wapoi nou kemasaubiai owera pupuwo kowai sapuwo to, nou Adiri sabowa masiro se apoi-ri pua, nou ro Godi edi komidiro nakomu ro ibose to kapoi ie, ina nedi komidiro nakomu ro etu ro nou ato na-imidirotiti, nou masiro ibose to kapoi ie.
23 Parasi urubia Mose sabi kitamudiro urubia mutu, nio imese karatigi urubia ie! Nio ro auna ubauba amadimo-owea-ri. Nio ro pari ato kibouti ie ohona topo kiwaititi namabu kainakaina, idaibo gasaro. Nio ro kidabuti ie, takamai kiamotuti ie, kioputi ie ibose iato kihoduti ie. 10 soirio to na-ihoduti-dumo ata soirio Godi aboto kaiwai sekere. Kaupoti nou edi awawo sabi ro nio ro huru gimowou-rimo. Idaibo tuputupu tanaro nio ro kisioidiro pua arua urubia aboto, urubia nio ro nirimagare kimati pua, ibose nio ro Godi edi owera ro durupi to mea se kisioidiro pua. Nedi awawo sabi ro nio ro ba-gibodoro-rimo. Ina ibose kainakaina sabi nio ro kibodoro modobo ie.
24 Nio ro urubia iwaboi-dumo, kaupoti nio idomari pogo urubia ie! Nio idaibo sosoro ie, emume kaupoti obo panikere to korodobia ato, nio ro hio ito kidimai ie. Kaupoti nio ro kemoro momuo se komodiai ie obo mutu kodio ie.
25 Parasi urubia Mose sabi kitamudiro urubia mutu, nio imese karatigi urubia ie! Nio ro auna ubauba amadimo-owea-ri. Nio ro mereki ra panikere ra ohu se iwioutiti-dumo, maumo kiwiouti pua. Mabu arua urubia namabu nio ro pupuwo to iwasitititi-dumo, ina simara ubi tanaro ro iwaboioidiro-dumo.
26 Parasi urubia, nio imese pogo urubia ie! Kebase nio ubauba aboudo ba-derewesegerai-mo. Nou idaibo sosoro ie, mereki ra panikere ra goro mea se kiwiouti-ma ato, taie ohu marea tato nato amadimo-oi-ri.
27 Mose sabi kitamudiro urubia Parasi urubia mutu, nio ro auna ubauba amadimo-owea-ri. Nio pamo urubia bobo ede sosoro ie, keakea penita to ta-giadiriti-rimo. Bobo ohu urubia ro na-iauri-dumo imese meana ia ie. Kaupoti bobo maumo ato pamo durupi na-epuse soro mutu, nio idaibo sosoro ie.
28 Nio urubia ro ohu takamai na-imiauri-dumo, taie nato karo ie ibo nedi urubia ro mea tuputupu urubia ie. Kaupoti nio maumo ato karatigi tanaro auna ia se isioidiro-dumo, ina sabi nio ro auna se isebo-dumo.
29 Mose sabi kitamudiro urubia Parasi urubia mutu, nio karatigi urubia ie! Nio ro auna ubauba amadimo-owea-ri. Nio edi nasaio ro Godi ipusu owera urubia neio ro ta-iopiautiti-mo, ina neio bobo ohu ato nio ro awawo keremasoro namabu timesioidirotiti-dumo. Ibose meamea tuputupu urubia neio bobo ohu ato kakamu nio ro imobouti-dumo.
30 Nio ibo iaro-dumo nimo nasaio tau ato korowomidiro rasiri ie, neio ro Godi ipusu owera urubia edi tau ato iopiautiti-mo, nimo neio aboto aradabu-ri pua.
31 Nio abora nakara se noto orowapotai-dumo ibo nio simara nasaio ro giopiauti-rimo, nio hodo neio aboudo tirobu-die.
32 Nedi kiopiauti tanaro ro nio edi nasaio ro neio ro egea mere se ta-gowioidiro-mo. Ina nedi kiopiauti tanaro ro nio ro aise dowou-mo womu tato kiritomuai.
33 Nio imese sibi bagawe sosoro ie, nio Godi ro ubauba urubia to ama-iapoi-ri. Nio korowadau gabo tato ie, nio nou ro era paruo to ama-iherai-ri.
34 Ina noudo ie nio mo ro a-nimowapotai, mo ro ina Godi ipusu owera urubia, muro urubia, Godi owera kitamudiro urubia, nio aboto anama-imerio-ri. Neio arua nio ro amadimi-iopiauti-ri, arua nio ro ota kemowotowa ato amadimi-imopoguti-ri. Arua nio ro karadabu moto ato kerei to amadimi-ipesuti-ri. Arua nio ro sabowa gabogabo to amadimi-iaipirio-ri.
35 Ina noudo ie iedi mea tuputupu urubia sirio ro na-iopiautiti-mo, iedi ubauba wisa ro nio ia ro amadimi-imidai-ri. Eiboro kebase naramu ro ta-gopia, ina iedi kororopiauti ro ioudo garatamuai-ro. Nou mea tuputupu dubu e ina nou karima ta-giroruwo imese mororuwo-ro Sekaraia to, nou Berekia mere ie. Nou nio nasa naminami ro gopia-rimo. Tarena Moto ina dao kimatowo patapata neitiro turituri ato neio ro nato gopia-rimo. Nedi tuputupu urubia ro kiopiauti sapuwo to, iedi wisa ro nio ia ro amadimi-imidai-ri.
36 Abora nio mo ro morobise owera mimowapotai-ro, nedi tanaro sirio ro neio ro na-gisioidiro-rimo imese mibo patu neio sapuwo to nio ia ro amadimi-iratai-ri.’
Iesu Ierusarema sabowa sapuwo to giropu mibo ro gorobai
37 ‘Ierusarema urubia nirimagare babio, Godi ro ipusu urubia nio aboto na-gimeirio-ro, nio ro giopiauti-rimo. Ibose owera sowake edi urubia ro goworohuti-rimo, nio ro nadi to giopiauti-rimo. Mo ubi sirio tau to owamotiti nio atu moro ato iwomidiro ri, mamu kakaba ro kainakaina tamu maumo ato beda mino to kiohidiro ra nio mo ro ibo iohidiro rie. Kaupoti nio simara ubi tato ie.
38 Ina owera neito ma-dirorowai-rimo! Nio edi moro ro urubia tato moro to ama-ararapoi-ri, sawakuri ro ama-owamo-ri.
39 Nio mo ro morobise owera nou ri nimowapotai, mo nio ro sosoro iauri-ri pua, womu tato nio ia ro karo ibo, “Oro Godi ro korosa ta-gomia. Abera Naramu pupuwo mutu oro nou se tou-die.” ’