24
Tarena Moto amadimo-ototoro-ri
1 Iesu Tarena Moto na-gemeserai imese gosuruo-ro. Nou kowasoro urubia nou aboto nato gou-rimo, Tarena Moto owera mea sosoro sapuwo to gemowapotai-rimo.
2 Ina neio Iesu ro nato gimodowa, ‘Nio ro nedi Tarena Moto ro arua moto mutu neio a-iauri-dumo ra? Nio mo ro morobise owera mimowapotai-ro, nedi nadi moto ro na-orowotoi, saiki ata urubia ro amadimi-itotouti-ri. Nadi sirio amadime-eresebuti-ri, goto ato kiamo kawa ama-iamo-ri.’
Womu tau ato beda tanaro sirio ro amadimo-ororosioidiro-ri
3 Iesu Oribi podo ohu to na-gioro, nakara moro ato iato gomidiro. Taie nou kowasoro urubia nou aboto nakara se nato gidiai-rimo. Neio ro ibo, ‘Nimo ma-dimowapotai-ro nedi tanaro ro beda tau ato ama-ororosioidiro-ri? Ina beda tanaro ro amadimo-ororosioidiro-ri nimo umoro koi sapuwo to ibo, oro nedi tau ro nato amadi-orowameai-ri, ibose duriomoro womu to nama-ereredea-ri?’
4 Neio Iesu ro ibo gimowameai, ‘Nio mea se ba-deremowotoi-mo, nio modobo pua arua urubia ro kisaubuti.
5 Mabu urubia sirio amadidimo-oroho-ri, neio ro ibo amadima-aro-ri “Mo Keriso nou se ie.” Ina urubia sirio neio ro amadimi-isaubuti-ri.
6 Nio ro ibose boso owera amadimi-irowidiro-ri aupi duriomoro ato namadimo-ororosioidiro-ri. Ibose boso owera arua urubia aboudo amadimi-irowidiro-ri muso duriomoro ato namadimo-ororosioidiro-ri. Kaupoti nio tere nato oi ate, koko se aise ba-dorowotoi. Nedi tanaro ro kebase ba-mororosioidiro-mo, kaupoti womu tau simara se amadi-orowapotai-ri.
7 Ata duriomoro urubia ata duriomoro urubia mutu amadimo-orobo-ri. Ibose ata owera urubia ata owera urubia mutu amadima-arado-ri. Ibose ohona tato tau sirio duriomoro ato amadima-araremo-ri, urubia sirio sogoi ro ama-iwati-ri. Ibose erere duriomoro ato sopu momuruwo ro duriomoro erere tau ato amadimi-imuruwouti-ri.
8 Nedi tanaro sirio ro namadimo-ororosioidiro-ri, urubia orobo mere temeteme ro kowaibia na-watamuai, tanaro idaibo sosoro amadimo-ororosioidiro-ri.
9 Nio arua urubia ro gabamani tu to amadimi-iaremo-ri, ina neio ro ubauba mino to amadimi-iworohuti-ri, ina arua amadimi-iopiauti-ri. Nio erere duriomoro urubia ro masawe amadimi-iwia-ri, mabu nio ro mo nowasoro-dumo.
10 Iedi tau ro nato urubia sirio mo kimibiria gabo rido amadima-aragarewado-ri. Neio nakara se aise amadima-arasouti-ri arua urubia aboto iopiauti ri. Ibose neio amadimo-orohoio-ri.
11 Iedi tau ro nato Godi ipusu owera urubia to na-waratigi-dumo amadidimo-orowapotai-ri, urubia sirio neio ro amadimi-isaubuti-ri. Karasaubuti owera neio ro nou amadimi-imibiria-ri.
12 Ubauba tanaro urubia ro imese auna ia se amadimi-isioidiro-ri, ina noudo ie sirio urubia ro nirimagare kimati aboto niro turi ato imese aise ama-aragodo-ri.
13 Kaupoti womu tau nama-orobai-ri, beda urubia ro iwotoi-dumo koko se, neio ro womu tato womu tato keremiro amadimo-owea-ri.
14 Nedi mea owera ro Godi edi kiwaboi tanaro ro nou sapuwo to imese duriomoro gabogabo to namadimo-obodorouti-ri, taie womu tau nato amadi-ereredea-ri.’
Auna ubauba tau ama-ereredea-ri
15 Iesu owera karo aise gowouwado nou ro ibo, ‘Ina noudo ie Godi ro owera keba ia se garo Daniere aboto nou Godi ipusu owera dubu e. Nou ro ibo, Ata ubauba ia nakomu Tarena Moto ato urubia dubu ro ama-edea-ri saruto ama-owaititi-ri. (Kioputi urubia, owera maumo nio ro mea se ba-doi-mo.) Ina nedi ubauba ia nakomu ro nio ro Tarena Moto ato namadimo-owea-ri,
16 beda urubia ro orowomidiro Iudia duriomoro ato, neio podo duriomoro to aise ba-morowadau.
17 Etu ra moto tamu ato nama-omidiro-ri, nou modobo pua moto goro to karatea, namabu ata omidai ri, modobo ie nou aise kodau.
18 Ina ibose pari ato beda urubia ro namadimo-oroho-ri, neio modobo pua obotama kimowame, modobo ie pari rido korowadau.
19 Iedi tau ro nato niro ra mutu mamio ibose bamuai mutu mamio neio beda ito amadimo-orowati-ri? Nirimagare babio tanaro patu iedi mamio ro neio sapuwo to imese koko ia se ama-iamo-ri.
20 Nedi tanaro ro nou sapuwo to, nio ro modobo ie Godi auna se kararatoro, idaibo tanaro modobo pua daroho tau ato kororosioidiro, ibose komidiro saiki ato kororosioidiro.
21 Mabu edi tau ro nato imese auna ia ubauba ro ama-ororosioidiro-ri. Godi ro duriomoro edi tau ato gosioidiro womu tato abora, idaibo ubauba ata ororosioidiro pua, ina idaibo sosoro tanaro ata ororosioidiro-ri pua ido.
22 Ina noudo ie Godi ro edi tau ro komukere kowai tato rasiri ie, urubia sirio orowomidiro-ri pua. Kaupoti Godi ro edi urubia girapoi neio auna se timaragoidirotiti-die, ina noudo ie nou ro edi tau ro komukere kowai.
23 Iedi tau ro nato, ata dubu ro nama-utura-ri nio aboto ibo, “Neito ma-dirarowea-rimo, Godi ro kohodowa dubu nou e.” O “Godi ro kohodowa dubu iato toroho-die,” kaupoti nou owera aise imibiria ate!
24 Mabu Godi ro kohodowa dubu to na-waratigi-dumo amadimo-orowapotai-ri. Neio ro amadimi-isioidiro-ri erere awawo korosa tanaro. Nedi karasaubuti urubia ro gabo kowamo ato neio ubi ie Godi ro edi urubia girapoi-ro neio isaubuti ri.
25 Ma-dirowidiro-rimo, nio mo ro nedi owera ro abora na-nimowauti, ido nedi tanaro sirio ro amadimo-ororosioidiro-ri.
26 Ina noudo ie arua urubia ro bagea to ibo namadima-aro-ri “Godi ro kohodowa dubu goto se duriomoro ato toroho-die”, nou osora ri aise ou ate! Ibose ata dubu ro nama-utura-ri ibo “Godi ro kohodowa dubu nedi moto ro ibi gugu ato toropiro-die”, nedi owera ro aise imibiria ate.
27 Mabu Imese Urubia Kiauri Dubu nou namadi-orowameai-ri, penenio kerememiouti beda sosoro ra saiki kidiowado moro rido saiki korioduti moro to ibo amadimo-ororosioidiro-ri. Imese Urubia Kiauri Dubu urubia sirio ro ibo amadimo-owea-ri.
28 Pamo durupi bato korobu ra, banawario sirio nou nibo aboto ito ama-iroruwoidiro-ri.’
Imese Urubia Kiauri Dubu namadi-orowapotai-ri, beda tanaro ro amadimo-ororosioidiro-ri
29 ‘Iedi mibo tanaro sirio ro kororosioidiro saro gabo ato, tuturu to owamo-ri pua saiki pina iato aise ama-iasoperai-ri. Duriomoro gebari duwoduwo ro ama-ahidimai-ri, ina sogomi imewiti-ri pua. Ibose kiboni sirio toboro rido amadidima-araubuti-ri. Imese namabu patu toboro ato na-orowotoi neio aise amadimo-orowararioidiro-ri.
30 Nedi tau ro nato, ata tanaro toboro ato amadi-ororosioidiro-ri urubia umoro koi aboto ibo Imese Urubia Kiauri Dubu aupi ia se ie korowameai aboto. Ina nedi tanaro ro namadi-ororosioidiro-ri, urubia sirio neio idobi mutu aise amadimi-iroboreauti-ri. Imese Urubia Kiauri Dubu nou ia sosoro urubia sirio ro nato amadimo-owea-ri, tema ohu rido namadi-ororuwo-ri. Nou mea ia sosoro namadi-orowapotai-ri, nou auna ia pupuwo mutu amadi-ou-ri.
31 Humuko diamo auna ia se namadi-utura-ri, nou ro sowake urio nato ama-itioduti-ri Godi ro edi urubia girapoi-ro imese sirio duriomoro rido idabuti ri.’
Dewao ota ro ata tanaro kitamudiro ie
32 ‘Dewao ota ba-diauri-mo, ina ata tanaro neido ba-daratamudiro-mo. Puara na-orobiritai-dumo, ina orio puara ro kisuwoduti ie, nio umoro koi ie ibo, bunio saiki ama-otobowa-ri.
33 Ina idaibo sosoro ie, nedi tanaro sirio ro nio mo ro dese to na-nimowapotai, neio kororosioidiro aboto nio ro namadimi-iauri-ri, nio umoro nato ba-doititi-mo ibo, mo korowameai tau aupiaupi ro orobowado-die.
34 Nio mo ro morobise owera mimowapotai-ro. Iu urubia, nio ororoporeai-ri pua, tauo nedi tanaro sirio ro nou sapuwo to na-nimowauti, neio ro amadimo-ororosioidiro-ri kebase.
35 Nedi duriomoro gebari ro toboro, sopu, imese sirio namabu patu, neio imese amadima-araraseperai-ri. Kaupoti mo edi owera ro beda kararaseperai ra.’
Imese urubia kiauri dubu korowameai tau urubia umoro pua
36 Iesu ro kowasoro urubia owera iato gimowauti ibo, ‘Imese urubia sirio umoro pua, iedi tanaro sirio ro edi tau ato namadimo-ororosioidiro-ri. Godi edi sowake urio sirio ro neio umoro pua, ibose Godi simara mere umoro pua. Mo edi abera ro nou nakara umoro ie.
37 Noa tau ato beda tanaro ro gororosioidiro-rimo, ina Imese Urubia Kiauri Dubu edi tau ato namadi-orowameai-ri, idaibo sosoro tanaro ibose to amadimo-ororosioidiro-ri.
38 Mabu Noa edi tau ato gomidiro, urubia kiho, kidio, kararemo gabo keremoworohuti, iedi tanaro ro nou gisioidiro-rimo, womu tato Noa ota bokose pe goro to ti-godoro.
39 Neio umoro tato irowomidirotiti ibo neio abato etou tanaro ro amadimo-ororosioidiro-ri, womu tato abata na-garapusia-ro, taie neio imese sirio se aise giopia. Ina Imese Urubia Kiauri Dubu edi tau ato namadi-orowameai-ri, idaibo sosoro tanaro amadimo-ororosioidiro-ri, urubia nou ro aise amadi-imuhia-ri.
40 Ina nedi tau ro nato netewa teibo dubu teibo pari ato namado-oroho-ri, Imese Urubia Kiauri Dubu namadi-orowameai-ri, ata ama-owagare-ri, ata amadi-emeserai-ri.
41 Ibose netewa teibo orobo teibo neitiro ohona kisioidiro moro ato namadi-iwia-mari, Imese Urubia Kiauri Dubu ro ata ama-orobai-ri, ata imese amadi-emeserai-ri.
42 Ina noudo ie sirio tau kiraroweauti modobo ie, nio umoro pua nio edi Abera Naramu ro korowameai tau.
43 Kaupoti nio umoro koi modobo ie ibo, moto abera umoro kowamo rasiri ie piro dubu korowateai tau, nou ro moto aise ba-gemiro, moto esebea-ri pua.
44 Nio ibose aise kiraroweauti modobo ie, mabu beda tau ato nio ro namadimi-imaragoidiro-ri ibo, “Nedi tau ro nato Imese Urubia Kiauri Dubu orowameai-ri pua,” taie, iedi tau ro nato amadi-orowameai-ri.’
Etu ra morobise sowake dubu
45 ‘Ina eputa dubu woko mea se na-emesioidiro, mea kimaragoidiro mutu, beda sowake dubu ro kemesioidiro ra? Eputa dubu ro borubi sowake urubia mea se kiwarebai aboto nou kohodowa ie, ina mea tau ato, iedi mea sowake dubu ro borubi wisa tato woko urubia ohona to mea mino to ama-iwarebidirotiti-ri.
46 Idaibo sosoro dubu meana nou ro ama-owea-ri, mabu nou edi eputa dubu ro namadi-orowameai-ri, nou ro ohona kimio moro ato amadi-owea-ri.
47 Ina owera neito ma-dirowidiro-rimo! Nedi sowake dubu ro eputa dubu ro beda mutu namabu sirio ra nou ro na-iworohuti, neio imese mea sowake dubu ro ama-emeauri-ri.
48 Kaupoti nedi sowake dubu ro nou ro ubauba kimaragoidiro na-iworohuti, ina nou ro ibo, “Mo ro eputa dubu egea se nemasebidiro, mo aboudo tau se gararasoperai, etu umoro ra nou tau se orowameai-ri pua.”
49 Taie nou ro borubi sowake koroho urubia aise iadotiti, ibose nou kidio urubia mutu kiho kidio nou iworohutiti.
50 Eputa dubu edi tau ato namadi-orowameai-ri, ubauba sowake dubu beda tau ato namadi-imaragoidiro-ri ibo, “Mo eputa dubu hio to orowameai-ri pua”, taie nou aise amadi-emuhia-ri.
51 Taie edi sowake dubu ro eputa dubu ro tu ra sairo ra aise ama-owaubuti-ri, karatigi urubia matagoro karabowa idobi diamo edi moro ato imarotiti-dumo, nou neito aise ama-eherai-ri.’