26
Iesu opia ri gemahuomai-rimo
1 Iesu ro nedi kitamudiro owera sirio ro kimowauti na-giporeai, taie nou ro ibo kowasoro urubia aboto,
2 ‘Nio umoro ie nimo Kimasaudai Soriomu kosioidiro aboto netewa teibo saiki teibo ro eremeserai-do. Iedi tau ro nato Imese Urubia Kiauri Dubu mo nou se ie, mo urubia aboto anamadima-apoi-ri ota kemowotowa ato emopoguti ri.’
3 Iedi atu tau ro nato Godi ra urubia ra turituri awawo urubia, duriomoro kiauri urubia mutu, Kaiapa edi auna moto ro nato garadabuai-rimo.
4 Iesu neio ro karasaubuti mino to orobai ri nato opia rie iedi owera ro neito geremowauti-rimo.
5 Neio ro ibo, ‘Nou nimo ro soriomu kosioidiro saiki ato korobai modobo pua. Nou urubia ro amadimo-owairiai-ri. Neio modobo pua karadabuti ina karado nato karatamuai.’
Iesu eputa dehoro to ata orobo ro gemasia
6 Iesu Betani sabowa ato na-gomidiro nou Saimoni moto ato imidirotiti. Saimoni keba se katio ikoni mutu imidirotiti, ina Iesu ro meana ta-gowai.
7 Iedi moto ro nato Iesu ohona giho, ina iedi tau ro nato ata orobo mea nibo dehoro botoni mutu nato godoro-ro. Iedi dehoro ro nou ro auna mani to gomidai-ro. Taie iedi dehoro ro neito Iesu eputa to aise gemasia.
8 Iedi orobo ro kowasoro urubia ro na-gowea-rimo, neio nou aboto kamade tato goi-rimo. Taie neio nato gutura-rimo ibo, ‘Oro ro edi dehoro ro nouto Iesu eputa dorogora mabu ato emasia!
9 Iedi dehoro ro arua urubia ro mani to a-sowomidai-mo, ina namabu tato urubia neito a-siwarebai.’
10 Neio ro edi owera to geremowauti-rimo, Iesu keba se umoro ta-goi. Taie neio nou ro nato gimowapotai, ‘Nedi orobo ro nio ro mibo etou mabu ato omio-dumo? Nou ro mea ia tanaro osioidiro-die mo aboto.
11 Namabu tato urubia nio abato imese tau ama-irowomidiro-ri. Kaupoti mo nio mutu nato omidiro-ri pua.
12 Nou ro edi tanaro ro na-osioidiro eputa to dehoro na-nemasia, mo nou ro idaibo a-nemododiai pamo durupi sapuwo to.
13 Ina nio mo ro morobise owera mimowapotai-ro. Mea owera mo sapuwo to kimibiria urubia ro amadimo-obodorouti-ri imese duriomoro to. Ina beda duriomoro ato nedi mea owera ro namadimi-imowauti-ri, nou ro edi tanaro ro na-osioidiro-die, nou eremasoro na neio ro ibose to amadimi-imowauti-ri.’
Iudasi ro ubi to gomidai Iesu kapoi aboto
14 Tuturu to owamo pua Iesu 12 kowasoro dubu ata, masiro Iudasi, nou Kerioti sabowa dubu e, nou imese gou Godi ra urubia ra turituri awawo urubia aboto.
15 Neio nou ro nato gimodowa, ‘Mo ro Iesu nio aboto nama-apoi-ri, mo nio ro etou nakomu namadimo-omia-ri?’
Taie neio iato mani se gimidai-rimo iato gioputi-rimo 30 siriba mani ti-gorobai, Iudasi nou gomia-rimo.
16 Taie nedi tau ro neido Iudasi ro Iesu korobai gabo giosora neio aboto nato apoi rie.
Iesu kowasoro urubia mutu Kimasaudai Soriomu gosioidiro-rimo
17 Keba saiki Patapata Beredi Kiaupai Tato Soriomu saiki ro gowamo. Iedi tau ro nato Kimasaudai Soriomu nato kisioidiro ie. Taie Iesu kowasoro urubia nato gou-rimo nou aboto. Nou neio ro nato gemodowa-rimo ibo, ‘Kimasaudai Soriomu oro ro kiho sapuwo to nimo ro beda moro ato namadimi-imododiai-ri?’
18 Neio Iesu ro ibo gimowameai, ‘Auna sabowa to ba-dou-mo. Ata dubu nio ro iato amadimo-owea-ri, ina nou nio ro ibo ba-demowapotai-mo, “Nimo kitamudiro dubu ibo utura-die, Godi ro edi tau ro gohodowa-ro mo sapuwo to aupise ta-gorobai-die. Mo ubi ie Kimasaudai Soriomu kowasoro urubia mutu oro moto ato kosioidiro.” ’
19 Iesu ro beda owera garo kowasoro urubia aboto, tanaro ibose to gororosioidiro-rimo, taie soriomu ohona iato aise gimododiai-rimo.
20 Adimo saiki ato Iesu kowasoro urubia mutu atu moro ato na-gomititi-rimo, ohona imese giho-rimo.
21 Neio kiho moro ato Iesu ro neio ata owera nato gimowapotai. ‘Nio mo ro morobise owera mimowapotai-ro. Mo nio ata ro anama-apoi-ri ubauba urubia aboto opia ri.’
22 Kowasoro urubia ro nedi owera ro na-girorowai-rimo, neio iato auna kamade tato ro girobai. Taie neio ro nou erere se nato gemodoruti-rimo ibo, ‘Abera Naramu, oro mo ro apoi-ri pua ra?’ Neio ro erere se garo-rimo idaibo owera.
23 Taie neio Iesu ro ibo gimowameai, ‘Mo beredi nou mutu atu se namadi-idobia-ri, io urubia dubu nou se ie, mo nou ro anama-apoi-ri.
24 Imese Urubia Kiauri Dubu nou ama-araburai-ri, owera Tarena Buka ato keba se idaibo sosoro ta-gisioidiro-rimo. Kaupoti nedi kapoi dubu ro nou aboto auna ubauba tanaro ro amadimo-ororosioidiro-ri. Mo kapoi dubu nou koroto tato rasiri ie, nedi ubauba ro nou sapuwo to kainai ie. Kaupoti beda ubauba wisa ra nedi dubu ro Godi aboudo nou ro nama-owea-ri, nou imese auna ubauba ie.’
25 Taie iato Iudasi ro gutura-ro, ‘Kitamudiro dubu, oro mo ro apoi-ri pua ra?’
Iesu ro nou ibo gemowameai, ‘Io, oro ia ro notutura-die.’
Abera Naramu ohona kiho
26 Neio ohona edi kiho ro na-giho-rimo, Iesu ro patapata beredi na-gomidai-ro nou ro eso owera iato garo Godi aboto. Taie edi patapata beredi ro na-gekekeouti kowasoro urubia aise gimio. Nou ro ibo, ‘Dimade-mo! Nou mo durupi ie, ba-diho-mo.’
27 Ina waini obo panikere iato gomidai-ro, taie eso owera iato garo Godi aboto. Nou ro ibo, ‘Nedi waini obo ro panikere ato na-omidiro, kodio to nio ro imese ba-demosuwo-mo.
28 Nedi waini obo ro mo ro orio hodo nasaubiai urubia aboudo mo karima nama-isuputi-ri, sirio urubia ubauba kimatopeamuti sapuwo to ie.
29 Nio mo ro morobise owera mimowapotai-ro, waini obo mo ro ido odio-ri pua, womu tato orio waini obo ido nio mutu atu se tinamadimi-idio-ri mo abera edi kiwaboi tanaro ro nou maumo ato.’
30 Taie neio Godi kemowabu ohare kemabodo na-goporeai-rimo, neio atu se Oribo podo to aise gidiai-rimo.
Kowasoro urubia ro Iesu amadime-ebedidiro-ri
31 Ina Iesu ro kowasoro urubia ibo gimowapotai, ‘Nedi duwo ro nato mo nio ro emedio-ri pua, nio ro anamadime-ebedidiro-ri. Mabu idaibo owera Tarena Buka ato kebase ta-gisioidiro-rimo. Godi ro ibo gutura-ro, Sipisipi kimowotoi dubu mo ro anama-audurai-ri, ina sipisipi erere moro to amadimo-orowadaudiro-ri.’
32 Ina Iesu ro ibo, ‘Mo pamo aboudo Godi ro namadi-owameai-ri, mo Gariri duriomoro to keba gabo moro to anama-aimai-ri. Mo nio ro iato anamadimo-owea-ri.’
33 Pita ro Iesu ibo gemowameai, ‘Oro arua kowasoro urubia ro kebedidiro ato, oro mo ro beda kebedidiro pua!’
34 Ina Iesu ro Pita ibo gemowapotai, ‘Oro mo ro morobise owera nama-emowapotai-ri, Pita! Nedi duwo ro nato kakaba owera ido to amadimu-utura-ri, mo oro ro netewa didi tau to anama-aratiouti-ri. Oro ibo ama-aro-ri mo umoro pua Iesu.’
35 Kaupoti Pita owera mutu pupuwo ta-goi. Nou ro ibo, ‘Mo oro mutu pamo kowea ato, ata owera tato ie. Oro mo ro beda karatiouti ra, neitiro pamo atu se kiwia modobo ie.’ Ina idaibo sosoro owera arua kowasoro urubia ro ibose to garo-rimo.
Iesu Godi mutu geremowauti-rido Getesemeni pari ato
36 Iesu kowasoro urubia mutu atu se imese gou-rimo Getesemeni pari to. Neio ito na-gorowateai-rimo, neio Iesu ro ibo gimowapotai, ‘Nio nato ba-dorowomidiro, mo ito nama-ou-ri Godi mutu eremowauti rie.’
37 Taie nou ro Pita se gadabuai Sebedi mere teibo mutu, neibi atu se ibo gou-birimo. Iedi tau ro nato Iesu natonato durupi ta-geremowateai. Ibose nou giropu imese mibo ia se goworohuti.
38 Nou ro ibo, ‘Mo kimaragoidiro patu imese ubauba ta-woi-mo. Ina noudo ie mo neio ro anamadimo-ohuruti-ri. Nibi mo mutu atu se mirarowo-birimo, norou utua ate!’
39 Taie Iesu neibi aboudo egea mere se giaubai, nou iato aise gorodiriti woidomari goto to aise giwaposowa. Taie Abera aboto iato gararatoro. Nou ro ibo, ‘Modobo ra nedi ubauba tanaro sirio ro mo aboto kororosioidiro tato? Kaupoti ibo pua mo simara ubi, oro ubi beda sosoro to owamo ibose ba-mororosioidiro-mo.’
40 Taie nou kowasoro dubu peteibi aboto iato gorowameai-ro, neibi nou ro norou kirobu-bi moro ato giwia-ibi. Nou ro ibo Pita aboto, ‘Nibi aboudo modobo pua ra mo mutu egea mere se kirarowo, a?
41 Kiraroweauti mutu Abera aboto ba-dararatoro-mo. Modobo pua nibi ubauba sirio ro kiwaibirioi-bi. Nibi ubi sekere meamea tanaro kisioidiro, kaupoti nibi durupi pupuwo tato se iamo.’
42 Iesu ina iato gorowameai Godi aboto araratoro ri. Nou ro ibo, ‘Nedi temeteme ro idaibo sosoro ie karakara obo kodio. Idau, gabo kowamo tato nedi karakara obo ro mo aboudo kowagare aboto, taie modobo ie, anama-odio-ri. Oro ubi beda sosoro owamo, aise ba-mororosioidiro-mo, ibo pua mo simara ubi.’
43 Iesu ina kowasoro urubia aboto iato gorowameai-ro. Neibi ina nou ro norou kirobu-bi moro ato giwia-ibi. Mabu neibi idomari kimahitai aboto imese mibo ia se giamo.
44 Taie Iesu imese gorowameai Godi mutu ina atu owera to eremowauti ri.
45 Nou kararatoro na-goporeai, nou ina aise gorowameai-ro neibi aboto, neibi ina norou kirobu-bi moro ato giwia-ibi. Nou ro ibo, ‘Nibi norou kirobu-bi iporeai pua ra? Ma-diwia-bimo! Imese Urubia Kiauri Dubu nou tau ta-worobai-ro, urubia dubu ro neio aboto ama-apoi-ri ina neio ro nato amadimo-orobai-ri.
46 Direrubua-birimo! Neio aboto mosiomai-birimo! Daio mo kapoi dubu tou-die.’
Iesu urubia sirio ro gorobai-rimo
47 Iesu kowasoro urubia aboto owera karo oporeai pua, iedi atu tau ro nato Iudasi nato gorowateai-ro, nou Iesu ata 12 kowasoro dubu nouse ie. Nou urubia sirio mutu gou-ro, neio giri, gamini nou mutu gou-rimo. Nedi urubia ro Godi ra urubia ra turituri awawo urubia, duriomoro kiauri awawo urubia mutu, Iesu aboto neio ro gimeiriai-rimo.
48 Iedi urubia ro kapoi dubu ro owera keba se ta-gimowapotai ibo, ‘Mo ro beda dubu nosomeai, urubia dubu nou se ie, ba-dorobai-mo.’
49 Taie Iudasi aise gemobodiai Iesu nou ro aise gohiai. Nou ro ibo, ‘Kitamudiro dubu, mea duwo ie.’ Taie Iesu nou ro iato gosomeai.
50 Iesu ro ibo, ‘Namutuna, oro edi ubi ato na-wou-die, aise dosioidiro.’
Taie urubia sirio ioudo na-gou-rimo, Iesu neio ro aise gorobai-rimo.
51 Iesu ata kowasoro dubu nou abato ibose to gou, nou giri na-gaubidiro-ro iato Godi ra urubia ra turituri auna dubu nou edi sowake dubu ro sapuwo gare giri to aise gowatua.
52 Iesu ro ibo, ‘Giri natara moro to dowameai. Mabu giri to edi urubia ro iadotiti-dumo, saiki ata neio giri to amadimi-iopiauti-ri.
53 Oro ibo a-imaragoidiro ra mo aboudo modobo pua ra Abera Godi karahuomai, ina nou ro kimeriai ie boso sowake urio sirio ota puara morobiritai-mo, mo neio ro kowairiai ie?
54 Kaupoti mo ro idaibo tanaro kosioidiro rasiri ie, Tarena Buka ato owera na-iamo ibo nedi tanaro ro aise amadimo-ororosioidiro-ri, neio morobise to beda sosoro to kororosioidiro ra?’
55 Taie nou aise gerewesegerai urubia sirio aboto, neio nou ro nato gimowapotai ibo, ‘Nio giri ra gamini ra mutu na-wou-dioumo, mo orobai ri a-wou-dioumo ra? Mo nio piro dubu ra? Mo saiki gabogabo Tarena Moto goto didiri ato nitamudirotiti. Iedi tau ro mo nio ro nato ba-norobai-rimo.
56 Kaupoti nedi tanaro sirio ro na-ororosioidiro-dumo, Godi ipusu owera urubia ro edi owera ro na-gisioidiro-rimo Tarena Buka ato, neio owera morobise to ororosioidiro ri.’
Iesu mutu edi kowasoro urubia ro na-gou-rimo, Iesu neio ro emedio pua, aise gorowadau.
Iesu Iu eputa urubia ro gemodoruti-rimo
57 Iesu edi urubia ro gorobai-rimo, nou neio ro imese gowou-rimo Kaiapa moto to Godi ra urubia ra turituri eputa dubu. Mose sabi kitamudiro urubia, Iu eputa urubia neio Kaiapa moto ato dese to garadabuti-rimo.
58 Ina Pita ro Iesu musomuso se gobodoro-ro, womu tato Kaiapa edi moto ro neito ti-gorowateai-ro. Nou goto didiri ato, kimotoi urubia abato aise gomi, atu se imese gorowomidiro. Iesu aboto beda tanaro ro amadimo-ororosioidiro-ri, nou ro urubia ioudo gimowotoi-ro.
59 Godi ra urubia ra turituri eputa urubia, Iu urubia awawo koto kiauri urubia mutu Iesu bagea mabu neio ro iato gemosora-rimo, taie nou neio ro nato opia rie.
60 Sirio urubia bagea owera mutu ta-goroho-rimo sekere, kaupoti nou neio ro mea mabu emowea pua. Tuturu to owamo pua netewa teibo dubu teibo owera mutu nato gou-rido,
61 neitiro ro Iesu nato gowauti-rido. Neitiro ro ibo, ‘Nedi dubu ro ibo ta-garo “Mo aboudo modobo ie Tarena Moto kototoro, ina netewa didi saiki ato mo ro kididi to koporeai ie.” ’
62 Nedi owera ro Godi ra urubia ra turituri auna dubu ro na-girorowai, nou sea rido aise geribidiro. Nou ro ibo Iesu aboto, ‘Nedi dubu teibo ro edi owera to aro-dioudo, oro korowairiai owera pua ra? Oro ata owera ata aro-ri pua ra?’
63 Iesu ro edi owera ro na-girorowai, nou muro se gotoi, ata owera ata utura pua.
Taie Godi ra urubia ra turituri eputa dubu ro Iesu ibo gemowapotai, ‘Keremiro Godi ohu ia ato na-imidirotiti-die mo ro nou masiro nouto nemowapotai, nimo oro ro dimowapotai-ro, oro Godi ro kohodowa dubu nou se ra? Ina ibose oro Godi mere ra?’
64 Iesu ro nou ibo gemowameai, ‘Io oro beda sosoro utura-die. Kaupoti nio mo ro nedi owera ro nou mimowapotai-ro, Imese Urubia Kiauri Dubu mo nouse ie, ina saiki ata imese pupuwo ia Godi mo nou tumodi sapuwo ato namadi-omidiro-ri. Ibose mo neito namadi-orowapotai-ri Adiri sabowa rido tema ohu ato anamadi-ou-ri.’
65 Godi ra urubia turituri eputa dubu ro nedi owera ro na-girorowai, nou masawe ri simara obotama aise gorowabowa. Nou ro ibo, ‘Nou ro na-waro-die ibo “Mo Godi sosoro ie”, nou ro Godi masiro ubauba owai! Nimo ro ina irowidiro-ri pua arua owera nou sapuwo to. Ma-dowea-mo, nou ro Godi masiro ubauba owai, ina nio ro noti emororowai-dumo.
66 Nio beda sosoro imaragoidiro-dumo?’
Neio ro ibo, ‘Nou kopia modobo ie! Mabu nou ro auna ia ubauba owera aro.’
67 Neio nou aboto na-goroho-rimo gase to iato gamoruti-rimo. Arua ro a-gado-rimo, arua ro a-giatoiauti-rimo.
68 Neio ro ibo gemasosowado-rimo, ‘Oro Godi ro kohodowa dubu nouse ra? Nimo oro ro ma-dimowapotai-ro, oro etu ro ado?’
Pita ro Iesu a-garatiouti
69 Pita isana moto araradi ato gomidiro. Ata sowake besere Pita aboto nato gou-ro, nou ro ibo, ‘Iedi Gariri dubu ro Iesu, oro mutu ta-irohotiti-do.’
70 Kaupoti Pita ro urubia sosoro gabo ato Iesu nou ro a-garatiouti. Nou ro ibo, ‘Oro edi owera to aro-die, mo umoro pua.’
71 Taie iedi moro ro Pita ro aise gemeserai-ro kodouti moro to imese gou. Ina nou iato ata sowake koroho besere ro ibose to gowea. Taie urubia nou ro nato gimowapotai ibo, ‘Nasareta dubu Iesu, nedi dubu ro nou mutu ta-irohotiti-do.’
72 Pita ro Iesu ina iato garatio. Nou ro ibo, ‘Mo ro Godi masiro nouto nimowapotai, mo umoro pua nedi dubu ro!’
73 Taie tau egea mere se ta-gaudomaidiro, arua dubu Pita abato na-gorowotoi, neio ro ibo, ‘Morobise ie oro ata nou se ie Iesu mutu oro ro irohotiti. Mabu oro owera kodu Gariri urubia owera karo sosoro ie.’
74 Pita ro ibo, ‘Mo nama-arasaubuti-ri, Godi ro mo ubauba wisa ba-momia-ro.’ Nou idaibo ubauba nakara se gorowai. Nou ro ibo, ‘Mo ro Godi masiro nouto nimowapotai, mo umoro pua nedi dubu ro!’
Pita owera karo oporeai pua, iedi tau ro nato kakaba owera nato gutura.
75 Taie Pita kimaragoidiro nato giwameai Iesu ro beda owera garo nou aboto, ‘Kakaba owera ido to amadimu-utura-ri, tauo mo keba se oro ro netewa didi tau to anama-aratiouti-ri.’
Taie nou ioudo aise gosuwoidiro-ro, auna idobi nou giroto.