28
Iesu pamo rido na-gowameai-ro
1 Iu urubia komidiro saiki na-gororoporeai, ina ata saiki Sande kowaroho duwoduwo ato, Maria Magadara sabowa orobo ie, ata Maria mutu Iesu bobo emowea ri imese gedei-rido.
2 Pua ie! Auna sopu momuruwo nato goromuruai. Mabu nedi tau ro nato Abera Naramu edi sowake urio ro nou aboudo gororuwo-ro, nou Iesu bobo to aise gemobodiai, nadi magere na-godobura iato aise gomi.
3 Nou sosoro woidomari imese penenio sosoro gerememiouti. Ibose nou edi obotama giroidiro ipakea musuga sosoro imese keakea ia ie.
4 Iesu bobo edi boso urubia ro gemotoi-rimo, neio ro na-giwia-rimo nedi tanaro ro, neio soro aise gorowamaro-rimo tere ri, iato sapuwo pamo imese girobu.
5 Sowake urio ro ibo nedi orobo teibo ro neitiro aboto, ‘Nitiro tere na ie! Mo umoro ta-noi ibo nitiro etou mabu ato oudio-do neito. Nitiro idaibo Iesu osora-dioudo, ota kemowotowa ato na-gemopoguti-dumo.
6 Nou bobo ato potoro ie, Godi ro ta-owoubua. Nou kowoubua owera nio aboto ta-irowautititi. Nou edi moro ato gowotodai-dumo tauo nitiro ro simara idomari to ma-dowea-rido.
7 Nitiro abora neido aise dorowameai-do kowasoro urubia ba-dimowapotai-do ibo, “Nou pamo rido Godi ro ta-owameai-ro. Nou Gariri duriomoro to keba moro to ta-waimai, nio ro saro rido ba-dowasoro-mo. Nou nio ro iato amadimo-owea-ri.” Owera nouse ie, nitiro umoro noti niwai-ma.’
8 Taie iedi orobo teibo ro bobo rido neido hio ito imese gorowarario-rido. Neitiro sapuwo tere ro giwati-ma, kaupoti neitiro abato auna kamade ro gowamo. Neitiro edi korowarario na-gorowarario-rido kowasoro urubia owera imowauti ri,
9 ipi ato Iesu ia ro aise giwotobowa-ma. Nou ro ibo, ‘Mea kowaroho ie nitiro aboto.’
Neitiro Iesu aboto na-gosiomai-rido nou sairo mabu ato aise gohiai-rido, taie iato gemowabu-rido.
10 Iesu ro ibo, ‘Nitiro tere na ie, mo edi urubia ro nowasoro-dumo io neio mo niramio ie, ba-dou-do neio imowapotai ri ibo neio Gariri duriomoro to ba-mou-mo. Mo neio ro iato anamadimo-owea-ri.’
Iesu bobo kemotoi urubia ro gorowauti-rimo owera
11 Iedi orobo teibo ro neitiro isana ipi gabo ato gou-rido kowasoro urubia owera imowapotai ri. Kaupoti arua bobo kemotoi urubia kebase gorowarario-rimo auna sabowa to. Bobo abato beda tanaro ro gororosioidiro-rimo Godi ra urubia ra turituri awawo urubia neio iato gimowauti-rimo.
12 Taie turituri awawo urubia, neio duriomoro kiauri urubia mutu, owera iato geremowauti-rimo, neio ro iato gimediai-rimo karasaubuti owera aro ri. Awawo urubia ro bobo kemotoi urubia auna mani to giahodorai-rimo, bagea karasaubuti owera aro rie Iesu sapuwo to.
13 Neio ro ibo, ‘Urubia nio ro ibo ba-dimowauti-mo, “Nimo isana norou ro niwagumaidiro, nou kowasoro urubia duwo turi ato na-wou-dioumo Iesu pamo durupi neio ro nato owopirowa-dumo.”
14 Nedi owera ro gabamani auna dubu ro nama-irorowai-ri, nou nimo ro kamade neito anamadimo-owai-ri. Nio owera ro irobai-ri pua.’
15 Taie iedi boso urubia ro iedi isarena mani gebari ro na-gomidai-rimo, taie neio kitomudiro modobo bagea owera urubia iato gimowauti-rimo. Iedi tau ro noudo, idaibo karasaubuti owera Iesu pamo durupi simara kowasoro urubia ro piro to kowosuruwo owera, Iu urubia abato nou ro gorobodorouti. Abora nedi atu karasaubuti owera ro neio abato nou ro owamotiti.
Iesu ia ro gimeriai kowasoro urubia nou bobo ato
16 Taie edi 11 kowasoro urubia ro Iesu owera gabo modobo edi podo ro gimapoi Gariri ato na-wotoi neito imese gidiai-rimo.
17 Iesu sosoro neio ro na-gowea-rimo, nou iato gemowabu-rimo, kaupoti arua kowasoro urubia kimaragoidiro teibo giworohuti-marimo.
18 Taie Iesu neio aboto aise gosiomai-ro, nou ro nedi owera ro neito gimowapotai, ‘Imese pupuwo korosa Godi ro ta-nomia-ro, Adiri sabowa kiauri aboto ibose sopu duriomoro kiauri aboto.
19 Ina noudo ie nio mo ro a-nimowapotai, ba-dororoburutai-mo erere duriomoro to, urubia sirio mo kowasoro urubia to ba-diwesegere-mo. Obo to ba-diwarumiauti-mo Abera, Mere, Tarena Urio neibi do to ba-mararasoro-mo.
20 Nio mo ro edi owera to nimowautiti, neio ba-ditamudiro-mo isioidiro ri. Dirorowai-mo! Mo nio mutu anama-imidirotiti-ri womu tato womu tau nama-orobai-ri.’