3
Abera Naramu gabo Ioane ro gemaipo-ro
1 Iesu edi tau ro nato ta-gomidiro, obo to kiwarumiauti dubu Ioane goto se duriomoro ato giasiai-ro, Iudia duriomoro ato na-owamo.
2 Nou ro ibo imowautiti, ‘Derewesegerai-mo ubauba aboudo! Mabu Godi ro kiwaboi tanaro aupise neito ta-gorowateai-die.’
3 Urubia dubu nou se ie Ioane, Godi ipusu owera dubu Aisaia ro keba ia se nou gowapotai-ro ibo, Urubia dubu goto se duriomoro ato tiaiauti, ibo Abera Naramu gabo tuputupu se mea se demowou-mo nou kou moro ie.
4 Ioane ro kemoro takamai obotama musugamusuga nou iroidirotiti, ibose nou obotama bage to erematahirawadotiti. Nou ro pugo, nogobe mutu nou ihotiti.
5 Taie urubia sirio nou aboto nato gou-rimo obo to iwarumiauti ri. Arua urubia Ierusarema sabowa rido gou-rimo, arua urubia Iudia duriomoro rido, ibose Iodeni oromo bara ato edi sabowa ro giamo, iedi urubia sirio ro aise goroho-rimo Ioane aboto.
6 Taie neio ubauba iato giwapotaidiro-rimo, iato neio Ioane ro Iodeni oromo turi ato obo to aise giwarumiauti.
7 Ioane ro na-giwia Parasi urubia sirio, Sadusi urubia mutu, arua urubia obo to kiwarumiauti moro ato, nou ro ibo, ‘Nio imese auna karatigi urubia ie, nio imese bagawe merebusere ie! Nio etu aboudo girorowai-rimo ibo, Godi edi auna ia serawo ro na-ou-die nou aboudo orowadaudiro rie?
8 Nio ro durupi to meamea tanaro namadimi-isioidiro-ri, nio neio ro amadimi-iwapotaidiro-ri ibo, nio ro morobise to ubauba ta-gimeserai-dumo, ina Godi aboto ta-gerewesegerai-dumo.
9 Idaibo sosoro kimaragoidiro na-iworohuti-dumo ibo, “Nimo modobo ato norowomidiro, ata ubauba tato ie, nimo Aberaham aramio merebusere ie. Nimo Godi ro ubauba wisa imio-ri pua, nimo nou urubia ie.” Idaibo sosoro kimaragoidiro nio abato kiamo modobo ia pua! Nio mo ro mimowapotai-ro Godi aboudo napo ie Aberaham orio aramio merebusere nadi rido kemesioidiro.
10 Godi ro susura kabi kebase ta-gowotobowa, beda ota ra meamea iopu kiasesuti tato nou ro kiebuti aboto ie. Taie era to aise ama-ihere-ri.
11 Nio mo ro obo to niwarumiauti ubauba aboudo kerewesegere sapuwo to ie. Kaupoti mo saro rido ata mea dubu tou-die, nou auna pupuwo dubu e, mo marasio. Nou tamaka mo ro kemerebidiro modobo pua. Nio nou ro Tarena Urio to ama-iwarumiauti-ri, ibose era to ama-iwarumiauti-ri.
12 Nou ro saboro sosoro poke ta-gorobai-die, abora nou tu ato ateidiro-die. Nou abora eremododiai woiti takamai kiamotuti aboto ie. Meamea woiti iopu kiaremo moto to neito ama-iwodouti-ri. Ina woiti takamai nou ro womu tato womu tato kiriware era to aise ama-iatowo-ri.’
Iesu obo to Ioane ro gowarumia
13 Iedi tau ro nato Iesu Gariri duriomoro rido godori-ro Iodeni oromo to, Ioane ro obo to owarumia rie.
14 Kaupoti nou edi ubi ro Ioane ro binio to gemowabeouti. Ioane ro ibo, ‘Mo oro ro kowarumia ie. Ibo pua oro mo ro kowarumia. Mabu boira oro mo aboto na-wou-die?’
15 Kaupoti nou Iesu ro ibo gemowameai, ‘Tanaro patu ibose to mororosioidiro-mo. Neitiro ro Godi ubi tanaro se momuo se kemesioidiro, io mea gabo ie.’
Taie Ioane ubi aise goi, Iesu nou ro obo to aise gowarumia.
16 Nou obo rudo edi kerehidiro ro na-gerehidiro-ro, naio ata tanaro ro gororosioidiro, toboro magere korodobura se gowea. Taie ioudo nou ro nato gowea, Tarena Urio nato gororuwo-ro dumu pawa sosoro, Iesu ato aise gomi.
17 Iato toboro rido owera kodu ro gou-ro ibo na-gutura-ro, ‘Ma-dowea-mo! Nou mo ia mere ie, mo auna nirimagare ie, kamade mutu, nou aboto.’