8
Katio dubu Iesu ro meana gowai
1 Iesu podo ohu rido na-gororuwo-ro, nou urubia sirio ro gobodoro-rimo saro rido.
2 Taie ata katio dubu Iesu aboto nato gou-ro, nou sosoro gabo ato kauhio to aise girimusubua. Nou ro ibo, ‘Abera Naramu, oro ubi ato mo meana dowai-ro. Mo katio demowagare-ro!’
3 Iesu ro nou owera na-gemororowai, tu iato gituturai iedi dubu ro nou aboto, taie iato gowasomai. Nou ro ibo, ‘Mo ubi ie oro meana kowai. Abora oro meana doi!’
Nedi atu tau ro nato Godi edi pupuwo korosa ro neito iedi dubu ro meana aise goi.
4 Taie nou Iesu ro nedi owera ro neito gemowapotai, ‘Owera neito ma-dirorowai-ro, oro ro ata dubu ata umoro owai ate ibo mo modobo ta-noi. Kaupoti oro mo ro a-notiodorai Godi ra urubia ra turi dubu aboto. Nou aboto se ba-dorowapotai ibo mo meana ta-noi. Taie Mose ro beda owera gisioidiro Tarena Buka ato kematowo namabu sapuwo to, nou aboto nato ba-diaiwai. Idaibo tanaro oro ro nama-osioidiro-ri, urubia umoro nato amadimo-oi-ri ibo oro meana ta-woi.’
Roma boso eputa dubu kimibiria mutu e
5 Iesu Kapeniama sabowa to na-godoro, Roma boso eputa dubu nou aboto nato gou-ro. Iesu nou ro nato gemodowa, mabu nou ubi ie nou ro owarebai ri.
6 Nou ro ibo, ‘Abera Naramu, mo sowake dubu auna temeteme ro owati, koroho modobo pua.’
7 Taie iedi dubu ro owera Iesu ro ibo gemowameai, ‘Mo anamadi-ou-ri nou meana owai ri.’
8 Ina nedi dubu ro Iesu owera ibo gemowameai, ‘E e! Abera Naramu, mo modobo pua. Oro auna dubu e. Oro mo moto to kou modobo pua. Kaupoti owera se demeiriai nou meana koi sapuwo to, ina nou meana ama-oi-ri.
9 Mo umoro ie mabu mo eputa dubu mutu e, mo ro nou woko nemesioidirotiti. Ibose boso koroho urubia neio mo ro niauri. Mo ro ata dubu aboto kutura ato ito ou ri, nou ito aise kou e. Ina ata dubu aboto kutura ato neito ou ri, nou neito aise kou e. Sowake koroho dubu aboto kutura ato woko osioidiro ri, nou ro aise kosioidiro ie.’
10 Iesu ro iedi owera na-girowidiro, nou iato kimaragoidiro ro gopia. Nou saro rido edi urubia ro gobodoro-rimo, neio aboto iato gerewesegerai. Nou ro ibo, ‘Nio mo ro morobise owera mimowapotai-ro. Isiraere urubia abato mo egea se nirohotiti, mo ro ata dubu ata owea pua, mo sapuwo to idaibo sosoro pupuwo kimibiria mutu.
11 Nio mo ro a-nimowapotai Iu owera karo tato urubia sirio erere duriomoro rido amadidimo-oroho-ri. Soriomu ohona neio ro amadimi-iho-ri Aberaham, Aisaki, Iakobo neibi mutu Godi edi kiwaboi maumo ro nato.
12 Godi edi kiwaboi tanaro ro Iu urubia do sekere ie, kaupoti neio ito odouti-ri pua. Neio Godi ro amadi-ihere-ri duwoduwo ia maumo moro to. Taie auna idobi diamo iato aise ama-ereredea-ri, temeteme iamo matagoro karabowa iato amadimo-oroho-ri.’
13 Taie Iesu ro ibo Roma boso koroho eputa dubu aboto, ‘Oro abato kimibiria beda sosoro na-owamo oro edi sowake dubu ro nou sapuwo to, tanaro ibose to amadimo-ororosioidiro-ri. Ba-dorowameai.’
Iedi atu tau ro nato nou edi sowake dubu ro meana aise goi.
Iesu ro sirio urubia meana giwaititi
14 Iesu Pita moto to na-gorowateai, nou ro Pita emapura abere se gowea na-gorobu kabena ro gowati.
15 Iedi orobo ro tu ato aise gorobai. Nou ro edi tau ato gorobai, iedi orobo ro kabena ro aise gemeserai. Taie nou ioudo na-geribuwa-ro, Iesu kowasoro urubia mutu ohona iato gimitai-bi.
16 Taie edi adimo duwoduwo ro nato, ubauba urio edi urubia sirio abato na-gorowomidiro Iesu aboto namuturubi ro nato giworoho-rimo nou ro meana iwaititi ri. Iesu ro ubauba urio aise gimowapotaidiro urubia aboudo osuwoduti ri. Taie neio ioudo aise gosuwoduti-rimo. Ibose nou ro imese temeteme urubia meana ta-iwaititi.
17 Iesu ro nedi tanaro ro na-gisioidiro, Godi ipusu owera dubu Aisaia kebase beda owera gisioidiro Tarena Buka ato, nedi tanaro ro morobise to noti gororosioidiro-dumo. Aisaia ro ibo, Nou ia ro nakara se gimidai nimo edi durupi ubauba ro. Ibose nimo edi temeteme sirio ro nou ro nimo aboudo ta-giwagarewado.
Iesu kowasoro ato oro ro koko kiauri ie
18 Auna topira Iesu ro na-gowea-ro, taie kowasoro urubia nou ro nato gimowapotai obo paruo sapuwo to iabu ri.
19 Tuturu to owamo pua Mose sabi kitamudiro dubu kaupoti Iesu aboto nato gou-ro. Nou ro ibo, ‘Oro beda moro to nama-oroho-ri, oro anama-owasoro-ri.’
20 Ina nedi dubu ro Iesu ro ibo gemowameai, ‘Tumu soka neio kirobuti moro mutu e, pawa ibose neio toto mutu e. Kaupoti Imese Urubia Kiauri Dubu nou korobuti moro tato ie.’
21 Ina Iesu edi urubia ro gowasoro-rimo neio ata ro ibo, ‘Abera Naramu, mo kebase sabowa to nama-orowameai-ri abera oromano nama-owarebai-ri. Nou nama-araburai-ri saro gabo ato, mo nato tinamadi-orowameai-ri oro owasoro ri.’
22 Kaupoti nedi dubu ro Iesu ro ibo gemowameai, ‘Abora nedi tau ro nato, mo aboto daradabuai-ro. Iedi urubia ro orowomidiro urio pamo mutu, oro abera negere neio ro ba-mowaumia-mo.’
Iesu ro surama ra bukopu ra a-giadibiai-ma
23 Taie Iesu iedi moro ro ioudo sawa pe to aise gorora-ro kowasoro urubia mutu. Neio atu se obo paruo ata sapuwo to imese giabu-rimo.
24 Ipi ato neio auna surama ro gimabuwo-ro. Iedi surama ro obo paruo ato ubauba mino to gororosowa-ro. Iedi sawa pe ro bukopu sapuwosapuwo rido gorowiti-rimo. Iesu wisana norou gorobu.
25 Taie kowasoro urubia nato gorowadoro-rimo Iesu norou maumo rido amutia ri. Neio ro ibo, ‘Abera Naramu nimo diwarebai-ro! Nimo aupise ie kimarumo!’
26 Taie neio Iesu ro ibo gimowameai, ‘Nio kimibiria imese kainai ia ie! Nio etou tere ro iwati?’
Taie Iesu na-geribuwa-ro surama ra bukopu ra orodiobo ri nato gimadowerai-ma. Tuturu to owamo pua iedi obo paruo gebari ro nato gasio aise gereredea.
27 Kowasoro urubia iato woki ro giopia. Neio ro ibo, ‘Nou beda dubu ra? Surama ra bukopu ra nou owera to aise orodiobo-do!’
Dubu teibo ubauba urio ro giworohuti-marimo
28 Iesu Gariri obo paruo ata sapuwo to na-gorowateai, nou kebase Gerasa duriomoro to gidiai. Ubauba urio dubu teibo abato gorowomidiro, neitiro pamo urubia bobo ato imidirotiti-do, ioudo gosuruwo-rido Iesu owea ri. Nedi dubu teibo ro serawo se iamotiti-ma, ina urubia iedi gabo ro neido irohotiti pua. Neitiro ro Iesu na-gowea-rido,
29 ioudo giaia-rido, ‘Oro Godi mere ie! Oro nimo aboto etou tanaro amadi-osioidiro-ri? Oro ro nimo auna temeteme imia-ri a-wou-die ra? Nimo tau mea se orobai pua oro ro auna temeteme kimia sapuwo to.’
30 Iedi duriomoro ro iato giro sirio muso ato oroho pua, neio a-geremosora-rimo.
31 Iedi ubauba urio ro gorowomidiro neitiro niro turi ato, Iesu neio ro nato gemagege-rimo, ‘Nimo oro ro namadi-imabodorai-ri iedi dubu teibo ro neitiro aboudo, giro niro turi to ba-dimeiriai-ro!’
32 Taie Iesu ro nato gutura ibo, ‘Ito dosuruwo-mo!’
Ina noudo ie nedi owera ro ubauba urio ro na-girorowai-rimo, neio ioudo aise gosuruwo-rimo giro niro turi to. Iedi giro sirio ro aise gorowodori-rimo damera gawagogo rido obo paruo to. Taie edi giro sirio ro obo ro aise giopia.
33 Giro edi urubia ro gimowotoi-rimo neio ro edi tanaro ro na-gowea-rimo, neio tere ri auna sabowa to aise gorowadau. Neio auna sabowa to na-gorowateai-rimo, nedi owera ro neio ro iato gobodorouti-rimo. Ibose ubauba urio edi dubu teibo aboudo gimabodorai, owera neitiro ro ibose to gobodorouti-rido iedi sabowa ro nato.
34 Taie iedi sabowa ro neido sirio urubia aise gou-rimo Iesu owea ri. Neio ro Iesu na-gowea-rimo, nou neio ro binio to gemediai-rimo iedi duriomoro ro emeserai ri.