9
Iesu pupuwo korosa mutu e ubauba kimatopeamuti aboto
1 Taie Iesu ina ioudo sawa pe to aise gorora-ro, obo paruo ata sapuwo to imese gabu-ro. Nou simara sabowa Kapeniama neito gorowameai-ro.
2 Nou ito na-gorowateai, arua urubia ro togiri dubu taratara mutu gowou-rimo Iesu aboto. Nedi urubia ro Iesu ro kimibiria kebase ta-gimowea, taie nou ro ibo togiri dubu aboto, ‘Mo mere, oro tere na ie! Abora oro ubauba mo ro ta-nematopeamuti.’
3 Iedi tau ro nato Mose sabi kitamudiro urubia iato ibose to gorowomidiro. Neio ro na-girorowai-rimo Iesu ro beda owera gutura, neio nakara se iato geremowauti-rimo ibo, ‘Nou ro Godi masiro ubauba ta-owai.’
4 Kaupoti neio edi kimaragoidiro ro Iesu ro ta-gimowea, taie neio nou ro nato gimowapotai, ‘Mabu boira nio ubauba kimaragoidiro mutu na-irohotiti-dumo?
5 Beda owera ra koko tato mo ro kutura aboto? Mo ro ibo kutura ato “Oro ubauba ta-nematopeamuti.” Nou ra? O mo ro ibo kutura ato “Dotobowa doroho!” Nou ra?
6 Mo Imese Urubia Kiauri Dubu e, ina ata tanaro mo ro anama-osioidiro-ri, nio umoro koi sapuwo to ibo, mo abato pupuwo korosa towamo nedi duriomoro ro nato, urubia ubauba kimatopeamuti aboto.’ Taie nou ro nato gutura togiri dubu aboto ibo, ‘Deribua! Keta detebuti! Dorowameai sabowa to!’
7 Iedi tau ro nato iedi togiri dubu ro meana aise goi, na-geribuwa-ro taie simara sairo to imese gorowameai sabowa to.
8 Nedi tanaro ro urubia sirio ro na-gowea-rimo, neio kimaragoidiro ro giopia, sapuwo to tere ro giwati. Taie Godi neio ro auna se iato gemowabu-rimo. Mabu idaibo sosoro pupuwo korosa Godi ro ta-gaiwai-ro urubia dubu aboto, idaibo tanaro kisioidiro aboto.
Iesu ro Mataio gemowapotai nou owasoro ri
9 Iesu ro edi duriomoro na-gemeserai, nou ro Mataio nato gowea takesi kimade moto ato gomidiro. Iesu ro ibo Mataio aboto, ‘Dou-ro mo dowasoro-ro!’ Mataio ro na-girorowai Iesu edi owera ro nou aise garadabuai, Iesu nou ro saro rido imese gobodoro.
10 Taie ido Iesu Mataio moto ato ohona iato giho. Sirio takesi kimade urubia, sabi kisebo urubia mutu, neio ro gou-rimo Iesu mutu ohona atu moro ato giho-rimo, nou kowasoro urubia mutu.
11 Neio Parasi urubia ro na-giwia-rimo, ohona kiho moro ato Iesu mutu, neio ro kowasoro urubia nato gimodowa-rimo ibo, ‘Mabu boira nio kitamudiro dubu takesi kimade urubia mutu, ibose sabi kisebo urubia mutu, ohona atu moro ato na-iho-dumo?’
12 Neio edi kemodowa owera ro Iesu ro na-gimororowai, neio nou ro ibo gimowameai, ‘Nou idaibo sosoro ie, etio ra durupi gamogamo se na-iworohuti-dumo, temeteme ro iwati tato, dokota neio aboto ou-ri pua. Kaupoti temeteme ro etio ra iwati, dokota neio aboto kou e.
13 Godi owera Tarena Buka ato keba ia se ta-gisioidiro-rimo ibo, “Mo ubi ie nio ro urubia natonato kimati. Mo ubi tato ie nio ro dao kimatowo tanaro sirio tau aise na-isioidiro-dumo.” Kaupoti ba-dorowameai-mo maumo mea se ba-dosora-mo! Mo nedi sopu duriomoro neito na-nou-ro, ubauba urubia aboto nou-ro, neio imowauti ri ubauba aboudo erewesegerai ri, mo ibo pua meamea urubia aboto kou.’
Tagara tanaro orio tanaro mutu imasaupiai-ri pua
14 Ata tau obo to kiwarumiauti dubu Ioane, nou edi kowasoro urubia ro arua, Iesu aboto nato gou-rimo. Neio ro Iesu nato gemodowa-rimo ibo, ‘Nimo arua tau ohona kiho tato korowomidiro ie, Parasi urubia atu sosoro tanaro ibose to kisioidiro ie. Ina mabu boira oro edi kowasoro urubia ro ohona kiho tato tanaro kisioidiro tato, Godi kemaragoidiro sapuwo to?’
15 Neio Iesu ro nedi totomu owera ro neito gimowameai, ‘Marete soriomu ato, orio dubu nu orobo dese to na-edea, nu simara namuturubi pape korowomidiro ra? E e! Kaupoti ata saiki amadi-ou-ri nedi orio dubu ro orobo dese to na-gedea, nu namuturubi aboudo amadimo-owagare-ri. Taie edi tau ro nato neio ohona kiho tato nato ama-orowomidiro-ri.
16 Ina ata orobo modobo pua tagara obotama pito mutu, orio obotama kere to kemowateai. Mabu kowiouti ato, iedi obotama kere ro aise kerekekeai ie, ibose edi tagara obotama ro nou pito auna aise kowai ie.’
17 Iesu ro ina atu sosoro totomu iato gimowauti, ‘Ata mere ro orio tuba tagara kepuru to arate-ri pua. Mabu idaibo mino to kororosioidiro ato, orio tuba tagara kepuru to karate ato, iedi tuba ro keremagaubuti ato, iedi kepuru ro aise kerepeputi ie, tuba aise karasiai ie, ina kepuru ubauba koi ie. Kaupoti urubia ro ibo kisioidiro ie, orio tuba orio kepuru to kiratuti ie. Neitiro atu se modobo ato ama-iamotiti-mari.’
Iesu ro temeteme orobo meana gowai ibose pamo besere keremiro gemowameai-ro
18 Iesu ro totomu kimowauti oroporeai pua, taie sabowa kiauri dubu nou aboto nato gou-ro. Nou Iesu sosoro gabo ato kauhio to aise girimusubua. Nou ro ibo, ‘Mo besere kainai ta-naseperai. Oro aise ba-dou-ro tu itomai ri nou durupi ato, nou keremiro kemowameai sapuwo to.’
19 Taie Iesu aise geribuwa-ro, iedi dubu ro nou aboto aise garadabuai. Kowasoro urubia ibose nou aboto ta-garadabuai-rimo, atu se imese gou-rimo nedi dubu ro nou moto to.
20-21 Neio atu se edi tau ato gou-rimo iedi dubu ro nou moto to, ata orobo Iesu saro rido ta-gou-ro. Iedi orobo ro nou durupi tama rido karima ro ororuwotiti-ro. Nedi temeteme ro nou abato 12 kisimisi to owamotiti. Nou ro kimaragoidiro to ibo, ‘Mo ro Iesu obotama gare nama-emowasomai-ri, mo meana anama-oi-ri.’
Taie nou ro Iesu obotama gare nato gemowasomai.
22 Iesu huru to na-gimeterai-ro, iedi orobo ro nou se gowea. Nou ro ibo, ‘Besere buro, oro tere na ie. Oro simara kimibiria ro owai meana.’
Taie iedi tau ro nato iedi orobo ro meana aise goi.
23 Taie Iesu aise gemobodiai sabowa kiauri dubu moto to. Nou ito na-gorowateai, nou ro nato giwia urubia sirio iedi besere ro idobi gemerete-rimo. Neio ro auna diamo gisioidiro-rimo, ibose arua urubia ugeuge gemourio-birimo.
24 Neio nou ro nato gimaiauti, ‘Neido daragare-mo! Nedi besere ro pamo pua, norou orobu.’
Kaupoti Iesu owera urubia sirio ro na-gemororowai-rimo neio ro nou gaga gemororouti-rimo.
25 Iedi urubia sirio ro Iesu ro ioudo na-gimabodorai-ro, taie nou moto goro to nato godoro. Iedi besere kainai ro tu rido na-gorobai-ro, nou aise geribuwa-ro.
26 Iedi tanaro ro Iesu ro na-gosioidiro, nou sapuwo to owera nato gobodorouti-rimo iedi duriomoro gebari ro nato.
Iesu ro dubu peteibi meana giwai-ibi
27 Iesu ro edi moro ro na-gemeserai-ro, nu aise gadorowado ina nou netewa teibo pogo dubu teibo ro saro rido aise gobodoro-rido. Iesu aise gouwado ina neitiro Iesu aboto auna se inaina aise giaiauti-rido ibo, ‘Oro Godi ro kohodowa dubu e! Neitiro natonato dimati-maro!’
28 Taie Iesu edi moto to na-godoro edi pogo dubu teibo ro ibose to godoro-rido. Nou ro ibo neitiro aboto, ‘Nitiro abato kimibiria a-iamo ra ibo mo ro modobo ie nitiro meana kiwai-ma aboto?’
Neitiro ro ibo, ‘Io Abera Naramu neitiro ti-nimibiria-do ibo neitiro oro ro modobo ie meana kiwai-ma aboto.’
29 Taie neitiro edi idomari ro Iesu ro aise gimowasomai-ma, nou ro ibo, ‘Nitiro kimibiria mutu e, nitiro idomari Godi ro meana imowai-ma.’
30 Taie iato tuturu to owamo pua neitiro idomari meana aise goi-rido. Neitiro idomari meana na-goi-rido, Iesu ro binio to owera nato gimowapotai-ma ibo, ‘Nedi tanaro ro ororosioidiro nou sapuwo to urubia imowauti ate!’
31 Kaupoti neitiro na-gorowameai-rido, owera neitiro ro aise gobodorouti-rido iedi duriomoro ro nato.
32 Iedi dubu teibo ro moto goro rido na-gosuruwo-rido, iedi tau ro nato owera karo tato dubu ubauba urio ro oworohutiti, simara urubia ro nato gowou-rimo Iesu aboto.
33 Iedi ubauba urio ro gomidiro nou abato Iesu ro nato gemabodorai nou aboudo. Taie iedi owera karo tato dubu ro owera imese garo. Iedi auna dubu patu ro gorobu iato, neio ro na-gowea-rimo iedi tanaro ro gorosioidiro neio kimaragoidiro ro giopia. Neio ro ibo, ‘Idaibo tanaro nimo ro abora se nowea-dumo nimo nedi Isiraere duriomoro gebari ro nato. Nimo ro idaibo korosa tanaro kiauri pua.’
34 Kaupoti Parasi urubia Iesu sapuwo to ibo garowado-rimo, ‘Ubauba urio sirio edi eputa urio ro, Iesu pupuwo korosa nou ro omiotiti-die ubauba urio kimabodoidiro aboto.’
Godi woko urubia sipu tato ie
35 Iesu kowasoro urubia na-gidabuai, taie neio ro awawo sabowa sirio, kainakaina sabowa sirio mutu iato giraturio-rimo. Iesu ro Iu urubia simara karadabu moto ato iato itamudirotiti. Nou ro urubia ta-imowautiti mea owera Godi ro kiwaboi tanaro sapuwo to. Ibose urubia durupi ato beda ubauba temeteme sirio ro iamotiti, nou ro meana aise giwaititi.
36 Nou ro urubia na-iaurititi kimaragoidiro siriosirio mutu koroho ato, neio sopu ia to imese ta-giwororuwo-rimo. Nedi urubia ro neio sipisipi sosoro ie dorogora se irohotiti-dumo, kimowotoi dubu tato ie. Neio idaibo sosoro Iesu ro na-giauri, neio noudo ie nou ro nirimagare gimati.
37 Taie nou kowasoro urubia aboto aise gerewesegerai nou ro ibo, ‘Morobise ie nou idaibo sosoro ie, pari ohona sirio ie kiwoiriamuti aboto. Kaupoti kiwoiriamuti woko urubia sipu tato ie.
38 Ina noudo ie nou sapuwo to pari abera ba-dararatoro-mo, woko urubia itioduti ri pari ohona kiwoiriamuti sapuwo to.’