3
Orobo ra uramu ra totomu nitiro sapuwo to ie
1 Ina ibose, owera ama-ou-ri uramio ra mutu mamio, nio aboto. Nio simara uramio mea mino to kimododidiro modobo ie. Nio ro idaibo tanaro namadimi-isioidiro-ri, arua kimibiria tato uramio nio abato na-irowomidiro, modobo se kowamo ie kimibiria upi nio edi mea korowomidiro muro ro owera tato se neio nio ro kiwesegere ie Iesu Keriso edi mea gabo ro neito.
2 Mabu nio neio ro kieibimo ie tarena muro to korowomidiro ato, ibose nio ro mea mino to na-imododidiro-dumo.
3 Nio edi mea sosoro ro ohu durupi rido kou modobo pua. Auna se imaragoidiro mamo parasi parasi koroho aboto, sobo meana kiwaititi aboto, ibose awawo wisa sowio namabu kiroidiro aboto auna se imaragoidiro mamo.
4 Kaupoti nio niro turi ato edi meana ro iamotiti, nio ro durupi to nou ri iwapotaidirotiti-dumo. Idaibo meana nio abato aise kiamo modobo ie. Nio niro turi ato mea muro, miro mutu ba-miamotiti-ma. Iedi meana ro koroporeai gabo tato ie, Godi sosoro gabo ato auna nakomu e.
5 Mabu tarena mamio keba se na-gorowomidiro, kimibiria Godi sapuwo to na-iworohutiti-mo, neio mea sosoro idaibo mino to gorowaititi-rimo. Neio uramio aise imododidirotiti-mo.
6 Sera idaibo orobo ie, nou uramu ro beda owera iarotiti, nou ro durupi to aise isioidirotiti. Ibose nou ro uramu simara eputa dubu to asorotiti. Nio beda mamio ra meamea tanaro tere tato na-isioidiro-dumo, nio idaibo Sera busere ie.
7 Ina atu sosoro kitamudiro owera kimibiria uramio nio aboto ibo ie. Nio upi mutu na-orowomidiro, nio ro sirio tau neio ba-dimaragoidirotiti-mo, nio ro beda mino to amadimi-iwarebidirotiti-ri. Upi nio ro sirio tau mea mino to aise gi-iworohuti-ri. Pupuwo nio abato giporeai, upi nio sosoro pua neio pupuwo awawo pua. Uramio upi nio ro aise gi-imododidiro-ri. Mabu upi dubu nio atu se Godi abato edi keremiro ro owamo-die, nio ro wisa tato nou amadimo-omidai-ri. Uramio ro nedi gabo ro mea se namadimo-obodoro-ri, nio kararatoro tau ato, Godi ro nio kararatoro owera modobo ato kimewidiro ie. Ina Godi aboudo nio ro mea wisa kowea ie.
Meamea tanaro gi-isioidiro-ri arua urubia aboto
8 Abora mo ubi ie nedi owera ro na-nimowauti nato koporeai, nio kaupoti kimaragoidiro mutu korowomidiro modobo ie. Abora mo ubi ie nio kimibiria urubia imese sirio se korowarebai tanaro kisioidiro naminiramio korowarebai beda sosoro ra, idaibo mino to korowarebai modobo ie. Arua kimibiria urubia aboto nirimagare tanaro aise gi-isioidiro-ri. Sopu to aise gi-orowororuwoidiro-ri.
9 Ata dubu ata ro ubauba tanaro ata na-osioidiro oro aboto, nou wisana ubauba to emowameai mamo. Ibose ata dubu ata ro oro ubauba owera na-omio, nou wisana oro ro ubauba owera to emowameai mamo. Kaupoti oro ro Godi gi-araratoro-ri korosa nou aboto aiwai ri. Nio Godi ro nou sapuwo to girapoi-ro. Ina nedi mea tanaro ro nou kisioidiro nou mabu ato nio Godi ro meamea wisa nato ama-imio-ri.
10 Mabu owera Tarena Buka ato kebase ta-gisioidiro-rimo ibo, Urubia dubu ubi na-owamo mea se komidiro aboto, nu matagoro kemododiai modobo ie. Karasaubuti owera nou matagoro rido kosuwoduti modobo pua.
11 Nou modobo ie ubauba tanaro kisioidiro aboudo ba-maragarewado, ina meamea tanaro se kisioidiro. Nou modobo ie sirio tau korowaibirio miro pupuwo to kosora.
12 Mabu meamea tuputupu urubia neio Abera Naramu ro timowotoititi-die. Ibose neio edi kararatoro owera ro Abera Naramu ro timewidirotiti-die. Kaupoti ubauba tanaro kisioidiro urubia neio Godi ro nasa urubia to iasorotiti-die.
Meamea tanaro kisioidiro sapuwo to nio temeteme kiauri ie
13 Nio abato auna ubi na-iamo tuputupu tanaro kisioidiro aboto, nou sapuwo to nio ubauba beda urubia ro amadimi-iwai-ri?
14 Nedi meamea tanaro ro nou sapuwo to nio ro ubauba temeteme kiauri sekere, kaupoti nio meamea wisa Godi aboudo kiwia ie. Nio ubauba beda urubia ro iwaititi-dumo, neio tere imati mamo, ibose siriosirio kimaragoidiro nio abato iamo mamo.
15 Kaupoti nio niro turi ato Keriso Abera Naramu to nouse dapoi-mo. Nio modobo ie sirio tau keremododiawado, urubia kimodowa owera kimowame aboto. Ina nio ata ro kimodowa ato ibo, ‘Mabu boira nio Keriso abato kimaragoidiro na-iamotiti?’, nedi urubia ro wisa kimowameai aboto wisa paea se kiamo ie. Kaupoti neio wisa owera nio ro kimowame ato, mea muro to gi-imowame-ri.
16 Modobo ie nio mea se korowomidiro, ina nou mabu rido nio keremasibai ibo, ‘Nimo ro ubauba tanaro isioidiro pua.’ Ina noudo ie nio urubia ro owera to ubauba na-iwaititi-dumo, mabu nio Keriso ubi tanaro isioidirotiti-dumo, saro to neio siripo koi ie. Mabu nio ro ubauba tanaro isioidiro pua, meamea tanaro isioidirotiti-dumo Keriso na-obodoro-dumo.
17 Godi ubi ato, nio ro temeteme amadimi-iauri-ri meamea tanaro kisioidiro sapuwo to. Io, Godi sosoro gabo ato ata ubauba tato ie nio ro idaibo temeteme kiauri aboto. Kaupoti nio simara ubauba tanaro sapuwo to temeteme nato na-imade-dumo, modobo ra? E e, modobo ia pua!
18 Keriso beda tanaro gosioidiro maumo nio ro mea se a-gowea-dumo ra? Nou kaupoti tau to imese garaburai urubia ubauba kimatopeamuti sapuwo to. Nou mea tuputupu tanaro dubu e. Nimo ro nedi kerewaekerewae tanaro sirio ro na-nisioidirotiti-dumo, temeteme nimo bobo ato nou ri gimidai. Nedi gabo ro nou ri gosioidiro nimo Godi aboto nou ro neido iwou rie. Nou durupi urubia ro gopia-rimo. Kaupoti nu Tarena Urio to gowameai-ro keremiro to.
19 Ina nedi urio keremiro ro nouto aise gou dibura ato edi urio ro gorowomidiro neio owera imowauti ri.
20 Neio keba ia se Noa edi tau ato gomidiro, Godi edi ubi tanaro ro neio ro a-gebesiai-rimo. Ina neio Godi ro ubauba tau se iwai pua, serawo samo to oi pua, nou ta-eremasebidirotiti neio ubauba kimeserai aboto. Kaupoti neio ro ubauba imeserai pua. Ina iedi tau ro nato Noa ro bokose pe na-ididititi, ina nedi bokose pe ro neito sipu tato urubia ro godoro-birimo, 8 urubia obo damo ato keremiro neibi ro giwia-birimo.
21 Nedi obo damo ro ata maumo owauti-die ibo obo to kiwarumiauti. Ina nedi obo to kiwarumiauti tanaro ro pikisa owera ibo owamo, nio abora ubauba aboudo nou ro iapopo-die. Nimo nedi sopu durupi ro na-niwarumiautiti-dumo maumo ibo owamo pua durupi rido marea kiwiouti. Nou pua io, Godi aboto nio ro amadima-aro-ri ibo mea ia se anama-irowomidiro-ri, keremasibowado aboto ibo nimo ro ubauba tanaro isioidirotiti pua. Iesu Keriso bobo rido na-geribua-ro nio nou ro neito iapopo-die.
22 Nedi dubu ro Iesu Keriso Adiri sabowa to nou ro godoro, abora Godi edi tumodi sapuwo ro nato auna gabamani to ohu ia to nou ro imidirotiti-die. Ina imese sowake urio sirio, erere orora pupuwo mutu na-irowomidirotiti, neio Iesu owera se kirowidiro ie.