4
Ubauba tanaro dimesere-mo, meamea tanaro se disioidiro-mo
1 Keriso durupi to temeteme ta-giwia. Ina noudo ie nio ibose mea se ba-dimaragoidiro-mo nou beda mino to goroho. Nou edi kimaragoidiro ro na-iworohutiti, nio ro idaibo sosoro kimaragoidiro ibose ba-diworohutiti-mo. Mabu etio ra temeteme na-iauri-dumo, ubauba tanaro sirio morobise to neio ro ta-gimesere-rimo kisioidiro aboto.
2 Ina noudo ie nedi tau kainai ro nato duriomoro ato nama-irowomidiro-ri, Godi ubi tanaro se kisioidiro aboto ama-irowomidiro-ri, ubauba tanaro ina isioidiro-ri pua, ubauba urubia ro na-isioidiro-dumo iedi ubauba tanaro ro.
3 Mabu nio kebase Godi umoro tato na-irowomidirotiti, nio ro auna tau dorogora mabu ato goporeai-rimo. Godi umoro tato urubia neio ro edi ubauba tanaro ro nou isioidirotiti-dumo, soka tanaro kisioidiro, auna sogoi ro kiwati ie ubauba tanaro kisioidiro aboto, neio kidio karadabu abato soka tanaro kisioidiro, ina orora kiroru. Godi edi sabi mako ro neio ro ta-gemadauriai-rimo.
4 Ina nedi tau ro nato kimibiria tato urubia nio abato na-orowomidiro boroboro ro girobai, mabu nio aradabu pua neio aboto, iedi durupi ubauba ubi tanaro sirio ro kisioidiro aboto. Ina noudo ie nio owera to neio ro nou ri iwatiti-dumo.
5 Kaupoti nedi urubia ro neio ro iedi ubauba ro na-isioidiro-dumo, Godi ro womu saiki ato koto aboto ama-iwou-ri. Nou ta-geremododiai nu edi koto kiauri woko ro nou ro osioidiro ri. Korowaburo urubia, korowomidiro urubia mutu, neio koto atu se ama-iwai-ri.
6 Pamo urubia keremiro kebase na-gorowomidiro, kowasoro urubia ro neio mea owera ta-imowautiti-mo. Nedi tanaro ro nou mabu ato gororosioidiro-rimo neio ro nedi mea owera ro kimibiria aboto, taie neio aise gorowaburo-rimo. Ubauba tanaro neio ro durupi to ta-gisioidiro-rimo, ina wisana pamo aise giauri-rimo, sopu duriomoro urubia aboto beda sosoro to ororosioidiro-dumo. Kaupoti nedi kimowauti tanaro ro nou mabu ato gisioidiro-rimo, kirowidiro urubia neio urio keremiro se korowomidiro aboto, Godi beda sosoro omidiro.
7 Tau aupiaupi ro orobowado-die imese namabu patu womu to kereredea aboto ie. Ina noudo ie nio kimaragoidiro patu mea se miamo, ibose tanaro kisioidiro ato modobo ie kororodiobuti, nio Godi aboto kararatoro owera mea se karo aboto.
8 Auna tanaro nou e, nirimagare aise gi-eremati-ri. Mabu nio ro nedi nirimagare ro na-owawutiti-dumo, nio edi ubauba sirio ro nou ro neito ama-imatopeamuti-ri.
9 Nio moto to kimibiria borubi kamade mutu aise gi-imaidodoro-ri, muhoio owera aro mamo.
10 Tarena Urio ro nimo kaokao se modobo niwaititi-die erere tanaro kisioidiro aboto, ina nedi erere tanaro ro urubia nio ro neito mea se ba-diwarebai-mo. Ina nedi erere tanaro ro kisioidiro aboto urubia mea se neito diwaboi-mo.
11 Etio ra owera nio abato na-imowauti-dumo, Godi simara ia owera ba-dimowauti-mo. Godi urubia kiwarebai tanaro etio ro isioidirotiti-dumo, neio ro ba-misioidiro-mo Godi edi pupuwo ro neito. Ina noudo ie imese sirio tanaro urubia ro kisioidiro ato Iesu Keriso edi pupuwo ro neito, nou sapuwo to urubia sirio ro Godi amadime-emowabutiti-ri. Imese pupuwo korosa, auna masiro mutu nou do ie, womu tato womu tato aise towamotiti. Ibose ba-mororosioidiro.
Iesu urubia temeteme kiauri sapuwo to ie
12 Namuturubi nirimagare babio, era sosoro edi kiwaibirio tanaro ro nio aboto na-oroho-dioumo, nio boroboro nato oi mamo. Idaibo kimaragoidiro iworohuti mamo ibo, ‘Aborabora tanaro ro ororosioidiro-dioumo nimo aboto.’
13 E e ibo pua, nou ibo ie nio abato kamade ro se kowamo modobo ie, mabu Keriso ro idaibo temeteme ta-giauri ina abora nio ro nou iauri-dumo. Keriso gebari pere ie, nou sosoro namadi-orowawea-ri, nio auna ia kamade ro ama-iwati-ri.
14 Nio Keriso na-owasoro-dumo, ina nou sapuwo to nio urubia ro ubauba owera namadimi-imio-ri, nio ro Godi aboudo meana kiwia ie. Mabu Godi edi Tarena Urio ro auna masiro na-orobidiro, nou nio abato tomidiro.
15 Modobo pua nio ro ubauba tanaro kisioidiro, idaibo urubia kiopiauti, piro tanaro kisioidiro, ubauba tanaro auna se kisioidiro, arua urubia tanaro aboto punugo se kiwaumudirio, ina neio sapuwo to temeteme kiauri.
16 Kaupoti nio ro temeteme kiauri ato mabu nio Keriso kowasoro urubia ie, siripo nato oititi mamo. Godi auna se ba-demowabu-mo, mabu nio abato Iesu Keriso edi masiro ro tiateidirotiti.
17 Abora tau ro orobowado-die Godi ro imese urubia koto kiwai aboto, nou ro koto edi tau ato nama-iwai-ri, nou ia simara urubia aboudo ama-aratamuai-ri. Nimo abato nedi tanaro ro kebase namadimo-ororosioidiro-ri, ina Iesu Keriso owera kimibiria tato urubia neio Godi ro beda mino to ama-iworohuti-ri?
18 Ina Tarena Buka ato owera ibose towamo, Meamea tuputupu tanaro kisioidiro urubia keba se koko tau sirio neio ro amadimi-iauri-ri, ina ido neio Godi ro nato amadi-iapopo-ri. Ina Godi tere kemati tato urubia, arua ubauba tanaro kisioidiro urubia mutu, neio nou ro beda mino to ama-iworohuti-ri? Modobo ia pua, neio imese moro to amadima-araraseperai-ri.
19 Ina noudo ie Godi ubi ato temeteme etio ro iauri-dumo, modobo ie neio Godi tu to kereredea. Nou ro beda owera karo ra aise kisioidiro ie, nou nimo kisioidiro dubu nouse ie, ina nimo ro modobo ie meamea tanaro aise kisioidiro.