Ruti totomu
1
Nou Ruti totomu e nou idaibo sosoro gomidiro
1-2 Isiraere urubia ata kiauri dubu ro na-iaurititi, ata dubu masiro Erimereki nou Beterehema sabowa ato wimidirotiti nou orobo mere teibo mutu. Iedi tau ro nato auna sogoi tau ro gereredea, ina noudo ie neibi ro nou ri gemeserai-birimo edi Eparata duriomoro ro, Iuda duriomoro ato na-owamo. Nou, orobo Naomi, mere teibo Maroni ra Kirioni ra neibi ro edi duriomoro ro aise gemeserai-birimo imese giabu-birimo ata daimodaimo duriomoro to masiro Moabi, neito goi-birimo karaho.
Taie tuturu tau to iato aise wimidirotiti-bimo.
3 Ina iato Erimereki aise garaburai Moabi duriomoro ato. Nou orobo garamu mere teibo mutu neibi se gimeserai-biro.
4 Neibi ibo wimidirotiti-bimo, mere teibo Moabi orobo teibo iato aise giedea-marido. Kirioni ro a-gedea Opa, Maroni ro gedea Ruti. Neibi nakara se iato imidirotiti-bimo tuturu tau to.
5 Ina iedi mere teibo ro iato aise gorowaburai-rido, Naomi nakara ia se geremeserai, mere teibo tato, uramu tato ibo wimidirotiti.
6 Ina ata owera nou ro iato girorowai ibo Isiraere urubia neio abora ohona modobo ie, tiho-dumo, sogoi tau ta-goroporeai. Iedi meana ro Godi ro gaiwai neio aboto. Naomi ro na-girorowai, nou eterera garamu teibo mutu neibi namabu keremododiai,
7 taie imese gaimai-birimo simara sabowa to, Iuda duriomoro ato na-owamo, edi koroho gabo ro neibi ro nou gemodobowa-birimo neido gabu-birimo ito.
8 Neibi neido na-gabu-birimo ipi ato, Naomi ro eterera teibo iato gimowapotai-ma, ‘Nitiro mo se nobodoidiro-do, simara sabowa to dorowameai-do. Nitiro beda kiwarebai tanaro wisioidirotiti-do mo aboto, mo mere teibo edi tau ato na-gomidiro-rido, nitiro Godi ro mea wisa ba-mimowameai-ma.
9 Ina nitiro mea se komidiro aboto Godi ro orio uramu teibo ba-mimowea-ma.’
Taie eterera teibo iato giohiai-ma, idobi imese geremerete-birimo.
10 Neitiro iato gutura-rido ibo, ‘Marasio neitiro anamadi-iabu-ri oro sabowa to.’
11 Ina Naomi ro ibo neitiro aboto, ‘E e, nitiro mo mutu ou-ri pua. Mo abere ie, mo ro modobo pua mere teibo ina kiroto-ma, nitiro kiedea-ma aboto.
12 Nodi duwo ro mo uramu ro ma-medea-ro ina niro kowea ato, nato nama-iroto-mari mo ro kiwoubua-ma tuturu e,
13 nitiro modobo pua keremotoi tuturu tau to. Komidiro keremiro mo abato ubauba ia se iamo, iedi tanaro ro Godi ro gosioidiro-die mo aboto.’
14 Neibi ina idobi iato geremerete-birimo. Opa daramuabere mutu na-gororohiai-rido, iawo kutura, taie nou imese gorowameai simara sabowa to. Kaupoti Ruti arahua pua daramuabere aboudo, koko se girarebidiro.
15 Taie Naomi na-gerewesegerai Ruti aboto nou ro ibo, ‘Oro boinana orobo torowameai simara sabowa to, nou simara orora imowameai. Oro ibose ba-dorowameai!’
16 Ina Ruti ro ibo, ‘Oro ro nemediawado mo orowameai ri. Oro beda moro to kou ra, mo ibose to kou e. Oro beda moro ato komidiro ra, mo ibose to komidiro ie. Oro edi urubia ro, mo urubia ie. Oro edi na emowabutititi, mo ro ibose to nou anama-emowabutititi-ri.
17 Oro karaburai moro, mo karaburai moro ie. Oro bobo kemoba moro, mo iato ibose to anamadime-emoba-ri. Neitiro ata ro nama-ihodowa-mari, Godi ro ba-maiwai-ro ubauba wisa mo aboto.’
Nou idaibo sosoro korowameai gabo rido imese ta-geremowotouti.
18 Naomi umoro na-goi Ruti ubi tato ie korowameai, nou ro ina emediawado pua nou orowameai ri.
19 Neitiro atu se imese gou-rido Beterehema sabowa to.
Neitiro ito na-gorowateai-rido, urubia sirio ro na-girowai-rimo ibo Naomi ta-wou-ro, neio kamade mutu iato giaiauti-rimo. Mamio ro ibo, ‘Morobise Naomi ra io?’
20 Naomi ro ibo, ‘Mo Naomi to asoro ate, mo Mara to dasoro-rimo, mabu mo kamade ro owati pua mo komidiro keremiro mibo ia ie, Godi ro ubauba ta-nemowai-ro.
21 Mo neido modobo ato naimai keba se, ina abora mo Godi ro nakara se nowameai-die neito. Mo Naomi to nasoro-rimo, imese pupuwo ia Godi ro mo komidiro keremiro ubauba ta-nemowai-ro.’
22 Neitiro na-gorowateai-rido urubia edi tau ro nato bari ohona gidabuti-rimo.