2
1-3 Ata saiki Ruti ro ibo Naomi aboto, ‘Mo anama-odori-ri pari to, bari ohona urubia ro na-imesere-dumo nou imade rie. Etu umoro ra ata dubu ata nirimagare aise koi ie mo aboto, nou pari rido iwoiriamuti rie.’
Naomi ro ibo, ‘Io buro, ba-dodori.’
Ruti dorogora se godori, nou ata umoro tato ie nou etu pari to godori. Nou ro iato gidabuti woko urubia ro na-gimesere-rimo. Ata auna dubu e Beterehema ato na-gomidiro nou masiro Boasi, nou pari ie. Naomi uramu gu dubu e.
4 Boasi pari to na-gorowateai-ro nou ro ibo woko urubia aboto, ‘Nio modobo ra? Nio Godi ro ba-miauri!’
‘Io, nimo modobo ie, oro ibose Godi ro korosa ba-mowai.’
5 Ina Boasi ro ibo woko kiauri dubu aboto, ‘Io beda besere ra?’
6 Nou ro iato gemowameai, ‘Naomi mutu edi besere ro na-gabu-die Moabi duriomoro rido nou e io.
7 Nou ta-worowapotai-ro mo aboto, “Modobo ra mo nio saro rido kiwoiriamuti bari ohona?” Nou auna woko osioidiro-die mapagea ato egea mere se ta-womi-ro.’
8 Taie Boasi owera aro ri na-gou Ruti aboto, nou ro ibo, ‘Oro nato ba-disioidiro edi mamio ro neio saro rido.
9 Neio ata pari to namadimo-ou-ri, oro neio saro rido ba-dorobodoidiro. Mo woko urubia ro oro takamai owasomai-ri pua, oro aboto neio ro ata owera ata aro-ri pua. Obo nou e, neido ba-didio.’
10 Ruti auna dubu sosoro gabo ato na-giroborea, nou ro ibo, ‘Eso oro edi nirimagare owera ro na-waro-die mo aboto, mo karaho orobo ie.’
11-12 Taie Boasi ro ibo, ‘Mo umoro ta-noi ibo oro urubia ta-gimeserai, oro neito na-gabu-die Godi edi asesepu maumo ro oro nato ama-omidiro-ri. Mo umoro ie oro ro nirimagare tanaro ta-isioidirotiti oro daramuabere aboto. Iawe ro mea wisa momuo se ba-maiwai oro aboto.’
13 Nou ro ibo, ‘Oro ro mea kiwarebai owera aro-die. Mo mibo egea mere se oro ro ta-nemowagare, mo dorogora se orobo ie.’
14 Taie saiki turi na-gorobai Boasi woko urubia iho moro to iato gou-rimo, ina Boasi ro ibo Ruti aboto, ‘Oro dou-ro, daradabuai-ro nimo mutu iho ri.’
Taie Ruti neio abato imese gomi.
Ina Boasi ro ibo, ‘Dokou nou e, basiau to ba-dodobi.’
15 Taie amia ohona Boasi ro iato gomia nou ihona, nou niro modobo na-goi amia aise giedea. Ina adimo to Ruti imese gorowameai woko aboto.
16 Boasi ro ibo woko urubia aboto, ‘Bari kitahiti popo abato nou ro nama-imede-ri, nio ro emowabeouti ate! Amia ba-demoriouti-mo, nou odiobuti ate, nou ro nou ama-imede-ri.’
17 Iato Ruti ro na-gimade neio aboudo edi na giretuti nou ro iato gitiamuti, netewa teibo baiko teibo nou giodiai-ma,
18 taie imese giwidiai-ma nou daramuabere aboto, amia ohona Boasi ro na-gomia nou mutu.
19 Nou ro imese giaiwai, taie daramuabere ro ibo, ‘O nedi ohona sirio ro oro ro boido iwai-die, etu aboudo imidai-die? Oro beda dubu ro owarebai-die, Iawe ro korosa ba-momia!’
Ina eterera ro ibo gemowameai, ‘O ata dubu nou masiro Boasi, nou pari rido niwoiriamuti-die.’
20 Daramuabere ro iato gutura, ‘Nou korosa ba-mowai Iawe ro, mabu nou beda nirimagare tanaro na-nimesioidiro-ma neitiro mere ra uramu ra mutu. Iedi dubu ro mo uramu gu dubu e.’
21 Eterera ro ibo, ‘Ibose mo nou ro ta-utura-ro orowame ri wapo rido iwoiriamuti ri, womu tato bari kiwoiriamuti kiporeai.’
22 Daramuabere ubi aise goi ina nou ro ibo, ‘Ba-diwoiriamutiti, oro nou ro beda sosoro emowapotai-die nou se ba-disioidiro. Modobo pua oro ubauba kowea ata dubu pari rido kiwoiriamuti ato.’
23 Ruti daramuabere mutu na-imidirotiti, nou ioudo odowadotiti-ro pari to sirio saiki, nou ro bari ohona na-iwoiriamutiti womu tato ti-giporeai-rimo kiwoiriamuti. Ina ibose woiti ohona na-iwoiriamutiti womu tato ti-giporeai-rimo kiwoiriamuti.