10
Sowake urio ro peba ketebuti kainai Ioane ro gouho
1 Mo ro ina ata auna pupuwo sowake urio nato nowea Adiri sabowa rido na-gororuwo-ro, nou tema obotama ta-gorori, eputa abato darai ta-gorowotowa, nou woidomari rido saiki woroworo beda sosoro ra ibo gimewia. Nou sairo teibo auna ia boroboro koko posi era mio sosoro giriware-rido,
2 ina nou ro peba ketebuti kainai nou se gorobidiro, kodobura se gowamo. Nou tumodi sairo buru oromo ato gowotobowa, ina pere sairo goto ato gowotobowa.
3 Iato nou ro auna iamo gutura-ro, auna serawo tumu na masiro raioni, nou iamo sosoro gutura-ro. Nou edi tau ato na-gutura ibose 7 gururu owera ibose to geremohumo-rimo.
4 7 toboro gururu owera edi tau ato na-garo-rimo, mo ubi ie iedi owera ro iatiti ri. Kaupoti mo ro owera kodu se nirorowai Adiri sabowa rido na-gutura-ro, ‘Nedi owera ro na-irorowai, oro ro iatiti ate! Piro se ba-miamo!’
5 Iedi sowake urio ro mo ro edi na nowea sairo sapuwo buru oromo ato gowotoi, ina sapuwo sairo goto ato gowotoi, taie nu tumodi tu Adiri sabowa to aise gowotobowa.
6-7 Nou ro koko owera hodo asaubiai ri ibo gutura, ‘Edi dubu na-imidirotiti womu tato womu tato keremiro to, toboro, sopu duriomoro, ibose buru oromo, imese beda mutu namabu patu ra, nou ro gisioidiro, mo ro nou masiro napoi nedi owera ro koko owai ri abora na-naro morobise owera ie. Iana humuko keba se uria-ri pua sowake urio ro, tauo keba se urubia umoro tato tanaro Godi ro na-giwapotai-ro nou ipusu owera urubia aboto nou sowake na-irohotiti-mo, nedi tanaro sirio ro paea se nato amadimo-ororosioidiro-ri. Tau tuturu to owamo-ri pua, aupise ie, amadimo-ororosioidiro-ri!’
8 Mo ro edi owera kodu ro keba se na-nirorowai Adiri sabowa rido na-gutura-ro, ina nato nirorowai. Nou ro ibo mo aboto, ‘Iedi sowake urio ro, sapuwo sairo buru oromo ato na-owotoi, ina sapuwo sairo goto ato na-owotoi, nou aboto dou! Peba ketebuti kodobura nou ro na-orobidiro, domidai-ro!’
9 Taie mo edi sowake urio ro nou aboto aise nou, mo ro ibo, ‘Iedi peba ketebuti ro mo aboto kaiwai modobo ra?’
Taie nou ro ibo, ‘Nou e, domidai! Ba-douho! Oro ro nama-ouho-ri, nu nogobe topo sosoro ie, ina niro turi to nama-ereredea-ri, oro niro temeteme ro ama-orobai-ri.’
10 Taie mo ro nou tu rido na-nomidai-ro, aise nouho, imese topo ia ie nogobe sosoro ie, kaupoti niro turi to na-gereredea-rimo, mo niro temeteme ro aise norobai.
11 Taie mo neio ro iato nemowapotai-rimo, ‘Erere tanaro urubia, erere duriomoro urubia, erere owera urubia, ibose eputa urubia neio sapuwo to, Godi ipusu owera ina ba-dimowauti!’