11
Woiginisi dubu teibo Iesu sapuwo to gimowautiti-do
1 Mo modobo Abera Naramu aise nomia-ro, taie nou ro nato nemowapotai-ro, ‘Ba-dou, Tarena Moto ba-dodoburio, nadi kitomuti ba-dodoburio, ibose mo iato etio ro nemowabu-dumo oro ro ba-dioputi!
2 Kaupoti Iu owera karo tato urubia neio beda moro ato iradabutiti-dumo Tarena Moto abato, iedi moro ro odoburio ate, ba-demeserai! Mabu iedi moro ro neio ta-nimapoi. Nedi urubia ro tarena sabowa Ierusarema 42 sogomi to neio ro amadimi-itarumawado-ri.
3-6 Ina netewa teibo woiginisi dubu teibo mo sapuwo to urubia na-imowautiti-do, neitiro mo ro pupuwo korosa anama-imio-mari, neitiro ro mo ipusu owera 42 sogomi to urubia neito amadi-imowautiti-ri, nou ibo owamo 1,260 saiki to. Nedi dubu teibo ro garamu suana mutu amadi-imowautiti-ri.’
Mo ipusu owera dubu Sekaraia, urubia nou ro ta-imowauti keba se oribi ota teibo sapuwo to, ibose gorodi erempa kiaremo nakomu teibo sapuwo to, edi na itoititi-do sopu duriomoro edi Abera Naramu ro nou sosoro gabo ato. Neitiro ro nedi urubia dubu teibo ro imabuti-madioudo. Etio ubi ra neitiro ubauba kiwai-ma aboto, neitiro matagoro rido era ro se kosuruwo ie, taie iedi nasa urubia ro era ro aise kiho ie. Etio ra ubi na-iamo neitiro ubauba kiwai-ma aboto, iedi urubia ro morobise to aise korowaburai ie. Nedi dubu teibo ro mo ipusu owera namadi-irowautiti-ri 42 sogomi to, neitiro abato pupuwo korosa ama-owamotiti-ri daroho neitiro ro aise amado-odiobutiti-ri. Ibose neitiro abato pupuwo korosa towamo erere obo neitiro ro urubia karima to aise amadi-iwaititi-ri. Neitiro ibose pupuwo korosa mutu e, erere ubauba ia tanaro urubia abato amadima-araratuamuti-ri simara ubi tau ato.
7 Nedi dubu teibo ro Godi owera korowauti nama-oroporeai-ri, ibisa auna ia bobo rido na-gioro-ro, iedi dubu teibo ro neitiro aboto boso amadi-owou-ri. Neitiro nou ro ama-iwamedei-mari, pamo se ama-iopia-mari.
8 Neitiro pamo durupi teibo auna gabo ato iato aise ama-irobu-mari iedi auna sabowa ro nato. Neitiro Abera Naramu ota kemowotowa teibo ato iato keba se ta-gemopoguti-rimo. Iedi sabowa ro piro masiro teibo mutu e, Sodom ra Isipi ra.
9 Iedi sabowa ro nato erere tanaro urubia, erere gu urubia, erere owera urubia, erere duriomoro urubia, nedi dubu teibo ro pamo durupi teibo netewa didi saiki peteibi ina ata saiki sapuwo, neitiro kiauri-ma to imese amadimi-isoberai-mari. Neio ro kimoba-ma aboudo sabi amadime-edea-ri.
10 Ina neio kamade ro ama-iwati-ri, namabu aise amadimo-oromio-ri, mabu awawo temeteme neitiro ro imiotiti-do abora pamo ie, neio kamade nou ri amadimi-iworohuti-ri.
11 Neio kamade giworohuti-rimo, kaupoti netewa didi saiki peteibi na-gororoporeai-birimo, ina ata saiki na-gowaroho, saiki turi ato nedi woiginisi dubu teibo ro neitiro Godi ro keremiro huhuame nato gimia-ma. Taie neitiro pamo rido aise giribua-rido, imese gotoi-rido. Neitiro edi urubia ro giauri-marimo neio auna tere ro giwati.
12 Iato neitiro ro auna owera kodu nato girorowai-rido Adiri sabowa rido na-gutura-ro ibo, ‘Nitiro neito dioro-rido!’
Taie neitiro Adiri sabowa to imese gioro-rido tema maumo ato, neitiro edi kioro ro na-gioro-rido, neitiro edi nasa urubia ro neio ro idomari to ibose to giauri-marimo.
13 Iedi atu tau ro nato auna ia sopu momuruo ubauba mino to nato goromurowai modobo pua, auna sabowa sapuwo kere ta-gamiriti. Iedi sopu momuruo ro nou ro 7,000 urubia nou giopia. Sopu momuruo ro edi urubia ro giaseperai, neio auna tere ro giwati. Taie neio ro Godi Adiri sabowa ato etu ro imidirotiti nou auna masiro dubu to gasoro-rimo.
14 Keba ubauba tanaro imese gororoporeai-rimo, ibose turi ubauba tanaro imese gororoporeai-rimo, kaupoti saro ubauba tanaro tou-die.
Sowake urio ro iana humuko guria
15 6 sowake urio ro humuko ta-giourio-birimo iato ata sowake urio tau ro gowamo. Nou ro iana humuko nato guria. Taie, nou saro gabo ato Adiri sabowa ato mo ro auna owera kodu nato nirorowai ibo na-gutura-rimo, ‘Nedi duriomoro gebari ro Abera Naramu Godi nou edi kohodowa dubu ro nou mutu neitiro do to imese gararapoi. Nedi duriomoro gebari ro Godi ro ama-iaurititi-ri womu tato womu tato.’
16 Iedi 24 eputa urubia ro simara komidiro nakomu ato na-irowomidirotiti Godi abato, neio sosoro woidomari sopu to aise giwaposowa-rimo. Taie Godi neio ro iato gemowabu-rimo
17 ibo, ‘Imese pupuwo ia Abera Naramu Godi kebase na-imidirotiti, ina abora na-omidiro, oro aboto eso owera niaro-dumo. Mabu urubia kiwaboi sapuwo to oro simara pupuwo korosa ta-giwapotaidiro-ro.
18 Kimibiria tato urubia neio serawo ro iwatiti, kaupoti oro edi serawo ro ta-gowapotai-die. Abora tau ta-gorobai-die korowaburo urubia neio oro ro koto ama-iwai-ri. Ibose tau ta-gorobai-die oro ro wisa kimio aboto. Oro ipusu owera urubia oro edi sowake ro na-iworohutiti-mo, ibose oro edi tarena urubia ro, ibose awawo masiro urubia dorogora urubia mutu oro masiro ohu to na-owoburiotiti-mo, neio imese oro ro wisa abora ama-imio-ri. Ibose tau ta-gorobai-die sopu duriomoro ubauba etio ro owaititi-dumo, neio oro ro ama-ipisiamuti-ri.’
19 Iato tuturu to owamo pua Godi edi Tarena Moto ro Adiri sabowa ato na-otoi-die, Godi ro magere aise godobura-ro. Iedi tarena moto goro ro nato Godi edi tarena bokose ro paea se imese gowamo-ro. Sopu duriomoro ato penenio ro se gerememiouti-rimo, gururu aupi ato kutura muso ato kutura. Sopu momuruwo ro sopu aise gomuruwouti, ibose koko daroho nadi iopu sosoro toboro rido binio to giretuti-ro.