13
Ibisa buru oromo rido gioro-ro
1 Mo neido na-nirarowea, mo ro ibisa se nowea buru oromo rido na-geribua-ro. Nou 10 gaini mutu e, 7 eputa, ina 10 eputa urubia hato idaibo sosoro na-iroidiritotiti-dumo nou giroidiro-rimo gaini ato. Eputa ato Godi masiro ubauba kowaititi sapuwo to masiro iato giamo.
2 Nedi ibisa ro serawo namabu repadi, nou sosoro ie. Nou sairo pata medube imese tututu ia ie musuga musuga. Ibose nou matagoro gebari ia ie, ibonoro imese susura ia ie. Iedi kanigiri ro nou ro ibisa simara pupuwo korosa iato gomia ibo nu modobo ie erere tanaro kisioidiro, ibose nou ro iato gomia simara komidiro nakomu urubia nou ro ioudo iauri ri. Ibose nou ro auna masiro gemapoi urubia simara mino to iauri ri.
3 Nedi ibisa ro nu ata eputa kikoni poro mutu e, nu idaibo sosoro keba se pamo ta-gowea, kaupoti nou meana ta-goi. Iedi ibisa ro imese urubia sirio ro eputa poro na-gemowea-rimo, neio auna kimaragoidiro ro giopiauti, taie neio ro nou ubi tanaro aise gisioidiro-rimo.
4 Ibose kanigiri neio ro aise emowabutiti-mo, mabu ibisa pupuwo korosa nou ro gomia. Iedi ibisa ro neio ro ibose ta-emowabutiti-mo. Neio ro ibo iaro-mo ibisa sapuwo to, ‘Ata nou sosoro omidiro pua! Ata dubu ata modobo pua nou mutu keremotobowa, nu gebari pere ie!’
5 Ina Godi ro 42 sogomi ibisa aboto nou giadodorai nu nakara se auna se eremowabu ri, ibose Godi masiro ubauba kowaititi aboto.
6 Taie ibisa ro ubauba owera karo nato gatamuai, io Godi masiro ubauba nato owaititi, ina Godi sapuwo to nou ro arua ubauba owera iarotiti. Ina Adiri sabowa sapuwo to, ibose Adiri sabowa ato etio ro orowomidiro neio sapuwo to ubauba owera nato iarotiti.
7 Ina gabo ta-gorodobura-ro ibisa ro boso owou ri Godi edi tarena urubia ro neio aboto, ibose neio nou ro sopu to iwororuwoidiro ri. Ibose gabo ta-gorodobura-ro ibisa ro erere gu urubia, erere tanaro urubia, erere owera urubia, erere duriomoro urubia, neio nou ro simara ubi to iworohuti ri.
8 Imese beda mutu urubia ro orowomidiro nedi duriomoro gebari ro nato, ibisa neio ro amadime-emowabu-ri. Ata buka ato womu tato womu tato keremiro etio ro amadimo-owea-ri, neio masiro iato tiamo. Kaupoti iedi urubia sirio ro ibisa neio ro namadime-emowabu-ri, neio masiro iato iamo pua. Nedi buka ro sipisipi dawade buka ie, edi na gopia-rimo. Duriomoro ido to gosioidiro, Godi ro keba se arua urubia nedi buka ro nato masiro ta-gisioidiro iato ibose to iamotiti.
9 Etio ra gare mutu, owera gare mea se ba-memedea-mo!
10 Etio ra Godi ro kebase na-gihodowa dibura to iaremo ri, neio dibura to amadimi-iaremo-ri. Etio ra Godi ro kebase na-gihodowa arua urubia ro giri to iopiauti ri, neio giri to amadimi-iopiauti-ri.
Ina nou mabu ato ie, koko tau idaibo amadimi-iauri-ri Godi edi tarena urubia ro, ina neio modobo ie koko se korowotoi, ibose neio kimibiria modobo ie koko se kirobidiro.
Ata ibisa goto maumo rido gioro-ro
11 Mo ro ina nato nowea ata ibisa goto maumo rido na-gioro-ro, nou netewa teibo gaini teibo mutu e sipisipi dawade gaini teibo sosoro ie. Kaupoti nu owera na-iarotiti, kanigiri owera kodu sosoro iarotiti.
12 Nedi goto ibisa ro oromo ibisa ro pupuwo korosa nato gomia, nou ubi tanaro kemesioidiro aboto. Imese urubia sirio nedi sopu duriomoro ro nato na-orowomidiro goto ibisa ro aise gimagege, oromo ibisa emowabu ri. Iedi oromo ibisa ro edi kikoni poro ro pamo na-gowea, meana ta-goi.
13 Nedi goto ibisa ro nou ro erere awawo pupuwo korosa tanaro nato gisioidiro. Idaibo nou ubi ato era toboro rido aise giretuti-ro urubia sosoro gabo ato nedi sopu duriomoro ro neito.
14 Nu pupuwo korosa oromo ibisa ro ta-gomia, ina pupuwo korosa tanaro nouto gisioidiro. Ina noudo ie iedi urubia sirio ro nedi sopu duriomoro gebari ro nato na-orowomidiro, nedi pupuwo korosa tanaro ro na-giauri-rimo, neio nou ro neito gisaubuti. Goto ibisa ro nedi tanaro ro na-gisioidiro, oromo ibisa masiro idaibo auna neito gowaititi. Ibose goto ibisa ro urubia sirio aise gimutura ota titi oromo ibisa sosoro osioidiro ri. Iedi oromo ibisa ro kebase giri to gaudurai-rimo eputa ato, pamo sosoro ikoni poro mutu e, kaupoti araburai pua.
15 Ina gabo ta-gorodobura-ro goto ibisa ro pupuwo korosa komidai aboto, ina noudo ie oromo ibisa edi ota titi ro goto ibisa ro keremiro huhuame nato gemohudurai, nu owera karo sapuwo to. Ina ota titi ro urubia sirio aise gimagege nou emowabu ri. Nou ro ibo, ‘Mo ia nio ro ba-demowabu-rimo. Nio abato na-orowomidiro mo kemowabu tato, mo owera ato nio arua urubia ro amadimi-iopiauti-ri.’
16 Goto ibisa ro imese urubia sirio aise gimagege neio tumodi tu ato o witoro ato isabuna imamo ri. Awawo masiro urubia, masiro tato urubia, namabu sirio urubia, namabu tato urubia, wisa tato woko urubia, ina urubia simara woko na-isioidiro-dumo, neio imese goto ibisa ro gimagege iedi isabuna ro imamo ri neio tumodi tu ato o witoro ato.
17 Beda urubia ra isabuna tu ato o witoro ato kemedea tato, nedi urubia ro neio aboudo gabo tato ie namabu mani to kimade ina keremahudirio. Iedi isabuna ro ibo owamo ibisa edi masiro ro nou se ie, nou masiro edi namba ro nou mutu.
18 Etio ra mea muro mutu, neio ro maumo mea se ba-miosora-mo keba ibisa edi namba ro, nedi namba ro urubia dubu namba ie. Ina iedi namba ro owamo ibo 666.