6
Iesu ro 6 kimakoko nakomu na-gisebo-ibi
1-2 Mo neido na-nirarowea mo ro sipisipi dawade se nowea, keba kimakoko nakomu na-gesebea. Ina mo ro owera kodu se nirorowai, iedi owera kodu ro a-gou-ro 4 keremiro nakomu peteibi edi na ro imidirotiti-bimo Abera Naramu edi komidiro nakomu ro nou abato. Neibi ata ro gutura-ro iedi owera kodu ro toboro gururu sosoro ibo, ‘Neito dou-ro.’ Iato mo na-nirarowea iau! Mo ro keakea hosi se nowea mo sosoro gabo ato. Iedi hosi ohu ro nato urubia dubu ro gomidiro. Iedi urubia dubu ro gari se gorobidiro. Ina nu Godi ubi ato eputa dubu hato nou gemamitiai-birimo. Taie imese gaimai boso aboto duriomoro urubia sirio iwameduti ri.
3-4 Keba kemakoko nakomu sipisipi dawade ro ta-gesebea, ina ata nou ro iato gesebea, mo ro ata owera kodu nato nirorowai iedi 4 keremiro nakomu peteibi ro neibi ata aboudo, iato gutura-ro, ‘Neito dou-ro!’ Iau! Karima hosi se nowea era mio sosoro ie. Iedi hosi ro nato a-gomidiro urubia dubu giri gebari ta-gemowateai-rimo, nou pupuwo korosa Godi ubi ato gomia-rimo miro owagare ri imese duriomoro gebari aboudo, urubia ororopiauti ri.
5-6 Netewa teibo kimakoko nakomu teibo sipisipi dawade ro ta-gisebea-ma, ina ata nou ro iato gesebea, mo ro ata owera kodu nato nirorowai iedi 4 keremiro nakomu peteibi ro neibi ata aboudo, iato gutura-ro, ‘Neito dou-ro!’ Mo na-nirarowea Iau! Mo ro a-nowea garegare hosi. Iedi garegare hosi ro nou ohu ato a-gomidiro ata dubu nou ro a-gorobidiro ohona kidoburio nakomu. Taie iato ata auna owera kodu mo ro nato nirorowai. Iedi 4 keremiro nakomu peteibi ro iedi kodu ro neibi edi moro ato gomidiro-birimo kodu ioudo gou-ro. ‘Duriomoro gebari ato ohona tato tau ama-ereredea-ri. Pupuwo korosa oro abato towamo idaibo tanaro ororosioidiro rie. Urubia abora ohona modobo ato na-imade-dumo, ido neio ro idaibo imade-ri pua, kainakaina ohona wisa imese ohu ia to amadimi-ioro-ri, urubia auna sogoi ro ama-iwatiti-ri. Kaupoti oribi ota, waini kumabo mutu ubauba iwai mamo. Oribi iopu isi, waini iopu isi mutu, urubia abato aise ba-miamotiti!’
7-8 Netewa didi kimakoko nakomu peteibi sipisipi dawade ro ta-gisebea-ibi, ina ata nou ro iato gesebea, mo ro ata owera kodu nato nirorowai iedi 4 keremiro nakomu peteibi ro neibi ata aboudo, iato gutura-ro, ‘Neito dou-ro!’ Mo na-nirarowea, iau! Mo ro a-nowea agoago hosi, urubia durupi agoago beda sosoro koi ra pamo ro na-emou-die. Iedi hosi nou ohu ato Pamo ro a-gomidiro. Pamo na-gou, nu saro rido Dudi ro gobodoro. Dudi ubi ie urubia sirio nou ro iwoiriamuti ri nou aboto. Godi ro ibo gutura, ‘Pamo ra Dudi ra, nitiro mo ro pupuwo korosa nimia-ma, nedi duriomoro gebari ro netewa netewa patu to kiasiouti ato, ina kaupoti patu nitiro ro kiopiauti to oporeai ri. Erere mino to ba-diopiauti-do, boso to, ohona tato to, temeteme to, ina serawo namabu to.’
9 Netewa netewa kimakoko nakomu peteibi sipisipi dawade ro ta-gisebea-ibi, ina ata nou ro iato gesebea. Nadi kitomuti patapata mabu ato mo ro urio sirio nato niwia. Neio ro Godi owera koko se ta-irobidirotiti-mo, urubia nouto ta-imowautiti-mo ina urubia ro nou mabu ato giopiauti-rimo.
10-11 Nedi urubia ro na-giopiauti-rimo auna owera to nato gutura-rimo ibo, ‘Auna ia eputa dubu, tarena ia dubu ibose morobise ia dubu, sopu duriomoro urubia neio oro ro beda tau ato ama-iwai-ri koto, ina nimo kiopiauti wisa oro ro beda tau ato ama-iwameai-ri?’
Nedi urubia ro neio erere se keakea tututu sodo Godi ro gimio. Godi ro neio ibo gimowapotai, ‘Egea mere se ba-deremasebidiro-mo, womu tato nio kimibiria naminiramio mo sowake nio mutu na-nemoworohutiti-mo, sopu duriomoro urubia ro neio ro namadimi-iopiauti-ri. Nio beda sosoro giopiauti-rimo mako nama-orobai-ri, taie wisa neio ro amadimo-owea-ri koto abato.’
12 Paibu kimakoko nakomu sipisipi dawade ro ta-gisebea-ibi, mo ibose to nirarowo ina ata nou ro iato gesebea. Tuturu to owamo pua auna ia sopu momuruwo nato goromuruwouti. Saiki beneniobenenio kimeweti duwoduwo to aise gararapoi, garegare obotama sosoro ie. Ina sagana era mio karima beda sosoro ra ibo girarowo-ro.
13 Ina kiboni sirio toboro rido aise giretuti-ro sopu duriomoro to, woimu iopu auna gawia ro na-imowamuseti-die idaibo sosoro giretuti-ro sopu duriomoro to.
14 Toboro kere turi ato aise gararapepea-rido keta ketebuti beda sosoro ra sapuwosapuwo ibo geretebuti-rido sapuwo womu rido sapuwo womu to. Beda mutu podo sirio ro gorowotoi ina ura na-giwadaudiro neio korowotoi moro rido ibose kiwadaudiro moro rido aise garagareawado-rimo.
15 Awawo eputa urubia duriomoro edi na urubia ro iaurititi-dumo, awawo gabamani urubia, boso koroho awawo urubia, namabu sirio urubia, awawo masiro urubia, wisa tato woko urubia, ibose simara ubi woko kisioidiro urubia, nedi urubia sirio ro neio tere ri agabea maumo to aise garateauti-rimo. Ibose neio arua nadi maumo to goropiro-rimo.
16 Nedi urubia ro neio nadi ra podo ra aboto aise gorowaro-rimo iwasio ri. Neio ro ibo, ‘Nimo diwasio-rimo, nedi dubu ro omidiro eputa dubu komidiro nakomu ato nou aboudo diwasio-rimo! Ibose sipisipi dawade auna serawo ie nimo aboto, nou aboudo diwasio-rimo!
17 Mabu abora nou e auna serawo saiki noto owaroho, neitiro edi serawo ro nou aboudo, ata dubu ata ro keremiro ama-owea-ri ra?’