4
Bagea kitamudiro owera sapuwo to
1 Tarena Urio ro paea se iwapotai-die ibo saro gabo ato arua rubi amadima-aragarewado-ri morobise kitamudiro gabo rido karasaubuti tanaro ibodoro ri. Nedi bagea owera ro karasaubuti orora ibose ubauba urio neio aboudo kou e.
2 Ina karasaubuti urubia ro iedi bagea owera ro neio ro nou amadimo-obodorouti-ri. Nedi urubia ro neio modobo pua keremasibowado ibo ‘Nimo ro ubauba tanaro nisioidiro-dumo,’ mabu neio kimaragoidiro ubauba ta-gimowai.
3 Neio neito itamudiro-dumo kararemo sabi ie, ibose amia ohona kiho sabi ie, kaupoti iedi ohona ro Godi ro gisioidiro. Urubia ro na-gimibiria-rimo Iesu sapuwo to neio ohona kiho ato modobo ie eso owera karo Godi aboto,
4 mabu imese sirio namabu Godi ro na-gisioidiro imese meana ia ie. Nimo ro ata ohona ata komidai ato modobo ie Godi aboto eso owera karo, taie nato kiho ato ata sabi tato ie,
5 mabu Godi edi owera ro nimo edi kararatoro owera ro nou mutu iedi ohona ro nou ro meana aise kiwai ie.
Iesu sowake mea mino to koroho aboto
6 Oro ro kimibiria naminiramio nedi mea owera ro mea mino to nama-itamudiro-ri, nedi morobise kitamudiro owera ro oro ro na-ibodoro modobo ie giropu maumo to kibiti urio pupuwo kowaititi aboto, idaibo ohona kiho ato durupi pupuwo nou ro kowaititi ie. Oro ro idaibo tanaro nama-isioidiro-ri oro Iesu sowake mea mino to ama-irohotiti-ri.
7 Bagea owera aboudo aise gi-aragarewado-ri idaibo ararai urubia ro na-orowauti-dumo. Oro ro modobo ie karatamudiro Godi ubi tanaro se kisioidiro,
8 mabu oro ro kisioidiro ato nedi tanaro ro oro nou ro ama-owarebidiro-ri nedi sopu duriomoro ro nato ibose Adiri sabowa ato nama-imidiro-ri. Godi edi ubi tanaro ro morobise to karatamudiro ato nimo imese auna ia se kiwarebai ie, kaupoti simara durupi pupuwo korowaititi tanaro auna se iwarebai-ri pua, egea mere se ie.
9 Nodi owera ro morobise ie, urubia ro koko se kirobidiro modobo ie.
10 Nimo Godi tu to ta-nereredea-rimo, nou Keremiro Mabu Dubu nou se ie. Nimo kimibiria ato nou imese sirio urubia kiapopo dubu e, nou mabu rido ie nimo kiwaworo idaibo nou edi ubi tanaro ro nou se kisioidiro.
11 Nodi tanaro sirio ro neito aise ba-ditamudirotiti.
12 Modobo pua ata mere ro ubauba kimaragoidiro kiworohuti oro sapuwo to ibo, ‘Nou orio mere ie.’ Modobo ie oro ro meamea tanaro kisioidiro, idaibo meamea owera karo, nirimagare tanaro kisioidiro, morobise kimibiria mareamarea tato komidiro. Kimibiria urubia ro namadimi-iauri-ri oro edi meamea tanaro ro, neio ro oro mea se nato amadime-ematiouti-ri.
13 Godi edi Tarena Buka owera ro neido ba-dimoputititi urubia neito ba-dimowautititi, ba-ditamudirotiti womu tato mo korowateai oro aboto.
14 Godi edi korosa ro na-gaiwai-ro oro aboto, modobo pua kowamo kawa kowamo, modobo ie oro ro kowawuti. Iesu urubia kemeauri rubi tu na-gitomo-rimo oro abato, neio ata ro Godi ipusu owera nato garo, ina iedi tau ro nato iedi korosa ro Godi aboudo oro ro nato gomidai-ro.
15 Iedi umoro owera sirio ro oro ro aise ba-disioidirotiti, oro durupi momuo se ba-daiwai nedi woko ro nou kosioidiro aboto, ina urubia sirio umoro nato amadimo-oi-ri ibo oro kimibiria tanaro mea mino to geribuwa.
16 Oro komidiro tanaro ba-deremeauri ibose morobise owera nouto se gi-itamudiro-ri, omuomu se ba-disioidirotiti, imesere mamo, mabu oro ro nama-isioidiro-ri nedi tanaro ro, urubia oro ro ubauba aboudo amadi-apopo-ri oro ia mutu.