5
1 Ohu to domere owera to iwati mamo, beda sosoro ra oro simara abera kemowauti ato neio ibo gi-imowauti-ri. Ibose orio domere mea mino to gi-iworohuti-ri beda sosoro ra oro simara naminiramio na-iworohuti.
2 Ina ibose ohu to mamio mea mino to gi-iauri-ri oro simara mamu beda sosoro to kiauri ra mea se. Busere mea mino to gi-iworohuti-ri oro simara mabiamio medamio beda sosoro ra na-iworohuti, ata ubauba kimaragoidiro tato neio aboto.
Umoro owera garamio mamio kiwarebai sapuwo to
3 Garamio mamio etio ro irowomidirotiti nakara se neio kiwarebai urubia tato ie, modobo ie neio kimibiria urubia ro kiworohuti.
4 Garamu orobo ata nou aramio merebusere na-orowomidiro modobo ie neio ro mea se koworohuti. Idaibo tanaro modobo ie sirio kimibiria urubia ro nou kisioidiro. Neio ro nou mea se koworohuti modobo ie mabu neio nou ro mea mino to ta-giwoubua, ina noudo ie neio wisa kiwame nou aboto, idaibo tanaro kisioidiro ato Godi kamade neio ro neito kowaititi ie.
5 Ata garamu orobo nakara se komidiro ato kowarebai urubia tato, nou Godi tu to kereredea ie, duwo saiki nou Godi aboto aise kararatoro ie.
6 Ibose ata garamu orobo nou simara durupi ubi tanaro na-isioidiro iedi orobo ro nou durupi keremiro ie kaupoti nou urio pamo ie.
7 Kimibiria urubia nedi owera ro ba-dimoburutai, modobo pua arua rubi ro idaibo owera karo ibo ‘Neio ro garamio mea se iworohuti pua.’
8 Ina ata kimibiria mere nou simara urubia kiwarebai tato, iedi mea owera ro nou ro na-gimibiria aise giherai, nou ro kimibiria tato dubu kematua ie ubauba tanaro kisioidiro mutu.
9 Garamio mamio masiro dorogora se iatiti mamo peba ato ohona namabu neito kiwarebai aboto, modobo ie keba se neio 60 kisimisi ro kirobai, simara uramio mutu ta-irowomidirotiti neio mau isebo pua.
10 Urubia umoro ie neio meamea tanaro kisioidiro mutu e, simara merebusere mea mino to giwoubua-rimo, apira urubia mea mino to ta-iworohutiti-mo. Ina neio dorogora woko ta-isioidirotiti-mo kimibiria urubia na-iwarebidirotiti-mo, urubia ubauba kiwia tau ato neio ro ta-iwarebidirotiti-mo, neio ro sirio meamea tanaro ta-isioidirotiti-mo. Io idaibo sosoro garamio mamio neio masiro se ba-diatiti kiwarebai sapuwo to.
11 Orio upi garamio neio masiro iatiti mamo kiwarebai sapuwo to. Neio durupi momuo se ta-giaiwo-rimo Iesu aboto, ina saro to simara durupi ubi tanaro idaibo auna se kimaragoidiro ata dubu ro kedea aboto neio Iesu kowasoro aboudo karagare ie.
12 Neio ta-geremowotouti-rimo uramio ro ina kiaremo aboudo, ina iedi sabi ro neio ro ta-giwaruriauti-rimo saro rido ubauba amadimi-iwia-ri.
13 Ata mabu nou e nedi orio upi garamio ro neio masiro iatiti tato, mabu neio saiki siriosirio irowomidirotiti, ina moto gabogabo irohotiti-dumo ipi owera kiworohuti mutu, punugo se kiwaumudirio ie, dorogora se owera aise karo ie karo kawa.
14 Ina nou mabu ato ie mo ubi ie orio upi garamio uramio ro kiaremo, simara moto urubia kiworohuti, ina neio ro idaibo tanaro kisioidiro ato nasa dubu ro ubauba owera aro-ri pua nimo sapuwo to, gabo imese kowasiouti ie.
15 Arua orio garamio ta-garagarewado-rimo Iesu kowasoro aboudo Satani gabo obodoro rie.
16 Ata kimibiria orobo, nou urubia abato garamio na-orowomidiro nou ro mea se ba-miworohuti, Iesu kowasoro urubia ro modobo pua edi garamio ro neio kiworohuti, mabu neio simara kiwarebai urubia torowomidiro. Modobo pua mibo Iesu kowasoro urubia abato se kitomo, neio ro urubia tato garamio se kiwarebai modobo ie.
Iesu urubia etio ro emeauri-dumo neio sapuwo to ie
17 Iesu urubia etio ro iwaboi-dumo mea se Abera owera to, modobo ie neio kimibiria urubia ro wisa na ohona ra mani ra to kiwarebai ie, ibose nimo ro modobo ie nou owera kirowidiro,
18 mabu Godi edi Tarena Buka owera ro nou ro ta-garo ibo, Burumukau ro urubia woko kimesioidiro ato idaibo woiti takamai na-iamutiti nou matagoro emopai mamo. Ibose ata owera ibo ie, Woko mere arua rubi woko kimesioidiro ato modobo ie nou wisa kimade iedi urubia ro neio aboudo.
19 Ata dubu ro idaibo sosoro owera na-waro ibo, ‘Iedi dubu ro na-emeauri Iesu urubia, nou ro ubauba tanaro ta-gosioidiro,’ iedi dubu ro nou owera emewidiro mamo womu tato netewa teibo o netewa didi dubu peteibi neibi atu sosoro owera karo ato nou se gi-irorowai-ri.
20 Nio abato ata kemeauri dubu ata etu ra ubauba tanaro omuomu se na-isioidiro, modobo ie nou oro ro imese kimibiria urubia sosoro gabo ato mea mino to kemotuputi, ina amia kimibiria urubia neio tere koi ie idaibo ubauba tanaro kisioidiro aboudo.
21 Abera Godi, Iesu Keriso, sowake urio sirio Godi ro na-gihodowa neio sosoro gabo ato oro mo ro a-nemowapotai nedi owera ro na-niatiti nou se ba-disioidiro. Oro ro modobo pua arua urubia se kiwarebai ina arua urubia kiwarebai tato, modobo ie oro ro urubia atu sosoro tanaro to kiworohuti.
22 Modobo pua sobosobo se kowamo tu kitomo ata dubu eputa ato nou Iesu urubia kemeauri dubu to ararapoi ri, modobo ie nou mea se kemeiouti mabu iedi dubu ro ubauba kosioidiro ato oro ibose nou ubauba ro kadabuai ie. Arua urubia ubauba aboudo aise gi-aragarewado-ri.
23-25 Arua urubia ro ubauba tanaro paea se isioidirotiti-dumo, urubia umoro samo to koi ie ibo, ‘Neio Godi ro koto ama-iwai-ri ina ubauba wisa amadimi-imidai-ri nou aboudo.’ Ina amia urubia ro ubauba tanaro paea se kisioidiro pua, piro se isioidirotiti-dumo, urubia ro umoro saro to koi ie. Ina ibose amia urubia ro meamea tanaro na-isioidirotiti-dumo, samo to orowapotaidiro-dioumo, urubia ro umoro samo to koi ie, ina arua meamea tanaro piro se na-isioidiro-dumo tuturu tau to piro se iamo-ri pua, urubia ro umoro samo to amadimo-oi-ri.
Oro temeteme ro owatititi buro, sirio saiki obo kawakawa idio mamo, waini egea mere se aise gi-imusubai-ri oro niro temeteme keremasiai aboto.