4
1 Iesu Keriso ro imese urubia koto ama-iwai-ri, korowomidiro urubia, korowaburo urubia mutu atu se. Nou neito amadi-orowameai-ri, ibose Godi edi kiwaboi tanaro ro eputa dubu to nou ro ama-ararasoro-ri. Ina noudo ie Godi sosoro gabo ato ibose Iesu Keriso sosoro gabo ato, oro aboto mo ro nedi pupuwo owera ro nou nemeiriai,
2 mea owera Iesu sapuwo to nou ba-dimowauti. Urubia ubi kirowidiro o ubi tato kirowidiro, ubauba tau ato o mea tau ato, aise ba-dimowauti. Urubia kitamudiro ato o kituputiwado ato, mea mino to gi-orowati-ri, serawo hio ito oi mamo. Ubauba tanaro etio ro isioidirotiti-dumo, neio oro ro modobo ie pupuwo to kimowapotaidiro ibo, nu ubauba tanaro ie kisioidiro modobo pua. Ibose kimibiria urubia kimibiria tanaro pupuwo aise gi-iwaititi-ri.
3 Mabu tau amadi-ou-ri morobise kitamudiro owera urubia ro irowidiro-ri pua, neio ro ubi tato amadimo-owea-ri. Neio simara ubi tanaro kisioidiro sapuwo to, orio kitamudiro urubia edi owera ro kamade mutu nou amadimi-irowidiro-ri.
4 Morobise owera neio gare goro to kiwodoro modobo pua, gare kiopai amadimi-iroho-ri. Nedi urubia ro neio ro karasaubuti totomu nou amadimi-imibiria-ri.
5 Kaupoti owera Timoti oro aboto ibo ie, sirio tau beda tanaro ro kororosioidiro ra kimaragoidiro mutu koko se gi-otoi-ri, mibo tau oro aboto amadime-ererehuti-ri. Ina mea owera Iesu sapuwo to kimibiria tato urubia ba-dimowautititi. Ibose oro Abera Naramu ro beda woko aboto gemeiriai-ro, imese nou se ba-disioidiro.
6 Ina mo simara sapuwo to, mo keremiro Godi aboto imese naiwai, nio mo ro aupise ie kimeserai.
7 Mo pupuwo to mea se nirarioidirotiti, abora womu to ta-norowateai-die. Morobise owera Iesu sapuwo to nouse ie mo ro koko se nou norobidirotiti. Ina abora nou e Godi woko mo ro ta-nemesioidirotiti, ina nedi woko ro nou sapuwo to wisa nou ro ti-nemerebidiro-die.
8 Nedi wisa ro Godi ro amadi-aiwai-ri mabu mo nou ro mea tuputupu dubu to ta-napoi-ro. Iana koto saiki ato Abera Naramu nou se ie mea tuputupu koto kiauri dubu, mo ro nedi woko ro na-nemesioidirotiti nou sapuwo to, wisa nou ro nato anamadi-omia-ri. Ina mo se pua, arua urubia nou korowameai sapuwo to auna ubi mutu teremotoi-dumo, neio ibose nedi atu wisa ro ama-imio-ri.
Erere umoro owera Timoti aboto
9 Timoti, oro gabo pupuwo to ioudo ba-diosora-ro, modobo ie oro samo to kou mo aboto.
10 Oro mo ro nou mabu ato nemagege mabu mo nato ti-nomidiro. Mo Demasi ro dorogora mabu ato nebedidiro-ro. Nou ubi auna se iamotiti duriomoro ubi tanaro kisioidiro aboto, Tesaronika sabowa to nou ri godau. Ibose Kerese Gereisia duriomoro to ta-gou. Ibose Taitasi Deremesia duriomoro to gou.
11 Ruka nakara se mo abato nou ro erediai-die, mo nou ro naiwidiro. Oro neito namadi-ou-ri, Mareko emeserai ate, ba-dadabuai-ro atu se ba-dou-rido, mabu mo woko mutu nou ro nowarebidirotiti.
12 Tikikasi mo ro Epesesi sabowa to ta-nemeiriai, nu nato omidiro pua.
13 Oro kou ato, mo kukamo ato koroidiro sedo tuturu Torowasi sabowa ato nemeserai Karapo abato towamo, nou aboudo ba-dememidai-ro. Ibose buka sirio mo ro iato ta-nimeserai, ba-dememidai-ro. Burumukau takamai to edi buka ro gisioidiro-rimo, mo ro auna se neio nimaragoidiro.
14 Oro umoro kowai sapuwo to, auri kisioidiro woko dubu masiro Arekasanida, oro ro nou ba-dowaruwo. Mo sirio tau ubauba nou ro nowaititi. Nou ro edi ubauba na-gisioidiro mo aboto, nu wisa Abera Naramu ro ama-emowameai-ri.
15 Mea se ba-deremowotoi urubia dubu nou se ie. Mabu neibi ro Iesu sapuwo to kitamudiro owera urubia na-nimowautiti-bimo, neibi edi kitamudiro ro nou ro auna se ihoiotiti.
16 Mo kebase koto owera aro ri edi tau ato norobai-rimo, mo ata dubu ata ro owairiai pua. Urubia sirio mo aboudo aise gorowadau, mo neio ata ro emedio pua. Mo aboudo nedi korowadaudiro ro na-gorowadaudiro, Abera Naramu ro ba-mipisiamuti nou sapuwo to.
17 Kaupoti mo nou ia ro huru rido ta-nemotoburio-ro, mea owera karo aboto pupuwo nou ro nemowaititi-ro. Iedi erere owera urubia ro gou-rimo, modobo ie mo ro neio Abera Naramu edi mea owera ro neito imowauti ri, ibose neio ro irowidiro ri. Iedi tau ro nato mo kopia aboto ie, kaupoti iedi namusu ro nou aboudo Abera Naramu ro ta-nahua-ro.
18 Ubauba urubia ro ubauba tanaro kisioidiro ato mo aboto, Abera Naramu ro neio ubauba aboudo anama-owaguwotiti-ri, womu tato Godi ro kiwaboi tanaro Adiri sabowa ato na-owamo-die, ito mea se korowateai.
Nu urubia sirio ro aise ba-memowabutiti-mo womu tato womu tato. Ibose ba-mororosioidiro-mo.
Kamade owera Pauro ro gemeiriai Epesesi kimibiria urubia aboto
19 Mo kamade owera nemeiriai Pirisira ra Akuira ra neitiro aboto, ibose Onesima aboto nou moto urubia mutu.
20 Erasita Korini sabowa ato omidiro, ina Toropimasi mo ro Mireto sabowa ato temeteme mutu ta-nemeserai.
21 Timoti, gabo ioudo samo to diosora-ro, auna bukopu tau modobo pua keba se kereredea, oro samo to korowateai modobo ie. Kimibiria borubi nedi auna sabowa ro nato na-orowomidiro, Euburu, Pudeni, Rinasi, Karadia imese kimibiria urubia mutu kamade owera neio ro emeiriai-dumo oro aboto.
22 Abera Naramu oro urio abato ba-mimidirotiti, ibose wisa tato kiwarebai oro abato ba-miamotiti.