1 Korini urubia, nio edi kemodowa owera ro na-gisioidiro-rimo mo aboto, erere kemodowa owera mutu e. Ata ibo ie, ‘Urubia dubu modobo ra orobo mutu koroho tato komidiro?’ 2 Kaupoti urubia sirio iato na-orowomidiro upo tanaro auna se isioidiro-dumo, ina noudo ie erere dubu neio modobo ie simara upi mutu koroho. Ibose erere mamio neio modobo ie simara uramio mutu koroho.

3 Uramu nu orowairiai mamo simara orobo mutu kirobu-ma aboto. Nou mea tanaro ie uramu ro tanaro kemesioidiro aboto, mabu nedi dubu ro nou uramu e. Ibose orobo uramu aboudo orowairiai mamo tanaro kemesioidiro aboto, mabu nedi orobo ro nou orobo ie. 4 Orobo, oro edi durupi ro uramu do ie, oro do pua, ibose uramu, oro edi durupi ro orobo do ie, oro do pua.

5 Orobo oro durupi uramu aboudo emowairiai mamo, ibose uramu durupi orobo aboudo emowairiai mamo. Kaupoti nitiro atu se ubi koi ato osio ra irimo ra mino to komidiro aboto, mabu nitiro ubi ie Godi aboto auna se kararatoro, tau nitiro ro kohodowa ie. Nedi tanaro ro na-ororoporeai Godi mutu, iato nitiro modobo ie ina karadabuai, tanaro kisioidiro aboto. Nitiro tuturu tau to damodamo se na-omidiro-do karadabuai tato, Satani edi tau ro nato idoutiti-die upi dubu nou ro nato iwaibiriotiti mau kisebo aboto, mabu kororodiobuti tanaro nio abato auna se owamo pua. 6 Nio mo ro ibo imowauti pua, orobo uramu mutu atu moro ato irobuti mamo, ina ibose uramu orobo mutu atu moro ato irobuti mamo. E e io mo ro ibo nutura Godi aboto kararatoro ato, io nitiro egea mere se nato korohodowa ie. 7 Nou mo ubi ie nio mo sosoro korowomidiro modobo ie orobo tato. Kaupoti nimo kimibiria urubia erere se Godi ro modobo ta-niwaititi erere tanaro kisioidiro aboto, ata nou ro modobo kowai ie kedea aboto, ina ata nou ro modobo kowai ie nakara se komidiro aboto.

8 Kararemo tato urubia, ibose garamio mamio, mo owera ibo ie nio aboto. Mo nakara se beda sosoro nomidiro, nio idaibo sosoro korowomidiro modobo ie. 9 Kaupoti nio ata abato auna ubi na-owamo kedea aboto, nou nato kiamuai ie. Kaupoti nio simara ubi kidiobuti modobo tato, taie nio aise ba-dararemo-mo. Mabu modobo pua nio auna ubi mutu korowomidiro era sosoro kirarebo, tanaro kisioidiro aboto. Modobo ie aise ba-dararemo-mo.

10 Kimibiria urubia, nedi owera ro nio aboto ie, nio mo ro pupuwo owera anama-imia-ri. Mo owera pua, owera ia Abera Naramu aboudo ie. Orobo, oro modobo pua uramu kararubia, 11 ina oro ro uramu kararubia ato modobo ie nakara se komidiro. Oro ubi tato nakara se komidiro aboto, nitiro ro modobo ie mibo koporeai. Ina ibose uramu oro simara orobo ararubia mamo.

12 Mo ina owera mutu e, nio etio ra kimibiria tato upi mutu na-orowomidiro, ibose kimibiria tato uramio mutu, nedi owera ro nio aboto ie. Mo simara owera ie, ibo pua Abera Naramu owera. Kimibiria dubu, oro orobo kimibiria tato orobo ato, ina nou ubi ie oro mutu komidiro, nedi orobo ro oro ro ebesiai mamo. 13 Ibose kimibiria orobo, oro uramu kimibiria tato uramu e ina nu ubi ie oro mutu komidiro, nedi dubu ro oro ro ebesiai mamo. 14 Mabu towamo nato, kimibiria tato uramu kimibiria orobo ro meana kowaititi ie. Ibose kimibiria tato orobo kimibiria uramu ro meana kowaititi ie. Mo ro nedi owera ro dese to na-niatiti karasaubuti owera rasiri ie, ina nitiro merebusere tarena merebusere to ararasoro-ri pua, marea merebusere to ba-gararapoi-rimo. Kaupoti mo ro edi owera ro niatiti morobise ie, nitiro merebusere tarena ie.

15 Ina kimibiria tato na ro nu simara ubi ato oro na-wararubia, nu simara se ma-morowati. Idaibo sosoro tanaro kororosioidiro ato, kimibiria dubu o orobo, hodo oro aboudo ororidiro-ri pua. Godi ubi ie nio miro maumo ato korowomidiro. 16 Oro etu ra kimibiria orobo to na-wararasoro, oro umoro pua oro ro kimibiria tato uramu Godi edi pupuwo ro neito kowameai ie Godi aboto, nou kimibiria dubu to kararapoi ie. Ina ibose oro etu ra kimibiria dubu to na-wararasoro, oro umoro pua oro ro kimibiria tato orobo Godi edi pupuwo ro neito kowameai ie Godi aboto, nou kimibiria orobo to kararapoi ie.

17 Nio Iesu patu urubia erere mino to na-orowomidiro, nio mo ro a-nimowapotai nio ibose ba-dirowomidiro Abera Naramu ro na-girapoi-ro, nio idaibo sosoro orowomidiro ri. Godi ro nio komidiro muro edi tau ato gimohoduti, imesere mamo, idaibo aise ba-dirowomidiro. Ina Iesu patu urubia erere sabowa ato na-orowomidiro, neio mo ro ta-nimowapotaidiro nedi tanaro ro obodoro ri. 18 Iu dubu nou Godi ro beda tau ato gohodowa Iesu owasoro ri, nou dubu simara takamai kebase ta-gasiai-rimo, modobo pua nou Iu owera umoro tato dubu to karatigi. Idaibo karatigi tanaro nou ro kosioidiro ato, nou idaibo sosoro dubu e simara takamai nou ro bobo ato orio takamai kowateai. Urubia dubu durupi takamai kasiai tato, nou Godi ro karapoi ato, nou durupi takamai kasiai modobo pua. 19 Durupi takamai kasiai o kasiai tato, io auna tanaro pua, neitiro atu sosoro ie. Auna tanaro nou e Godi sabi kibodoro.

20 Oro Godi ro na-gohodowa-ro oro beda sosoro gomidiro, ibose ba-dimidirotiti. 21 Oro Godi ro edi tau ato gohodowa-ro, oro wisa tato woko dubu to a-gararasoro ra? Oro wisa tato woko dubu to na-gararasoro, nou sapuwo to modobo pua mibo kimaragoidiro kiworohuti. Kaupoti oro ro mea tau na-owea iedi wisa tato woko ro nou aboudo kosuruwo aboto, ioudo aise dosuruwo-ro. 22 Mabu nio etio ra wisa tato woko kisioidiro urubia Godi ro edi tau ato girapoi-ro, nio ibose Iesu ro nato giapopo-ro mibo tato urubia to ararasoro ri. Ina ibose ie nio etio ra Godi ro beda tau ato gihodowa nio wisa tato woko urubia pua, abora nio Keriso edi wisa tato woko kemesioidiro urubia ie.

23 Nio Iesu ro auna wisa to giapopo-ro. Ina noudo ie nio modobo pua wisa tato woko kisioidiro arua urubia abato. 24 Niramio, nio beda sosoro gorowomidiro Godi ro na-gihoduti, ibose ba-dirowomidirotiti.

25 Ina abora nio mo ro ata owera anama-imowapotai-ri, kararemo tato urubia nedi owera ro neio sapuwo to ie. Mo simara ubi ato nisioidiro nedi owera ro neio kiwarebai sapuwo to ie, Abera Naramu Iesu mo nou ro emowapotai pua. Mo beda sosoro nimaragoidiro, nio ro nou ibodoro rie. Abera Naramu auna natonato goi-ro mo aboto. Mo ubauba to na-nimidirotiti nou ro newesegerai meana to, ina noudo ie nou wisa tato nirimagare maumo ato mo nou ro morobise owera kimowauti dubu to ta-napoi-ro. 26 Abora sirio ubauba tanaro ro ororosioidiro-dumo kimibiria urubia aboto. Ina nio mo ro nou ri nimaragoidiro ibo, modobo ie nio abora kaokao se beda sosoro orowomidiro, idaibo sosoro ba-dirowomidiro.

27 Oro orobo mutu na-omidiro, iedi orobo ro oro ro ararubia mamo, nou mutu aise domidiro-do. Oro orobo tato na-omidiro, ibose to domidiro, orobo osora mamo. 28 Kaupoti, osio ro besere kedea ato, nou ro ubauba tanaro osioidiro-ri pua. Ibose irimo besere uramu ro kedea ato, nou ro ubauba tanaro osioidiro-ri pua. Kaupoti nio etio ra na-gararemo-rimo, nio korowomidiro maumo ato koko tau amadimi-iauri-ri. Mo ubi ie nio ubauba tanaro kisioidiro moro rido kiwasiouti, mo ro nou ri nimowapotai.

29 Niramio, nedi owera ro mo ro nou nemabuti nio abora noti nama-imowapotai-ri. Tau komukere ro orobai-die. Abera Naramu aupise ie korowameai. Ina noudo ie, nedi tau ro neido uramio nio upi kiaremo tato dubu sosoro ba-dirowomidiro. Modobo pua nio auna se kimaragoidiro simara upi kamade kiwaititi sapuwo to. 30 Nio kimaragoidiro auna se iamo mamo beda kamade tato tanaro ro ororosioidiro-dumo, ibose kamade tanaro na-ororosioidiro-dumo nio abato, ina namabu kimade tanaro sapuwo to. 31 Nio korowomidiro maumo ato nedi tanaro sirio ro na-ororosioidiro-dumo, Godi woko odiobuti mamo. Kimibiria urubia nio etio ro isioidiro-dumo erere tanaro, nio modobo pua ioudo auna se kirarebidiro. Mabu abora tau aupiaupi ro orobowado-die nedi sopu duriomoro ro nou simara tanaro mutu kororoporeai aboto.

32 Kaupoti mo edi ubi ato na-nisioidiro nedi owera ro, mabu mo ubi tato ie nio kimaragoidiro auna se kiworohuti sopu duriomoro tanaro sapuwo to. Mo ro umoro owera nio aboto nou ri nisioidiro, mabu nio kararemo tato na-orowomidiro, auna se imaragoidiro-dumo Abera Naramu ubi tanaro kisioidiro aboto, ibose gabo beda sosoro iamo-die nou kamade kowaititi aboto.

33 Kaupoti upi ra mutu urubia neio kimaragoidiro siriosirio mutu irowomidirotiti, neio auna se imaragoidirotiti-dumo upi kamade beda mino to amadimi-iwaititi-ri. 34 Iedi upi ra mutu urubia ro neio idaibo sosoro ie pe teibo erere moro to iabidiro-madumo.

Ina atu sosoro tanaro ibose to ororosioidiro-dumo uramio tato mamio aboto, ibose irimo busere aboto. Neio auna se imaragoidiro-dumo Abera Naramu ubi tanaro kisioidiro aboto, ibose gabo beda sosoro iamo-die nou kamade kowaititi sapuwo to. Neio ubi ie tarena mino to korowomidiro, modobo pua koroho arua dubu mutu.

Kaupoti uramio ra mutu mamio, neio siriosirio kimaragoidiro mutu irowomidirotiti, neio auna ubi ie uramio ubi ato se koroho uramio kamade kiwaititi sapuwo to.

35 Mo ro nedi owera ro nou ri nisioidiro nio meana sapuwo to ie, ibo pua nio mo ro kidiobuti. Mo ubi ie nio mea se korowomidiro Abera Naramu se kowaititi kamade. Idaibo mino to korowomidiro ato, nio kimaragoidiro erere se iworohuti-ri pua.

36 Kaupoti ata osio gabo na-emoworohuti-dumo ata besere nou ro edea ri, edi besere ro uramu ro kedea tau kebase ta-gorobai, ina iedi osio ro auna ubi ro owamotiti nou mutu koroho. Nedi osio ro nou ro ubauba tanaro osioidiro-ri pua iedi besere ro kedea ato, nou ro simara ubi ato ba-medea.

37 Kaupoti nedi osio ro kimaragoidiro na-iwia ibo nou orobo edea-ri pua, mabu nou kororodiobuti mutu e, ina nou koko ta-goi edi besere ro nou ro edea-ri pua. Nou ro idaibo mea tanaro kosioidiro ie.

38 Ina noudo ie imese owera sirio kidabuai ato, gabo kemoworohuti besere uramu ro na-edea, io mea tanaro kosioidiro ie. Kaupoti ata osio ro gabo kemoworohuti besere kedea tato, nou ro imese mea ia tanaro kosioidiro ie.

39 Uramu aise na-omidiro, orobo uramu abato se kateidiro ie. Kaupoti uramu na-waraburai iedi garamu orobo ro nou abato owamo kiamuai ata dubu aboto. Nu modobo ie kimibiria dubu aboto se kiamuai.

40 Ina nou mo simara kimaragoidiro owera ie, garamu orobo nakara se komidiro ato, nou abato kamade ohu ato kowamo ie. Ina mo ibose to nimaragoidiro Godi edi Tarena Urio ro mo abato ibose to omidiro.