1 Kimibiria urubia wisa tato woko na-isioidirotiti-dumo eputa dubu abato, nou aboto meamea tanaro ba-misioidiro-mo, ina arua urubia ro Godi masiro ubauba owaititi-ri pua, ibose neio ro nimo edi kitamudiro tanaro ro masiro ubauba owaititi-ri pua. 2 Kimibiria urubia wisa tato woko na-isioidirotiti-dumo neio eputa urubia kimibiria urubia ato modobo pua neio ata ro idaibo sosoro kimaragoidiro kiworohuti ibo, ‘Nou mo kimibiria naramu e, mo ro isioidiro-ri pua mea woko nou abato.’ Modobo ie neio ro auna se kisioidiro woko eputa urubia abato, mabu eputa urubia neio kimibiria naminiramio ie, nou rie wisa tato woko urubia ro nirimagare mutu ba-miwarebai-mo.

Kimibiria urubia oro ro aise ba-ditamudiro nedi tanaro ro oro mo ro na-nemowauti neio ro isioidiro ri. 3 Beda dubu ra ata sosoro owera to nama-itamudiro-ri Iesu edi morobise kitamudiro owera ro nou mutu aradabuai tato, 4 nedi dubu ro nou auna keremowabu e ina nou umoro pua tanaro, owera saro keremasio auna ie. Nou ubi ie arua urubia mutu masawe to keremaro, kararasoro, ubauba kimaragoidiro kiworohuti neio sapuwo to.

5 Urubia etio ro isioidiro-dumo idaibo tanaro neio kimaragoidiro ubauba ta-gimowai, morobise kitamudiro tanaro aboudo imese ta-gorowameai-rimo. Neio simara kimaragoidiro to ibo imaragoidiro-dumo, ‘Mo ro Godi ubi tanaro kisioidiro ato mo namabu sirio dubu to nato nama-ararapoi-ri.’

6 Urubia etio ra Godi ubi tanaro kisioidiro aboto neio ro auna se kimaragoidiro tato duriomoro namabu aboto, iedi urubia ro neio mea komidiro tanaro kiwia ie. 7 Nimo mamio ro na-nirotuti-rimo etou nakomu nirobidiro-rimo? Potoro ie! Ata nakomu tato nirotuti-rimo. Ina karaburai ato beda nakomu kirobai ra? Potoro ie! Tu kawakawa keribua ie. 8 Nimo obotama ohona mutu io nou kawakawa kiworohuti ato modobo ie.

9 Kaupoti urubia etio ra namabu sogoi ro na-iwatiti neio simara ubauba ro kituti ie. Neio idaibo namusu ro kirobai ie mabu neio daradara ubi tanaro isioidirotiti-dumo ina temeteme kiwia ie, iedi ubauba ubi ro idaibo wakahe sosoro ie urubia neio ro iwarumiautiti-dumo obo maumo to. 10 Sirio ubauba tanaro ro isuwoduti-dumo mani sogoi ro kiwati ato. Arua urubia neio mani sogoi ro auna se na-giwati Iesu Keriso kowasoro aboudo aise garatateawado-rimo, nou mabu ato ie neio giropu mibo nakara se geremowaititi-rimo.

11 Iedi ubauba tanaro sirio ro ba-dimowagegeidiro mabu oro Godi mere ie ina noudo ie oro ro pupuwo to kisioidiro meamea tuputupu tanaro, Godi ubi tanaro se gi-isioidiro-ri, kimibiria tanaro aboudo koko se gi-irarebidiro-ri, nirimagare tanaro gi-isioidiro-ri, mibo kowea ato eremeseruti mamo, mea muro tanaro gi-isioidiro-ri.

12 Oro Iesu Keriso abato kimibiria towamo, ina noudo ie ubauba tanaro sirio nedi duriomoro ro nato na-iamo ba-ditarumowado pupuwo se gi-owamo-ri kituti aboto. Koko se gi-irarebidiro-ri womu tato keremiro aboudo. Oro ro urubia sirio sosoro gabo ato kimibiria owera na-gimowauti oro Godi ro ta-gemapoi-ro edi keremiro ro nou omidai ri. 13 Godi ro iwaititi imese namabu patu keremiro, ibose Iesu Keriso ro Ponitiasi Paireti sosoro gabo ato ta-gorowauti mea owera. Godi ie, Iesu Keriso mutu neitiro sosoro gabo ato oro mo ro a-nemowapotai ibo, 14 Mo ro edi owera ro na-nemowapotai modobo ie aise kisioidiro mareamarea tato se, oro masiro modobo pua ata ro kowaititi ubauba, womu tato Iesu Keriso namadi-apimaidiro-ri. 15 Abera Godi ro beda mea tau gemapoi-ro nou nato amadi-apimaidiro-ri. Godi nou nakara se gebari pere ie ibose meana ia ie. Nou imese auna ia ie, duriomoro eputa urubia nou ro sopu to iaurititi-die. 16 Nou kaupoti nou se ie karaburai tato dubu, nou woroworo ia ato imidirotiti, urubia ro modobo pua iedi woroworo ro nou aboto aupise kateai, ata dubu ata ro Godi sosoro owea pua ibose owea-ri pua. Auna masiro pupuwo mutu nou abato ba-mowamotiti womu tato womu tato. Ibose ba-mororosioidiro-mo.

17 Kimibiria urubia etio ra namabu sirio mutu na-irowomidirotiti, ba-dimowapotai neio keremowabu tato ba-mirowomidiro, modobo pua neio kimaragoidiro patu mani ato se kiaremo, modobo ie Godi ato kiaremo. Mani samo to koroporeai ie kaupoti nimo Godi ro ti-nimiotiti-die imese sirio meamea namabu nimo kamade nou ro neito niwaititi. 18 Ibose kimibiria urubia ba-dimowapotai sirio tau modobo ie neio ro meamea tanaro se kisioidiro. Namabu sirio urubia ro modobo ie namabu tato urubia kiwarebai. 19 Neio ro mea wisa Adiri sabowa ato neito amadimi-iaremo-ri, idaibo sosoro tanaro namadimi-isioidiro-ri edi wisa ro neio neido ama-iwarebaititi-ri neio ido morobise keremiro korobai aboto.

20 Timoti oro buro ro meana se ba-demeauri Godi ro edi na giedea oro tu ato mea se ba-demoworohuti. Amia urubia Godi ubi tanaro sapuwo to iremowautiti pua, dorogora se owera to iremowautiti-dumo, neio ba-dimowagegeidiro, neio aboto aradabu mamo. Ibose oro morobise kitamudiro owera na-emasioutiti-dumo neio aboto aradabu mamo neio edi umoro ro bagea umoro iworohuti-dumo. 21 Nedi bagea umoro ro arua urubia nou ro ta-gisaubuti morobise kimibiria aboudo.

Godi edi nirimagare ro nio abato ba-mowamotiti.