1 Oro umoro koi modobo ie ibo womu tau ato etou tanaro amadimo-ororosioidiro-ri. Nedi womu tau ro nato koko tau amadimo-ororosioidiro-ri. 2 Urubia sirio simara durupi auna se amadime-eremaragoidiro-ri, arua urubia nirimagare imati-ri pua. Neio auna se mani aboto amadimi-imaragoidiro-ri. Neio auna keremowabu owera karo ie. Neio abato keremowabu auna se ama-owamo-ri. Neio ro urubia owera to ubauba amadimi-iwaititi-ri. Neio mamio abeamio owera irowidiro-ri pua. Neio ro urubia aboudo meamea namabu kimade kawa imadetiti-dumo, ina neio ro wisana meamea tanaro kisioidiro pua neio aboto. Nedi urubia ro Godi tere kemati tato urubia ie. 3 Arua urubia neio ro nirimagare imati-ri pua. Ubauba tanaro ata ro nou aboto kosioidiro ato, iedi dubu ro nou ro adabuti-ri pua koporeai sapuwo to. Neio ro arua urubia ipi owera amadimi-imoworohuti-ri. Ubauba tanaro kisioidiro aboto durupi idiobuti-ri pua. Neio serawo koi ato urubia neio ro temeteme aise amadimi-imio-ri, kiageawado modobo pua. Neio auna masawe ie urubia ro meamea tanaro kisioidiro ato. 4 Neio ro urubia amadimi-iasouti-ri arua urubia ro ubauba iwaititi ri. Neio ro kimaragoidiro tato tanaro hio to amadimi-isioidiro-ri. Nedi urubia ro keremowabu mutu amadimi-iaupai-ri. Neio ro binio to amadimi-iosora-ri kamade nakara se korowaititi aboto, neio ubi tato ie Godi kamade kowaititi. 5 Godi ubi tanaro kisioidiro neito aratigi-dumo, kaupoti morobise pua, ohu meana ie, maumo ubauba ie. Godi abato edi pupuwo korosa ro na-owamo-die urubia ubauba aboudo edina ro iwesegerewadotiti meana to, nedi pupuwo korosa ro neio ro huru amadime-emoworoho-ri. Oro aboto owera ibo ie, idaibo urubia ba-dimowagegeidiro, neio mutu idabuti mamo.

6 Arua urubia idaibo sosoro urubia ie, duboi moto to karatigi mino to kodouti ie, koko tato mamio isaubuti ri. Nedi mamio ro ubauba nakara se ohu ra maumo ra aise iremotomotiti-dumo. Ina mamio neio simara ubauba ubi ro itowoutiti-dumo sirio ubauba tanaro kisioidiro aboto. 7 Nedi mamio ro sirio tau orio umoro aise iosoratiti-dumo, kaupoti nedi morobise owera ro na-owamo Iesu sapuwo to mea se keibimai aboto modobo pua. 8 Keba ia tau ato Mose ro Godi edi woko ro na-emesioidirotiti, nou gabo pakani dubu teibo ro Iane ra Iambere ra ro egea mere se ta-owasioutiti-do. Ina abora nou e idaibo sosoro tanaro neio ro ororosioidiro-dumo. Morobise owera Iesu Keriso sapuwo to, ubauba urubia ro gabo ibo egea mere se temoputi-dumo urubia sirio ro kimibiria aboto. Idaibo tanaro beda urubia ro isioidiro-dumo, neio kimaragoidiro ubauba kebase ta-gimowai, morobise kitamudiro aboudo imese ta-giretei. 9 Nedi karasaubuti kitamudiro ro neio ro tuturu to owou-ri pua, saiki ata ama-eresebuti-ri. Mabu neio ro edi bagea kitamudiro to na-itamudiro-dumo, urubia sosoro gabo ato isioidiro-dumo neio urubia ro amadimi-ieibimai-ri, iedi pakani dubu teibo ro keba se beda sosoro gieibimai-marimo.

10-11 Kaupoti oro bagea kitamudiro urubia sosoro pua, mo edi kitamudiro ro oro ro tibodoro. Oro umoro kebase ta-goi mo beda keremiro ato nimidirotiti. Mo beda ubi nemamotiti kosioidiro aboto, mo kimibiria tanaro beda sosoro nowaboititi oro auna ia umoro ie. Ibose koko tau ato mo beda mino to nirimowotoititi oro auna umoro ie. Oro auna umoro ie mo ro urubia nirimagare beda mino to nimatiti. Iesu Keriso sapuwo to owera na-nobodoroutiti, mibo sirio nou mabu ato noti niaurititi, oro umoro ie mo irorodiobuti pua, aise nirowautititi. Ina Entioko sabowa ato, Ikoniam ra, Risitira ra mutu, nedi sabowa peteibi ro mo iato neio ro auna ia ubauba mino to noworohutiti-mo, oro auna umoro ie. Mo ro urubia aboudo ubauba temeteme ta-niaurititi sekere mo koko se ta-niwotoititi. Mo Abera Naramu ro ta-nowagarewadotiti-ro iedi mibo sirio ro neido. 12 Ina etio ra ubi na-iamo Godi ubi tanaro kisioidiro aboto Iesu kobodoro maumo ato, nedi urubia ro temeteme amadimi-iauri-ri arua urubia aboudo. 13 Ibose ubauba tanaro kisioidiro urubia, karatigi urubia mutu neio ubauba tanaro kisioidiro aboto imese ubauba ia amadimo-oi-ri. Neio ro urubia ubauba mino to amadimi-isaubuti-ri, ina neio urubia ro ibose to amadimi-isaubuti-ri.

14 Kaupoti neibi aboudo owera ibo ie Timoti oro aboto, oro ro kebase beda mea owera garatamudiro, ibose oro ro iedi morobise owera ro na-gimibiria, koko se nato dotoi. Ata gabo ato otobowa mamo, mabu oro umoro ie nedi mea owera ro etu bi ro gatamudiro-birimo. 15 Oro umoro ie oro mere kainai rido womu tato abora, Tarena Buka owera oro auna umoro ie. Iedi Tarena Buka owera ro, oro nou ro mea umoro ama-omio-ri ibo oro ubauba aboudo nou ro ta-gapopo-ro, ina morobise mea owera oro ro ta-gimibiria Iesu Keriso sapuwo to. 16 Imese owera na-iamo Tarena Buka ato, Godi ro iaiwotiti-ro urubia aboto. Ibose nedi owera ro nou simara korosa mutu e urubia kitamudiro sapuwo to. Nu simara pupuwo korosa mutu e urubia dubu ro beda ubauba kosioidiro ra, nou ro kemowapotai ie. Nedi owera ro nou simara pupuwo korosa mutu e nimo ro beda ubauba tanaro nisioidiro-dumo, nou ro kimutuputuwado ie ibo nedi tanaro ro ubauba ie. Ibose meamea tuputupu mino to korowomidiro sapuwo to, nedi owera ro nou simara pupuwo korosa mutu e nimo ro karatamudiro aboto. 17 Ina noudo ie Godi gabo etio ro obodoro-dumo, neio modobomodobo kiwaititi ie meamea tanaro kisioidiro aboto.