1 Pita ra Ioane ra urubia owera ibose to gimowauti-rido, iedi tau ro nato Iu eputa urubia nato gou-rimo neitiro aboto. Iedi urubia ro neio ie, amia turituri urubia, amia Sadusi urubia, ina Tarena Moto kemotoi auna dubu, 2 neio ubauba kimaragoidiro mutu gou-rimo. Mabu nedi kitiodorai na teibo ro neitiro ro urubia ata sosoro gitamudiro-rido, ibo Iesu bobo rido ta-geribuwa ina pamo urubia idaibo sosoro amadime-eriburio-ri bobo rido. 3 Nedi eputa urubia ro neio ubi ie Pita ra Ioane ra koto aboto iwou-ma ri kaupoti saiki ta-goriodoi, neitiro neio ro nou ri girobai-marimo duwoduwo moto to aise giedea-marimo kowaroho iwou-ma rie koto aboto. 4 Kaupoti neitiro ro edi mea owera ro gorowauti-rido Iesu sapuwo to, ina urubia sirio ro na-girowidiro-rimo neio imese ta-gimibiria-rimo, neio kowasoro urubia mutu atu se na-garadabuai-rimo imese 5,000 goi-rimo.

5 Ata kowaroho Iu eputa urubia daro Mose sabi kitamudiro urubia neio kaupoti moro to ta-garadabuti-rimo Ierusarema sabowa ato. 6 Anasi nou Godi ra urubia ra turituri eputa dubu e, nou urubia mutu idaibo Kaiapa, Ioane, Arekesanida ibose to gorowomidiro. 7 Taie neio ro Pita ra Ioane ra iato giwotobowa-marimo neio sosoro gabo ato ina iato gimodoruti-marimo. Neio ro ibo, ‘Nitiro ro edi tanaro ro na-osioidiro-do etu ro imapoi-ma, etu ubi ato osioidiro-do edi tanaro ro?’

8 Pita Tarena Urio ro goworohuti taie nou ro neio nato gimowameai ibo, ‘Nio eputa urubia na-orowotoi, 9 nio ubi ra neitiro kimodoruti-ma aboto nedi nirimagare tanaro ro neitiro ro na-nosioidiro-do nedi togiri dubu ro nou aboto? Nio ro ibo a-nimodowa-madioumo ra nedi dubu ro beda sosoro oi meana? 10 Nio urubia sirio na-worowotoi imese sirio Iu urubia mutu nio umoro doi-mo ibo nedi dubu ro neitiro ro owai pua meana, nu Iesu Keriso Nasareta sabowa dubu edi pupuwo korosa ro nu nou ro owai meana, abora nio sosoro gabo ato nototoi nu. Iesu nio ro gemopoguti-rimo ota kemowotowa teibo ato kaupoti nedi dubu ro Godi ro ina ta-gowoubua-ro bobo rido, nou abora keremiro ie.

11 Iesu posi ie, nio moto keremari urubia ro kakate moro ato gedea-rimo, kaupoti nu turimida posi nou se titoititi.

12 Iesu nakara se nou se ie ata tato ie urubia ubauba aboudo kiapopo aboto. Ata dubu ata omidiro pua nedi duriomoro gebari ro nato urubia ubauba aboudo kiapopo aboto.’

13 Iedi Iu awawo urubia ro neio kimaragoidiro ro giopia Pita ra Ioane ra beda sosoro gotoi-rido ata tere tato neio sosoro gabo ato. Mabu neio umoro ie ibo nedi kitiodorai na teibo ro dorogora se dubu teibo ie, sikuru dubu teibo pua. Neio ibose umoro ie nedi dubu teibo ro sirio tau Iesu mutu ta-irohotiti-do. 14 Neio ata ro modobo pua karatio nedi tanaro ro, mabu nedi togiri dubu ro sairo meana na-gemowai-rido neitiro gomo ato ibose to gotoi neio sosoro gabo ato.

15 Taie iedi awawo urubia ro neio ro nato gutura-rimo nedi dubu teibo ro neitiro aboto, ‘Nitiro tauo egea mere se dosuruwo-do!’

Neitiro edi kosuruwo ro na-gosuruwo-rido neio nakara moro ato iato geremowauti-rimo. 16 ‘Nedi dubu teibo ro neitiro aboto nimo ro beda tanaro anamadimo-osioidiro-ri? Mabu imese sirio urubia Ierusarema sabowa ato neio imese umoro ta-woi-mo iedi auna korosa tanaro ro neitiro ro na-wosioidiro-do. Nimo ro modobo pua kutura ibo, “Karasaubuti ie, ororosioidiro pua!” 17 Kaupoti nedi owera ro Iesu sapuwo to neitiro ro ina kimowauti modobo pua. Neitiro nimo ro koko owera anamadimi-imia-mari ibo, “Nitiro ro ina imowauti ate Iesu sapuwo to, ibose nedi tanaro ro modobo pua korobodorouti nedi duriomoro ro nato.” ’

18 Taie neio keremowauti na-goporeai-rimo neio ro edi na teibo ro iato giramairiai-marimo odoro ri. Neitiro na-godoro-rido taie neio iato gutura-rimo neitiro aboto ibo, ‘Nitiro ro Iesu sapuwo to urubia ina imowauti ate!’

19 Pita ra Ioane ra owera mutu iato gotobowa-rido, neitiro ro ibo, ‘Godi sosoro gabo ato mea tanaro boira? Nio ro ma-dimaragoidiro-mo. Neitiro ro modobo ra nio ubi tanaro se kisioidiro o Godi ubi tanaro kisioidiro? 20 Neitiro modobo pua matagoro kimopai komidiro, neitiro ro edi tanaro ro na-niauri-rido ibose na-nirowidiro-rido, modobo ie urubia kimowauti.’

21 Nedi awawo urubia ro gabo egea se giosora-rimo neitiro ro ubauba wisa kimidai aboto. Ina nou rie Pita ra Ioane ra neio ro auna owera to giwati-marimo, taie aise gitiodorai-marimo, ata ubauba tanaro ata osioidiro pua neitiro aboto mabu neio ro urubia sirio tere gimati-rimo. Mabu sabowa urubia na-gorowomidiro iato iedi tanaro ro na-giauri-rimo neio auna kamade ro giwati, ina neio ro Godi nou ri gemowabu-rimo, 22 mabu iedi dubu ro sairo meana na-gemowai-rido nu 40 kisimisi to imidirotiti sairo ubauba mutu.

23 Pita ra Ioane ra Iu eputa urubia ro na-gitiodorai-marimo koto aboudo neitiro aise gimobodiai-ma borubi kimibiria urubia aboto. Neitiro ro etou tanaro giauri-rido imese aise gorowauti-rido neio aboto. 24 Nedi kimibiria borubi ro na-girowidiro-rimo nedi owera ro, neio ro atu se Godi iato gararatoro-rimo. Neio ro ibo ‘Abera Naramu, oro kaupoti nou se ie etu ro gisioidiro toboro, sopu duriomoro, buru oromo ina imese sirio namabu nedi duriomoro ro nato na-iamo. 25 Nimo nasa dubu Deibidi oro sowake dubu e, nou Tarena Urio ro gemasouti kutura owera. Nou ro ibo, Mabu boira erere duriomoro urubia serawo ro na-iwatititi? Mabu boira urubia sirio ro bagea gabo owera to na-isioidiro-dumo? 26 Sirio duriomoro gabamani urubia neio ubi ie boso aboto koroho Godi neio ro kowaruriauti aboto, nou edi na kohodowa dubu ro nou mutu.

27 Nedi tanaro sirio ro morobise to ta-gororosioidiro-rimo. Herodi, Ponitiasi Paireti, daimodaimo urubia, Iu urubia atu moro to beda tau ato garadabuti-rimo nedi sabowa ro nato oro ro kohodowa dubu Iesu edi tau ro nato gowaruria-rimo. 28 Kaupoti nedi atu urubia ro oro edi gabo ro keba se na-gisioidiro neio ro oro Tarena Sowake dubu aboto gosioidiro-rimo mabu oro edi ubi ro, oro edi pupuwo ro nato gororosioidiro-rimo. 29 Ina abora nou e ma-dirowidiro-ro neio ro abora beda owera aro-dumo nedi urubia ro, neio ubi ie nimo tere iwai ri. Abera Naramu nimo oro sowake urubia ie, nimo ro oro owera tere tato se kimowauti modobo ie. 30 Ina oro edi korosa tanaro ro nou ba-diwapotai-ro. Temeteme urubia meana ba-diwaititi oro korowapotai modobo ie ibo oro korosa mutu e idaibo tanaro kisioidiro aboto, korosa tanaro ba-mororosioidiro-rimo oro edi tarena sowake dubu ro Iesu, nou edi pupuwo ro nato.’

31 Neio kararatoro na-goroporeai edi ipi ato gorowomidiro aise goromuruwouti, iato neio Tarena Urio ro korosa aise giwai, neio ro Godi edi mea owera ro tere tato se gimowauti-rimo.

32 Kimibiria urubia neio atu sosoro kimaragoidiro giedea-rimo namabu sapuwo to. Neio edi namabu sirio ro simara namabu to iasorotiti pua, neio namabu to atu se ta-irowarebidirotiti-mo. 33 Ina kitiodorai urubia ro pupuwo korosa mutu Iesu sapuwo to urubia sirio owera iato gimowauti-rimo ibo, ‘Abera Naramu Iesu abora keremiro ie, nou bobo rido ta-geribua-ro.’ Sirio kimibiria urubia aboto Godi edi nirimagare ro auna ia se giamo. 34 Ina neio ro namabu iosoratiti pua, neio namabu imese modobomodobo ato giamo. Neio moto, goto kere mutu amia urubia aboto mani na aise giaiwo-rimo. Neio ro iedi mani ro na-gimade-rimo 35 aise giworoho-rimo kitiodorai urubia aboto, ina kitiodorai urubia ro iwarebidirotiti-mo namabu tato urubia. Ina nou mabu ato ie, neio namabu imese modobomodobo ato giworohuti-rimo.

36-37 Ina ata Iesu kowasoro dubu masiro Iosepa ata tau ato goto kere ta-gaiwai urubia ro ta-gowomidai-rimo mani to. Taie edi mani ro nou ro ioudo na-giwou-ro kitiodorai urubia aboto iato aise giaiwai. Iosepa Riwai gu dubu e nou mamu ro Saiporasi Ura ato goroto. Kitiodorai urubia ro nou Banabasi to asorotiti-mo. Banabasi neio owera to owamo ibo ‘Urubia pupuwo kiwaititi dubu e.’ Neio ro nou ri asorotiti-mo Banabasi to mabu neio nou ro iwaititi pupuwo.