1 Pauro ra Sairasi ra Tesaronika sabowa to na-gou-rido, ipi ato nedi sabowa teibo ro Ampi Sabowa ra Aporonia ra neitiro ito godoro-rido. Tesaronika sabowa ato Iu urubia karadabu moto ta-gotoi, 2 ina Pauro ito aise gou. Nu beda sosoro irowatititi ata moro to kou ato, Iu urubia karadabu moto to aise kou e. 3 woiki maumo ato Iu urubia komidiro saiki ato, Pauro ro neio iato imowautititi Tarena Buka ato owera na-iamo 3 ibo Godi ro kohodowa dubu temeteme ama-iwia-ri, ama-araburai-ri ina bobo rido amadi-eribuwa-ri. Nou ro ibo, ‘Nedi dubu ro Iesu nou sapuwo to nio mo ro na-nimowauti, nu Godi ro kohodowa dubu nou se ie.’

Nedi owera ro neio neito gimowauti, ina nou ro Iu urubia komidiro saiki peteibi ta-giporeai-bi nedi owera ro neio nouto kitomu.

4 Nedi owera ro arua Iu urubia ro na-irowidirotiti-mo neio ubi aise oititi-mo, ibose Giriki urubia Godi etio ro emowabutiti-mo, awawo mamio mutu, Pauro ra Sairasi ra aboto aise iradabutiti-mo.

5 Kaupoti arua Iu urubia iato na-gorowomidiro neio masawe goi-rimo Pauro ra Sairasi ra aboto. Neio neido na-gohau-rimo maketo moro to koroho kawa urubia gabo ato na-irasaubutiti-dumo, neio ro kaupoti moro to na-gidabuti-rimo, neio ro ubauba tanaro nato gisioidiro-rimo. Neio ioudo na-gedei-rimo aise gimobodiai Ieisoni moto to, neio ubi ie Pauro ra Sairasi ra iado-ma ri. 6 Kaupoti neio ro iato egea se giosora-marimo, iwia-ma pua. Ina neio ro Ieisoni se gorobai-rimo arua kimibiria urubia mutu, ioudo aise gimudo-rimo, imese giwou-rimo koto kiauri urubia aboto. Urubia sirio ro auna owera nato garo-rimo ibo, ‘Iedi dubu teibo ro duriomoro gabogabo to na-irohotiti-do urubia neitiro ro auna se igediouti-do, ina abora nimo aboto neito gou-diodo. 7 Iedi dubu teibo ro Ieisoni ro giwodoro-ma, nou moto ato imidirotiti-do. Neitiro kimibiria borubi mutu edi tanaro ro na-isioidirotiti-dumo Sisa edi sabi ro nou isebo-dumo, mabu neio ro urubia ibo itamudiro-dumo, ata eputa dubu tomidiro nu masiro Iesu.’

8 Ina edi owera ro koto kiauri urubia, sabowa ia urubia mutu neio ro na-girorowai-rimo neio auna ia kamade tato goi-rimo. 9 Taie koto kiauri urubia ro Ieisoni arua kimibiria urubia mutu ibo gimowapotai-rimo, ‘Nio abora mani ba-didabuti-mo nimo ba-dimia-rimo. Ido nedi ubauba tanaro ro nio ro kisioidiro tato, nio mani nimo ro anamadimi-imowameai-ri.’

Neio mani na-gidabuti-rimo koto kiauri urubia aboto imese giaiwai-rimo, taie neio koto kiauri urubia ro aise gitiodorai-rimo.

10 Iedi atu duwo ro nato kimibiria urubia ro Pauro ra Sairasi ra Tesaronika sabowa rido aise gimeiriai-marimo Berea sabowa to. Neitiro Berea sabowa to na-gorowateai-rido aise gimobodiai-ma Iu urubia karadabu moto to. 11 Taie neitiro edi owera ro na-garo-rido, Iu urubia Berea sabowa ato na-gorowomidiro auna ia ubi ro giamo neitiro edi mea owera ro nou kirowidiro aboto. Kaupoti Iu urubia Tesaronika sabowa ato na-gorowomidiro neitiro edi owera ro neio ro kebase ubi tato to ta-gapoi-rimo. Berea urubia ro sirio saiki Tarena Buka owera mea ia se irimoputiti-mo, neio ro a-wiosoratiti-mo ibo Pauro edi kimowauti owera ro morobise a-iamo ra Tarena Buka ato. 12 Ina noudo ie Iu urubia sirio Berea sabowa ato aise gimibiria-rimo, Giriki awawo mamio iato na-gorowomidiro dubu mutu, neio atu se aise gimibiria-rimo.

13 Ina Tesaronika sabowa ato, Iu urubia umoro na-goi-rimo ibo, Pauro ro neio Godi owera timowauti Berea sabowa ato, iedi urubia ro Tesaronika sabowa rido aise gou-rimo Berea sabowa to. Neio ro Berea sabowa ato koroho kawa urubia aise gigediai-rimo, bagea owera iato gimowauti-rimo Pauro sapuwo to, idaibo Berea sabowa urubia kamade tato neito giwai-rimo. 14 Kaupoti kimibiria urubia ro na-girorowai-rimo ibo, nedi urubia ro idaibo tanaro nou isioidiro-dumo, neio ro Pauro aise gemeiriai-rimo Berea sabowa rido koriri sabowa to. Isana Sairasi ra Timoti ra nou ro Berea sabowa ato iato gimeserai-ma. 15 Ina Pauro edio urubia ro na-gowaboi-rimo, neio atu se nou mutu pe to gou-rimo dodo se giwaseidiro-rimo womu tato Atenisi sabowa ti-gorobai-rimo. Atenisi sabowa na-gorobai-rimo neio ro Pauro nani kemeserai ie iato, neio nakara se gorowameai-rimo Berea sabowa to. Pauro ro korowameai urubia aboto owera se gemeiriai Sairasi ra Timoti ra aboto samo to ou ri nou aboto.

16 Pauro Atenisi sabowa ato na-gomidiro, Sairasi ra Timoti ra nou ro ioudo gimotoi-maro, nou nakara se masawe mutu irohotiti. Mabu nou ro nedi sabowa ro na-giauri, ota titi iato imese sirio ia se giamo. 17 Pauro nagi-odoro-ri Iu urubia karadabu moto to, Iu urubia, Giriki urubia neio mutu iremowautititi, nedi urubia ro Godi neio ro se emowabutiti-mo. Pauro ibose sirio saiki aise irohotiti maketo moro to, urubia sirio mutu iato iremowautititi.

18 Taie Ipukereini patu urubia Sitoiki patu urubia simara kitamudiro etio ro itamudirotiti-dumo, ata tau Pauro neio mutu gororobai owera to. Neio ro ibo, ‘Nedi dubu ro ararai ie, nou edi owera to aro-die nimo aboudo irerisai-dumo.’

Arua ro ibo, ‘Etu umoro ra orio orora teibo sapuwo to nimowauti-die.’ Mabu Pauro ro neio Iesu sapuwo to gimowauti, ina ibose nou ro Kowameai sapuwo to gimowauti.

19 Taie Pauro neio ro aise gowaboi-rimo Arapagasi kanisere urubia aboto. Neio ro ibo, ‘Pauro, modobo ra oro ro mea se kemabuti nedi orio kitamudiro ro oro ro na-gowou-die nimo aboto? 20 Nedi orio owera ro na-nimowauti-die orio kitamudiro ie, ina ibose nimo ubi ie umoro koi nedi kitamudiro ro maumo beda sosoro ra.’

21 (Atenisi urubia arua duriomoro urubia mutu etio ro irowomidirotiti iato, neio sirio tau aise iradabutiti-mo atu moro to. Orio owera neio ro na-irorowai-dumo neio auna ubi ie keremowagomea nou sapuwo to, neio ibo irowatiti-dumo.)

22 Taie Pauro aise gotobowa Arapagasi kanisere urubia sosoro gabo ato, nou ro ibo, ‘Atenisi urubia, mo umoro ie nio aboudo kemowaibiti tanaro auna se tiamotiti. 23 Mabu nio sabowa mo ro na-nimowaseidiro namabu sirio ta-nimiauri nio ro edi na imowaibititi-dumo. Ina ata ipi ato nadi kitomuti mo ro ta-nowea, nedi kitomuti ro nato idaibo sosoro owera nou ro iamo. Urubia umoro tato orora nou sapuwo to ie. Nedi orora ro nio ro umoro tato se emowaibititi-dumo. Ina nou e, nio umoro tato Godi abora nou sapuwo to nio mo ro anama-imowauti-ri.

24 Nedi duriomoro gebari ro imese namabu sirio mutu nou ia ro gisioidiro. Goto, toboro imese nou do ie. Urubia dubu ro kididi moto nu nato imidirotiti pua. 25 Nedi keremiro ro nimo ro na-niworohuti-dumo Godi ro nimiotiti-die, huhuame na-nimosubotiti-dumo, imese nakomu sirio nou aboudo ou-diomo. Nu urubia ro kowarebai modobo pua, imese nakomu nou do ie, nou abato tiamotiti. 26 Duriomoro gabogabo ato erere urubia na-orowomidiro Godi ro keba se kaupoti dubu gosioidiro, urubia sirio nou aboudo gorobodorouti-rimo. Urubia beda tau ato ama-orowomidiro-ri, ina beda moro ato ama-irowomidiro-ri, Godi ro gabo keba se ta-gisioidiro.

27 Nedi tanaro sirio ro Godi ro na-gisioidiro mabu nou ubi ie imese urubia sirio ro nu mea se kosora aboto, ina nu neio ro mea se umoro oi ri. Kaupoti nou musomuso pua nimo aboudo, nu aupise timidirotiti nimo mutu. 28 Ata dubu ro keba se ta-gorowauti idaibo owera, “Nimo keremiro nou ro nimio-die, noudo ie nimo korowomidiro, ibose nou ri noroho-dumo.”

Nio simara urubia ro owera keba se ta-giatiti-rimo ibo, “Nimo nou ia sosoro to nisioidiro.”

29 Ina noudo ie nio ibo imaragoidiro mamo Godi tu to kosioidiro nakomu sosoro ie, idaibo urubia dubu ro simara siware to gorodi rido kosioidiro ie, siriba rido kosioidiro ie, ibose nadi rido.

30 Urubia keba ia tau ato Godi umoro tato na-irowomidirotiti, neio nou ro idomari to se ta-iaurititi-ro. Kaupoti abora Godi ro imese duriomoro urubia ibo imowauti-die, ubauba aboudo erewesegerai ri. 31 Mabu Godi ro ata saiki ta-gohodowa-ro nou ro imese duriomoro urubia sirio koto nato ama-iwai-ri, nu simara tuputupu mino to amadi-isioidiro-ri. Nimo koto edi dubu ro nama-iwai-ri imese urubia sirio sapuwo to nedi dubu ro nou ro keba ia se nimohodowa-ro. Godi ro pamo rido na-gowameai-ro nou ro neito gowapotai-ro ibo nimo koto kiwai dubu io nou se ie.’

32 Urubia ro na-girowidiro-rimo nedi owera ro Iesu pamo rido beda sosoro gowameai-ro, arua ro nu gaga gemororouti-rimo. Isana arua urubia ro ibo, ‘Pauro, oro ina namadi-orowameai-ri, nimo oro ro arua owera nato anama-imowauti-ri nou sapuwo to.’

33 Iedi urubia ro Pauro ro aise gimeserai nou imese gosuruo-ro. 34 Kaupoti arua urubia Pauro ro kimowauti owera ta-gimibiria-rimo, taie neio nou aboto aise garadabuai-rimo. Nedi orio kimibiria urubia ro neio abato ta-gomidiro ata dubu masiro Daionasi nou Arapagasi kanisere dubu e, ibose ata orobo neio abato ta-gomidiro, masiro Damarisi, arua urubia mutu, neio aise garadabuai-rimo Pauro aboto.