1 Nimo nirimagare owera na-naro-rimo neio aboto, taie sawa pe to imese niora-rimo, ioudo imese niabu-rimo Kosi ura to. Ina ata saiki Kosi ura rido ioudo nasiriai-rimo a-nou-rimo womu tato Rodasi ura ti-norobai-rimo. Ina Rodasi ura rido nasiriai-rimo a-nou-rimo womu tato Patara sabowa to ti-norowateai-rimo. 2 Taie Patara sabowa ato nimo iedi sawa pe to na-niabu-rimo iato aise nemeserai-rimo ina ata sawa pe to nirasaudai-rimo Ponika duriomoro to abu rie. Ina Patara rido imese na-niabu-rimo, 3 Saiporasi ura gare mata to naudurai-rimo womu tato Siria duriomoro ti-norobai-rimo. Taie ata sabowa Siria duriomoro ato na-owamo masiro Taia iato aise norodiobo-rimo, mabu arua namabu ta-giamo Taia sabowa sapuwo to iato gibeduti-rimo.

4 Taia sabowa ato kowasoro urubia arua iato ta-niwia-rimo, nimo neio mutu 7 saiki to norowomidiro. Neio Tarena Urio ro giwai umoro ibo Pauro aboto beda tanaro ro amadimo-ororosioidiro-ri Ierusarema sabowa ato, ina nu neio ro gemagege-rimo ibo, ‘Oro ito ou ate!’

5 Nimo neio mutu komidiro arua saiki ta-niporeai-rimo, ina ioudo nasiriai-rimo. Edi kowasoro urubia ro na-gorowomidiro, upi, dubu, merebusere kainakaina, nimo neio ro atu se aise niwaboi-rimo pe mokuro to. Taie koriri ato kauhio to aise nirimusubua-rimo iato nararatoro-rimo, 6 nimo ido niora-rimo sawa pe to, tauo keba se nirimagare owera naro-rimo neio aboto. Kowasoro urubia aise gorowameai-rimo simara moto to, isana nimo sawa pe to niora-rimo, 7 taie Taia sabowa rido imese napere-rimo Toremaisi sabowa to, ina iato kaupoti saiki to norowomidiro nimo kamade owera iato naro-rimo kimibiria urubia aboto.

8 Taie Toremaisi sabowa rido na-nasiriai-rimo ata saiki imese nou-rimo womu tato Siseria sabowa korobai, taie ioudo aise nidiai-rimo Piripi moto to. Piripi Godi mea owera kimowauti dubu e. Keba se edi 7 urubia ro na-giaubai-rimo ohona kihoduti woko isioidiro ri, Piripi ata nou se ie. 9 Nu 4 irimo busere mutu e, neibi Godi ipusu owera kimowauti busere ie.

10 Ina nimo nou abato egea mere se na-norowomidiro, taie Godi ipusu owera dubu masiro Agabasi Iudia duriomoro rido nato godori-ro. 11 Nou nimo aboto na-gorowateai-ro, Pauro edi bereito ro aise gomidai-ro, nou simara tu ra sairo ra neito aise geremotohiti. Taie nou ro ibo, ‘Nedi dubu bereito to na-nerematahiti mo Tarena Urio ro ibo nemowapotai-die, “Nu Iu urubia ro idaibo mino to amadimo-oworohuti-ri Ierusarema sabowa ato, iato nu neio ro Iu owera karo tato urubia aboto aise amadima-aiwai-ri.” ’

12 Taie nimo ro edi owera ro na-nirorowai-rimo nou nimo ro binio to nemediai-rimo, ibo ‘Oro aise ou ate Ierusarema sabowa to!’

13 Kaupoti Pauro ro ibo, ‘Nio idobi etou mabu ato iroto-dumo, mo idaibo nio ro kamade tato nowai-dumo, mo arua urubia ro kemotohiti modobo ie, mo kopia aboto Abera Naramu Iesu sapuwo to, io ata ubauba tato ie.’

14 Nu Ierusarema sabowa to kou aboto nimo ro modobo pua kodiobuti, taie owera aise neremasiai-rimo. Nimo ro ibo, ‘Abera Naramu ubi ato tanaro aise ba-mororosioidiro-mo.’

15 Taie ata saiki nimo imese nasiriai-rimo Ierusarema sabowa to idiai ri. 16 Ibose Siseria sabowa ato arua kowasoro urubia nimo aboto ta-garadabuai-rimo, atu se aise nidiai-rimo Ierusarema sabowa to, taie neio ro imese niwaboi-rimo Mesoni moto to. Mesoni Saiporasi ura dubu e, nou tagara kimibiria dubu e.

17 Nimo edi tau ato na-norowateai-rimo Ierusarema sabowa to kimibiria urubia iato na-gorowomidiro auna kamade goi-rimo, nimo neio ro na-niwia-rimo. 18 Taie ata saiki nimo atu se Pauro mutu imese nou-rimo Iemisi owea ri, Iesu urubia etio ro emeauri-dumo neio nimo ro iato aise niatuamo-rimo. 19 Neio Pauro ro kamade owera na-gimia, taie neio nou ro nato gimowauti ibo nu na-irohotiti Godi ro beda tanaro isioidirotiti Iu owera karo tato urubia abato.

20 Neio ro na-girowidiro-rimo nedi owera ro, Godi neio ro iato gemowabu-rimo. Taie neio ro ibo, ‘Neama Pauro, oro umoro ie Iu urubia Iesu kowasoro urubia to na-gararapoi-rimo imese sirio ia ie, neio ro ibose Mose sabi patu auna se tirobidiro-dumo. 21 Kaupoti neio ro bagea owera irowidirotiti-mo arua urubia aboudo ibo oro daimodaimo duriomoro ato na-irohotiti Iu urubia neito itamudirotiti Mose sabi imeserai ri. Neio ro ibose ta-irowidirotiti-mo oro ro Iu urubia na-itamudirotiti ibo modobo pua dubu simara takamai kiasio kiouriouti, ina nimo Iu urubia tanaro kibodoro modobo pua. 22 Mea gabo kowea aboto imese koko ia ie. Mabu neio umoro nato amadimo-oi-ri ibo oro neito ta-gou-die, ina neio serawo amadimo-oi-ri.

23 Ina oro nimo ro nato anamadime-emowapotai-ri, beda tanaro ama-osioidiro-ri. 4 dubu peteibi tomidiro-diebirimo Godi aboto ta-garo-birimo keremowotouti owera, 24 neibi keremowotouti tanaro aupise koroporeai, oro ro ba-dirobai-biro. Modobo ie oro ro ata tanaro kosioidiro neibi meana kiwai-bi sapuwo to. Neibi sapuwo to wisa oro ro ba-daiwai iato turituri urubia ro sobo amadimi-iwasioi-biri neibi keremowotouti tau koporeai aboto. Nedi tanaro ro oro ro nama-isioidiro-ri, Iu urubia umoro nato amadimo-oi-ri ibo iedi owera ro oro sapuwo to na-irowidiro-mo io bagea owera ie. Ina ibose Iu urubia umoro nato amadimo-oi-ri ibo Mose edi sabi sirio ro oro ro mea se tibodoro oro komidiro keremiro maumo ato.

25 Kaupoti Iu owera karo tato urubia etio ro gimibiria-rimo Iesu sapuwo to, neio aboto nimo ro ta-nimeiriai-rimo peba titi owera, ata orio owera ata adabuai-ri pua. Iedi peba titi ro nato a-giamo idaibo owera. Orora aboto beda ohona kiedea ra nio ro modobo pua kiho. Ibose dao karima mutu iho mamo, karima keba se kosuruwo modobo ie, idaibo urubia ro hodo to na-iopiauti-dumo. Ina ata owera nou e upo tanaro nio ro kisioidiro modobo pua.’

26 Taie ata saiki edi 4 dubu peteibi ro Pauro ro na-girobai-biro, neibi atu se aise gimobodiai-bi Tarena Moto to. Neibi atu se Iu urubia edi tanaro ro aise gosioidiro-birimo meana kiwai-bi aboto. Taie Godi ra urubia ra turituri dubu Pauro ro nato gemowapotai ibo, ‘7 saiki ro nama-orobai-ri nedi na peteibi ro nato namadi-iwameai-biri. Kimatowo namabu neibi sapuwo to oro aboto nato anama-iaiwai-ri imamatowo-ibiri. Mabu Mose sabi ato ibo iamo idaibo tanaro aise kisioidiro modobo ie.’

27 Iedi 7 saiki ro aupise ie kororoporeai arua Iu urubia keba se gou-rimo Eisia duriomoro rido Ierusarema sabowa to, Pauro neio ro Tarena Moto ato gowea-rimo. Nedi urubia ro arua Iu urubia iato na-goroho-rimo serawo koromea neio ro gimia-rimo, ina Pauro neio ro aise gohiai-rimo. 28 Neio ro ibo, ‘Isiraere urubia dou-rimo! Nimo diwarebai-rimo! Nedi dubu ro nio ro a-iauri-dumo ra? Nu duriomoro gabogabo na-irohotiti nou ro imowautititi ibo Mose sabi ibodoro mamo. Iu urubia sapuwo to ubauba owera nou ro ta-iarotiti, nou ro ibose Tarena Moto ubauba ta-owaititi. Abora nou ro arua Iu owera karo tato urubia noti iwou-die Tarena Moto to, neio ro idaibo saruto owai-dumo.’

29 Edi Iu urubia ro nou ri gutura-rimo mabu neio ro Toropimasi Pauro mutu dese to giwia-marimo Ierusarema sabowa ato, Toropimasi Iu dubu pua, nou Epesesi sabowa dubu e. Neio ibo gimaragoidiro-rimo Toropimasi Pauro ro ta-owodoro Tarena Moto kara goro to.

30 Taie sirio urubia Ierusarema sabowa ato na-gorowomidiro, neio auna ia serawo goi-rimo, Pauro neio ro aise gorobai-rimo. Nu neio ro ioudo aise gomudo-rimo, ina Tarena Moto magere damo teibo iato giopai-marimo. 31 Neio ro Pauro opia ri gemiri-rimo womu tato Roma boso eputa dubu aboto owera ti-girarebai ibo ‘Auna karado tororosioidiro-die sabowa ato.’ 32 Nu boso urubia aboto iato gutura, ‘Mohau-mo ito!’

Taie neio neido na-gohau-rimo, isana Pauro Iu urubia ro a-gado-rimo. Iu urubia ioudo na-girarowea-rimo Roma boso eputa dubu a-gohau-ro simara boso urubia mutu, iato Pauro neio ro kado egenabo gemeserai-rimo, 33 taie boso eputa dubu ro nou aise gorobai. Nou ro ibo boso urubia aboto, ‘Nedi dubu ro anikapo to demotohiti-mo!’

Nou ro Iu urubia nato gimodowa, ‘Nedi dubu ro beda dubu ra? Nou ro beda ubauba tanaro gisioidiro?’

34 Nedi auna dubu ro neio ro nato gowakopeamuti-rimo, arua urubia ro ata owera to giaeauti-rimo, arua urubia ro ata owera to giaeauti-rimo. Iato nou kimaragoidiro modobo pua mea mino to kiwesegeruti aboto. Taie boso urubia nou ro nato gimowapotai ibo, ‘Nedi dubu ro dowou-mo bariki to!’

35 Taie totorowa aupiaupi na-gemowai-rimo nu ohu ato kemerebuti se gowou-rimo, mabu Iu urubia ioudo na-gou-rimo neio auna ia serawo ro giwati neio ubi ie nu opia ri. 36 Neio ro neibi saro rido aise gibodoro-ibirimo, kai diamo mutu neio ro ibo, ‘Nedi dubu ro aise mororopia!’

37 Boso urubia ro Pauro na-gowou-rimo bariki to, nou ro ibo boso eputa dubu aboto, ‘Mo modobo ra owera karo oro aboto?’

Taie boso eputa dubu ro ibo, ‘Oro Giriki owera umoro ra? 38 Mo ibo nimaragoidiro oro Isipi dubu e. Dutu ata 4,000 urubia oro ro gidabuti, boso gabamani aboto oro ubi ato nato gosioidiro-rimo, ina nedi kororopiauti urubia ro oro ro neio goto se duriomoro to aise giwaboi.’

39 Ina Pauro ibo, ‘Ee, io mo pua io, mo Iu dubu e mamu ro Tasasi sabowa ato noroto. Tasasi sabowa Sirisia duriomoro ato na-owamo, nu dorogora sabowa pua mo ioudo nou-ro. Mo auna ubi ie urubia sirio owera kimowauti.’

40 Taie nu boso eputa dubu ro gabo aise gemagerai owera aro ri. Nou bariki totorowa ato aise gotobowa nou ro urubia tu to aise gimadohodai. Taie nou urubia ro na-gowea-rimo, neio owera aise geremasiai-rimo. Nou owera na-gatamuai Iu urubia simara ia owera to gimowauti.