1 Nio keba se ta-nimowapotai-birimo tuputupu owera ibo Iesu Keriso beda sosoro garaburai ota kemowotowa ato nio ubauba sapuwo to, ina abora nio ata sosoro gabo obodoro-dumo. Nio imese meana pua, kawakawa ia ie! Nio beda urubia ro isaubuti-dumo? 2 Mo nio ro kaupoti owera ba-demowapotai-rimo, Abera edi Tarena Urio ro nio aboto beda mabu ato gateai-ro? Nio sabi na-ibodoro-dumo Tarena Urio nio aboto nou mabu ato a-gateai ra? E e! Neito omidai pua nio ro, marasio ie! Mabu owamo ibo nio ro mea owera Iesu sapuwo to keba se nou gimibiria-rimo, ina Tarena Urio nou mabu ato gateai-ro nio aboto. 3 Nio ro Iesu kowasoro aboto na-gatamuai-rimo nio Tarena Urio edi pupuwo ro neito gowasoro-rimo. Ina nio ibo a-imaragoidiro-dumo ra simara mino to owasoro ri Iesu, a? E e, nio imese kawakawa urubia ie! 4 Nio abato edi tanaro sirio ro na-gororosioidiro-rimo, kororosioidiro kawa a-gororosioidiro-rimo ra? Io, mabu mutu e.

5 Nio aboto Abera ro Tarena Urio ta-gemeiriai-ro ina nio abato nou ro pupuwo korosa tanaro ta-gisioidiro. Etou mabu ato gororosioidiro-rimo idaibo tanaro? Mose sabi patu na-ibodoro-dumo, nou ri a-wororosioidiro-dumo ra? E e, mabu nou pua. Mabu nio ro mea owera Iesu sapuwo to keba se ta-gimibiria-rimo.

6 Ina Tarena Buka ato atu sosoro owera ibo iamo Aberaham sapuwo to. Nou Godi ro mea tuputupu dubu to gapoi-ro, mabu Godi edi owera ro Aberaham ro aise gimibiria. 7 Nio umoro kiamo modobo ie kimibiria urubia neio Aberaham patu urubia ie mabu nedi urubia ro neio kimibiria mutu e.

8 Ina ata owera ibose towamo Tarena Buka ato ibo Iu owera karo tato kimibiria urubia neio Godi ro mea tuputupu urubia to ama-iapoi-ri mabu neio kimibiria mutu e. Ina nou mabu ato mea owera Iesu sapuwo to keba se Godi ro ta-gaiwai-ro Aberaham aboto ibo, oro aramio merebusere nasaio neio aboudo imese sirio urubia erere duriomoro ato na-orowomidiro, neio ro meamea pupuwo korosa tanaro amadimi-iaurititi-ri.

9 Ina etio ro imibiria-dumo Godi edi owera ro Aberaham ro beda sosoro gimibiria, nedi urubia ro Godi ro ibose korosa ama-imio-ri.

10 Ina etio ra sabi na-ibodoro-dumo neio Godi ro mea tuputupu urubia to kiapoi aboto, nirimagare babio nedi urubia ro Godi ro mea tuputupu urubia to iapoi-ri pua, neio ubauba ama-iwai-ri mabu neio ro modobo ia pua Mose edi sabi sirio ro kibodoro aboto. Mabu ata owera ibose towamo Tarena Buka ato etio ra kibodoro tato imese sabi sirio Mose ro na-gisioidiro, neio Godi ro ubauba ama-iwai-ri. 11 Io morobise ie, iedi owera ro paea se owamo ibo ata mere ata modobo pua Godi ro mea tuputupu dubu to kapoi aboto sabi kibodoro maumo ato. Mabu owera ibose tiamo Tarena Buka ato, tuputupu urubia to etio giapoi Godi ro mabu neio abato tiamo kimibiria, io neio ro se amadimo-owea-ri keremiro.

12 Sabi kibodoro gabo ata ie, ina kimibiria gabo ata ie. Tarena Buka ato ibo iamo etio ra Mose sabi sirio imese na-ibodoro-dumo ibose isebo tato, nedi urubia ro neio keremiro amadimo-owea-ri.

13 Tarena Buka ato ibo iamo imese sirio sabi etio ra kibodoro tato, iedi urubia ro Godi ro wisa na ubauba ama-iwai-ri. Nimo nedi ubauba wisa ro nou aboudo Iesu Keriso ro ta-niapopo-ro, ina nou ia ro giratai nedi ubauba wisa ro nimo bobo ato. Tarena Buka ato tiamo idaibo sosoro owera ibo etu emobuai-dumo ota rido, iedi dubu ro Godi ro kebeiomai ie. Ina Iesu Keriso aboto idaibo sosoro tanaro nou ro gororosioidiro. 14 Iesu Keriso ro idaibo tanaro nou gosioidiro mabu Godi ro hodo na-gasaubiai-ro Aberaham aboudo iedi meana ro aise ororosioidiro rie. Etio ra Iu owera karo tato urubia erere duriomoro ato na-orowomidiro iedi meana ro neio aboto ororuwo-die. Ina ibose nimo Iesu ro nou mabu ato niapopo-ro nimo kimibiria urubia aboto Tarena Urio emeiriai rie Godi ro keba se edi na gimasogoro-ro.

15 Kimibiria niramio, netewa teibo dubu teibo hodo na-eremasaubiai-do ata dubu ata ro iwotowa-ri pua, ibose ata ro ohu rido ata owera ata otomai-ri pua. 16 Ina idaibo sosoro owera Godi ro Aberaham nou nasa mutu neitiro aboto ibo, ‘Mo ro nedi owera ro na-nutura anama-isioidiro-ri.’ Godi ro aro pua Aberaham nou nasa sirio neio aboto. Puaie! Godi ro a-gutura Aberaham edi nasa kaupoti ro nou aboto, iedi nasa kaupoti ro Keriso nou se ie. 17 Mo ro nou nemabuti io Godi ro keba se hodo na-gasaubiai-ro Aberaham aboudo, nou ro owamotiti, ina 430 kisimisi saro gabo ato Godi ro sabi patu nato giaiwai-ro Mose aboto. Ina iedi sabi sirio ro Godi ro edi hodo ro na-gemasaubiai-ro Aberaham aboudo, sabi kibodoro gabo ro emowotowa pua. 18 Nimo sabi kibodoro ato ina nou mabu ato Godi edi meana ro nimo aboto kou rasiri ie, Godi edi hodo kemasaubiai owera ro meana ioudo iauri-ri pua. Kaupoti Godi ro ata wisa tato se gemasaubiai-ro hodo Aberaham aboudo meana ioudo iauri rie.

19 Sabi patu etou mabu rido giaiwai-ro Godi ro? Sabi patu maumo ibo ie, Godi ubi ie urubia ro kieibimo ibo, ‘Nou ubauba tanaro ie’, womu tato Aberaham edi nasa ro Godi ro na-gohodowa nou neito nato gou-ro. Iedi sabi sirio ro neio kiauri ato turi dubu ramutu e, Mose nou se ie. Mabu Godi ro gimeriai-ro sowake urio sirio Mose aboto, iedi sabi sirio ro neio ro nou gemowou-rimo, ina Mose ro giaiwai-ro nedi sabi sirio ro Isiraere urubia aboto neio ro ibodoro ri. 20 Urubia dubu ro kosioidiro ato ata tanaro, nou ro nakara ia se kosioidiro ie, turi dubu tato ie. Ina idaibo sosoro ie, Godi nakara ia se garo-ro nedi owera ro Aberaham aboto, turi dubu tato ie.

21 Godi ro edi hodo kemasaubiai ro Aberaham aboudo sabi patu ro a-giwasiai ra, a? E e, sabi patu ro beda kiwasiai pua. Mabu iedi sabi patu ro Godi ro na-giaiwai-ro urubia ro kibodoro aboto keremiro neito kiauri rasiri ie, Godi ro nato mea tuputupu urubia to ba-giapoi.

22 Kaupoti Tarena Buka ato ibo iamo imese urubia sirio nedi duriomoro gebari ro nato na-orowomidiro ubauba ubi tanaro ro ta-gimotohiti-rimo. Ina noudo ie mea owera Iesu sapuwo to etio ro na-imibiria-dumo, Godi ro edi kemasaubiai owera garo Aberaham aboto, nedi urubia ro meana neido amadimo-owea-ri.

23 Ina nedi kimibiria tanaro ro ido gou-ro neito, nimo keba se sabi ro ta-nimuruti womu tato Godi ro kimibiria gabo ti-gowapotai-ro.

24 Ina nedi sabi patu ro nimo nou ro kokoho ta-niwaititi womu tato Iesu Keriso neito ti-gorowateai-ro. Iesu Keriso neito nou mabu ato gou-ro, nimo kimibiria maumo ato Godi ro mea tuputupu urubia to kiapoi aboto. 25 Abora nedi kimibiria gabo ro towamo, ina nimo sabi sirio ro kokoho imowaititi pua.

26 Iesu Keriso kimibiria maumo ato nio Godi merebusere to ta-gararapoi-rimo. 27 Mabu nio obo maumo to na-giwarumiauti-rimo nio Iesu mutu imese karadabuti ie, orio obotama beda sosoro iroiti-dumo, nio Iesu Keriso idaibo mino to gorori-rimo. 28 Nio etio ra Iesu Keriso maumo ato na-orowomidiro, Iu urubia, Iu owera karo tato urubia, sowake urubia, awawo urubia, urubia orobo ra o urubia dubu ra, nio imese Iesu Keriso ro ta-gidabuai kaupoti to. 29 Abora nio Iesu Keriso do ie, ina nio nou mabu ato gararapoi-rimo Aberaham nasaio to. Ina ibose saiki ata nio Godi ro edi meana ro na-gowapotai-ro Aberaham aboto, nio ro edi meana ro amadimi-imade-ri mabu Godi ro keba se kemasaubiai owera ta-garo-ro Aberaham aboto.