1 Nimo keba se iedi sabi kibodoro tanaro ro nou ro imese ta-nitahiti. Nimo Iesu Keriso ro sabi patu mibo maumo rido ta-niapopo-ro abora nou maumo ato orowotoi pua. Dirimusubua-mo koko se ba-dorowotoi, modobo pua ina korowameai iedi sabi maumo ro neito.

2 Mo gare neito ma-demedea-rimo! Mo Pauro ie, nio mo ro mimowapotai-ro ibo nio ro kibodoro ato idaibo tanaro dubu simara takamai kasiai kuriai, io nio aboto Iesu Keriso ro ata mea kiwarebai tanaro ata modobo pua kosioidiro. 3 Nio mo ro ina atu sosoro umoro owera a-nimowapotai ibo nio ata etu ro ororosioidiro idaibo mino to, nou durupi takamai kasiai kuriai, io iedi dubu ro nou ro Mose edi sabi sirio ro ba-mibodorotiti, nou ro ata sabi ata esebea ate. 4 Nio etio ro na-ibodoro-dumo nedi sabi patu ro, Godi ro mea tuputupu urubia to kiapoi aboto, nirimagare babio nio Godi aboudo gabo nakara se gorowasiai-rimo. Godi edi wisa tato nirimagare ro na-gaiwai-ro, nio ro ta-gemeserai-rimo.

5 Kaupoti nimo kimibiria mutu Godi ro na-niapoi-ro mea tuputupu urubia to, nimo ro keba moro to woki to ti-niauri-dumo womu tato keremiro beda tau ato namadimo-owea-ri. 6 Iesu Keriso kimibiria maumo ato nio durupi takamai kiasio o kiasio tato, io auna tanaro pua. Auna ia tanaro owamo ibo kimibiria kawakawa ro kiamo nio abato, ina nedi kimibiria ro neido kisioidiro ie urubia kiwarebai nirimagare mutu, io auna tanaro nou e.

7 Nio keba se modobo ato gorowarario-rimo, ororodiobuti pua. Nedi tau ro nato nio etu ro giwamedei morobise gabo rido? Nedi tanaro ro nio ro na-gosioidiro-rimo etu owera girorowai-rimo? 8 Idaibo owera Godi aboudo ou pua. Nio nou ro tiarotiti-die nou obodoro ri. 9 Mea se! Nio ro ibo ma-dimaragoidiro-rimo, nakere kosiouti ato susuopu na-warapusia, iedi nakere ro susuopu karakara ro ubauba aise kowai ie. Io idaibo sosoro ie bagea kitamudiro kainai ro nio ubauba imese kiwai ie. 10 Kaupoti mo nio mutu atu kimibiria urubia ie Abera Naramu sapuwo to, ina nou mabu ato mo a-nimaragoidiro ibo mo edi owera ro nio ro mea se amadimi-imidai-ri, ina ata sosoro owera imibiria-ri pua. Nio etio ro imamuwado-dumo neio ro ubauba wisa amadimi-imidai-ri Godi aboudo.

11 Niramio, mo ia ro itamudiro pua ibo urubia dubu Godi ro tuputupu dubu to kapoi aboto nou modobo ie dubu simara takamai kasiai kuriai, io mo ro ibo itamudiro pua. Mo ro idaibo sosoro kitamudiro rasiri ie, mo neio ro mea se ba-noworohuti-rimo. Ina ibose mo ro idaibo sosoro kitamudiro rasiri ie dubu takamai kasiai kuriai, edi mea owera ro Iesu Keriso nou ota kemowotowa teibo ato na-gemopoguti-rimo nou ro neio masawe iwaititi-ri pua. 12 Nio beda urubia ro imamuwado-dumo iedi urubia ro neio modobo ie muopu aise kimeiho!

13 Niramio, nio sabi sirio ro imuruti pua, ioudo Godi ro ta-giwatateai-ro, kaupoti modobo pua simara durupi ubauba ubi tanaro kisioidiro. Nio modobo ie nakara se korowarebai nirimagare mutu, 14 mabu auna owera towamo Tarena Buka ato ibo, oro modobo ie arua urubia nirimagare kimati oro beda sosoro eremati nirimagare nakara se. Iedi kaupoti sabi ro nio ro na-obodoro-dumo, io idaibo sosoro ie Mose edi sabi sirio ro nio ro tibodoro-dumo, mabu Mose edi sabi sirio ro nirimagare ro giaupotai. 15 Kaupoti nio nakara se owera to karagege ato, mea se! Nio iedi dubu patu ro saiki ata emedio-ri pua, ama-orototoro-ri.

16 Nio mo ro a-nimowapotai modobo ie Tarena Urio edi ubi tanaro ro nou kibodoro aboto, ina nio ro isioidiro-ri pua durupi edi ubauba ubi tanaro ro. 17 Mabu nimo durupi ubauba ubi tanaro io Tarena Urio ubi tato ie nimo ro kisioidiro aboto. Ina ibose ie Tarena Urio edi ubi tanaro ro kisioidiro ato durupi ubi tato ie. Nedi tanaro teibo ro neitiro erere se iamo-ma, ubi tato eremati-do. Ina nio nou mabu ato ie modobo pua simara ubi tanaro kisioidiro. 18 Nio Tarena Urio ro kiwaboi ato nio sabi maumo ato oroho-ri pua.

19 Iedi durupi ubauba ubi tanaro ro urubia ro na-isioidiro-dumo neio paea se iamotiti. Neio ibo ie, ata orobo mutu koroho, upo tanaro kisioidiro, soka tanaro kisioidiro, 20 ibose orora kiroru, pakani giwari tanaro kisioidiro, kororohoio, keremaro, masawe kerereauri, duboi gabu abera, nou nakara se ubi ie auna to komidiro, karapeputi, arua urubia sopu to kiwororuwoidiro, 21 ina arua urubia oriori kiauri. Ata nou e auna se kidio, muguru tanaro kisioidiro, ina arua idaibo sosoro tanaro kisioidiro.

Nio mo ro ina a-nimowapotai pupuwo owera mo ro keba se beda sosoro pupuwo owera nimowapotai, idaibo sosoro ubauba tanaro etio ro isioidiro-dumo Godi edi kiwaboi tanaro maumo ro neio ito odouti-ri pua.

22 Ina Tarena Urio urubia dubu abato na-omidiro, idaibo sosoro meamea tanaro nou ro nou kisioidiro ie, urubia nirimagare kimati, maumo kamade, miro, serawo samo to koi tato, kiwarebai tanaro kisioidiro, meamea tuputupu tanaro kisioidiro, beda owera karo ra, nou ro aise kosioidiro ie, 23 nakara se sopu to korowororuwoidiro, tanaro kisioidiro ato kororodiobuti mutu.

Nedi meamea tanaro sirio ro ata sabi ata owamo pua neio kidiobo sapuwo to.

24 Etio ra Iesu Keriso urubia to na-gararapoi-rimo neio simara ubauba ubi ota kemowotowa ato ta-gimopoguti-rimo. 25 Ina nimo nedi tau ro nato orio keremiro ta-nimade-rimo Tarena Urio aboudo, ina modobo ie nimo Tarena Urio ro kiwaboioidiro. 26 Nimo modobo pua keremowabu, ibose arua urubia kimasosowado, ina oriori kerereauri.