1 Aberaham nou ata orobo iato gedea nou masiro Ketura. 2 Ina Ketura abato nou ro ta-girasomai dubu mere sirio neio masiro Simiran, Iokosan, Medan, Midiani, Isibaki, Sua. 3 Iokosan ro girasomai-ma Seba ra Dedani ra. Asuri urubia, Retusi urubia, Reumi urubia neio mabu Dedani aboudo orobu-die. 4 Midiani dubu mere girasomai-ibi neibi masiro Epa, Epere, Hanoka, Abida, Erida. Neio imese sirio se nedi urubia ro mabu Ketura aboudo orobu-die.

5 Taie Aberaham edio namabu sirio ro nedi tau ro nato giaiwai nou mere Aisaki aboto. 6 Ina nou arua namabu iato gimio nou merebusere arua sowake upi ato na-girasomai taie nou ro ibo neio ato, ‘Nio neido ba-dou-mo ito saiki boido idiawado-die neito iato ba-dirowomidiro!’ Nou ro nou ri gitiodorai nou ubi tato ie neio Aisaki mutu atu moro ato korowomidiro.

7 Taie nou ta-wimidirotiti 175 kisimisi to, 8 komidiro ro ta-gamidimai ina oromano ia ta-goi, nou iato aise garaburai. 9-10 Taie nou mere teibo ro Aisaki Isimere mutu neitiro ro gibiria-rido Makapera bobo goro to Mamere gomo ato. Kebase Aberaham nedi bobo ro nou pari mutu ta-gomidai Eporon Soha aboudo. Ina nou orobo Sera nato ta-gibiria, ina edi atu goro bobo ro nato nou mere teibo ro neito gibiria-rido. 11 Taie Aberaham na-garaburai, Iawe ro nou mere Aisaki korosa giaiwo taie nou iato wimidirotiti iodio duriomoro nato obo bobo masiro ‘Keremiro dubu na-womidiro mo nou ro niauri-die.’

12 Isimere Aberaham ro garasomai Haga ro goroto. Haga Sera edi sowake besere nou e ina neitiro ro a-gaubai-rido Isipi rido. Haga Isimere mamu e. 13 Isimere ro sirio merebusere girasomai, nou keba mere Nebaioti, ina nou arua dubu mere mutu e, neio masiro nou e Keda, Adabere, Mibisama, 14 Misima, Duma, Masa, 15 Hadada, Tema, Ieturi, Napisi, Kedema. 16 Neio Isimere dubu mere sirio ie, ina gu gabogabo neio aboudo irobu-die, ina iato neio aise gororoburutai-rimo erere moro to.

17 Taie Isimere iato wimidirotiti 137 kisimisi ti-giporeai. Nou oromano ro na-gorobai iato nou aise garaburai. 18 Nou aramio merebusere imese sirio ia ie neio iato wirowomidirotiti duriomoro teibo turituri, edi duriomoro teibo ro iasoro-madumo Habira ra Sura ra. Isipi sapuwo ato ie, Asiria sapuwo ato ie. Taie Isimere edi aramio merebusere ro neio ro Isimere niramio edi aramio merebusere ro sirio tau to wisobititi-mo iato wiado-mo.

19 Aisaki Aberaham mere ie. 20 Aisaki 40 kisimisi ro na-gorobai Rebeka nato gedea. Rebeka Mesopotamia duriomoro orobo ie, ioudo gou-ro, nou abera masiro Betuere, nou medera masiro Rebeni, neitiro Arama dubu teibo ie. 21 Rebeka nou teri orobo ro wimidiro, Aisaki nou ri wararatoro Iawe aboto Rebeka teri gabo rido owatateai-ri. Iawe ro na-gemorowai-ro Aisaki kararatoro owera, taie Rebeka niro iato aise gowea. 22 Nou niro mutu na-wimidiro mere teibo aise wirorohoio-do niro goro ato.

Taie Rebeka ro nato gemodowa Iawe ibo, ‘Mo abato idaibo tanaro etou ri ororosioidiro-dumo?’

23 Iawe ro a-gemowameai-ro ibo, ‘Io, edemuai teibo tomidiro-do oro niro goro ato. Sipu teibo neitiro aboudo amadimo-osuruwo-ri, neama iedi sipu ro nama-iwia-ri neio pupuwo mutu, naramu edi sipu ro neio ro amadime-emesioidirotiti-ri woko.’

24 Taie, Rebeka mere temeteme ro na-gemeriai-ro, nou ro edemuai teibo giroto-ma. 25-26 Keba mere takamai karima karima ie musuga musuga. Ata mere naramu obo nupu rido girarebidiro. Keba mere masiro Iso nouto giduti, Hiburu urubia asoro-dumo ‘musuga musuga’. Ina saro mere Iakobo to giduti, Hiburu urubia asoro-dumo ‘karasaubuti dubu’. Aisaki 60 kisimisi ro ta-gorobai Rebeka ro nato giroto-ma iedi mere teibo ro.

27 Iedi mere teibo ro neitiro auna osio teibo ro na-girobai-ma, Iso tumu ato wirohotiti nou ase koroho dubu e, nou auna ubi ie tumu ato koroho. Ina Iakobo ibose nou muro dubu e parai moto ato imidirotiti sipisipi nanigosi neio iaurititi. 28 Aisaki ubi mere ie Iso, mabu nou ro bida karima ohona kowateai ra tumu ato Aisaki ro nou gi-ouho-ri edio dao ro. Ibose Rebeka ubi mere ie Iakobo.

29 Ata tau karima bini supo Iakobo ro na-gitai, iato Iso ro orowatea-die tumu rudo na-gohau-ro. Nou auna ia sogoi ro gowahau-ro. 30 Taie nou ro ibo Iakobo ato, ‘Oro karima supo na-witai mo tauo domia-ro mo sogoi ia ro ta-norobai.’ Iso nou ata masiro Idomu, Hiburu urubia asoro-dumo ‘Karima titi’.

31 Ina Iakobo ro ibo, ‘Oro ido nama-omia-ri, mo oro ro demapoi-ro keba mere to kararasoro!’

32 Iso ro ibo, ‘Mo sogoi ri nama-araburai-ri, keba mere edi namabu sirio ro kirahidimai ra mo neio ro owarebai-ri pua!’

33 Iakobo ro ibo, ‘Demapoi-ro mo keba mere to kararasoro!’

Ina Iso ro aise gemapoi. Idaibo mino to geremahodorai-rido Iakobo keba mere to gararapoi, Iso wisa karima bini supo gomia. 34 Iso ro iato giho. Nou kiho obo kodio taie nou ro imese gemeserai neama dubu. Iso mea se imaragoidiro pua nou keba mere ie, namabu kirahidimai aboto, ina nou neama aboto aise giapoi.