1 Godi ro iato gutura Iakobo aboto, ‘Oro ba-dohau ito Betere to, iato ba-dimidirotiti, mo nadi iato ba-demotomuti-ro. Oro Iso aboudo beda duriomoro rudo godau-ro, mo keba se oro aboto iato ta-norowapotai.’

2 Taie Iakobo ro na-girowai odio owera ro nou edi urubia mutu na-gou nou ro iato gimowapotai ibo, ‘Nio gatere sua namabu na-iwou-diomo neito ota titi nio ro ba-dimeserai-mo. Godi kemowabuti aboto nio mea se ba-deremododiai-mo keba se, mareamarea tato obotama nou ba-diroiti-mo. 3 Iedi duriomoro ro nimo ro anamadime-emeserai-ri ito anamadimo-ohau-ri Betere to, mo ro nadi iato anama-emotomuti-ri. Mo Iawe ro ta-nowarebaititi mo mibo ato na-nimidirotiti, mo beda moro to kou ra nou ibose kou e mo mutu.’

4 Taie Iakobo iedi urubia mutu na-gou neio edi gatere suana ota titi na-giwou-rimo iato giaiwo-rimo Iakobo aboto, ibose neio ro gare sowio na-giroidiro-rimo aise gipuruti-rimo iato giaiwo-rimo Iakobo aboto. Taie nou ro aise gimoba piro se iato auna ota edi moro ato na-itoititi Sekemi sabowa aupiaupi ato.

5 Taie Iakobo iedi urubia mutu na-gou nou merebusere edi moro ro neio ro aise gemeserai-rimo. Neio ro na-gemeserai-rimo edi duriomoro ro taie Godi ro iedi duriomoro urubia ro auna tere aise gimia noudo ie Iakobo nou urubia mutu neio ro iaipirio tato.

6 Neio Betere to gohau-rimo, keba se Rusi to ararasoro, Keineni duriomoro ato owamo. 7 Iedi moro ro nato Iakobo ro nadi aise gitomuti, taie iedi moro nou ro masiro a-giduti ‘Iawe, nou ata masiro Ere, Betere ato na-gorowawea-ro’, mabu Iakobo Iso tere ri na-gemeserai edi moro ro Godi hiwo to iato gorowawea nou aboto.

8 Rebeka iedi sowake orobo ro na-iaurititi masiro Debora, nou iedi tau ro nato garaburai, Betere ato aise gemoba-rimo ota gebari gomo ato. Taie neio ro iedi ota ro masiro a-giduti-rimo ‘Ota mabu idobi’.

9 Iakobo iedi tau ato ta-gorowameai-ro oromo teibo turituri edi duriomoro rudo Keineni duriomoro to Godi iedi tau ro nato gorowapotai-ro nou aboto taie nou korosa iato gomia. 10 Godi ro iato gutura nou aboto, ‘Abora oro masiro Iakobo ie, ina oro urubia ro Iakobo to asoro-ri pua. Oro orio masiro a-niduti mo ro Isiraere, urubia ro neito amadima-asoro-ri Isiraere to. 11 Mo nakara se nou e pupuwo ia Godi. Oro aramio merebusere sirio ba-moi-mo iedi aramio merebusere sirio ro neio aboudo amadimo-orobodorai-ri sipu. Urubia dubu patu sirio neio eputa urubia mutu oro aboudo amadi-ororuwo-ri. 12 Iedi duriomoro ro Aberaham ra Aisaki ra ta-nimasouti-ma, oro abora edi duriomoro gebari ato na-wotoi nou anama-omia-ri mo ro, oro aramio merebusere mutu.’ 13 Taie iato nou Godi ro aise gemeserai.

14 Iedi moro ato na-geremowauti-rido Iakobo ro nadi na-gomidai-ro tuputupu se iato gowotobowa. Nou ro waini obo komidai iato gemasia, ibose oribi iopu isi komidai ina nouto iato gemasia. Idaibo tanaro nou ro na-gosioidiro tarena gowai, iato Godi urubia ro kemowabuti sapuwo to. 15 Taie Iakobo ro iedi moro ro Betere to giduti, ibo owamo Hiburu owera to ‘Godi Moto ie’. Taie.

16 Iakobo Betere rudo na-gasiriai-ro nou urubia mutu ata moro masiro Eparati, nou gemidiai-rimo. Rasere mere niro mutu gou-ro ina ipi ato mere temeteme ro gemeriai-ro. Nou iato ipi ato auna ia se gorowaibia, nou modobo pua mere hio to koroto aboto. 17 Rasere edi mere koroto kowarebai orobo ro nou ro na-gowea nou beda sosoro gorowaibia nou ro ibo, ‘Oro tere na ie Rasere, oro dubu mere ta-worobu.’

18 Iato tuturu to pua aupise Rasere karaihi, nou ro masiro a-giduti Benoni, ibo owamo Hiburu owera to ‘Mo mere ro auna se nowaibia’. Taie nou iato a-garaihi.

Taie Iakobo ro nou ata masiro to iato giduti Beniamini, ibo owamo Hiburu owera to ‘Mo tumodi mere’.

19 Rasere nou gabo bara ato gemoba-rimo Eparati to edi gabo ro na-gou. Eparati ata masiro Beterehema. 20 Taie Iakobo ro nadi kememidai iato gemowotobowa bobo ato, emaragoidiro na ie, abora iedi nadi ro towamo-die iato.

21 Taie Isiraere imese gidiai-ro urubia mutu ipi ato na-gou-ro neio aise gorohodorai-rimo moro masiro tararasoro ‘Ohu rudo kiauri moro ie imese kiwoubua namabu’, taie neio aimara sabowa iato aise gosioidiro-rimo. 22 Isiraere iedi duriomoro ato na-gomidiro, nou keba mere Rubeni Isiraere sowake orobo edina gedea Biriha nou mutu goroho-rido. Isiraere ro ta-girowai iedi owera ro.

23 Nodio 12 dubu mere sirio ro Iakobo ro girasomo erere mamio ato. Ria ro girotuti 6 dubu mere. Iakobo keba mere Rubeni, iato Simioni, Riwai, Iuda, Isaka, Seburuni.

24 Rasere ro giroto-ma netewa teibo dubu mere teibo, keba mere masiro Iosepa, ina saro mere Beniamini.

25 Rasere edi sowake orobo ro Biriha nou ro giroto-ma netewa teibo dubu mere teibo, keba mere masiro Dani, saro mere Napatari. 26 Ria edi sowake orobo ro Siripa nou ro giroto-ma netewa teibo dubu mere teibo, keba mere Gadi, saro mere Asere.

Imese sirio se Iakobo dubu mere Mesopotamia duriomoro ato neio mamio ro iato girotuti-rimo.

27 Taie Iakobo nou urubia mutu imese gaimai-rimo Mamere to, nou abera Aisaki iato gomidiro Heboroni sabowa aupi ato. Keba se Aberaham ra Aisaki ra beda ipi ato imidiro-do neio neito gou-rimo.

28 Aisaki nou ta-imidirotiti tuturu tau to 180 kisimisi to. 29 Nou komidiro ro ta-gamidimai, oromano ia ro ta-gorobai, iato nou aise garaburai. Taie nou mere teibo ro Iso ra Iakobo ra neitiro ro iato aise gibiria-rido bobo to.