1 Iedi tau ro nato Keineni duriomoro ato meamea ohona isuwodutiti pua, urubia iato auna sogoi ro iwatititi. 2 Taie naramio ro iedi ohona ro na-gimade-rimo Isipi rido keba se neibi ro kiho to ta-giporeai-birimo. Taie neibi abera ro iato gutura ibo, ‘Nibi ina ba-dorowameai-bimo ohona egea mere se ba-dimidai-birimo Isipi rido.’

3 Ina Iakobo Iuda ro gemowameai ibo, ‘Kaupoti iedi gabamani na-omidiro iato neibi nou ro koko owera ta-nimia-ibiro. Nou ro ibo gutura neibi ato “Mo sosoro woidomari nibi ro kowea modobo pua ina, womu tato nibi neama kainai mutu namadibi-imou-ri neito mo aboto.” 4 Beniamini oro ro namadi-adodorai-ri neibi mutu ou ri io neibi oro sapuwo to nato namabimo-ou-ri ohona imade ri Isipi duriomoro rido. 5 Oro ro kadodorai tato Beniamini neibi mutu ou ri neibi iodori-ibiri pua Isipi duriomoro to mabu iedi gabamani ro nou ro ta-gutura-ro ibo, “Nibi ro neama kainai kowou tato mo aboto, mo nibi ro sosoro woidomari ina kowea modobo pua.” ’

6 Ina Iakobo ro ibo neibi aboto, ‘Mo ata mibo nemotomai-bimo nibi ro idaibo sosoro owera to na-garo-birimo. Nibi ro etona mabu ato gemowapotai-birimo edi gabamani dubu ro ibo nibi neama kainai mutu e?’

7 Taie neibi ro ibo Iakobo aboto, ‘Iedi dubu ro nou ro neibi gu sapuwo to auna ia se nimodoruti-ibi. Nou ro ibo, “Nibi abera a-womidiro ra?” Ina neibi ro ibo, “Neibi abera tomidiro.” Neibi nou ro auna ia se nimodoruti-ibi ibo, “Nibi neama kainai mutu ra?” Ina nou neibi ro iato nemowameai-birimo. Neibi umoro oi pua keba se nou ro a-nimuhia-ibiro neama kainai sapuwo to na-gutura-ro ibo “Nibi neama kainai ba-dowodori-birimo mo aboto!” ’

8 Taie Iuda ro ibo nou abera ato, ‘Beniamini mo aboto aise ba-dadodorai-ro mo ro anama-owou-ri. Abora aise dosioidiro. Nimo atu se korowaburai modobo pua nato. 9 Oro ro mo aboto dadodorai-ro nou mea se mo ro anama-iauri-ri. Nou mo ro kowameai tato mo oro ro nato ba-demaruti-ro auna owera to womu tato mo pamo nama-owea-ri. 10 Neibi idaibo ata tau nowagare-birimo a-norowameai-birimo, oro ro kimowasiai-ibi tato rasiri ie ina ba-naimai-bimo ohona kimade ina ba-norowameai-birimo ina iato korowameai idaibo sosoro koroho nou ba-noroho-bimo kaupoti neibi ro owera keremowauti to noporeai-bimo nedi saiki ro.’

11 Taie abera ro ibo, ‘Ata gabo potoro ato taie ibose ba-dosioidiro. Nio namadimo-ou-ri ba-dimidai-mo neido meamea ohona ro buruku to ba-dibiti-mo ina ota meresini, nogobe, meamea nibo dehoro, kiho ota iopu nou ba-diwodo-rimo nio nirimagare namabu patu duriomoro kemeauri dubu nou ba-domia-mo, 12 mani iopu nibi ro namabimi-imidai-ri keba se beda sosoro giwodori-rimo ina ohu rudo idaibo sosoro ba-ditomai-birimo. Ibose woki emati ate edi mani ro na-gimowameai-ibi nio ro ina ba-dimowameai-mo. Etu umoro ra neio a-garadorea-rimo. 13 Taie Beniamini dadabuai-mo, mea se ba-demeauri-rimo nio ro. 14 Dasiriai-mo idaibo tau ato, iedi dubu ro nou aboto se ba-dirodoromai-mo. Godi imese auna ia pupuwo dubu iedi gabamani ro na-womidiro nou aboto mea nirimagare kimaragoidiro ba-maiwai nio sapuwo to. Nou ro ibose Simioni ra Beniamini ra ba-miadodorai-maro neito amadido-orowameai-ri nio mutu atu se mo aboto. Mo aboudo mere ata kararaseperai ato imese kararaseperai ie.’

15 Taie naramio ro iato gemadabuti-rimo namabu eputa dubu omia na, neio Beniamini mutu imese gemowou-rimo Isipi duriomoro to. Naramio ibose sirio mani ta-gimidai-rimo ohona imade na, keba se edi mani giwou-rimo nou mutu atu se gidabuai-rimo imese giwou-rimo.

Neio neido hio ito geremamidimai-rimo Isipi duriomoro to na-gorowateai-rimo, taie Iosepa sosoro gabo ato imese gorowotoburio.

16 Iosepa ro na-gowea Beniamini neibi mutu kotoi moro ato, nou ro ibo nou moto kemeauri dubu aboto, ‘Nodi urubia ro na-orowotoi dirobai-ro ba-diwodoro mo moto to, ibose oro ro burumakau ata ba-dimopia ohona ba-dimitai, nedi saiki turi ro neio mo mutu mo moto ato ohona atu se anamadimi-iho-ri.’

17 Taie moto kiauri dubu ro beda owera girowidiro Iosepa aboudo nou ro aise gisioidiro. Taie neio nou ro kidabuai iato giwodoro Iosepa moto to. 18 Neio tere mutu godoro-rimo. Neio iato geremowauti-rimo, ‘Kebase neibi na-nou-birimo ohona imade ri etu umoro ra neio ro beda mani gibiti-rimo neibi baiko goro to, nimo nou sapuwo to nirobai-die. Nou ubi ie nimo dibura to kiedea, nimo nou sowake urubia to ararasoro ri, ibose nimo doniki nou ro anama-iwasiti-ri.’

19 Taie neio imese gou-rimo Iosepa moto kemeauri dubu aboto, ido godoro-rimo, magere damo ato neio ro iato gemowapotai-rimo iedi dubu ro, neibi ro ibo, 20 ‘Auna dubu nimo keba se neito ta-nou-rimo Isipi duriomoro to ohona imade ri, 21 nimo ina neido na-norowameai-rimo ohona baiko mutu nimo ipi ato duwo ro na-nimatumuti iato aise nutua-rimo. Taie nimo atu se baiko iato nimahitauti-rimo, nimo baiko erere ato mani se niauri-rimo. Nedi mani ro nimo ro iwopirua pua ta-niwameai-rimo nimo abato tiamo iaiwai rie nio aboto, nimo beda ohona niwou-rimo neido etu umoro ra woki geremati ohona kimade dubu ro, 22 ibose nimo simara mani ta-niwou-rimo orio ohona imade na nio aboudo. Nimo umoro iamo pua nedi mani ro etu ro nimowame baiko goro to.’

23 Taie moto kiauri dubu ro ibo, ‘Puaie ata kimaragoidiro tato se ie modobo ie. Nibi tere na ie. Nio edina na-emowabutititi-dumo, nio abera ro edina na-emowabutititi Godi nou ro aise gimowame. Nio ro edi mani giaiwo-rimo mo aboto, mo ro ta-nimade.’

Taie Simioni nou ro na-gorobai-ro neio aboto imese gowosuruwo-ro.

24 Iato moto kiauri dubu ro neio imese giwodoro edio urubia ro Iosepa moto to, obo na-gimia taie neio sairo imese giwiouti-rimo ibose nou ro neio doniki ohona iato gimio. 25 Taie naramio ro edi namabu gidabuti-rimo saiki turi ato omia na neio ro iato giehuti-rimo baiko goro rido taie imese giaremuti-rimo atu moro ato. Neio umoro ta-goi-rimo neio abora Iosepa mutu ohona atu se amadimi-iho-ri.

26 Iosepa na-gorowameai-ro woko aboudo, naramio ro edi namabu gidabuti-rimo neio ro nou iato gomio-rimo. Taie neio eputa goto to atu se aise giborea-rimo. 27 Iosepa ro neio iato gimodowa, ‘Nio modobo ra? Mo nio ro na-nemowauti-rimo nio abera negere sapuwo to nou modobo ra, nou aise a-womidiro ra?’

28 Ina naramio ro ibo, ‘Oro sowake dubu nimo abera modobo ato tomidiro, nou araburai pua.’ Taie neio eputa ina sopu to aise giborea-birimo Iosepa aboto mabu nou auna dubu e.

29 Ina Iosepa ro na-gowea Beniamini mabu neitiro atu mamu ro giroto-ma, nou ro naramio iato gimodowa, ‘Nio ro na-nemowapotai-rimo neama kainai sapuwo to nedi mere ro nio neama kainai ra?’

Iosepa ro iato gutura Beniamini aboto, ‘Mo mere, oro Godi ro korosa ba-momia!’ 30 Nou ro na-gowea nou neama Beniamini simara idomari to nou niro ubauba ia se gowamo, ina nou ri godoidiro moto goro to neama idobi piro se iato gemerete, mabu nou ro kiauri modobo pua nou neama kainai. Nou idobi suwo aise gisuputai-rimo taie noudo godoidiro nou neio ro kowea modobo pua.

31 Nou idobi kiroto na-goporeai taie nou woidomari iato giwiouti ina imese gosuwoidiro-ro neio aboto. Nou a-gororodiobuti nakara se idobi auna se kemai modobo pua.

Taie nou ro ibo sowake urubia aboto, ‘Ohona ba-dihoduti-mo,’ taie neio ro ohona iato gihoduti-rimo. 32 Iosepa timase gemohodowa-rimo, naramio timase gimohodowa-rimo, Isipi urubia neio timase gimohodowa-rimo mabu neio ubi tato ia ie Hiburu urubia mutu atu moro ato kiho.

33 Taie Iosepa naramio na-gorowomititi neio keba dubu keba to gomi, iato nou abato na-gai-ro nou ro gomi, iato nou abato na-gai-ro nou ro gomi, ibo gomititi-rimo womu tato Beniamini nou saro ia to gomi-ro. Neio nakara se iato geremowauti-rimo, boroboro se giraroweauti-rimo, auna ia kimaragoidiro nou gowea-rimo. 34 Edi ohona ro na-giaremuti-rimo Iosepa edi moro nato arua ohona aise gimeriai-ro nou naramio aboto, kaupoti Beniamini nou ro 5 tau to gomio-ro ohona. Taie Iosepa nou naramio mutu auna kamade ro giwati ohona na-giho-rimo waini na-gidio-rimo Iosepa mutu.