1 Iosepa woko urubia sosoro gabo ato na-goroho modobo pua, nou niro turi koko se korobidiro aboto. Taie nou do ie nou ro woko urubia aboto kiaia, ‘Mo aboudo urubia sirio neido maragare-mo.’

Taie neio iato aise garagare-rimo nou aboudo, nou naramio neio kawakawa se geremeserai-rimo, Iosepa abato, imese gorowotoi nou ubi ie neio aboto eremabowa rie.

2 Nou auna ia idobi giroto naramio sosoro gabo ato. Isipi urubia ro nou idobi ta-gemewidiro-rimo, ina nou idobi kiroto owera nato gorobodorai eputa dubu moto ato na-gorowomidiro edi urubia sirio ro neio ro iato girorowai-rimo. 3 Nou ro iato gutura naramio aboto, ‘Mo masiro Iosepa ie. Mo abera modobo ato a-womidiro ra?’

Nou naramio ro na-girowai-rimo nou beda sosoro owera to garo neio ro modobo pua nou owera wisa samo to kemowameai aboto, mabu neio auna tere ro giwati.

4 Taie Iosepa ro ibo neio aboto, ‘Nirimagare peteibi mo aboto aupise dosiomai-birimo.’ Taie neio nou aboto aupise iato gosiomai-rimo.

Nou ro iato gimowapotai ibo, ‘Mo nou e nio neama naramu. Mo masiro Iosepa. Mo nio ro na-nawoto-rimo ata sabowa mere sosoro ie Isipi duriomoro to mo nou e. 5 Kaupoti mo beda sosoro na-woto-rimo nou sapuwo to nio kimaragoidiro ubauba iwia ate, ibose nio nakara se eremosurupo ate. Nedi tanaro ro na-gororosioidiro mo Godi ro nemeiriai-ro keba gabo moro to urubia sogoi pamo aboudo iwatateai ri. 6 Abora netewa teibo kisimisi ta-goroporeai-do nedi duriomoro nato, pari ohona mea se isuwoduti pua, ina arua 5 kisimisi tiamo-die, urubia pari ohona ibouti-ri pua, idabuti-ri pua, imese duriomoro gebari nou ororo ia se ama-owamotiti-ri, 7 ina nou do ie nio sapuwo to mo Godi ro nemeiriai-ro keba moro to nio aramio merebusere sirio irowomidirotitiwai ri, Godi ro edi pupuwo tanaro ro ta-gitamuai kisioidiro. 8 Ina ibo pua mo nio ro kemeiriai neito Godi nakara se mo nou ro nemeiriai-ro. Abora Pero edi namabu sirio ro, mo nou namabu abera to nararasoro. Isipi duriomoro gebari mo ro niauri, mo Godi ro ohu to ta-nowioidiro. Nou edi moto gebari ro mo ro nemeauri, mo keba dubu nou e. 9 Nio abora neido ba-dasiriai-mo hio ito! Idau ibo ba-demowapotai-mo, “Oro mere Iosepa ibo utura-die ‘Mo Godi ro auna gabamani to ta-nowomi Isipi duriomoro ato. Oro mo aboto samo ito ba-dodori-ro, 10 oro Goseni duriomoro ato ama-omidiro-ri, mo gomo ato. Oro aramio merebusere, oro ia, oro sipisipi, nanigosi, burumakau, oro beda mutu nakomu ra aise ba-diaubai-ro. 11 Oro mo ro nato nama-iaurititi-ri nedi 5 kisimisi ro na-wou-dioumo sogoi kisimisi. Idaibo sosoro oro aramio merebusere, oro sowake urubia, kiwoubua namabu, daro oro ia modobo pua sogoi ro kiwati.’ ”

12 Nio ro mo abora simara idomari to ti-niauri-dumo, ibose mo Beniamini ro ti-niauri-die, mo abora nedi dubu ro na-naro nio aboto owera mo Iosepa ie. 13 Idau ba-demowapotai-mo ibo mo abora auna to nomidiro ibose Isipi duriomoro mo ro niauri. Nio ro ba-demowapotai-mo etou tanaro giauri-rimo nato. Nio abora dasiriai-mo, nou ba-dadabuai-rimo neito samo to ba-dowou-rimo mo aboto.’

14 Taie Iosepa nou neido na-gosiomai Beniamini nou ro aise gohiai idobi iato gemerete. Beniamini ro ibose naramu ta-gemerete idobi. 15 Taie naramio Iosepa ro iato giohi ina iato gisome, ata kohiai iato kosomea ie neito gorowati idobi mutu. Taie naminiramio kaupoti moro to na-garadabuai-rimo owera iato geremowagomea-rimo. Taie.

16 Pero nou simara gabamani urubia mutu neio umoro na-goi-rimo Iosepa naramio ta-gou-diomo neio auna ia kamade ro giwati.

17 Taie Pero ro nato gutura Iosepa aboto ibo nou naramio kimowapotai ibo, ‘Nio namabu ba-dimidai-mo doniki ohu ato ba-ditomo-mo nio ba-dorowameai-mo Keineni duriomoro to. 18 Nio abera negere ba-dowou-rimo ibose nio upi merebusere mutu neito atu se ba-dou-rimo. Mo ro mea goto kere nou nama-imia-ri nedi Isipi duriomoro ro nato. Nio nato meamea ia ohona amadimi-ihotiti-ri. 19 Nio ro gabo ato koroho namabu ba-dimidai-rimo, nio upi merebusere kiowiti sapuwo to, ibose nio abera oromano ba-dowameai-rimo neito mo aboto. 20 Nio kimaragoidiro tato se beda sosoro nakomu ra neito kiwou tato, idaibo namabu nato tiamo sirio ie Isipi duriomoro ato.’

21 Taie Isiraere dubu mere sirio ro edi tanaro neio ro aise gosioidiro-rimo ina Iosepa ro iato gimapoi-ibi gabo ato koroho namabu, Pero owera gabo modobo. Nou ro ibose ipi gabo ato kiho ohona iato gimiai-ibi. 22 Iosepa ro ibose naramio ta-gimio kiroidiro namabu iworohuti na, Beniamini gomio sirio kiroidiro namabu 5 obotama 5 sodo, ina auna mani iato gimowateai nou ro, 23 ibose nou abera negere aboto 10 dubu doniki nou gimeriai Isipi duriomoro rido. Nou ro meamea namabu baiko to ta-gemodiowado, nou gemaremuti doniki ohu ato, ibose nou ta-gimeriai 10 upi doniki. Neio kono baiko, parawa baiko, ibose arua Iakobo ipi gabo ato ihona nou Isipi to kou ato ohona iedi 10 upi doniki ro Iakobo nou mutu gemowou-rimo.

24 Taie Iosepa ro nou naramio aboto asiriai-ri iato gutura. Naramio ro Isipi duriomoro na-gemeserai-rimo nou ro neio iato gimowapotai ibo, ‘Nio ipi ato eremaro ate dorogora se ba-dou-mo womu tato korowateai.’

25 Iato Iosepa naramio Isipi duriomoro iato gemeserai-rimo neio abera aboto imese giodori-ro Keineni duriomoro to. 26 Nou owera neio ro iato gemowauti-rimo, ‘Iosepa araburai pua nou tomidiro. Nou abora auna gabamani to omidiro Isipi duriomoro ato.’

Neio abera keba se aborabora ro gorobai, nou ro mea se imibiria pua edio owera ro. 27 Kaupoti nou naramio ro mea se iato gemowauti-rimo Iosepa ro beda sosoro owera to garo neio aboto. Isiraere iato na-giraroweauti nou ro gabo ato koroho nakomu neio se giauri iedi namabu ro Iosepa ro gimeriai-die nou kowameai sapuwo to Isipi duriomoro to, nou iato keremiro pupuwo neito geremowai. 28 Isiraere ro ibo, ‘Mo abora se nimibiria nio owera. Mo mere Iosepa morobise tomidiro. Mo ido karaburai modobo pua keba se mo ro modobo ie nou sosoro woidomari kemowea.’