1-2 Karatamuai moro rido nimo abato edi tanaro ro na-gororosioidiro-rimo, ina simara idomari to edi urubia ro giauri-rimo nedi owera ro nimo neio ro nimowauti-rimo. Taie urubia sirio ro peba to nato gisioidiro-rimo.

3 Mo ro tanaro patu mea se niosoratiti amia urubia aboudo na-nimade-ro edi tau ro nato Iesu woko na-gitamuai womu tato abora. Mo ro na-nimaragoidiro modobo ie buka to kisioidiro beda tanaro gororosioidiro-rimo. Auna dubu Tiopira oro aboto mo ro nou ri nisioidiro nedi owera ro, 4 oro umoro kowai sapuwo to ibo arua urubia ro oro na-gemowauti-rimo io morobise owera ie.

5 Iedi tau ro nato Herodi eputa dubu to na-imidirotiti Iudia duriomoro ato, ata dubu masiro Sekaraia nou Godi ra urubia ra turituri dubu e nou Godi woko emesioidirotiti Ierusarema sabowa ato. Abaia Eroni aramu e ina Sekaraia gu nou aboudo orobu-die. Sekaraia orobo masiro Erisabeti, ina neitiro atu nasa ie Eroni. 6 Sekaraia ra Erisabeti ra neitiro tuputupu orobo ra uramu ra ie, Abera Naramu edi owera ro na-iamo neitiro ro aise isioidirotiti-do. Neitiro ata ubauba tato ie Godi sabi patu mea mino to ibodorotiti-do, 7 kaupoti nedi orobo ra uramu ra ro merebusere tato ie, teri orobo ra uramu ra ro imidirotiti-do. Erisabeti abere ie mere koroto aboto modobo pua. Neitiro teibo imese abere ra nogere ra ta-goi-rido.

8 Sekaraia ro Godi ra urubia ra turituri edi woko ro nou isioidirotiti. Iedi tau ro nato Abaia gu urubia Sekaraia mutu neio tau ro gowamo Tarena Moto ato woko kosioidiro aboto. 9-10 Neio ro simara tanaro to na-gosioidiro-rimo keba se Sekaraia masiro ro gorowapotai-ro, nou masiro edi korowapotai ro na-gorowapotai-ro nou imese godoro Tarena Moto goro to meamea nibo nakomu iwatuti ri Godi sapuwo to.

Urubia sirio isana Godi gararatoro-rimo Tarena Moto araradi ato. 11 Taie edi tau ro nato Godi edi sowake urio ro Sekaraia aise gemotobowa tumodi sapuwo ato patapata abato meamea nibo nakomu bato giriware-rimo. 12 Sekaraia ro na-gowea iedi sowake urio ro nou aborabora ro gorobai.

13 Suwake urio ro iato gutura, ‘Sekaraia oro tere na ie. Oro edi karatoro owera ro Godi ro ta-emewidirotiti-ro. Oro orobo Erisabeti abere nou mere saiki ata ama-oroto-ri, nitiro ro Ioane to ba-diduti-do, 14 oro auna kamade ama-oi-ri iedi tanaro ro nama-ororosioidiro-ri, edi bamuai kainai ro Erisabeti ro nama-oroto-ri. Ibose urubia sirio ro neio kamade amadimo-oi-ri, 15 mabu iedi dubu ro nou ata auna dubu to ama-ararasoro-ri Godi sosoro gabo ato.

Ioane nou auna nama-oi-ri nou koko obo idio-ri pua, iedi tau ro nato nou nama-oroto-ri Erisabeti ro, nou Tarena Urio ro ama-oworohutiti-ri. 16 Nou ro sirio urubia ama-iwarebai-ri nedi Isiraere duriomoro nato korowame Godi edi mea gabo ro neito. 17 Abera Naramu keba se gabo nou ia ro amadi-emaipo-ri. Nedi dubu ro Ioane nou pupuwo tanaro ama-isioidiro-ri Eraia beda sosoro tanaro isioidirotiti. Mamio abeamio daro merebusere neio turituri ato nou ro miro ama-iaremo-ri. Nou ro ibose amadi-iwame-ri etio ro garagarewado-rimo morobise gabo rido, ibose neio meamea kimaragoidiro nou ro ama-imio-ri. Nedi dubu ro nou ro urubia idaibo tanaro to ama-imododiai-ri, Abera Naramu edi tau ato namadi-ou-ri nou sapuwo to ie.’

18 Ina Sekaraia ro ibo, ‘Mo umoro beda sosoro to nama-oi-ri nedi tanaro kororosioidiro aboto? Mo modobo pua, oromano ta-noi, mo orobo abere ia ie. Modobo pua nou mere koroto aboto.’

19 ‘Mo masiro Gabiriere ie. Mo Godi sosoro gabo ato nitoititi. Mo nou sowake koroho urio ie. Mo Godi ro notiodorai-die oro mea owera emowapotai ri. 20 Abora owera neito ma-dirowidiro-ro. Oro imibiria pua ra mo ro edi owera ro na-nemowou-die? Nedi tanaro ro morobise to amadimo-ororosioidiro-ri. Oro nedi tau ro neido owera tato ama-imidiro-ri, womu tato tanaro namadimo-ororosioidiro-ri oro owera nato ama-utura-ri.’ 21 Urubia dubu patu ibose ti-gorowotoi nou gemasebidiro-rimo. Neio iato kimaragoidiro siriosirio mutu gorowotoi, Sekaraia dese odoro pua Tarena Moto goro to. Urubia dubu patu ibose to gemowarabu goto ato, ibo gemowarabu, ibo gemowarabu, Sekaraia imese tuturu tau to ta-gomidirowado Tarena Moto goro ato. 22 Taie saro to nato gosuruo-ro. Nou na-gosuruwo-ro nou matagoro rudo owera kodu ata emororowai pua urubia ro. Neio umoro nato goi-rimo ibo nou ro ata nakomu ata ta-wowea Tarena Moto goro ato, mabu nou tu to se gorowati.

23 Taie nou woko kosioidiro tau na-goporeai nou imese gorowameai simara moto to.

24 Tuturu to pua nou orobo abere niro aise gowea, nou niro 5 sogomi to na-goworohuti, moto nou ro emeseretiti pua, moto ato aise iropirotiti. 25 Taie Erisabeti ro nato gutura, ‘Abera Naramu ia ro nedi tanaro ro nou ro gosioidiro-die mo aboto. Mo urubia ro siripo nematiti-mo teri na-nimidiro, kaupoti nedi tau ro nato Abera naramu ro nedi siripo tanaro ro ta-giwagare mo aboudo.’

26 Erisabeti nou mere niro mutu na-imidirotiti 6 sogomi to edi tau ro nato, Godi edi sowake urio ro Gabiriere nato gemeiriai-ro Nasareti sabowa to Gariri duriomoro ato na-owamo. 27 Sowake urio ro ata umoro owera gowou-ro ata besere aboto, edi besere ro gabo ta-gemoworohuti-rimo Iosepa aboto nou ro edea ri. Iosepa nou Deibidi nasa ie. Iedi besere ro masiro Maria.

28 Sowake urio nato gou-ro nou aboto, taie nou ro ibo, ‘Godi auna kamade ie oro aboto. Abera Naramu oro mutu e.’

29 Kaupoti Maria daradara goi sowake urio beda owera gutura nou aboto. Maria ro ibo gimaragoidiro, ‘Nou etou owera aro-die mo aboto?’

30 Taie sowake urio ro nou nato gemowapotai, ‘Oro tere na ie, mabu Godi kamade ie oro aboto. 31 Oro mere ama-oroto-ri, ina edi mere ro Iesu to ba-diduti. 32 Nedi dubu ro auna ia dubu to ama-ararasoro-ri, ibose nou Godi mere ie imese ohu ia to na-imidirotiti-die. Abera Naramu Godi nou ro ama-omia-ri pupuwo daro nou ro ama-imidiro-ri gabamani to, Deibidi beda sosoro to imidirotiti nou nasa ibo ama-omidiro-ri, eputa dubu to nou ro ama-ararasoro-ri. 33 Nedi dubu ro, Isiraere urubia nou ro ama-iwaboi-ri womu tato womu tato, nou ro kiwaboi tanaro aise ama-owamotiti-ri womu tato womu tato.’

34 Maria ro iato gemodowa sowake urio, ‘Io idaibo tanaro beda sosoro ama-ororosioidiro-ri mo aboto? Mo irimo ie uramu ro edea pua.’

35 Sowake urio ro ibo, ‘Oro aboto Tarena Urio ro amadi-ou-ri, nou edi pupuwo ro oro abato ama-iwateai-ri. Ina nou mabu rido ie nedi tarena mere ro Godi mere to ama-ararasoro-ri. 36 Abora oro neito ma-dirowidiro-ro oro edi mamu saro ro nou abere ie, kaupoti nou niro mutu e. Urubia ro ibo imaragoidirotiti-mo nou modobo pua mere koroto aboto mabu nou abere ie, kaupoti abora nou niro mutu e. Netewa didi sogomi peteibi nama-iherai-biri nou bamuai mutu ama-omidiro-ri. 37 Godi aboudo tanaro koko tato ie kisioidiro aboto.’

38 Taie Maria ro ibo, ‘Mo Abera Naramu woko besere ie, oro ro beda sosoro to aro-die idaibo sosoro ba-mororosioidiro-mo mo aboto.’

Maria sowake urio ro iato aise gemeserai.

39 Edio tau ro nato Maria imese gaimai-ro ata podo duriomoro to, masiro Iudia. 40 Taie Sekaraia bato gomidiro nedi moto ro neito nou imese godoro, iato nou ro Erisabeti aboto kamade owera iato gutura. 41 Ibose Erisabeti ro na-girorowai edio kamade owera ro Maria aboudo, bamuai kainai na-gomidiro Erisabeti niro turi ato, pua ie tu ra sairo ra na-giwimowado. Edio tau ro nato Erisabeti iato Tarena Urio ro aise goworohuti.

42 Ina Erisabeti ro auna se iato gutura ibo Maria aboto, ‘Morobise ie Godi ro oro ia gomia pupuwo korosa, arua mamio marasio ie. Ibose oro ro edio mere ro nama-oroto-ri Godi ro pupuwo korosa ama-omia-ri. 43 Abera Naramu mamu oro nouse ie mo naraturiomai-die. Mabu boira idaibo sosoro mea ia tanaro na-wororosioidiro-die mo aboto? 44 Edio tau ro nato mo ro na-nirowai oro edi kamade owera ro na-utura-die, bamuai kainai na-omidiro mo niro turi ato nou kamade ri tu ra sairo ra aise iwimowado. 45 Ina abora oro kamade ta-woi mabu oro kimibiria tiamo ibo Abera Naramu edio owera ro na-gowou-die oro aboto, morobise to amadimo-ororosioidiro-ri.’

46 Maria ro iato gutura, ‘Mo maumo giropu mutu Abera Naramu mo ro a-nemowabu. 47 Mo kamade ie Godi aboto mabu abora nou mo kapopo dubu e. 48 Mo nou dorogora se sowake besere ie kaupoti nou ro mo mea mino to niaurititi. Abora noudo womu tato boira urubia ro amadima-aro-ri ibo mo Godi ro meana ta-nomia-ro, 49 mabu edi auna tanaro ro nou ro na-gosioidiro mo aboto. Nou masiro tarena ie.

50 Godi ro imese sirio tau nirimagare kiaiwo ie imese urubia aboto nou etio ro emati-dumo tere. 51 Godi edi tu teibo ro pupuwo ia ie. Urubia etio ro eremowabu-dumo, etio ro imaragoidirotiti-dumo auna se simara sapuwo to neio nou ro kiburutai ie. 52 Etio ro gabamani to na-orowomidiro neio ohu rido nou ro kiamodorai ie. Etio ra dorogora se na-orowomidiro sopu ato, neio nou ro kiwoubua ie. 53 Etio ra sogoi ro na-iwati Godi ro neio kiwarebai ie meamea namabu to, ibose namabu sirio urubia nou ro tu kawakawa kimeriai ie. 54 Godi ro tiwarebidirotiti nou sowake urubia Isiraere. Nou auna ia nirimagare ie neio aboto, neio nou ro woki imatiti pua. 55 Abera Naramu nou edi owera to na-garo kebase nimo orora dubu Aberaham nou aboto nou ro gisioidiro ina nou aramio merebusere aboto ibose to amadimo-ororosioidiro-ri womu tato womu tato.’

56 Taie Maria tuturu to omidiro pua Erisabeti abato 3 sogomi neito gomidiro, taie imese gorowameai simara sabowa to.

57 Erisabeti mere ro na-gemeriai-ro nou ro dubu mere se goroto. 58 Nou moto aupi ato etio ro gorowomidiro nou simara urubia mutu, neio ro atu se na-girowai-rimo Abera naramu edi nirimagare ro na-gowapotai-ro nou aboto, neio nou mutu auna kamade ro giwati.

59 Iedi bamuai kainai ro nou 8 saiki na-giporeai, amia urubia iato gou-rimo Sekaraia aboto, Ioane dubu simara takamai kowasiai aboto, iedi tanaro ro nou aboto gou-rimo neio. Neio ubi ie nedi bamuai ro Sekaraia masiro to emiditi ri abera edio masiro to na-warasoro mabu neio simara tanaro ie, Isiraere urubia idaibo sosoro ie mere na-warasomai karasomai abera masiro neito kemiditi ie. Namuturubi ro na-gowapotai-rimo idaibo sosoro owera, 60 nou mamu ro na-girowai neio edi owera ro nou ro aise giseai. Nou ro ibo, ‘E e marasio, nio ro neito iduti ate! Nou Ioane to ama-ararasoro-ri.’

61 Ina urubia ro Erisabeti aboto, ‘Nio gu ato idaibo sosoro masiro to kebase a-gararasoro ra? Io beda sosoro ra idaibo?’ 62 Taie neio na-gerewesegerai-rimo abera negere aboto neio ro tu to iato gemesioidiro-rimo ibo, ‘Nou beda masiro to namadima-asoro-ri?’

63-64 Taie neio nou kiatiti nakomu na-gemowosiomai-rimo, kemedea taie nou masiro iato gematiti IOANE. Nou ro masiro edi tau ato na-giatiti Godi nou ro aise gemowabu. Urubia ro edi masiro na-gowea-rimo neio iato aborabora ro girobai. 65-66 Urubia iato na-gorowomidiro auna ia tere ro girobai etou tanaro gororosioidiro-rimo neio abato.

Beda tanaro gororosioidiro-rimo edi owera ro imese nato gorobodorouti Iudia podo duriomoro ato, ina neio kimaragoidiro auna ia se giamo iedi bamuai kainai ro nou sapuwo to. ‘Nedi mere ro nama-ororomai-ri nou ro etou tanaro ama-isioidiro-ri?’ Neio ibose umoro ta-goi-rimo Abera Naramu nou mutu ta-gidabuti.

67 Sekaraia iedi tau ro nato Tarena Urio ro goworohuti. Taie Godi ipusu owera nou ro urubia aboto iato gimowauti ibo, 68 ‘Nimo Isiraere urubia Abera Naramu nou Godi ie, nou ia se memowabu-rimo, nou ta-gou-die simara urubia iwarebai ri ibose iapopo ri ubauba aboudo. 69 Auna pupuwo dubu Godi ro nimo kiapopo dubu to gapoi-ro, nou edi sowake dubu ro Deibidi nou gu dubu e. 70 Godi ro owera kebase giaiwai-ro nou tarena ipusu owera urubia aboto tagara tau ato etio ro gorowomidiro, 71 ibo Godi ro nimo nasa rubi aboudo anama-iapopo-ri, ibose nimo etio ro nihoio-dumo neio aboudo anama-iwagare-ri. 72 Godi ro ibose ta-gutura-ro ibo nou ro nirimagare ama-iwawuti-ri neio nasa naminami aboto ibose nou ro ama-emaragoidirotiti-ri edi tarena hodo ro na-gasaubiai. 73 Nimo nasa Aberaham aboudo iedi hodo kemasaubiai owera ro 74 ibo owamo nimo nou ro anamadi-iwatateai-ri nasa urubia aboudo. Ina nou do ie nimo ro nou woko kemesioidiro ata tere tato ie, 75 ina nimo tuputupu se orowomidiro-ri tarena mino to nou sosoro gabo ato ibo nama-orowomidiro-ri.’

76 Taie Sekaraia iato gerewesegerai simara mere dubu aboto, nou ro ibo, ‘Mo mere, oro Godi ohu ia ato na-omidiro-die nou ipusu owera dubu to ama-ararasoro-ri. Oro kebase ama-ou-ri Abera Naramu saro rudo amadi-ou-ri, nou gabo kebase oro ro ama-emaipo-ri urubia aboto. 77 Keremiro gabo nou urubia aboto oro ro ama-imowapotaidiro-ri. Oro ro ibo ama-imowauti-ri, “Nio ubauba Abera Naramu ro kimatopeamuti ato keremiro gabo nio ro nato amadimo-owea-ri.”

78 Saiki beda sosoro kowaroho ra, Godi edi nirimagare ro idaibo sosoro amadi-orowapotai-ri nimo aboto. 79 Nimo korowaburo tere mutu nirowomidiro duwoduwo maumo ato, ina Godi edi nirimagare ro pina sosoro ie, miro gabo edi pina ro nou ro imowapotaidiro rie.’

80 Edi mere ro auna na-goi, nou Tarena Urio ro pupuwo aise gowai. Ioane ibo pua nou urubia mutu moro ato komidiro, urubia tato moro ato imidirotiti womu tato ti-gorowapotai-ro Isiraere urubia aboto neio Godi owera to itomudiro ri.