1 Iesu aboto auna ia dubu patu ro garadabuti. Neio ito nakara se aise gorohoiouti-rimo sairo nabo gorowotuti-rimo. Iesu keba se simara kowasoro urubia aboto gapimaidiro nou ro neio ibo iato gimowapotai, ‘Mea se ba-diraroweauti-mo! Parasi urubia karatigi tanaro aboudo ba-daragarewado-mo. Io nakere susuopu beda sosoro karapusia ra nakere kosiouti ato, iedi nakere ro susuopu karakara ro ubauba aise kowai. Io idaibo sosoro ie edi karatigi tanaro kainai ro nio ubauba nou ro imese kiwai ie. 2 Piro se beda tanaro isioidirotiti-dumo, neio Godi ro saiki ata paea se amadi-iwapotai-ri. 3 Nakara moro ato piro se beda owera to eremowauti-dumo, saiki ata urubia sirio ro amadimi-irowidiro-ri. Ibose nakara moto ato piro se beda owera to irimowapotaidiro-dumo urubia ro irorowidiro tato, saiki ata urubia sirio ro aise ama-irorowidiro-ri.’

4 ‘Namuturubi, nio mo ro ibo nimowapotai, sopu duriomoro durupi etio ro iopiauti-dumo neio tere imati mamo. Nio etio ro kiopiauti ra ido nio urio aboto neio ro ata tanaro ata osioidiro-ri pua. 5 Nio mo ro mimowapotai-ro, etu tere kemati ra nio ro modoboie nakara se nou tere kemati. Nou abato pupuwo korosa towamo nio durupi nou ro kiopiauti ie ina nio urio era paruo to kihere ie. Godi nou se ie nu tere ba-demati-mo.

6 Urubia ro 5 pisiwi pawa kaina ia mani to kimade ie, iedi pisiwi kainakaina ro neio Godi ro mea se timowotoititi-die, nou ro woki imati pua. 7 Kaupoti Godi auna umoro ie, nio eputa ato beda mutu sobo muruwa ro irowotoititi. Ina noudo ie nio tere eremati mamo. Nio pisiwi kainakaina sosoro pua, nio Godi ro auna se timaragoidirotiti-die.’

8 ‘Nio mo ro a-nimowapotai ibo mo etio ro namadimo-owauti-ri urubia aboto ibo, “Mo Iesu nowasoro,” Imese Urubia Kiauri Dubu mo, neio mo ro ibose to anama-iwauti-ri Godi sowake urio sosoro gabo ato ibo, “Nedi urubia ro mo urubia ie.” 9 Kaupoti beda urubia ra namadima-aro-ri ibo, “Mo Iesu owasoro pua,” isana mo ro nedi urubia ro ibose to anama-iwauti-ri Godi sowake urio sosoro gabo ato ibo, “Nedi urubia ro mo urubia pua.”

10 Ina Imese Urubia Kiauri Dubu masiro ubauba etio ro owaititi-dumo, nedi urubia ro neio ubauba Godi ro kimatopeamuti ie. Kaupoti Tarena Urio masiro ubauba etio ro owaititi-dumo neio ubauba Godi ro kimatopeamuti gabo tato ie.

11 Nio koto aboto urubia ro namadimi-iworoho-ri Iu urubia karadabu moto to, ibose gabamani urubia aboto, nio auna se imaragoidiro ate, koto owera beda mino to amadima-aro-ri. Edi tau ro nato, nio koto abato korowairiai owera iosora-ri pua, 12 nio Tarena Urio ro modobo ato ama-imasouti-ri beda owera to amadima-aro-ri.’

13 Ata dubu topira maumo rido Iesu aboto owera ioudo gutura-ro. ‘Kitamudiro dubu, mo naramu demowapotai, neitiro abera ro edi namabu na-nimowameserai-maro oro ro ba-dimohoduti-maro!’

14 Ina Iesu ro nedi dubu ro ibo gemowameai, ‘Etu ro owapotai nitiro namabu mo ro kimohudutia-ma aboto? Mo nitiro gabamani ra?’

15 Iesu ro ina ibo urubia aboto, ‘Nio mea se ba-deremowotoi-mo! Simara durupi keremaragoidiro tanaro nio abato kiamo modobo pua, amia urubia aise gi-imaragoidiro-ri. Namabu siriosirio na-iworohuti-dumo, neio aboudo keremiro owea-ri pua.’

16 Ina neio Iesu ro nedi totomu ro nou gimowauti, ‘Ata namabu sirio dubu nou goto kere mutu e, taie nedi goto kere ro nato nou ro auna pari gosioidiro. Taie nou ro nato gibouti pari namabu, nou ro beda namabu gibouti neio mea se gisuruwo-rimo. 17 Iedi dubu ro nou nakara se ibo gimaragoidiro, “Ina iato mo ro etou tanaro nama-osioidiro-ri? Mo pari namabu kiaremuti moro bobo tato ie.” 18 Taie nou ro ata kimaragoidiro nato gowea, “Nedi tanaro ro nou anama-osioidiro-ri, mo ro kiaremo moto kainakaina anama-iaiouti-ri, awawo kiaremo moto anama-eremari-ri pari namabu arua namabu mutu iato anama-iaremuti-ri. 19 Taie mo nakara se ibo anama-eremowauti-ri, ‘Mo namabu mutu modobo ta-noi, komidiro keremiro modobo ato anama-owaboi-ri.’ ”

20 Kaupoti nou edi kimaragoidiro ro Godi ro ta-gemowea-ro. Godi ro ibo edi dubu ro nou aboto, “Oro kimaragoidiro tato dubu e! Abora duwo ro nato, oro keremiro ama-aseperai-ri. Oro edi namabu sirio ro namadi-imeserai-ri, etu ro ama-irahidimai-ri?”

21 Beda urubia ra simara namabu ohu to na-iremotomotiti-dumo, Godi ubi tanaro imaragoidiro tato, idaibo sosoro tanaro neio aboto ibo amadimo-ororosioidiro-ri.’

22 Iesu ro kowasoro urubia totomu ibo gimowauti, ‘Ina noudo ie nio mo ro a-nimowapotai ibo nio idaibo imaragoidiro mamo, “Mo ro beda ohona nama-ouho-ri, ibose beda obotama nama-iroidiro-ri?” 23 Mabu keremiro ohona ra obotama ra ato owamo pua. Keremiro auna nakomu e. 24 Koiakoia pawa na-orowadaudiro-dumo nio ro ma-diauri-mo, neio ohona kibouti pua, kidabuti pua, ibose neio ohona kiaremo moto tato ie. Kaupoti neio ohona Godi ro imiotiti-die. Ina nio pawa sosoro pua, nio Godi ro auna se timaragoidirotiti-die. 25 Egea mere se tuturu to kiwaboi aboto nio keremiro kimaragoidiro siriosirio ro neito ama-iwarebai-ri ra? E e, iwarebai-ri pua. 26 Idaibo kainakaina tanaro nio ro kimaragoidiro siriosirio to kisioidiro modobo pua. Ina etou mabu rido ra arua tanaro aboto kimaragoidiro siriosirio kiworohuti?

27 Nio ro woki to ma-diauri-mo, tumu ato kakamu beda sosoro isuwodutiti-dumo. Neio umoro pua woko nakara se keremesioidiro, ibose obotama nakara se keremowaruwoidiro. Eputa dubu Soromoni nu egea dubu gebari ie. Morobise ie, nu meamea kiroidiro namabu to iremedutititi. Kaupoti nio mo ro a-nimowapotai kakamu beda sosoro orowotoi mea ia titi mutu, Soromoni idaibo obotama neito iremedutiti pua. 28 Iedi kakamu ro abora mea ia titi mutu e, mabu neio Godi ro imedutititi. Tuturu to pua, neio pamo ro nama-irobai-ri era ro ama-iho-ri. Godi ubi tato ra nio keremeduti namabu to kiwarebai? E e, nou auna ubi ie nio kiwarebai. Nio kimibiria imese kaina ia ie!

29 Nio modobo pua sirio tau ibo kimaragoidiro, “Nedi saiki ro mo ro beda ohona nama-ouho-ri? Beda obo nama-odio-ri?” Idaibo siriosirio kimaragoidiro mutu auna se orowomidiro mamo. 30 Mabu idaibo sosoro tanaro, kimibiria tato urubia ro auna se isioidirotiti-dumo. Beda nakomu ra nio abato modobo ato iamo tato, Godi nio Abera ie, nou umoro koi ie. 31 Kaupoti nio ro modobo ie Godi edi kiwaboi tanaro ro keba se pupuwo to nou kosora, ina saro rido nedi namabu ro Godi aboudo nio ro nato amadimi-iauri-ri.’

32 Iesu ro ina nou kowasoro urubia iato gitamudiro ibo, ‘Sipu tato na peteibi nibi tere na ie. Nio Abera Godi nu kamade ie nio magere kimodobura aboto nou edi kiwaboi tanaro ro nou maumo to odouti ri.

33 Nio edi namabu ro, namabu tato etio ro orowomidiro neio aise gi-imio-ri. Nio ro nedi tanaro ro kisioidiro ato, idaibo ie nio Godi ro Adiri sabowa ato wisana baiko timodiawadotiti. Nio umoro kiamo modobo ie ibo Adiri sabowa ato beda namabu ro iamo baiko ato ubauba oititi-ri pua, imese mea se ama-iamotiti-ri. Adiri sabowa ato ata ro piro to kimade gabo tato ie, kipiri o genoho idaibo sosoro namabu neio ro itotouti-ri pua. 34 Nio meamea namabu baiko beda moro ato iamo, nio giropu kimaragoidiro mutu iato ibose to iamo.’

35-36 ‘Nio woko urubia sosoro ba-dorowomidiro eputa dubu na-emasebidiro-dumo, nu beda tau ato amadi-orowameai-ri orobo kedea soriomu aboudo. Ina noudo ie obotama mea se pikipiki se ba-diroiti-mo nu woko emesioidiro ri, ibose pina aise mireware-mo. Nou namadi-orowameai-ri magere ato namadi-ipoguti-ri nou wisa tato woko urubia ro magere hio ito amadime-emodobura-ri. 37 Nedi urubia ro neio ro meana amadimi-iwia-ri, mabu neio nou ro kirarowo moro ato amadi-iwia-ri. Nio mo ro morobise owera mimowapotai-ro eputa dubu nu wisa tato woko urubia namabu to amadi-eremeduti-ri, nou ro nato ama-imowapotai-ri wisa tato woko urubia omititi ri nou ia patapata abato. Taie neio nou ro ohona nato ama-imoworoho-ri. 38 Etu umoro ra nou duwo turi ato korowameai, o kowaroho duwoduwo ato ra, nou ro beda wisa tato woko urubia iwia-die kirarowo moro ato neio ro amadimi-iwia-ri meana.

39 Nedi owera ro ba-dimaragoidiro-mo, moto abera umoro kowamo rasiri ie piro dubu korowateai tau, nou ro edi piro dubu ro ba-godiobo, moto esebea-ri pua. Ina nou e, 40 nio ibose modobo ie keremowotoi mabu Imese Urubia Kiauri Dubu nu korowameai tau nio umoro pua aise amadi-apimaidiro-ri.’

41 Pita ro ibo gemodowa Iesu, ‘Abera Naramu, iedi totomu ro oro ro na-orowauti-die neibi a-nimowauti-bidie ra, o urubia sirio a-imowauti ra?’

42 Taie Abera Naramu ro Pita ibo gemowameai, ‘Etio ra morobise woko urubia, siware kimaragoidiro mutu? Nedi wisa tato woko urubia ro eputa dubu ro woko nama-imio-ri, neio ro eputa dubu edi woko urubia ro mea mino to amadime-emeauri-ri. Nedi urubia ro mea tau korobai ato, neio borubi wisa tato woko urubia ohona to mea mino to amadimi-iwarebidiro-ri. 43 Nedi urubia ro meana neio ro amadimi-iwia-ri, mabu neio nou ro ohona kimio moro ato amadi-iwia-ri. 44 Morobise ia ie nio mo ro ibo nimowapotai, idaibo sosoro urubia eputa dubu edi namabu sirio ro neio aboto ama-iapoi-ri emeauri ri.

45 Kaupoti ido nedi woko dubu ro ibo nama-utura-ri, “Ei! Mo eputa dubu orowameai pua, sabowa nou ro dese emeserai pua.” Nedi dubu ro nou ro borubi woko urubia upi dubu ama-iadotiti-ri nou ro neio ubauba mino to ama-iworohuti-ri. Nedi dubu ro ibose kiho kidio nou ama-iworohuti-ri. 46 Iato nou eputa dubu namadi-orowameai-ri nedi korowameai tau ro aise amadi-apimaidiro-ri nou keremododiai tato moro ato eputa dubu ro nato aise amadi-emuhia-ri. Iedi dubu ro nou ro ubauba ia mino to ama-ado-ri. Taie nou ioudo aise amadi-eherai-ri borubi owera kirowidiro tato urubia aboto.

47 Ina beda urubia ra eputa dubu ro woko na-gimapoi isioidiro ri, neio umoro ie eputa dubu ubi beda sosoro ra. Kaupoti nedi urubia ro eremododiai pua nedi woko ro nou kisioidiro sapuwo to, ibose neio ro isioidiro pua. Nou idaibo sosoro urubia eputa dubu aboudo auna temeteme amadimi-iwia-ri. 48 Ina beda urubia ra umoro tato eputa dubu ubi beda sosoro ra, ina ubauba tanaro na-isioidiro-dumo, nedi urubia ro eputa dubu aboudo temeteme kainaimere se amadimi-iwia-ri.

Etio aboto giapoi Godi ro namabu sirio neio ro emeauri ri, modobo ie neio ro Godi ubi tanaro mea se neito kemesioidiro. Etio aboto giapoi Godi ro imese namabu sirio, modobo ie neio ro Godi ubi tanaro mea ia se neito kemesioidiro.’

49 Ina Iesu ro ibo, ‘Mo nedi duriomoro ro neito na-nou-ro era owateai ri nou-ro. Mo auna ubi ie era aise kiriware aboto. 50 Auna temeteme tau mo ro anama-owea-ri, mo obo to edi tau ato namadimo-owarumia-ri, idaibo sosoro mibo maumo ato mo nou ro anama-omidiro-ri womu tato koroporeai.

51 Nio ibo a-imaragoidiro-dumo ra mo nedi duriomoro ro neito na-nou-ro miro owou ri urubia aboto? E e, mo miro owou ri ou pua. Urubia ihoduti ri nou-ro. 52 Abora nedi tau ro neido 5 urubia atu moto ato na-omidiro-bimo, neibi mo sapuwo to amabima-arapeputi-ri. Idaibo netewa didi neibi serawo amabimo-oi-ri netewa teibo aboto. Ibose netewa teibo neitiro serawo amado-oi-ri netewa didi aboto. 53 Abeamio ro simara dubu merebusere ubauba mino to amadimi-iworohuti-ri. Osio mere ro ibose neio simara abeamio ubauba mino to amadimi-iworohuti-ri. Mamio ro simara busere ubauba mino to amadimi-iworohuti-ri. Busere ro ibose simara mamio ubauba mino to amadimi-iworohuti-ri. Daramio ro eteamio ubauba mino to amadimi-iworohuti-ri. Ina eteamio ro ibose neio simara daramio ubauba mino to amadimi-iworohuti-ri.’

54 Ibose Iesu ro auna topira iato gimowauti, ‘Nio ro kowea ato daroho bubu tumu sapuwo rido kiwomi ato nio umoro samo to koi ie ibo daroho amadi-ou-ri. Tuturu to eremasebidiro-ri pua daroho aise keretei ie. 55 Ibose surama na-ihudurai-die, nio umoro hio ito koi ie ibo korosa tau e. 56 Nio imese karatigi urubia ie! Nio umoro ie toboro ato, daro duriomoro ato etona tanaro ro kororosioidiro ra, nio umoro keba se koi ie. Ina mabu boira abora nedi tanaro ro Godi ro na-isioidiro-die nio ro maumo mea se owea tato?’

57 ‘Mabu boira oro ro mea se ihoduti tato meamea tanaro kisioidiro aboto? 58 Oro ata dubu ro koto to na-owou, iedi dubu ro nou mutu edi mibo ro ipi ato samo to ba-doporeai. Oro ro mea se koporeai tato, modobo pua oro nou ro aise kowou koto kiauri dubu aboto. Oro iato nou ro pesomani tu to ama-edea-ri ina nou ro dibura to ama-ibiria-ri. 59 Oro iato ama-imidirotiti-ri kosuruwo gabo tato ie, womu tato boira oro mani momuo se nama-iaiwai-ri iedi dubu ro nou aboto.’