1 Iesu Keriso gu Aberaham ra Deibidi ra aboudo orobu-die, ina nedi masiro sirio ro na-iamo neio Iesu Keriso nasa naminami ie.

2 Aberaham ro garasomai Aisaki, Aisaki ro garasomai Iakobo, Iakobo ro garasomai Iuda nou naminiramio mutu.

3 Iuda ro girasomai-ma Peresi ra Seraha ra, neitiro mamu Tama. Peresi ro garasomai Hesoroni, Hesoroni ro garasomai Rama. 4 Rama ro garasomai Aminadabi, Aminadabi ro garasomai Nasoni. Nasoni ro garasomai Saromoni, 5 Saromoni ro garasomai Boasi, Reihebi nou mamu e. Boasi ro garasomai Obedi, nou mamu Ruti, Obedi ro garasomai Iesi. 6 Iesi ro garasomai eputa dubu Deibidi, eputa dubu Deibidi ro garasomai Soromoni, Uria orobo garamu ato. 7 Soromoni ro garasomai Rehobomu, Rehobomu ro garasomai Abaia. Abaia ro garasomai Asa, 8 Asa ro garasomai Iehosope. Iehosope ro garasomai Iehora, Iehora ro garasomai Usia. 9 Usia ro garasomai Iotemi, Iotemi ro garasomai Ahasi. Ahasi ro garasomai Hesekaia, 10 Hesekaia ro garasomai Manase. Manase ro garasomai Amoni, Amoni ro garasomai Iosaia, 11 Iosaia ro garasomai Iakonaia nu niramio mutu.

Taie nedi tau ro nato neibi arua Iu urubia mutu, boso urubia ro Babironi duriomoro to aise giwadau-rimo. 12 Neio edi tau ato gorowameai-rimo Babironi duriomoro rido womu tato Iesu mamu ro na-goroto, nedi aramio negenege ro neio ie. Iakonaia ro garasomai Siaritiere, Siaritiere ro garasomai Serubabere. 13 Serubabere ro garasomai Abiudu, Abiudu ro garasomai Eriakimi. Eriakimi ro garasomai Asoro, 14 Asoro ro garasomai Sadoko. Sadoko ro garasomai Akimi, Akimi ro garasomai Eriudi. 15 Eriudi ro garasomai Ereasa, Ereasa ro garasomai Matani. Matani ro garasomai Iakobo, 16 Iakobo ro garasomai Iosepa. Iosepa ro gedea Maria, Iesu nou ro goroto. Nedi dubu ro Iesu nou Keriso to asorotiti-dumo, ibo owamo nou Godi ro kohodowa dubu e. 17 Ina ioudo kiwasoro ato Aberaham aboudo Deibidi aboto nou 14 aramio negenege ie. Deibidi aboudo womu tato Babironi duriomoro to beda tau ato giwadau-rimo nou 14 aramio negenege. Ina Babironi duriomoro to beda tau ato giwadau-rimo ioudo womu tato Keriso ia aboto, nou 14 aramio negenege ie.

18 Iesu mamu ro edi tau ato na-goroto tanaro idaibo mino to gororosioidiro-rimo. Nou mamu Maria gabo Iosepa aboto gemowou-rimo edea ri. Kaupoti iato ata tanaro ro gororosioidiro, neitiro kereredea tato moro ato, Maria niro nato gowea. Iedi bamuai ro Maria niro turi ato Tarena Urio edi korosa ro neito gororosioidiro. 19 Nou uramu Iosepa mea tuputupu dubu e, nou ubi tato ie Maria siripo kowai urubia sosoro gabo ato, ina noudo ie nou kimaragoidiro giworohuti Maria nou ro piro se ararubia ri.

20 Nou edi kimaragoidiro giworohuti, Godi edi sowake urio ro Iosepa aboto nato gorowapotai-ro. Nou ro hiwo to giauri sowake urio. Sowake urio ro ibo, ‘Iosepa oro Deibidi nasa ie, oro etou kimaragoidiro siriosirio mutu omidiro? Oro tere na ie Maria oro ro ararubia ate, oro orobo ie aise ba-dadabuai. Mabu nedi mere niro ro nou ro na-gowea Tarena Urio edi korosa ro neito gororosioidiro. 21 Nou ro dubu mere ama-oroto-ri, Iesu to ba-diduti, maumo owamo ibo Iawe Godi ro urubia kiapopo ie. Mabu nou simara urubia neio simara ubauba aboudo nedi mere ro nou ro amadi-iapopo-ri.’

22 Kebase Abera Naramu ipusu owera dubu ro edi owera ro na-gisioidiro Tarena Buka ato, tanaro morobise to noti gororosioidiro-dumo ibo, 23 Owera neito ma-dirowidiro-rimo! Irimo besere niro ama-owea-ri, nou ro dubu mere ama-owahau-ri. Neio ro Emanuera to amadima-asoro-ri, maumo owamo ibo ‘Godi nimo mutu tomidiro’.

24 Iosepa norou aboudo na-geribua-ro, Abera Naramu edi sowake urio ro edi owera to gemowapotai-ro nou ro tanaro durupi to aise gosioidiro. Nou ro iato Maria niro mutu aise gadabuai. 25 Iedi tau ro ioudo Iosepa Maria mutu atu moro ato irobuti-ma pua, neitiro erere moro ato imidirotiti-do womu tato Maria toutou ti-goi. Taie Iosepa ro edi bamuai mere ro Iesu to aise giduti.