1 ‘Arua urubia dorogara mabu ato idoromuti mamo. Tauo oro ia nakara se ma-derereauri, oro Godi ro ibose kodoromai modobo pua. 2 Mabu oro ro urubia beda sosoro kidoromuti ra, oro Godi ro idaibo sosoro ama-odoromai-ri. Urubia oro ro beda modobo ato imodobowauti, ina oro Godi ro iedi atu modobo ro nato ama-emodobowauti-ri.

3 Ina oro namutuna idomari ato momoso na-emeauri, mabu boira oro ro edi momoso ro nou idomari rido eweihai ri na-waro? Ina oro ia nakara se simara idomari a-weremeauri ra? 4 Ina oro nakara se ma-deremowea, oro idomari ato ota agagi towamo. 5 Oro imese karatigi dubu e. Kebase ota agagi oro idomari ato na-owamo, nou ba-dereweihai. Ido oro mea se nato ama-irarowo-ri, taie oro namutuna idomari ato momoso na-owamo, oro ro nato amadi-eweihai-ri.

6 Urubia etio ra auna ubi tato na-iamo Godi edi owera ro nou aboto, neio soka ra giro ra sosoro ie, neio Godi owera imio mamo. Nou idaibo sosoro ie Godi edi tarena namabu soka kimowehere ie, ibose auna mani namabu giro kimowehere ie. Nou idaibo sosoro tanaro kisioidiro ato, soka ra giro ra ro aise kituti ie, ina iato etou ra neio aise kerewesegerai ie oro aboto, oro neio ro durupi kowasomai ie.’

7 ‘Auna se dararatorotiti-mo, ina nio Godi ro nato amadi-imio-ri. Binio to dosora-mo, nio ro nato amadimi-iwia-ri. Magere damo ato kohe to auna se dorowapotaidiro-mo, nio aboto magere nato amadi-orodobura-ri. 8 Mabu auna se etio ro kararatoro ra, neio Godi ro nato kimio ie. Binio to etio ro kiosora ra, neio Godi aboudo kiauri ie. Ibose magere damo ato kohe to auna se etio ro orowapotaidiro-dumo, neio aboto Godi ro magere kodobura ie.

9 Mamio abeamio, merebusere dokou ri na-utura-dumo nio ro goto kere kimaudai ra? 10 Ibose merebusere nakere ri na-utura-dumo, nio ro bagawe kimia ra? 11 Mamio abeamio, nio meamea mamio abeamio pua, imese ubauba ia ie. Kaupoti nio nirimagare mutu e, merebusere aboto nio ro meamea ohona kimio ie. Abera Godi nio sosoro pua, nou imese meana ia ie. Nou auna ia nirimagare mutu kimio ie meamea namabu nou aboto na-orowaro-dumo!’

12 ‘Godi ro edi sabi sirio ro na-giaiwai-ro Mose aboto, ibose Godi ipusu owera urubia ro edi owera ro gisioidiro-rimo, morobise to nedi owera ro neito imese ta-gimatahirai, nou e. Nio ubi beda sosoro iamo arua urubia ro nio kiworohuti aboto, io arua urubia idaibo sosoro ba-diworohuti-mo.’

13 ‘Keremiro magere imese kurukuru ia ie, ina auna magere imese boroboro ia ie. Auna gabo magere imese wagawaga ia ie, ibose gabo imese boroboro ia ie. Ina nedi magere ro sirio ia urubia ro odoutiti-dumo. Kaupoti nedi gabo ro neido etio ro odoro-dumo neio era paruo emou-dumo. 14 Kaupoti ata gabo, nu magere imese kurukuru ia ie, womu tato womu tato keremiro kowea aboto. Nedi keremiro kurukuru magere ro neido dodoro-rimo. Neito etio ro odoutiti-dumo neio sirio koko tau amadimi-iaurititi-ri keremiro na-emou-dumo, ina sipu tato urubia ro aritiawado-dumo.’

15 ‘Mea se deremowotoi-mo Godi ipusu owera urubia to amia urubia taratigi-dumo. Neio kimibiria urubia to aratigi-dumo. Kaupoti neio serawo soka sosoro ie, urubia neio ro iohi rie, ina iopiauti rie. 16 Neio ro beda tanaro ra namadimi-isioidiro-ri nio ro namadimi-iwia-ri, nio ro nato amadimi-ieibimo-ri, neio beda sosoro urubia ra. Urubia ro woimu deimi iopu goino hodo rido kidoho ra? Ibose buni iopu badari ota rido kidoho ra? 17 Ina atu sosoro tanaro ibo kororosioidiro ie meamea ota rido meamea ota iopu ro kisuwoduti ie. Ibose ubauba ota rido ubauba ota iopu ro kisuwoduti ie. 18 Meamea ota rido ubauba ota iopu kisuwoduti modobo pua, gabo tato ie. Ina ibose ubauba ota rido meamea ota iopu kisuwoduti modobo pua. 19 Beda ota sirio ra meamea deimi iopu kisuwoduti tato, neio Godi ro ama-iebuti-ri taie era to aise ama-ihere-ri. 20 Ina idaibo sosoro ie, nedi karatigi urubia ro neio beda tanaro namadimi-isioidiro-ri, nio umoro neido amadimo-oititi-ri.’

21 ‘Mo sirio urubia ro Abera Naramu to kasoro ie, kaupoti neio arua Godi edi kiwaboi tanaro ro neito odouti-ri pua. Ina mo abera Adiri sabowa ato na-omidiro-die nou ubi tanaro etio ro isioidiro-dumo, io neio ro se amadimo-odouti-ri. 22 Iedi koto saiki ro nama-orobai-ri, mo sirio urubia ro Abera Naramu to anamadima-asororo-ri. Kaupoti nedi urubia ro Godi ubi tanaro isioidirotiti pua. Neio ro ibo amadima-aro-ri, “Abera Naramu, Ei Abera Naramu! Oro edi ipusu owera ro nimo ro na-nimowautiti-mo nimo oro ro ta-niaurititi-ro. Oro edi pupuwo korosa ro neito nimo ro ubauba urio urubia aboudo ta-nimabodoidirotiti-mo. Ibose nimo ro sirio pupuwo korosa tanaro oro edi pupuwo korosa ro neito ta-nisioidirotiti-mo.”

23 Kaupoti neio mo ro paea mata se nama-imowapotai-ri ibo, “Nio ubauba tanaro kisioidiro urubia ie. Mo umoro pua nio. Daragare-mo mo aboudo!” ’

24 ‘Ina noudo ie mo kitamudiro owera sirio etio ro irowidiro-dumo, ina durupi to na-isioidiro-dumo, neio muro dubu sosoro ie. Nou ro moto na-gididi damera goto ato gididi, kokoho ta-gemowaititi nadi sosoro itoititi. 25 Daroho na-gou-ro, abata obo imese ta-gioro-ro, ibose surama erere sapuwo rido imese pupuwo ia se gihuduti-ro. Iedi moto ro nato gederiouti, kaupoti nou koko se gotoi, ederiai pua. Mabu iedi moto ro kokoho damera goto ro ta-gemowaititi. 26 Kaupoti mo kitamudiro owera etio ro irowidiro-dumo ina durupi to kisioidiro tato, nedi urubia ro kimaragoidiro tato dubu sosoro ie. Nou ro moto pusuru goto ato gididi, 27 daroho na-gou-ro, abata obo imese ta-gioro-ro, surama imese pupuwo ia se gihuduti-ro. Iedi moto ro nato gederiouti. Modobo pua, iedi moto ro auna diamo mutu garaburuti.’

28 Iesu ro nedi kitamudiro owera sirio ro kimowauti na-goporeai, iedi topira gebari ro gorobu auna kimaragoidiro ro giopia, nou edi kitamudiro ro nou sapuwo to. 29 Mabu nou edi kitamudiro ro imese pupuwo korosa mutu e. Nedi korosa ro Godi aboudo gou-ro, Mose sabi kitamudiro urubia sosoro pua.