1 Mea owera Godi edi mere ro Iesu nou sapuwo to neido garatamuai. 2 Keba ia tau ato Godi ipusu owera dubu Aisaia nou ro gisioidiro nedi owera ro Godi edi mere ro nou sapuwo to. Nou ro ibo, Godi ro iato gutura, Keba moro to anama-emeiriai-ri ata sowake dubu oro gabo nou ro ama-emaipo-ri. 3 Nou ro kaunene ama-iarotiti-ri goto se duriomoro ato. Nou ro ibo, Abera naramu gabo mea se ba-demesioidiro-mo! Nou gabo tuputupu se ba-demowou-mo!

4 Ina noudo ie Ioane goto se duriomoro to kou urubia obo to iato iwarumiautititi. Ioane ro ibo witomutiti, ‘Ba-derewesegerai-mo ubauba aboudo! Nio ubauba aboudo namadime-erewesegerai-ri, nio mo ro obo to nato anama-iwarumiauti-ri Godi ro imese ama-imatopeamuti-ri nio edi ubauba ro.’

5 Iudia duriomoro urubia Ierusarema urubia mutu neio imese ta-wirohotiti-mo Ioane aboto. Taie neio simara ubauba na-giwapotaidiro-rimo, iato Ioane ro neio obo to aise giwarumiauti. 6 Ioane mea obotama iroidirotiti pua, nou kemoro musugamusuga obotama bage to erematahirawadotiti nou giworohuti, ibose mea ohona ihotiti pua nou ro pugo nogobe mutu nou wihotiti.

7 Taie Ioane ro neio iato imowautititi, ‘Ata dubu tou-die nou auna pupuwo dubu e, mo marasio ie, mo modobo ia pua kiroborea nou sairo mabu ato, nou sairo sigibere kemowiouti aboto mabu nou gebari pere ia ie. 8 Nio abora mo ro obo to niwarumiauti. Nodi dubu ro nio nou ro Tarena Urio to ama-iwarumiautititi-ri.’

9 Iedi tau ro nato Iesu Nasareta sabowa Gariri duriomoro ato na-owamo nou ioudo godori-ro Ioane bato gomidiro nou neito gou-ro. Iesu obo to iato gowarumia Ioane ro Iodeni oromo kainai ato. 10 Iesu beda tau ato gerebua-ro obo maumo rido nou ro toboro kerekekeai se gowea, iato Tarena Urio ioudo na-gororuwo-ro kororosowa mino to gororuwo-ro dumu sosoro Iesu abato aise gomi. 11 Taie ata owera kodu ro iato gou-ro Adiri sabowa rudo ibo, ‘Oro mo ia mere ie. Mo auna natonato ie oro aboto, ina ibose mo auna kamade ie.’

12 Taie Tarena Urio ro Iesu imese gewedei goto se duriomoro ito 13 serawo tumu na bato irowomidirotiti nou iato imidirotiti 40 saiki ti-giporeai. Iesu nou goto se duriomoro ato na-imidirotiti iato Satani ro gou-ro nou aboto, taie nou Satani ro iato gowaibirio. Godi sowake urio na-gou-rimo nou neio ro iato gowarebai-rimo.

14 Ioane obo to kiwarumiauti dubu dibura to na-gedea-rimo Iesu nato gidiai-ro Gariri duriomoro to.

Taie nou ro mea owera Godi aboudo urubia iato wimowautititi, 15 ‘Godi ro mea tau ta-gohodowa nou ia ro urubia kiwaboi dubu to kararapoi. Iedi tau ro aupise neito korowateai ie. Ba-derewesegerai-rimo ubauba aboudo! Mo edi mea owera ro nou se ba-dimibiria-mo!’

16 Taie iato nou ioudo na-godori-ro Gariri obo paruo bara to nou ro naramu ra neama ra nato giwia-ma, Saimoni ra Enduru ra neitiro neti gidobi-rido. 17 Nou ro nato gutura neitiro aboto, ‘Dou-rido, mo dowasoro-rido! Nitiro nakere na-irobotiti-do, ina nitiro mo ro anama-imasouti-mari urubia kirobo tanaro beda sosoro ra.’

18 Taie neitiro edi owera ro na-girowai-rido neti aise gimeserai-rido Iesu imese gowasoro-rido.

19 Iesu ina imese gadoro Gariri obo paruo bara ato ina netewa teibo dubu teibo nou ro nato giwia-ma, Iemisi tiro Ioane mutu neitiro Sebedi mere teibo ie, pe ato gomidiro-rido neti gimododiai-rido. 20 Iesu ro ibo, ‘Nitiro dou-rido mo aboto mo dowasoro-rido!’ Neitiro ro na-girorowai-rido edi owera ro neti aise gimeserai-rido neitiro abera Sebedi nou woko rubi mutu na-gorowomidiro neio imese pe ato aise gimeserai-rido taie Iesu iato gowasoro-rido.

21 Iesu kowasoro urubia mutu neio imese gou-rimo Kapeniama sabowa to. Taie ata komidiro saiki ato neio imese godoro-rimo karadabu moto to, Iesu nou kitamudiro iato imese gatamuai. 22 Urubia sirio ta-godoro-rimo ito ina neio ro nou kitamudiro tanaro na-gemowea-rimo neio boroboro ro girobai mabu nou ata sosoro gitamudiro, ibo pua Mose sabi kitamudiro urubia neio sosoro kitamudiro. Nou ro na-gitamudiro nou simara korosa mutu gitamudiro.

23 Ina ata dubu na-gomidiro karadabu moto ato nou ubauba urio ro goworohuti. Taie iedi dubu ro nou aboudo ubauba urio ro garo-ro ibo, 24 ‘Nasareta dubu Iesu, oro nimo aboto etou tanaro amadi-osioidiro-ri, oro neito nimo ubauba iwai ri a-wou-die ra? Mo umoro ie oro Godi edi Tarena Dubu oro nou se ie.’

25 Iesu ro masawe to nou iato gemowasiai, ‘Oro owera deremasiai, oro abora se dosuruwo-ro ioudo!’

26 Iedi dubu ro nou ro ubauba mino to geteamo, auna iamo garo, taie ubauba urio iato aise gosuruo-ro nou aboudo.

27 Urubia ro na-gowea-rimo neio aborabora ro girobai taie neio nakara se iato geremodoruti-rimo, ‘Nou etou tanaro isioidiro! Idaibo sosoro kitamudiro nimo ro kiauri pua. Nou ro korosa ia mutu itamudirotiti. Ibose nou ro kutura ato ubauba urio aboto neio ro nou owera kirorowai ato aise kisioidiro ie.’

28 Taie Iesu beda sosoro tanaro gisioidiro iedi dubu ro nou aboto iedi owera ro samo to gorobodorouti Gariri duriomoro ato.

29 Iesu Iemisi ra Ioane ra mutu karadabu moto na-gemeserai-birimo imese gou-birimo Saimoni ra Enduru ra moto to. 30 Iedi moto ro nato Saimoni emapura abere kabena ro gowati, urubia iato na-gorowotoi neio ro Iesu nato gemowapotai-rimo nou temeteme sapuwo to. 31 Taie Iesu imese gou nou korobu moro to, mabu nou nirimagare goi nou aboto, nou ro tu rido iato aise gorobai-ro imese gowomi mea mino to, nou ro beda tau ato gosioidiro edi tanaro ro nou kabena ro hio to iato aise gemeseruti. Taie iedi abere ro kabena ro na-gemeserai neibi ohona nou ro iato gimoworoho-ibiro.

32 Ina Iesu aboto sabowa urubia ro temeteme urubia nou ri giworoho-rimo adimo duwoduwo ato. Urubia ro ibose to giwaboidiro-rimo arua rubi ubauba urio ro na-iworohutiti-mo iedi urubia ro aise giworoho-rimo Iesu aboto 33 womu tato iedi moto ro nato Iesu urubia sirio ro imese ti-gemosopa-rimo. 34 Iesu ro imese temeteme rubi nou ro meana giwaititi etio ro giworohuti-rimo temeteme nou ro imese mea na aise giwai. Ibose Iesu ro arua rubi aboudo ubauba urio iato gimabodoidiro. Ata ubauba urio kemabodorai ato nou ro aise kemowapotai ibo, ‘Oro owera orowauti ate mo sapuwo to!’ Nou ro ibo giwati mabu ubauba urio umoro ta-goi-rimo Iesu beda dubu ra.

35 Iesu omona kakaba owera ato geribua moto na-gemeserai imese gidiai nakara moro to Godi mutu eremowauti ri. 36 Saimoni bi na-giriribua-birimo Iesu neibi ro iato gosora-birimo. 37 Taie neibi ro na-gowea-birimo, Saimoni bi ro ibo, ‘Imese rubi oro osora-dumo.’

38 Ina Iesu ro ibo, ‘Neibi arua sabowa to moroho-birimo aupise na-iamo, urubia iato nama-imowauti-ri mea owera, mo neito nou mabu ato nou-ro.’

39 Nou na-irohotiti sabowa gabogabo Gariri ato nou idaibo tanaro nou wisioidirotiti. Nou ro ta-imowautiti karadabu moto ato mea owera, ibose nou ro ubauba urio ta-imabodoidirotiti arua urubia aboudo.

40 Ata dubu nou durupi katio ro ta-goporeai nou Iesu aboto nato gou-ro. Iesu nou ro na-gowea nou aise gomi kauhio to girimusubua taie Iesu nou ro iato gemediai, ‘Oro ubi ra mo meana kowai aboto? Mo umoro ie oro aboudo modobo ie.’

41 Taie Iesu ro nou owera na-gemororowai nou auna nirimagare goi nou aboto. Nou durupi nou ro iato gemowasomai, nou ro ibo, ‘Mo ubi e oro meana kowai aboto. Meana doi!’ 42 Taie iedi dubu ro hio to nou edi katio sirio ro samo to aise gikokoiriai-rimo nou meana ina aise goi.

43 Taie nou Iesu ro auna se iato gotomu, 44 ‘Oro neido ba-dou ata mere ata oro ro emowapotai ate, kaupoti oro ba-dorowapotai Godi ra urubia ra turituri dubu aboto, ina nou ro oro batina namabu ama-emematowo-ri Godi aboto mabu abora oro meana ta-woi. Nou ro oro batina namabu kemematowo Godi aboto Mose ro beda sosoro owera to garo ibo ba-memesioidiro. Ina idaibo tanaro nama-osioidiro-ri urubia umoro nou ro ama-iwai-ri ibo oro meana ta-woi.’

Taie nou iato gemeiriai Iesu ro.

45 Iedi dubu ro Iesu na-gemeserai nou imese gorowameai-ro, kaupoti Iesu beda owera garo nou ro osioidiro pua. Nou ro urubia nagi-iwia-ri nou ro iato gi-imowauti-ri ibo, ‘Mo Iesu ro meana ta-nowai.’ Sirio tau ibo wirowatititi womu tato Iesu sapuwo to owera imese ti-gorobodorouti. Iesu urubia ro auna se emosopautiti-mo ina noudo ie nou kodouti tato arua sabowa to, nou ata moro to gi-ou-ri urubia korowomidiro tato duriomoro nou neito kou e. Kaupoti urubia sirio neio ta-irohotiti-rimo nou aboto sirio sabowa rido.