1 Iesu ata komidiro saiki ato na-gou karadabu moto to, tu karawia dubu iato gomidiro. 2 Iedi moto ro neito Parasi urubia ta-gou-rimo iato ibose to gorowomidiro, neio ubi ie Iesu iauri ri nou ro etou tanaro ama-isioidiro-ri. Neio ubi ie nou iato ata sabi ata esebea ri taie nou nato asotai rie koto aboto nato owou rie, ina neio ro nou ri gemaipirio-rimo aupise iedi dubu ro komidiro saiki ato meana nama-owai-ri.

3 Taie Iesu ro na-gowea iedi tu karawia dubu ro nou aboto iato gutura ibo, ‘Oro dotobowa nimo sosoro gabo ato!’

4 Iesu na-gerewesegerai neio aboto nou ro nato gutura ibo, ‘Nimo sabi ro beda sosoro aro komidiro saiki sapuwo to, meana isioidiro ri ra o ubauba isioidiro ri ra? Urubia keremiro imowame ri ra o iopiauti ri ra, a?’

Iesu ro iedi karatodai owera ro na-gaiwai neio aboto neio ro kemowameai modobo pua, imese akau aise goi-rimo.

5 Iesu auna serawo goi neio idaibo sosoro na-giauri, ina neio akau sapuwo to nou mibo ro gorobai.

Taie Iesu ro nato gutura iedi tu karawia dubu nou aboto, ‘Oro tu dotuturai-ro!’

Taie iedi dubu ro nou tu iato gotuturai-ro, edi kotuturai na-gotuturai-ro nou tu imese meana aise goi. 6 Taie Parasi urubia ro na-gowea-rimo Iesu beda tanaro gosioidiro neio edi moto ro aise gemeserai-rimo imese gosuruwo-rimo. Taie neio owera iato giworohuti-rimo eputa dubu Herodi edi kobodoro urubia neio mutu Iesu kopia sapuwo to.

7-8 Iesu kowasoro urubia mutu neio a-giodori Gariri obo paruo bara to. Urubia ro na-girowidiro-rimo Iesu beda tanaro gisioidiro urubia meana na-giwaititi, mea se na-itamudirotiti, auna dubu patu nato garapusia-ro Gariri duriomoro rido ibose Iudia rido Ierusarema rido. Nou kowasoro urubia mutu beda moro to giodori iodio urubia ro neio ibose to giodori nou aboto. Arua urubia ta-gou-rimo muso moro rido Idumia duriomoro rido ibose Iodeni sapuwo rido ta-garadabuti-rimo. Taia ra Sidoni ra kakate ato na-iamo edi sabowa sirio ro neio ibose ti-garadabuti-rimo, urubia sirio imese dubu patu ia ie. Nedi auna dubu patu ro nou ro gararasiouti iato Gariri obo paruo bara to.

9-10 Iesu ro temeteme urubia sirio meana na-giwaititi arua temeteme urubia ro odio dubu patu ro aise giwatatuti-rimo Iesu kowaseidiro sapuwo to neio temeteme nato oroporewado rie.

Taie nou ro nato gutura nou kowasoro urubia aboto pe emamodorai ri obo to mabu nou modobo pua neio ro kemohutauti aboto.

11 Amia rubi ubauba urio ro giworohuti-rimo, ubauba urio ro nagi-owea-ri Iesu edi dubu ro goto ato aise keteamoidiro ie taie iato iamo se gi-utura-ri, ‘Oro Godi mere ie!’

12 Ina Iesu ro auna se itomudirotiti erere ubauba urio ibo, ‘Mo oro ro owapotai ate iamo to!’

13 Iesu imese gidiai podo duriomoro to ina nou ro beda urubia ubi gimedea nou ro owera iato gemeiriai-ro neio idiai ri nou aboto. Taie iedi urubia ro umoro na-goi-rimo neio imese gidiai-rimo nou aboto. 14 Iesu ro idaibo sosoro giaubai 12 dubu, Nou Kitiodorai Urubia to giapoi. Neio nou ro nou ri giaubai nou mutu atu se iroho ri, ibose neio itioduti ri arua duriomoro to nou sapuwo to mea owera urubia imowauti ri, 15 ibose kawakawa urubia aboudo ubauba urio imabodoidiro ri. 16 Nedi urubia ro na-girumai nou ro neio masiro ie: Saimoni, ata masiro Pita Iesu ro gomia, 17 Iemisi ra Ioane ra, neitiro Sebedi mere teibo ie, neitiro ata masiro Iesu ro gimia-ma Boanegisi, Iu urubia owera to owamo ibo ‘Masawe dubu teibo ie,’ 18 Enduru, Piripi, Batoromiu, Mataio, Tomasi, ata Iemisi nou Arapisi mere ie, Tadiasi, ata Saimoni nou Roma urubia mutu serawo werereauri-mo, 19 Iudasi nou Kerioti sabowa dubu e Iesu edi na ro gapoi nasa rubi aboto.

20 Iesu imese gorowameai nou korobuti moto to Kapeniama sabowa ato. Nou beda tau ato gorowameai-ro sirio urubia nou aboto nato garadabuti-rimo. Iesu nou kowasoro urubia mutu edi tau ro nato neio kiho modobo pua mabu dubu patu auna ia se gararasiouti.

21 Taie Iesu simara urubia ro edi owera ro na-girowai-rimo nou sapuwo to, neio nato giodori nou orobai ri mabu urubia ro timatima owera garo-rimo nou sapuwo to ibo ‘Iesu nou kawakawa ta-goi.’

22 Ina Mose sabi kitamudiro urubia Ierusarema rudo na-giodori-ro Iesu aboto neio ro ata owera iato garo-rimo nou sapuwo to ibo, ‘Iesu Satani ro oworohuti, nedi korosa ro nou ro ubauba urio neito imabodoidiro.’

23 Iesu ro edi owera ro na-girowai taie urubia sirio nou ro aise gimaidodorai nou aboto imese gou-rimo. Taie Iesu ro totomu maumo mutu nou ro nato gimowauti. Nou ro ibo, ‘Satani ro modobo ra simara sowake urio kimabodorai aboto? 24 Kaupoti duriomoro urubia na-orowomidiro boso nato na-eremedea-dumo iedio tau ro nato neio atu moro ato orowomidiro-ri pua, korohoduti ie. 25 Ibose kaupoti moto urubia neio nakara se karado ato ibose korohoduti ie neio, atu moto ato atu se orowomidiro-ri pua. 26 Ina Satani nou simara sowake urio mutu karado ato nou ro kiwaboi tanaro iato koko aise koi ie. 27 Urubia dubu nou ubi ie kodoro aboto ata pupuwo dubu moto to namabu piro to ioudo imade ri, keba se modobo ie nou ro moto abera kemotohiti aboto, iato beda namabu ro iamo moto goro ato nou ro nato kiwosuwoduti ie. Mo ro Satani sowake urio idaibo sosoro to nimabodoidirotiti.

28 Oro mo ro abora imese owera nemowauti ina neio aise amadimo-ororosioidiro-ri. Ata mere ata nou ro ubauba tanaro na-isioidiro ibose Godi masiro ubauba na-owaititi nou edi ubauba ro Godi ro modobo ie kiatopeamuti. 29 Kaupoti ata mere ata ro Tarena Urio masiro ubauba na-owaititi iedi mere ro nou ubauba kiatopeamuti gabo tato ie, iedi ubauba ro nou abato aise ama-owamotiti-ri.’

30 Iesu ro nedi owera ro noudo gimowauti mabu neio ro Tarena Urio ubauba gowaititi-rimo neio ro na-garo-rimo ibo Iesu nou Satani ro oworohuti.

31 Iedi owera ro karo nou ro na-goporeai iato nou simara urubia ro gorowateai-rimo, nou mamu niramio mutu neio ro gou-rimo nou aboto. 32 Amia urubia ro gemowapotai-rimo Iesu ibo, ‘Oro mamu niramio mutu ta-wou-rimo oro owea ri.’

Ina Iesu ro ibo gutura edi urubia sirio ro na-gorowomidiro nou gomo ato, 33 ‘Mo mamu niramio mutu boira?’

34 Ina nou na-giraroweauti nou gomo ato edi urubia ro na-gorowomidiro nou ro ibo, ‘Mo mamu niramio mutu nio nou se ie. 35 Beda urubia ro na-isioidirotiti-dumo Godi ubi tanaro io neio mo niramio ie, medamio ie, mamio ie.’