1 Iedi tau ro neido netewa teibo saiki ro geremeserai-rido Isiraere urubia neio soriomu teibo kisioidiro-ma aboto. Isiraere urubia Godi ro na-gimasaudai masiro neio ro asoro-dumo ibo Kimasaudai Soriomu. Ata soriomu neio ro na-isioidirotiti-mo masiro owamo ibo Patapata Beredi Kaupai tato Soriomu. Turituri urubia neio awawo urubia, Mose sabi kitamudiro urubia neio ro iato gabo gemodobowauti-rimo Iesu kopia aboto. Neio ro ibo, ‘Iesu kopia aboto piro se beda mino to namadimo-orobai-ri? 2 Kaupoti nimo ro modobo pua soriomu teibo tau ato korobai urubia sirio idomari gabo ato mabu neio auna serawo koi ie ibose nimo neio ro iadoni-dumo.’

3 Iesu Betani sabowa ato Saimoni moto ato gomidiro adimo dokou iato gouho nou moto ato. Nedi dubu ro keba se katio ta-goworohuti.

Iesu iato na-gomidiro ata orobo nato gou-ro nou aboto botoni se gorobidiro-ro, iedi botoni ro nato a-gomidiro mea nibo dehoro, auna mani dehoro ie. Taie iedi orobo ro nou ro iedi dehoro ro mutuge na-gaubai Iesu eputa ato nato gemasia. 4 Arua urubia iato na-gorowomidiro neio ro na-gowea-rimo nou ro edi tanaro ro na-gosioidiro neio serawo ro girobai taie neio nakara se iato geremowagomea-rimo. Neio ro ibo, ‘Mabu boira edi orobo ro mea ia nibo dehoro dorogara se na-wasia? 5 Iedi dehoro ro mani na kaiwai rasiri ie nou ro auna mani kowea ie ina edi mani ro neito nou ro kiwarebai ie namabu tato urubia.’ Iedi urubia ro masawe owera to garo-rimo iedi orobo nou aboto.

6 Iesu ro neio masawe owera na-gimorowai nou ro ibo, ‘E e auna se gimaragoidiro-mo iedi orobo ro nou aboto. Nio ro nou mibo etou ri omio-dumo? Nou ro mea ia tanaro osioidiro mo aboto. 7 Ata dodio tato ie namabu tato urubia nio ro kiwarebai aboto, simara ubi tau ato nato aise ba-diwarebidiro-mo. Kaupoti mo nio mutu omidiro-ri pua, 8 nedi orobo ro nou simara modobo ato osioidiro-die odio tanaro ro mo aboto dehoro idaibo eputa to na-nemasia-die. Mo ido pamo anama-owea-ri ina bobo to anamadimi-ibiria-ri, nou ro nou ri osioidiro idaibo tanaro. 9 Nio mo ro morobise owera nimowauti, nedi mea owera ro mo sapuwo to imese ama-orobodorouti-ri nedi duriomoro gebari ro nato, ibose sirio sabowa ato nedi mea owera ro amadimi-imowauti-ri. Nedi orobo ro beda tanaro osioidiro owera nou sapuwo to ama-orobodorouti-ri urubia ro ibose nou amadime-emaragoidirotiti-ri.’

10 Ata kowasoro dubu nou masiro Iudasi Kerioti sabowa dubu e nou imese gou turituri urubia neio awawo urubia aboto. Taie nou ro iato gutura neio aboto, ‘Iesu mo ro anama-owapotai-ri nio aboto.’

11 Iedi eputa urubia ro neio ro ta-gemowapotai-rimo nou mani omia-ri nou ro edi woko nama-osioidiro-ri nou sapuwo to. Nou ro mea tau iato gosora Iesu neio aboto owapotai ri.

12 Keba saiki ro gereredea nedi soriomu nou kosioidiro aboto Patapata Beredi Kiaupai tato nou soriomu osioidiro rie, ibose sipisipi kainakaina ta-giopiauti-rimo Kimasaudai Soriomu sapuwo to. Ina Iesu kowasoro urubia ro iato garatoro-rimo, ‘Nimo ro beda moro ato namadimo-osioidiro-ri nedi Kimasaudai Soriomu ro? Nimo anamadimo-ou-ri nedi soriomu nou osioidiro ri.’

13 Taie Iesu ro nato gutura netewa teibo kowasoro dubu teibo aboto ibo, ‘Nitiro ba-dou-do auna sabowa to ina ata dubu nitiro ro iato amado-owea-ri obo bageto mutu namadi-ou-ri. Nou beda moto to odoro nou se ba-dobodoro-do io nou se ie moto. 14 Moto abera ba-demowapotai-do ibo, “Nimo kitamudiro dubu ro utura-die ibo, ‘Modobo ra oro ro nimo moto ipi ata kimapoi aboto Kimasaudai Soriomu osioidiro rie nimo?’ ” ’

15 Ina Iesu ro ibo, ‘Moto abera ro nitiro ama-imowapotai-mari auna negere ibi gugu ohu ato na-owamo-die, nedi ibi gugu ro nou ro ta-gemododiai. Ohona iato ba-diedea-do.’

16 Iedi dubu teibo ro na-gorowateai-rido auna sabowa to, Iesu ro beda sosoro owera garo iedi tanaro iato aise gororosioidiro-rimo.

17 Iedi adimo ro nato Iesu 12 kowasoro urubia mutu atu se na-garadabuai-rimo iho ri 18 nou ro nato gimowapotai-bi ibo, ‘Nibi mo mutu nato na-iho-bimo mo nibi ata ro opia ri anama-apoi-ri ubauba urubia aboto.’

19 Ina kowasoro urubia ro na-girowai-rimo neio kimaragoidiro ubauba ro girobai neio kamade tato goi-rimo idaibo sosoro owera Iesu ro na-gimowapotai. Ina neio ro Iesu nato gemodoruti-rimo ibo, ‘Mo ra o mo pua ra?’ Ina ata ro ibo, ‘Ee mo ra o mo pua ra?’

20 Taie Iesu ro neio nato gimowameai, ‘Nio ata dubu tomidiro nato nedi 12 nou maumo ato. Mo mutu edi dubu ro dokou atu basiau to namadi-idobi-ri io nou se ie edi dubu ro mo nou ro nama-apoi-ri. 21 Owera keba tau ato ta-gisioidiro-rimo Tarena Buka ato notamadimo-ororosioidiro-ri. Mo nou se ie Imese Urubia Kiauri Dubu mo ro araburai rie. Kaupoti mo beda dubu ro nama-apoi-ri nou aboto auna ia ubauba tanaro ama-ororosioidiro-ri. Mabu boira nedi dubu ro neito na-gararadia-ro? Nou koroto tato rasiri ie, nou aboto ubauba ororosioidiro-ri pua.’

22 Neio ohona edi kiho ro na-giho-rimo iato Iesu ro patapata beredi na-gomidai-ro nou ro eso owera iato garo Godi aboto. Taie iedi patapata beredi ro na-gikekeouti imese giaiwai kowasoro urubia aboto. Nou ro ibo, ‘Dimade-mo, nou mo durupi ie, ba-diho-mo!’

23 Ina panikere waini obo mutu iato gomidai-ro eso owera na-garo Godi aboto, taie edi waini obo panikere ro iato gaiwai kowasoro urubia aboto, neio ro iato gemosuwo-rimo kodio. 24 ‘Nou mo karima ie imese urubia sapuwo to ama-ororuwo-ri, nedi karima ro neito mo ro urubia sirio anamadi-apopo-ri. 25 Nio mo ro morobise owera nimowapotai waini obo ido mo ro odio-ri pua womu tato Godi edi kiwaboi tanaro ro namadi-orowapotai-ri.’

26 Neio kemowabu ohare na-geremaboduti-rimo taie iato Oribi Podo ohu to imese gidiai-rimo.

27 Ina Iesu ro nou kowasoro urubia iato gimowapotai, ‘Mo anamadime-ebedidiro-ri nio ro. Godi ro idaibo sosoro owera Tarena Buka ato ta-garo, Mo ro anama-opia-ri sipisipi kimowotoi dubu, ina sipisipi neio korowadaudiro kawa ama-orowadaudiro-ri. 28 Kaupoti mo bobo rido namadi-eribua-ri keremiro anama-owea-ri keba moro anama-orobai-ri Gariri duriomoro.’

29 Ina Pita ro ibo, ‘Arua kowasoro urubia beda hata ie oro neio ro amadime-ebedidiro-ri kaupoti oro mo ro beda kebedidiro pua!’

30 Taie nou Iesu ro nato gemowameai, ‘Oro mo ro morobise owera nama-emowapotai-ri, Pita nedi duwo ro nato kakaba owera netewa teibo tau to ido amadu-utura-ri, tau keba se mo oro ia ro anama-aratio-ri netewa didi tau to. Oro ama-utura-ri nedi duwo ro nato ibo “mo umoro pua Iesu.” ’

31 Pita owera mutu imese pupuwo ia se gowamo. Nou ro ibo, ‘A! Iesu mo ro idaibo owera to utura-ri pua ibo “mo umoro pua oro.” Oro namadimo-opia-ri mo ibose to namadimo-opia-ri.’

Arua kowasoro urubia ibose to garo-rimo atu sosoro owera.

32 Iesu nou kowasoro urubia mutu imese gou Getesemeni pari to. ‘Nio nato ba-dorowomidiro. Mo kararatoro moro to nama-ou-ri.’

33 Iesu ro Pita Iemisi Ioane neibi se gidabuai-bi neibi nou mutu atu se imese gou-birimo. Iesu natonato durupi ta-geremowateai ibose nou kamade tato ie nou giropu kerekere se gowamo.

34 Taie nou ro ibo, ‘Mo kimaragoidiro imese mibo ia se iamo aupise ie mo kataumai. Nibi nato aise domidiro-bimo mo ba-demotoi-birimo norou utua ate atu se namabimi-irarowo-ri.’

35 Taie Iesu neibi aboudo na-giaubai emia ro egea mere se gemopai iato nou kauhio teibo to girodiriti taie nou aise gararatoro. Nou ro ibo gararatoro, ‘Nedi ubauba tanaro namadimo-ororosioidiro-ri modobo ra neio kororosioidiro tato mo aboto? 36 Idau, oro aboudo modobo ie sirio tanaro kisioidiro aboto. Nedi temeteme ro nama-iwia-ri idaibo ibo ie temeteme obo panikere sosoro ie, mo aboudo ba-dowatateai nedi panikere ro, modobo pua neido kodio. Kaupoti oro ubi beda sosoro iamo aise ba-mororosioidiro-mo, ibo pua mo ubi.’

37 Taie Iesu iato imese gorowameai kowasoro urubia aboto neibi nou ro norou kirobu-bi moro ato giwia-ibi. Nou ro Pita aboto ibo, ‘Saimoni oro norou a-worobu ra? Oro modobo pua ra egea mere se komidiro kirarowo? 38 Norou utua ate aise deremasebidiro-bimo, ba-dararatoro-bimo Godi aboto modobo pua nibi ubauba ro kiwaibia-ibi ibo morobise kimibiria a-wiamo ra mo ato. Nibi ubi ie meamea tanaro kisioidiro aboto kaupoti nibi durupi pupuwo tato iamo.’

39 Iesu ina iato gorowameai araratoro ri atu owera to gararatoro. 40 Kaupoti nou ina na-gorowameai-ro neibi norou ro kiduwuti-bi moro ato giwia-ibi. Neibi ata owera ata iwapotai pua Iesu aboto, siripo ro girobai-bi.

41 Iesu ina netewa didi kararatoro aboudo na-gorowameai-ro edi na peteibi ro neibi norou se giatuamo-ibi. ‘Nibi norou a-irobu-bi ra? Taie, norou na ie! Aupise ie Imese Urubia Kiauri Dubu ata dubu ro ama-apoi-ri ubauba urubia aboto neio ro orobai ri. 42 Nibi ma-diribua-bimo otobowa rie daio ito dirarowea-bimo urubia tou-diomo mo edi na dubu ro nama-apoi-ri nou keba se tou-die.’

43 Sirio urubia neio na-gou-rimo giri gamini nou mutu gou-rimo Iesu nou isana owera geremowauti kowasoro urubia mutu. Nedi urubia ro turituri urubia neio edi eputa urubia ro, Mose sabi kitamudiro urubia, Iu eputa urubia ro gitiodorai-rimo Iesu orobai ri. Iudasi nou Iesu ata 12 kowasoro dubu nou se ie. 44 Iudasi ro keba se gabo ta-gisioidiro neio mutu Iesu beda sosoro ra korobai. Iudasi ro ta-gimowapotai ‘Mo ro beda dubu nohiai iato nama-osomeai-ri io dubu nou se ie ba-dorobai-mo koko poroporo se, ba-dowou-mo.’

45 Iedi gabo ro nou ro keba se ta-gisioidiro, Iudasi neido na-gou Iesu aboto nou ro ibo, ‘Kitamudiro dubu!’ Nou ro kohiai iato gosomeai. 46 Taie Iesu urubia ro aise gohiai-rimo emahodowado pua koko poroporo se gorobidiro-rimo. 47 Taie ata dubu ta-gotoi neio mutu iato nou girisipi rido na-gaubidiro-ro turituri urubia eputa dubu nou edi sowake dubu ro giri to sapuwo gare aise gowatua.

48 Taie Iesu ro iato gutura, ‘Mabu boira nio giri, gamini neio mutu na-wou-dioumo? Mo nio piro dubu ra? 49 Mo saiki gabogabo ta-niradabutiti nio mutu, ina nio mo ro ta-nitamudirotiti Tarena Moto ato, mea owera to nitomutititi. Iedi tau ro nato mo nio ro nato a-norobai-rimo. Kaupoti nedi tanaro neido ororosioidiro-dumo Tarena Buka ato owera beda sosoro iamo.’

50 Iesu iedi kowasoro urubia ro nou neio ro aise gebedidiro-birimo neio imese gorowadau.

51 Ina ata orio dubu ibo se Iesu kowasoro dubu e nou keakea obotama goroidiro. Nou edi obotama ro na-goroidiro neio ro gowopirotai-rimo. 52 Nou porose se godau obotama neio tu ato geremeserai.

53 Iesu edi urubia ro na-gorobai-rimo neio ro nou imese gowou-rimo turituri rubi neio eputa dubu nou moto to, iato neio, Mose sabi kitamudiro urubia, Iu eputa urubia neio ito garadabuti. 54 Taie Iesu beda tau ato gowou-rimo Pita nou saro rido musomuso se gobodoro, nou aise gemobodiai iedi eputa dubu nou goto mea moro iato gomi era mabu ato. Nou sowake urubia mutu gomidiro neio atu se era ro giaso.

55 Iedi turituri urubia neio eputa urubia, Iu kanisere urubia mutu neio ro ata dubu gosora-rimo, Iesu owapotai ri nou ubauba tanaro kisioidiro sapuwo to iedi dubu ro nou ro owauti ri, ina Iesu nato opia rie. Kaupoti neio ro egea se gosora-rimo. 56 Sirio urubia nou sapuwo to ioudo na-goroho-rimo auna ia karasaubuti owera mutu goroho-rimo. Neio kaupoti gabo ato ou pua kakate ato goroho-rimo owera mutu. 57 Taie arua urubia nou aboto nato gou-rimo nou sapuwo to bagea owera nato garo-rimo. Neio ro ibo, 58 ‘Nedi dubu ro nimo ro ta-nemewidiro-rimo nou ibo na-garo “nedi Tarena Moto ro urubia ro na-gididi-rimo mo ro kototoro ie ina netewa didi saiki ato kididi ie urubia ro ididi-ri pua nedi moto ro.” ’ 59 Kaupoti neio edi owera to garo-rimo mea se araradebuti pua arua ro ata owera to karo ie arua ata owera to karo ie atu gabo ato ou pua.

60 Taie turituri eputa dubu, nou eputa urubia sosoro gabo ato na-gotobowa Iesu aboto nato gutura, ‘Oro sapuwo to edi owera ro na-waro-dumo morobise ra? Oro ro ama-imowameai-ri ra? A? Oro ibose to ama-otoi-ri ra owera tato?’ 61 Iesu nou ata sosoro dubu e, nou ubauba tato ie, ina noudo ie nou ro ata owera ata utura pua nou kotoi kawa se gotoi, wisa imowame pua.

Ina iedi eputa dubu ro nou ina iato gemodowa, ‘Oro Godi ro kohodowa dubu nou se ra? Nedi dubu ro nimo ro na-nemowabutiti-dumo, oro nou mere ra? Samo to dimowapotai-ro!’

62 Iesu ro ibo, ‘Io mo nou se ie. Saiki ata mo nio ro anamadimo-owea-ri Imese Urubia Kiauri Dubu mo Godi edi tumodi sapuwo ato nama-omidiro-ri ina ioudo namadi-ororuo-ri tema ohu rido nio ro nato anamadimo-owea-ri.’

63 Taie Iesu owera iedi eputa dubu ro na-gemororowai nou masawe ri simara obotama aise gorowapepea, taie nato gutura urubia aboto. ‘Nimo ro irowidiro-ri pua nou sapuwo to owera arua urubia aboudo, 64 nio ro ta-wirorowai-mo abora ibo nou ro na-waro “Mo Godi sosoro ie.” Godi masiro nou ro ubauba owai! Nio beda sosoro imaragoidiro-dumo?’

Neio ro atu se gutura-rimo ibo, ‘Nou modobo ie kopia mabu nou ro auna ia ubauba owera aro!’

65 Iesu arua ro iato gamoruti-rimo gase to, arua ro idomari teibo gowasiai-rimo obotama kere to, iato gado-rimo. ‘Ma-dapoi oro etu ro ado?’ Neio ro ibo gemasosowado-rimo.

Awawo rubi neio edi sowake urubia ro Iesu gomo ato na-gemotoi-rimo neio ro na-gorobai-rimo nou kadokado imese gowou-rimo ata ipi to.

66 Pita eputa dubu kara goro to ta-godoro nou iato na-gomidiro iedi eputa dubu nou woko besere ro gou-ro 67 Pita nou ro nato gowea era ro kaso moro ato. Iedi besere ro nou ro nato geibimai Pita sosoro ato, taie nou ro ibo, ‘Oro Iesu mutu keba se ta-irohotiti nou Nasareta sabowa dubu e.’

68 Kaupoti Pita ro nou a-garatio, ‘Oro arasaubuti, mo umoro pua iedi dubu ro. Mo ata umoro tato ie oro edi owera to na-waro-die!’

Taie Pita iedi moro ro aise gemeserai imese gou magere damo to. Taie iedi tau ro nato omona kakaba owera nato gutura. 69 Iedi moro ro nato Pita iedi atu besere ro nou ro ina nato gowea. Nou ro ibo urubia aboto na-gorowotoi, ‘Iedi dubu ro nou se ie Iesu mutu nou ro irohotiti. Mo ro ta-nowea nou!’

70 Kaupoti Pita neido gerepeduai imese moro to Iesu nou ro a-garatio.

Taie iato tuturu to pua iedi urubia ro na-gorowotoi Pita mutu neio ro ibo, ‘Nimo umoro ta-iamotiti oro nou se ie nou mutu ta-irohotiti! Oro Gariri dubu e.’

71 Ina Pita ro ibo, ‘Iedi owera ro na-waro-dumo mo ata umoro tato ie nedi dubu ro! Mo morobise owera naro. Mo nama-arasaubuti-ri Godi ro mo ubauba ba-mowai-ro!’ 72 Ina iato kakaba owera ro gutura.

Taie nedi kakaba owera ro Pita ro na-girowai nou kimaragoidiro nato giwameai Iesu beda owera garo keba se ibo, ‘Kakaba owera netewa teibo tau to ido amadu-utura-ri, tau keba se mo oro ro netewa didi tau to anama-aratiouti-ri.’ Pita giropu peke se gutura taie nou iato aborabora ro gorobai idobi imese giroto.