1 Nedi buka ro owera nato tiamo urubia ro umoro koi tato tanaro Iesu Keriso ro Ioane aboto nou giwapotai-ro. Nedi tanaro ro Godi aboudo ie, ina Iesu Keriso ro nou giwapotai-ro nou sowake urubia aboto, beda tanaro ra aupise ie amadimo-ororosioidiro-ri. Iesu edi sowake urio ro nou gemeiriai-ro nou sowake dubu Ioane aboto, nedi tanaro sirio ro iwapotai ri. 2 Mo Ioane nouse ie, mo ro nedi morobise tanaro sirio ro niauri simara idomari to ibo Godi edi owera ro Iesu Keriso ro giwapotai-ro mo aboto, morobise to noti niatiti.

3 Godi edi ipusu owera ro nedi buka ro nato na-iamo, etio ro ioputi-dumo neio ro meana tiauri-dumo, ibose etio ro irowidiro-dumo ina durupi to aise na-isioidiro-dumo, nedi urubia ro meana tiauri-dumo. Mabu tau aupiaupi ro orobowado-die nedi tanaro sirio ro kororosioidiro aboto.

4 Mo Ioane ie nedi peba titi owera ro mo ro nimeriai Iesu urubia aboto 7 awawo sabowa ato na-orowomidiro Eisia duriomoro ato na-iamo.

Godi keba ia se na-imidirotiti, abora na-omidiro, ina ido ama-imidirotiti-ri, wisa tato nirimagare miro mutu nou aboudo nio abato aise ba-miamotiti. Ibose Godi edi Tarena Urio ro 7 tanaro mutu, Godi komidiro nakomu edi na ro emotoititi, wisa tato nirimagare miro mutu nou aboudo nio abato aise ba-miamotiti. 5 Ibose wisa tato nirimagare miro mutu Iesu Keriso aboudo nio abato aise ba-miamotiti. Iesu Keriso ro Godi mea se owautiti. Iesu nou keba koroto mere sosoro ie. Mabu nu keba dubu e Godi ro pamo rido imese gowameai-ro. Duriomoro gabogabo eputa urubia to edi urubia ro ararasorotiti-dumo, Iesu eputa dubu kaupoti nou se ie, neio nou ro sopu to iaurititi-die.

Nimo nirimagare Iesu ia ro nimatiti-die, ina nimo edi ubauba sirio ro nou na-garaburai nou edi karima ro na-gosuputi neito nimapoduti. 6 Nimo Iesu ro ta-nidabuai nu edi kiwaboi maumo ro nato orowomidiro ri, ina Godi ra urubia ra turituri ato Iesu edi abera ro Godi nou woko iato emesioidiro ri. Ina noudo ie auna masiro pupuwo korosa mutu nou abato womu tato womu tato aise ba-miamotiti. Ibose ba-mororosioidiro-mo!

7 Ba-dowea-mo Iesu tema ohu rido amadi-ororuwo-ri. Nu imese sirio ia urubia ro simara idomari to amadimo-owea-ri. Nu edi tau ato garaburai ubauba etio ro gowai-rimo, nu ibose neio ro amadimo-owea-ri. Nedi duriomoro ro nato na-orowomidiro sirio erere owera urubia neio idobi amadimi-iroto-ri, neio ro nu sosoro namadimo-owea-ri. Morobise ie! Ibose ba-mororosioidiro-mo!

8 Abera Naramu Godi ibo aro-die, ‘Keba moro mo do ie, saro gabo mo do ie, imese namabu mo ro ta-nimapogai.’ Imese pupuwo ia Godi keba ia se ta-imidirotiti, abora tomidiro, ina ido ama-imidirotiti-ri.

9 Mo Ioane ie, mo nio naramu e, ina mo nio mutu Iesu sapuwo to atu se temeteme noti niauri-dumo. Nimo atu se Godi edi kiwaboi maumo ro nato koko se norowotoi. Mo ro Godi edi owera ro urubia na-nimowautiti, ibose Iesu mo ro simara idomari to na-niaurititi beda tanaro ro gisioidiro, nou sapuwo to nimowautiti, ina mo dibura to nou ri nedea-rimo Petimosi Ura ato.

10 Abera Naramu edi saiki ro nato mo Godi edi Urio ro nou ro aise noworohuti. Ina huru rido mo ro auna kodu nato nirorowai humuko diamo sosoro 11 na-gutura-ro ibo, ‘Oro ro beda tanaro ama-iauri-ri, buka ato aise ba-disioidiro. Ina 7 awawo sabowa ato mo urubia iato na-orowomidiro, nedi umoro owera ro neio aboto nou ba-dimerio. Nedi 7 sabowa ro neio ie Epesesi, Semena, Pegimu, Taiatira, Sadisi, Piradepia, Raodesia.’

12 Mo iato a-niraroweauti owera kodu edi dubu aboudo gosuruo-ro, nou nosora. Mo edi tau ato nerewesegerai mo ro 7 gorodi erempa kiaremo nakomu se niwia, erempa mutu. 13 Neio turituri ato ata dubu se nowea, Imese Urubia Kiauri Dubu nou sosoro nowea na-gotoi. Keakea tuturu obotama goroidiro sairo mabu ta-giwasomai. Nou ro ibose gorodi gagabe ta-garagodea nou goroidiro. 14 Nou eputa sobo mutu ipakea musuga sosoro ie imese keakea ia ie. Ibose nu idomari teibo imese era pina sosoro giriware-rido. 15 Nou sairo teibo sagaru durupi saiki korosa ro kimewia ato, idaibo sosoro gerememiouti-rido. Ibose nou owera kodu kadoro obo diamo sosoro geremohumo-ro. 16 Nou ro tumodi tu to 7 kiboni girobidiro. Nou matagoro rido sapuwosapuwo susura giri nou ro asumaidirotiti. Nou sosoro woidomari bubu ro kowasiai tato saiki idaibo sosoro imese benenio ia se irememioutititi.

17 Nu sosoro edi tau ato nowea mo nou sairo mabu ato egenabo nirosiriti, sapuwo pamo imese norobu. Nou tumodi tu na-gotuturai, mo durupi ato aise gedea. Nou ro ibo, ‘Oro tere na ie! Keba moro ato ti-nitoititi, saro gabo ato ti-nitoititi-die, imese namabu sirio mo ro ta-nimapogai, mo do ie. 18 Mo nouse ie keremiro mabu dubu. Mo kebase ta-naraburai, owera neito ma-dirorowai-ro mo womu tato womu tato keremiro dubu nouse ie. Pamo abato edi magere ki ro, ibose korowaburo urubia korowomidiro moro Dudi nou magere ki, mo ro tinorobidiro-ma.

19 Ina noudo ie oro ro dese to edi na iauri, ina abora etou tanaro ro ororosioidiro-dumo, ina ido etou tanaro ro amadimo-ororosioidiro-ri, neio se buka ato aise disioidiro. 20 7 kiboni oro ro na-iauri-die mo ro tumodi tu to na-nirobidiro, ibose 7 gorodi erempa kiaremo nakomu oro ro na-iauri-die, erempa mutu, maumo oro ro umoro oi tato, abora oro aboto maumo anama-iwapotai-ri. 7 kiboni neio Godi sowake urio iwapotaidiro-die, Iesu urubia 7 awawo sabowa ato na-orowomidiro neio iwarebidiro na ie. 7 gorodi erempa kiaremo nakomu, Iesu urubia iwapotaidiro-die, 7 awawo sabowa ato na-orowomidiro io neio ie.’